తనకల్లు : మండలంలోని చీకటిమానిపల్లి వద్ద ఓ లారీ ఆదివారం అదుపు తప్పి ఇంట్లోకి దూసికెళ్లింది. స్థానికులు, పోలీసుల కథనం మేరకు.. తమిళనాడులోని సేలంకు చెందిన ఓ లారీ అనంతపురానికి బయలుదేరింది. మార్గమధ్యంలోని చీకటిమానిపల్లి సమీపలో గల మలుపు వద్దకు రాగానే అదుపు తప్పడంతో జాతీయ రహదారికి ఆనుకునే ఉన్న శేఖర్‌ అనే వ్యక్తికి చెందిన ఇంట్లోకి దూసుకెళ్లింది. అదృష్టవశాత్తు ఆ సమయంలో ఇంట్లో ఎవరూ లేకపోవడంతో పెను ప్రమాదమే తప్పిందని గ్రామస్తులు తెలిపారు. అయితే ఘటనలో లారీ డ్రైవర్‌ తిరుమల మురుగన్‌కు రెండు కాళ్లు విరిగిపోయాయి. చికిత్స కోసం క్షతగాత్రున్ని 108లో కదరి ప్రభుత్వాస్పత్రికి తరలించారు. కేసు నమోదు చేసుకొని దర్యాప్తు చేస్తున్నట్లు పోలీసులు తెలిపారు.