లండన్: విదేశీ జీవిత భాగస్వాములకు బ్రిటన్ వీసా నిబంధనలు మరింత కఠినతరమయ్యాయి. విదేశీ జీవిత భాగస్వామితో బ్రిటన్‌లో జీవితం గడపాలనుకునే బ్రిటన్ పౌరుల కనీస వార్షిక ఆదాయం 18,600పౌండ్లు (రూ. 10.10లక్షలు) ఉండాలన్న ప్రతిపాదనను బ్రిటన్ అపీల్ కోర్టు ఆమోదించింది. ఈ తీర్పు,..వీసాకు దరఖాస్తుచేసుకునే భారతీయ సంతతివారితో సహా వేలాదిమంది వీసా దరఖాస్తుదారులపై ప్రభావం చూపించే అవకాశం ఉంది. కనీస వార్షికాదాయంగా 18,600పౌండ్లు చాలా కష్టసాధ్యం, అసమంజసమని గత ఏడాది జూలైలో పేర్కొన్న హైకోర్టు తీర్పును సవాలు చేస్తూ, బ్రిటన్ హోమ్‌శాఖ మంత్రి థెరెసా మే దాఖలు పిటిషన్‌పై అపీల్ కోర్టు తాజా తీర్పు చెప్పింది. నిర్దేశించిన వార్షికాదాయం సమంజసమేని పేర్కొంది. భారత్‌లో వివాహం చేసుకుని జీవిత భాగస్వాములను తమ వారసులుగా బ్రిటన్‌కు రప్పించుకోవాలనుకునే వారికి ఈ తీర్పు ఇబ్బంది కలిగిస్తుందని మీడియా శనివారం పేర్కొంది. గత జూలైలో వెలువరించిన తీర్పులో, కనీస ఆదాయాన్ని 13,400 పౌండ్లుగా హైకోర్టు న్యాయూర్తిజస్టిస్ బాల్కే సూచించారు. అయితే, ఆదాయం పరిమితిపై నిబంధనలు బ్రిటన్ జీవిత భాగస్వాముల హక్కులకు భంగకరంగా ఉన్నాయన్న జస్టిస్ బాల్కే అభిప్రాయం సరికాదని, నిబంధనలు సక్రమమేనని బ్రిటన్ అపీల్ కోర్టుకు చెందిన ముగ్గురు జడ్జీలు తమ తీర్పులో అభిప్రాయపడినట్టు గార్డియన్ పత్రిక తెలిపింది.
  
  


 లండన్: బ్రిటన్ వీసా కోసం దరఖాస్తు చేసే భారతీయులకు శుభవార్త. ఇకపై వీసా పొందడం కోసం మీరు మీ పాస్‌పోర్ట్‌ను దరఖాస్తు కేంద్రాల్లో సమర్పించాల్సిన పలి లేదు. మార్చి 31 నుంచి ‘‘పాస్‌పోర్ట్ పాస్‌బుక్’’ సేవలను భారత్‌లోని 12 వీసా దరఖాస్తు కేంద్రాల్లో ప్రారంభించనున్నట్టు బ్రిటన్ బుధవారం వెల్లడించింది. దీనిని మొదట దక్షిణ భారతదేశంలో ప్రయోగాత్మకంగా అమలు చేయనున్నారు.
 
 పాస్‌పోర్ట్ పాస్‌బుక్ సేవలు అందుబాటులోకి వచ్చినట్లయితే వీసా దరఖాస్తు పరిశీలన దశలో ఉన్నా కూడా దరఖాస్తుదారులు పాస్‌పోర్ట్‌ను తమ వద్దే ఉంచుకోవచ్చు. ఈ సమయంలో వారు ఏ ఇబ్బందీ లేకుండా ప్రయాణించవచ్చు. అవసరమైతే మరో దేశం వీసాకు దరఖాస్తు చేసుకోవచ్చు. అయితే ఈ సేవలను ఒక్కో వీసా కేంద్రంలో రోజుకు 75 మందికి మాత్రమే అందిస్తారు. ఇందుకోసం దరఖాస్తుదారులు రూ. 4,200 చెల్లించాల్సి ఉంటుంది. బ్రిటీష్ వీసా కోసం దరఖాస్తు చేసే ప్రతి 10 మంది భారతీయుల్లో 9 మందికి వీసా వస్తోందని భారత్‌లో బ్రిటన్ హై కమిషనర్ జేమ్స్ బెవాన్ చెప్పారు.