తూర్పుగోదావరి,కాకినాడ క్రైం: జిల్లాలో మూడు చోట్ల దాడులు నిర్వహించి బెట్టింగ్‌కి పాల్పడుతున్న ఏడుగురిని అరెస్టు చేసి వారి నుంచి రూ.11.26 లక్షల నగదు, రూ.15 లక్షల విలువైన బెట్టింగ్‌ సామగ్రిని, 180 సెల్‌ఫోన్లు స్వాధీనం చేసుకున్నట్టు ఎస్పీ విశాల్‌గున్ని తెలిపారు. ఆదివారం జిల్లా పోలీస్‌ కార్యాలయంలో ఏర్పాటు చేసిన విలేకర్ల సమావేశంలో ఆయన మాట్లాడారు. కాకినాడ సూర్యనారాయణపురం యాళ్లవారివీధిలో చీకట్ల ఈశ్వరరావు ఇంట్లో డబ్బులతో క్రికెట్‌ బెట్టింగ్‌ ఆడుతుండగా శుక్రవారం మధ్యాహ్నం 2.30 గంటలకు దాడి చేసి ఈశ్వరరావు, అతడికి సహాయకుడిగా ఉన్నా అట్లూరి శివనాగవెంకటేశ్వరరావు అనే వ్యక్తులను పట్టుకున్నట్టు వెల్లడించారు. వీరి నుంచి ఒక లైన్‌బాక్సు, రెండు సెల్‌ఫోన్లు, ఒక డెల్‌ ల్యాప్‌ట్యాప్, ఒక ప్రింటర్, ఒక సోనీ ఎల్‌ఈడీ టీవీ, బెట్టింగ్‌లో ఉపయోగించిన రూ.1.71 లక్షల నగదు స్వాధీనం చేసుకున్నట్టు ఎస్పీ విశాల్‌గున్ని వివరించారు. ఈశ్వరరావు ఇచ్చిన సమాచారం మేరకు కాకినాడ సాంబమూర్తినగర్‌ రెవెన్యూకాలనీ, సాయిబాబాగుడి వీధిలో ఒక ఇంటి వద్ద జరుగుతున్న క్రికెట్‌ బెట్టింగ్‌ ఆడుతున్న దండు గోపాలకృష్ణంరాజు అలియాస్‌ గోపాల్‌ అనే వ్యక్తిని అరెస్టు చేసి అతడి నుంచి లైన్‌ బాక్సు, 20 సెల్‌ఫోన్లు, క్యాష్‌ కౌంటింగ్‌ మిషన్, బెట్టింగులో ఉపయోగించే రూ.9,55,900 నగదు స్వాధీనం చేసుకున్నట్టు ఎస్పీ విశాల్‌గున్ని వివరించారు. గోపాలకృష్ణంరాజును ప్రశ్నించగా అతడు ఇచ్చిన సమాచారం మేరకు రాజమండ్రిలో బెస్ట్‌ ప్రెస్‌ ఎదురుగా గల శ్రీసాయి ఎవెన్స్‌ అపార్టుమెంట్‌లో ప్లాటు నంబర్‌ 504లో మూడేళ్ల నుంచి బెట్టింగ్‌ నడుపుతున్న సికింద్రాబాద్‌కు చెందిన కుప్ప ప్రవీణ్‌కుమార్, భీమవరం చిన అప్పారావుతోటకు చెందిన మేకల కళ్యాణ్, భీమవరం డీఎన్‌ఆర్‌ కాలేజీ ఎదురుగా ఉంటున్న అడపాల జగదీష్‌ప్రసాద్, పశ్చిమగోదావరి జిల్లా ఉంగుటూరు మండలం నారాయణపురానికి చెందిన కలిదిండి శివధర్మతేజలను అరెస్టు చేసి వారి వద్ద నుంచి సోలాపూర్, రాజస్థాన్, విశాఖపట్నం తదితర లైన్ల నుంచి వచ్చే నాలుగు లైన్‌ బాక్సులు, 124 సెల్‌ ఫోన్లు, ఒక ప్రింటర్, ఒక ల్యాప్‌ట్యాప్, ఎల్‌సీడీ టీవీలను బెట్టింగ్‌లో ఉపయోగిస్తున్న వాటిని స్వాధీనం చేసుకున్నట్టు ఎస్పీ విశాల్‌గున్ని వివరించారు. బెట్టింగ్‌కు పాల్పడుతున్న ఏడుగురు ముద్దాయిలను అరెస్టు చేసినట్టు తెలిపారు. ఈ దాడుల్లో పాల్గొన్న పోలీస్‌ సిబ్బందిని ఎస్పీ విశాల్‌ గున్ని అభినందించారు. విలేకర్ల సమావేశంలో ఎస్బీ డీఎస్పీ పల్లపురాజు, కాకినాడ డీఎస్పీ రవివర్మలు పాల్గొన్నారు.


 ప్రొద్దుటూరు క్రైం, న్యూస్‌లైన్ : క్రికెట్ మ్యాచ్‌లు మొదలయ్యాయంటే చాలు పోలీసులు హడావుడి కనిపిస్తుంది. ప్రధాన సెంటర్‌లతో పాటు పలు బెట్టింగ్ స్థావరాలలోనూ, బుకీల ఇళ్లల్లో పోలీసులు సోదాలు చేస్తారు. దీంతో పోలీసుల దాడులు ఉంటాయేమోనని పసిగట్టిన బుకీలు ప్రొద్దుటూరు వదలి వెళ్లే వారు.
  
  ఇది ఒకప్పటి మాట. కానీ ఇపుడు పోలీసుల దాడులు లేవు..భయపడి ఎక్కడికో దూరంగా పారిపోయే బుకీలు లేరు. క్రికెట్ మ్యాచ్‌లు ప్రారంభమయ్యాయంటే ‘బుకీలకు ఇది మామూలే లే’ అని ఇక్కడి పోలీసు అధికారులు భావించడంతో క్రికెట్ బెట్టింగ్ అనేది సర్వసాధారణమైంది. వారం రోజుల నుంచి చాంపియన్స్ లీగ్ ట్వంటీ ట్వంటీ క్రికెట్ మ్యాచ్‌లు జరుగుతున్నాయి. గతంలో పట్టణంలో ఉన్న ప్రధాన బుకీలతో పాటు సబ్ బుకీలు కూడా మ్యాచ్‌ల సమయంలో హైదరాబాద్, చెన్నై, తిరుపతి, బెంగుళూరు లాంటి న గరాలకు వెళ్లి బెట్టింగ్ నిర్వహించేవాళ్లు. అయితే ఇప్పుడు ఆ పరిస్థితి కనిపించడంలేదు. కొన్ని రోజుల క్రితం కొందరు పేరు మోసిన బుకీలు మాత్రమే బయటి ప్రాంతాలకు వెళ్లి పోయినట్లు తెలుస్తోంది. మరి కొందరు ప్రధాన బుకీలు, సబ్ బుకీలతో పాటు కొరియర్‌లు కూడా ఇక్కడే ఉంటూ విచ్చలవిడిగా బెట్టింగ్ నిర్వహిస్తున్నారు. ప్రధాన టీ దుకాణాలతో పాటు కూడళ్లలో బుకీల హడావుడి కనిపిస్తుంటుంది. వీరు బహిరంగంగానే లావాదేవీలు జరుపుతున్నా పట్టించుకునే నాథుడే కరువయ్యాడంటే అతిశయోక్తి కాదు.
  
  
  బుకీలకు రాజకీయ అండ
  ప్రొద్దుటూరు బుకీలకు రాజకీయ అండ పుష్కలంగా ఉన్నట్లు తెలుస్తోంది. ప్రతి ప్రధాన బుకీ వెనుక ఒక రాజకీయనాయకుడు ఉన్నాడని పోలీసు వర్గాల సమాచారం. గాంధీరోడ్డులో ఉన్న ఓ ద్వితీయశ్రేణి నాయకుడు కొందరు బుకీలకు అభయ‘హస్తం’ ఇస్తున్నట్లు సమాచారం. అతను ఓ పోలీసు అధికారికి ఫోన్ చేసి చెప్పడంతో పోలీసులు కూడా సంబంధిత బుకీల జోలికి వెళ్లడం లేదని తెలుస్తోంది.
  
  అతని అండతోనే బుకీలు పట్టణంలోనే ఉంటూ విచ్చలవిడిగా బెట్టింగ్ నిర్వహిస్తున్నట్లు వార్తలు వినిపిస్తున్నాయి. ఇదివరకైతే పట్టణంలోని పోలీసులు ప్రధాన బుకీల స్థావరాలు కనిపెట్టి దాడులు నిర్వహించేవారు. అయితే ఇటీవల కాలంలో కొందరు కానిస్టేబుళ్లకు రాజకీయ నాయకుల నుంచి బెదిరింపులు వచ్చిన సందర్భాలు అనేకం ఉన్నాయి. దీంతో కానిస్టేబుళ్లు బుకీలను పట్టుకోవడానికి సాహసించలేకపోతున్నట్లు పోలీసు వర్గాల సమాచారం. విషయం ఉన్నతాధికారులకు తెలిసినా ఎలాంటి చర్యలు తీసుకోలేదు.