విజయవాడ: చెస్ క్రీడాకారిణి కోనేరు హంపి పెళ్లి కూతురైంది. ఈ రోజు రాత్రి హంపి వివాహం.. ఎఫ్ట్రానిక్స్ మేనేజింగ్ డెరైక్టర్ దాసరి రామకృష్ణ తనయుడు అన్వేష్‌తో జరగనుంది. బుధవారం ఉదయం హంపిని పెళ్లి కూతురిగా ముస్తాబు చేశారు. తెలుగుతనం, సాంప్రదాయం ఉట్టిపడేలా హంపి పట్టు చీరలో మెరిసిపోయింది. హంపి కుటుంబ సభ్యులు పూజా కార్యక్రమాలు నిర్వహించారు.
 
 హంపి, అన్వేష్లకు పెళ్లికి ఘనంగా ఏర్పాట్లు చేశారు. విజయవాడలో వివాహ వేదిక ‘ఏ కన్వెన్షన్ సెంటర్’ను అందంగా అలంకరించారు. ఇరువురి కుటుంబ సభ్యుల పెద్దలు ఈ పెళ్లిని నిశ్చయించారు. హంపి వివాహానికి పలువురు వీఐపీలు హాజరయ్యే అవకాశముంది.


 సాక్షి, విజయవాడ బ్యూరో :  విజయవాడలో ఈ నెల 13వ తేదీన  ప్రఖ్యాత చదరంగం క్రీడాకారిణి కోనేరు హంపి వివాహం జరగనుంది. స్థానిక ‘ఏ కన్వెన్షన్ సెంటర్’ ఇందుకు వేదిక కానుంది. ఎఫ్ట్రానిక్స్ మేనేజింగ్ డెరైక్టర్ దాసరి రామకృష్ణ తనయుడు అన్వేష్‌తో హంపి వివాహం జరిపించేందుకు పెద్దలు నిర్ణయించారు. హంపి తండ్రి కోనేరు అశోక్ సతీసమేతంగా గురువారం హైదరాబాదులో ముఖ్యమంత్రి నారా చంద్రబాబునాయుడును కలిసి వివాహ ఆహ్వానపత్రికను అందజేశారు. వివాహానికి హాజరై వధూవరులను ఆశీర్వదించాలని  ఆయన విజ్ఞప్తి చేశారు. ఈ సందర్భంగా ఆంధ్రప్రదేశ్ నూతన రాజధాని అభివృద్ధి కోసం రెండు లక్షల రూపాయల విరాళాన్ని ముఖ్యమంత్రి చంద్రబాబుకు అశోక్ అందజేశారు.