మడకశిర రూరల్‌: కోడిగానిపల్లిలో కొట్టంలో కట్టేసిన మేకలపై శుక్రవారం తెల్లవారుజామున చిరుత దాడి చేసింది. పెంపకందారురాలు హనుమక్క శబ్దం విని కేకలు వేసుకుంటూ అక్కడికి వచ్చేసరికి అప్పటికి ఐదు మేకల చిరుతదాడిలో చనిపోయాయి. మరొక మేకను తీసుకుని చిరుత పరుగులు తీసింది. దాదాపు రూ.30వేల నష్టం వాటిల్లిందని బాధితురాలు వాపోయింది.
 
 అటవీశాఖ, వెటర్నరీ అధికారులు సంఘటనా స్థలాన్ని పరిశీంచి మృతి చెందిన మేకలకు శవపరీక్ష నిర్వహించారు. నష్టపరిహారం కోసం ఉన్నతాధికారులకు నివేదిక పంపుతామని అటవీ శాఖాధికారి శాంప్లానాయక్‌ తెలిపారు. గ్రామాల్లోకి వన్యప్రాణులు ప్రవేశించకుండా అటవీశాఖాధికారులు చర్యలు తీసుకోవాలని సర్పంచు సావిత్రి, ఎంపీటీసీ సభ్యుడు రామప్ప కోరారు.


 మడకశిర రూరల్‌ : కదిరేపల్లి సమీపంలో హంద్రీనీవా కాలువ వద్ద శుక్రవారం తెల్లవారుజామున కాపరి రంగనాథ్‌కు చెందిన గొర్రెల మందపై చిరుత దాడి చేసింది. మందలోకి చిరుత ప్రవేశించిన వెంటనే కేకలు వేయడంతో మేకను చంపివేసి అక్కడే వదిలి గొర్రెను కొండప్రాంతంలోకి ఎత్తుకెళ్లి వదలేసిందని బాధితుడు తెలిపాడు. దీంతో దాదాపు రూ.13 వేల నష్టం వాటిల్లిందన్నాడు. రెండు నెలల వ్యవధిలో నరసప్ప, తిప్పేరంగప్ప, రంగధామప్ప తదితరులకు చెందిన దాదాపు పది మేకలు, గొర్రెలను చిరుత చంపివేసిందని గ్రామస్తులు తెలిపారు. అటవీ శాఖాధికారులు చర్యలు తీసుకుని చిరుత దాడిలో మృతి చెందిన మేకలు, గొర్రెల కాపరులకు నష్టపరిహారం అందించి ఆదుకోవాలని కోరుతున్నారు.


 కళ్యాణదుర్గం : కళ్యాణదుర్గం మండలం మల్లాపురంలో నల్లప్ప అనే రైతుకు చెందిన గొర్రెను ఓ చిరుత గురువారం చంపేసింది. కళ్యాణదుర్గం సమీపంలోని వన్నూరుస్వామి కొండ వెనుక భాగంలో ఈ ఘటన జరిగింది. గొర్రెలను మేపుకుని వచ్చేందుకు కొండ వద్దకు వెళ్లగా అనూహ్యంగా చిరుత మందపై దాడిచేసి గొర్రెను ఎత్తుకెళ్లినట్లు గ్రామస్తులు తెలిపారు. అటవీ శాఖ అధికారిణి రామేశ్వరి ఘటనా స్థలానికి చేరుకుని వివరాలు సేకరించారు. కాగా అదే గ్రామానికి చెందిన మరో రైతు గొర్రెను రెండ్రోజుల కిందట చిరుత చంపేసినట్లు గ్రామస్తులు తెలిపారు. దీంతో ఆయా గ్రామస్తులతో పాటు పశువుల కాపరులు అటువైపు మందను తోలుకెళ్లాలంటేనే భయపడిపోతున్నారు.


 రాయదుర్గం రూరల్‌ : మల్లాపురం బోయ నాగన్నకు చెందిన మేకపోతునుకకొండ సమీపంలో చిరుత దాడి చేసి చంపింది. వెంటనే బాధితుడు అటవీ అధికారులకు సమాచారమందించాడు. వారు వచ్చి చిరుతే దాడి చేసి చంపినట్లు ఆనవాళ్లను బట్టి ధ్రువీకరించారు. మల్లాపురం పరిసర ప్రాంతాలలో చిరుతలు సంచరిస్తున్నాయని, ఇప్పటికే పది మేకలను పొట్టన పెట్టుకున్నాయని పెంపకందారులు ఆందోళన చెందుతున్నారు.