సాక్షి, నల్గొండ : నాగార్జున సాగర్‌ నియోజకవర్గ మాజీ ఎమ్మెల్యే గుండెబోయిన రాంమ్మూర్తి యాదవ్‌ శనివారం తుది శ్వాస విడిచారు. ఆయన 1947 ఆక్టోబర్‌ 26 న గుండెబోయిన మట్టయ్య, మహాలక్ష్మమ్మ దంపతులకు జన్మించారు. మొదటిసారిగా 1981 లో పెద్ద దేవులపల్లి గ్రామ సర్పంచ్‌గా తన రాజకీయ జీవితాన్ని ప్రారంభించారు. 1994 నుంచి 1999 వరకు అప్పటి చలకుర్తి నియోజకవర్గంలో ఎమ్మెల్యేగా ప్రజలకు సేవలు అందించారు. ఈ ఎన్నికల్లో అ‍ప్పటి వరకు ఓటమి ఎరుగని మాజీ మంత్రి జానారెడ్డిపై ఘన విజయం సాధించారు. ప్రజా సంక్షేమం కోసం పాటుపడిన వ్యక్తిగా రాంమ్మూర్తికి మంచి పేరు ఉంది. బడుగు బలహీన వర్గాల నుంచి వచ్చిన రాంమూర్తి యాదవ్‌ పేద ప్రజల అభ్యున్నతి కోసం తన జీవితాంతం తాపత్రయ పడ్డారు.


 చలకుర్తి(పెద్దవూర): మండలంలోని చలకుర్తి జవహర్‌ నవోదయ విద్యాలయంలో రెండు రోజులుగా నిర్వహిస్తున్న జేఎన్‌వీ రీజినల్‌ స్థాయి టేబుల్‌ టెన్నిస్‌ పోటీల్లో కరీంనగర్‌ క్లస్టర్‌ ఛాంపియన్‌గా నిలిచినట్లు ప్రిన్సిపాల్‌ జి.బ్రహ్మపుత్రారెడ్డి తెలిపారు. గురువారం జరిగిన బహుమతి ప్రదాన కార్యక్రమంలో ఆయన పాల్గొని మాట్లాడారు. కేరళ, కర్ణాటక, ఆంధ్రప్రదేశ్, తెలంగాణ రాష్ట్రాల జేఎన్‌వీలకు చెందిన ఎనిమిది క్లస్టర్‌ల విద్యార్థులు ఈ పోటీల్లో పాల్గొన్నట్లు తెలిపారు. అండర్‌–14, అండర్‌–17, అండర్‌–19 బాల బాలికల విభాగాల్లో మొత్తం ఆరు కేటగిరీలకు గాను ఐదింటిని కరీంనగర్‌ క్లస్టర్‌ గెల్చుకోగా, అండర్‌–19 విభాగంలో బెంగళూరు రూరల్‌ క్లస్టర్‌ గెలిచినట్లు తెలిపారు. బెస్ట్‌ ప్లేయర్స్‌ అవార్డులను అండర్‌–14 బాలుర, బాలికల విభాగంలో కరీంనగర్‌ క్లస్టర్‌కు చెందిన వేదానంద, మేఘనలు, అండర్‌–17 విభాగంలో కరీంనగర్‌ క్లస్టర్‌కు చెందిన ఎం. సుమంత్, హర్షితలు, అండర్‌–19 బాలుర విభాగంలో బెంగళూరు రూరల్‌ క్లస్టర్‌కు చెందిన కిరణ్, బాలికల విభాగంలో కరీంనగర్‌ క్లస్టర్‌కు చెందిన సాయిదీపికలు గెల్చుకున్నట్లు తెలిపారు. ఈ పోటీల్లో ఉత్తమ ప్రతిభ కనబరిచిన 30 మందిని జాతీయ స్థాయి పోటీల కోసం ఎంపిక చేసినట్లు తెలిపారు. ఎంపికైన క్రీడాకారులకు సెప్టెంబర్‌ 5వ తేదీ వరకు చలకుర్తిలోనే శిక్షణ నివ్వనున్నట్లు తెలిపారు. శిక్షణ పూరై్తన తర్వాత సెప్టెంబర్‌ 7వ తేదీ నుంచి 10వ తేదీ వరకు గుజరాత్‌లోని కేడాలో నిర్వహించనున్న జాతీయ స్థాయి పోటీలకు పంపనున్నట్లు తెలిపారు.