హైదరాబాద్: నగర శివారులో జరిగిన రోడ్డు ప్రమాదంలో ఒక మహిళ చనిపోగా మరో వ్యక్తికి, ఇద్దరు చిన్నారులకు తీవ్రగాయాలయ్యాయి. హయత్‌నగర్ మండలం వర్డ్ అండ్ డీడీ పాఠశాల సమీపంలో బుధవారం అర్థరాత్రి జరిగిన ఈ ఘటన వివరాలివీ.. జీడిమెట్లకు చెందిన కె.రవిచంద్ అనే లెక్చరర్ తన భార్య రాధిక(38)కుమార్తె జాహ్నవి(14), కుమారుడు ఆదర్శ్(12)తో కలిసి విజయవాడ నుంచి కారులో వస్తున్నారు.
 వర్డ్ అండ్ డీడ్ స్కూలు సమీపంలో రాంగ్ రూట్‌లో రోడ్డు దాటుతున్న లారీని వేగంగా వచ్చిన వారి కారు ఢీకొట్టింది. తీవ్రంగా గాయపడిన నలుగురిని వెంటనే సమీపంలోని గ్లోబల్ ఆస్పత్రికి తరలించారు. కొద్దిసేపటికే రాధిక చనిపోయింది. మిగతా వారు చికిత్స పొందుతున్నారు. వారికి ప్రాణాపాయం తప్పిందని వైద్యులు తెలిపారు. ఈ మేరకు పోలీసులు కేసు నమోదు చేసుకుని దర్యాప్తు చేపట్టారు.
  


 నల్గొండ : నల్గొండ జిల్లాలో ఘోర రోడ్డు ప్రమాదం జరిగింది.  65వ నెంబరు జాతీయ రహదారిపై చివ్వెంల మండలం దురాజ్‌పల్లి వద్ద జరిగిన  ప్రమాదంలో ముగ్గురు వ్యక్తులు అక్కడికక్కడే మృతి చెందారు. మరో ముగ్గురికి తీవ్ర గాయాలయ్యాయి. మృతులను శ్రీనివాస్‌, కామేష్‌, పూర్ణచంద్రికగా గుర్తించారు. కారు ( AP 28 DS 2224), లారీ ఒకదానికొకటి ఢీ కొనటంతో ఈ ప్రమాదం జరిగింది.
 
 గాయపడినవారిని సూర్యాపేట ఏరియా ఆస్పత్రికి తరలించి చికిత్స అందిస్తున్నారు. బాధితులంతా హైదరాబాద్‌కు చెందినవారుగా గుర్తించారు. వీరంతా తూర్పుగోదావరి జిల్లా తునిలో ఆధ్యాత్మిక కార్యక్రమంలో పాల్గొని తిరిగి వస్తుండగా ప్రమాదం జరిగింది.