కర్నూలు అగ్రికల్చర్: జిల్లా నలుమూలల నుంచి వచ్చిన ప్రజలతో ఎప్పటిలాగే ప్రజాదర్బార్ పోటెత్తింది. ఎన్ని సార్లు తిరిగినా తమ సమస్యలు పరిష్కారం కావడం లేదని బాధితులు వాపోయారు. సోమవారం కలెక్టరేట్‌లోని సునయన ఆడిటోరియంలో కలెక్టర్ సీహెచ్ విజయ్‌మోహన్ వినతులు స్వీకరించారు. జేసీ హరికిరణ్, ఏజేసీ రామస్వామి, డీఆర్‌ఓ గంగాధర్ గౌడ్, జెడ్పీ సీఈఓ ఈశ్వర్, కలెక్టర్ కార్యాలయ పరిపాలన అధికారి పివి.రమణరావు, ల్యాండ్‌రిఫామ్స్ తహశీల్దారు ఎలిజబెత్ తదితరులు కూడా వినతులు స్వీకరించారు.వచ్చిన వినతులను అక్కడే స్కానింగ్ చేసి ప్రజావాణి వెబ్‌సైట్‌లో ఉంచి సంబంధిత అధికారులకు రెఫర్ చేశారు. ప్రజాదర్బార్‌కు వచ్చిన సమస్యల్లో కొన్ని ఇలా ఉన్నాయి.
  
 చాగలమర్రి మండలం చిన్న బోధనం గ్రామంలో రాంపుల్లయ్య పాయన్నలు 4.62 ఎకరాల ప్రభుత్వ భూమిని కొన్ని దశాబ్దాలుగా అనుభవిస్తున్నారు. ఇందులో రెండు ఎకరాలకు ప్రభుత్వం వీరికి పట్టా, పాస్ పుస్తకం కూడా ఇచ్చింది. అయితే ఓబుల్‌రెడ్డి అనే వ్యక్తి తన భార్య భారతి పేరు మీద 4.62 ఎకరాకు బోగస్ పట్టాదారు పాస్ పుస్తకం తీసుకుని ఆన్‌లైన్‌లో ఎక్కించుకున్నాడు. దీనిపై చర్యలు తీసుకుని న్యాయం చేయాలని వారు కలెక్టర్‌ను కోరారు.
  
 ఉయ్యాలవాడ మండలం బోడెమ్మనూరు గ్రామంలో గ్రామ దేవత పెద్దమ్మ మాన్యం భూములను పెద్దలు ఆక్రమించుకున్నారు. కొన్నేళ్లుగా దీనిపై ఫిర్యాదులు చేస్తున్న పట్టించుకునే వారు లేరు. పేదలు అనుభవిస్తున్న మాన్యం భూములను పెద్దలు ఆక్రమించుకున్న విషయం తెలిసినా ఎవ్వరు స్పందించడం లేదు. ఇప్పటికైనా చర్యలు తీసుకొని మాన్యం భూములను పెద్దల నుండి స్వాధీనం చేసుకోవాలని ఓబులపతి, ఓబులేసు తదితరులు కోరారు.
  
 హామీలు అమలు చేయండి..
 తెలుగుదేశం ప్రభుత్వం అధికారం చేపట్టి తొమ్మిది నెలలు గడిచిన ఇప్పటి వరకు రాష్ట్ర విభజన చట్టంలోని హామీల్లో ఏ ఒక్కదానిపైన దృష్టి సారించలేదు. ఇప్పటికైనా ముఖ్యమంత్రి చంద్రబాబు నాయుడు చొరవ తీసుకుని విభజన చట్టంలోని హామీలను సాధించే దిశగా చర్యలు తీసుకోవాలని జిల్లా కాంగ్రెస్ పార్టీ నేతలు ప్రజాదర్బార్‌లో కలెక్టర్‌ను కోరారు. డీసీసీ అధ్యక్షుడు బీవై.రామయ్య, ఎమ్మెల్సీ సుధాకర్‌బాబు, మాజీ జడ్పీ ఛైర్మన్ ఆకెపోగు వెంకటస్వామి, డీసీసీ ఉపాధ్యక్షుడు సర్దార్ బుచ్చిబాబు తదితరులు కలెక్టర్‌ను కలిసి ఈ మేరకు వినతి పత్రం సమర్పించారు.


 కర్నూలు(అగ్రికల్చర్): రీసోర్స్ టీచర్ల ఎంపికకు పరీక్ష నిర్వహించి జిల్లా స్థాయి కమిటీ ద్వారా అర్హులైన వారిని ఎంపిక చేయడానికి చర్యలు తీసుకోవాలని జిల్లా కలెక్టర్ సీహెచ్ విజయ్‌మోహన్ సర్వశిక్ష అభియాన్ అధికారులను ఆదేశించారు. కలెక్టరేట్‌లోని సమావేశ మందిరంలో మంగళవారం ఆయన సర్వశిక్ష అభియాన్ వయోజన విద్యాశాఖ అధికారులతో సమీక్ష నిర్వహించారు. కలెక్టర్ మాట్లాడుతూ ఉపాధ్యాయులకు శిక్షణ ఇవ్వడానికి రీసోర్స్ టీచర్ల ఎంపికకు సంబంధించిన ఏర్పాట్లన్నీ ఈ నెల 15 నాటికి పూర్తి చేయాలన్నారు. ఈ నెల నుంచి 2 నుంచి 20 వరకు నిర్వహించే జన్మభూమి-మాఊరు కార్యక్రమం పూర్తయ్యేలోపు బడిబయట ఉన్న బడిఈడు పిల్లలను వంద శాతం పాఠశాలలో చేర్పించేలా కృషి చేయాలన్నారు. విద్యా హక్కు చట్టం, గుణాత్మక విద్య, నిరంతర సమగ్ర మూల్యాంకనం ద్వారా పిల్లల చదువు వారి స్థితి గతులతో పాటు పాఠశాలల్లో మౌలిక సదుపాయాలపై ప్రత్యేక దృష్టి సారించాలన్నారు. వంట గదుల నిర్మాణం, మధ్యాహ్న భోజనంలో మెను అమలు, క్రీడా సామగ్రి, తదితర వసతులు ఉన్నాయా లేదా పరిశీలించి తగిన చర్యలు తీసుకోవాలన్నారు. విద్యార్థులకు అంటువ్యాధులు సోకకుండా హెల్త్ క్యాంపులు నిర్వహించి అవసరమైన మందులు పంపిణీ చేయాలన్నారు. స్కూలు గ్రాంటు, మెయిన్‌టెనెన్స్ గ్రాంటు కింద ఇచ్చిన నిధుల వినియోగంపై ర్యాండమ్‌గా విచారణ జరిపి నివేదిక ఇవ్వాలని ఎస్‌ఎస్‌ఏ పీఓను ఆదేశించారు. విద్యార్థులకు సరఫరా చేస్తున్న యూనిఫాం, టైలరింగ్ చార్జీల చెల్లింపు, కమ్యూనిటీ మొబలైజర్స్ విధి విధానాలకు సంబంధించిన ఫైల్‌ను తమకు పంపాలన్నారు. కేంద్ర, రాష్ట్ర ప్రభుత్వాలు నిరక్షరాస్యులైన మహిళలను వంద శాతం అక్షరాస్యులుగా చేయాలనే ఉద్దేశంతో పెద్ద ఎత్తున నిధులు ఖర్చు పెడుతుందని తెలిపారు. వయోజన విద్య శాఖ డీడీ సత్యనారాయణ, ఎస్‌ఎస్‌ఏ పీఓ మురళీధర్, ఈఈ ప్రసాద్, వయోజన విద్యశాఖ ఏపీఓలు పాల్గొన్నారు.