ఇండోర్‌ : పశువులకు గుర్తింపు నెంబర్‌ ఏంటని అనుకుంటున్నారా? మీరు చదువుతున్నది నిజమే.. దేశంలోని జనాలకు ఆధార్‌లాగే పశువులకు కూడా యూనిక్‌ ఐడెంటిటీ‌(యూఐడీ) నంబర్ జారీ చేస్తోంది మధ్యప్రదేశ్‌ ప్రభుత్వం.  నేషనల్‌ డైరీ డెవలప్‌మెంట్‌ బోర్డ్‌ పథకం కింద ఈ కార్యక్రమానికి శ్రీకారం చుట్టింది. పశువుల రక్షణతోపాటు, పాల ఉత్పత్తి పెంచేందుకు ఈ విధానాన్ని ప్రారంభించారు. ‘రాష్ర్టంలో 90 లక్షల పశువులున్నాయి. మొదటి దశలో భాగంగా 40 లక్షల పశువులకు యూఐడీ ట్యాగింగ్‌ చేపడతాం. ఇప్పటివరకు 2.5 లక్షల ఆవులు, గేదెలకు ట్యాగింగ్‌ పూర్తయింది. రెండో దశలో మిగిలిన వాటికి ట్యాగింగ్‌ చేపడతాం. యూఐడీ కేటాయించేటప్పుడు పశువు ఏ రకానికి చెందినది, వయస్సు వంటి వివరాలను సేకరిస్తున్నాం. తర్వాత పశువులకు కేటాయించిన యూఐడీ నంబర్‌ని యాజమాని ఆధార్‌కి లింక్‌ చేయనుబోతున్నాం. మధ్యప్రదేశ్‌ పాల ఉత్పత్తిలో దేశంలోనే మూడో స్థానంలో ఉంది. ఈ విధానం పశువులు సంతతివృద్ధికి ఉపయోగకరంగా ఉంటుంది. దీని ద్వారా అక్రమ కొనుగోలు, అమ్మకాలను నియత్రించడమే కాకుండా, స్మగ్లింగ్‌ని ఆరికట్టవచ్చు’ అని అధికారులు తెలుపుతున్నారు. 


 మక్తల్: మహబూబ్‌నగర్ జిల్లా మక్తల్ మండలం వనాయికుంటలో ఓ రైతు అప్పుల బాధతో ఆత్మహత్యకు పాల్పడ్డాడు. గ్రామానికి చెందిన నర్సింహులు(45) తనకున్న 5 ఎకరాల్లో 15 బోర్లు వేసినా చుక్క నీరు రాలేదు. దీంతో వాటిలో నాలుగు ఎకరాలు అమ్మి కొన్ని అప్పులు తీర్చాడు. మళ్లీ ఎకరా పొలంలో ఓ బోరు వేస్తే కొద్దిపాటి నీరు రావడంతో వరి సాగు చేశాడు. విద్యుత్ సరఫరా లేక పంట ఎండిపోయింది. దాంతో ఆ పంటను పశువులు మేత కోసం వదిలాడు.
 
 పంటల సాగుకు, బోర్లు వేయడానికి దాదాపు రూ.4లక్షల వరకు అప్పులు చేశాడు. అప్పులు తీర్చే మార్గం కనిపించక ఆదివారం రాత్రి పురుగుమందు సేవించాడు. గమనించిన కుటుంబ సభ్యులు ఆస్పత్రికి తరలించారు. చికిత్స పొందుతూ మంగళవారం రాత్రి మృతి చెందాడు.