పిండి పదార్థాలు (కార్బోహైడ్రేట్లు) తక్కువగా తీసుకుంటే ఆరోగ్యం మెరుగవుతుందని.. కొన్ని రకాల వ్యాధులకు చికిత్స లభిస్తుందన్న ప్రచారం ఇటీవలి కాలంలో జోరుగా సాగుతోంది. ఇందులో వాస్తవం ఎలా ఉన్నప్పటికీ ఓ మోస్తరు స్థాయిలో కార్బోహైడ్రేట్లను ఆహారంలో చేర్చుకోవడమే మేలని తాజా అధ్యయనం ఒకటి చెబుతోంది. లాన్సెట్‌ పబ్లిక్‌ హెల్త్‌ జర్నల్‌ తాజా సంచికలో ప్రచురితమైన వివరాల ప్రకారం ఆహారం ద్వారా శరీరానికి అందే శక్తిలో 40 శాతం కంటే తక్కువ కార్బోహైడ్రేట్ల ద్వారా వస్తే ఆరోగ్యం దెబ్బతినే అవకాశముండగా, 50 – 55 శాతం శక్తి వస్తే మెరుగయ్యే అవకాశముంది. అమెరికాలో దాదాపు 15 వేల మందిపై జరిపిన అధ్యయనంతోపాటు ఇప్పటికే అందుబాటులో ఉన్న ఇంకో 4.3 లక్షల మంది వివరాల విశ్లేషణ ద్వారా తాము ఈ అంచనాకు వచ్చినట్లు బోస్టన్‌లోని బ్రైగమ్‌ అండ్‌ విమెన్‌ హాస్పిటల్‌ శాస్త్రవేత్త సారా సెడిల్‌మ్యాన్‌ తెలిపారు. జంతు సంబంధిత ఆహారంతో కార్బోహైడ్రేట్లను తగ్గించినప్పుడు జీవిత కాలం తగ్గే అవకాశముందని తమ పరిశోధన చెబుతోందని,  బదులుగా మొక్కల నుంచి అందే కొవ్వులు, ప్రొటీన్లను, ఓ మోస్తరుగా కార్బోహైడ్రేట్లను చేర్చడం ద్వారా దీర్ఘకాలిక ఆరోగ్య ప్రయోజనాలు ఉంటాయని చెప్పారు. తక్కువ కార్బోహైడ్రేట్ల ఆహారం స్వల్పకాలంలో ప్రయోజనం కల్పించినా.. ఎక్కువ కాలం వాడినప్పుడు మాత్రం సమస్యలు సృష్టించే అవకాశముందన్నారు.  


 కొత్త పరిశోధన
 శరీరానికి మేలు చేసే పిండి పదార్థాలను ఎక్కువగా, ప్రొటీన్లను కాస్త తక్కువగా ఆహారంలో తీసుకుంటే ఎక్కువ కాలం ఆరోగ్యంగా జీవించవచ్చని నిపుణులు చెబుతున్నారు. మొత్తం కేలరీల్లో 40 శాతం తగ్గించుకుంటే ఎలాంటి ఫలితం వస్తుందో, పిండి పదార్థాలను ఎక్కువగా, ప్రొటీన్లను కాస్త తక్కువగా తీసుకున్నప్పుడు కూడా దాదాపు అలాంటి ఫలితమే దక్కుతుందని వారు అంటున్నారు. ఆస్ట్రేలియాలోని సిడ్నీ వర్సిటీ వైద్య నిపుణులు ఎలుకలపై జరిపిన పరిశోధనలో ఈ విషయం తేలింది. డయాబెటిస్, స్థూలకాయం బారిన పడకుండా ఉండేందుకు రోజువారీ ఆహారంలో ఏకంగా 40 శాతం కేలరీలను తగ్గించుకోవడం అంతగా ఆచరణ సాధ్యం కాదని, దాని బదులు పిండి పదార్థాలను బాగా తీసుకుని, ప్రొటీన్లను కొంతమేరకు తగ్గించుకున్నట్లయితే తేలికగా ఆరోగ్యాన్ని రక్షించుకోవచ్చని సిడ్నీ వర్సిటీ నిపుణుడు డాక్టర్ స్టీఫెన్ సింప్సన్ చెబుతున్నారు.