సాక్షి, విశాఖపట్నం: రాష్ట్రానికి తుపాను ముప్పు తప్పింది. పశ్చిమ బంగాళాఖాతం, దాన్ని ఆనుకుని ఉన్న తూర్పు మధ్య బంగాళాఖాతంలో కొనసాగతున్న బుల్‌బుల్‌ తీవ్ర తుపాను శుక్రవారం దిశ మార్చుకుంది. ప్రస్తుతం ఇది పారాదీప్‌కు దక్షిణ ఆగ్నేయ దిశగా 310 కి.మీ, పశ్చిమ బెంగాల్‌కు దక్షిణ నైరుతి దిశగా 450 కి.మీ, బంగ్లాదేశ్‌కు దక్షిణ నైరుతి దిశగా 550 కి.మీ దూరంలో కేంద్రీకృతమై ఉంది. ఉత్తరదిశగా పయనిస్తున్న ఈ తీవ్ర తుపాను అతి తీవ్ర తుపానుగా మారింది. అయితే శనివారం ఉదయం దిశ మార్చుకుని ఈశాన్య దిశగా ప్రయాణిస్తూ క్రమంగా బలహీన పడనుంది. ఇది శనివారం అర్ధరాత్రి పశ్చిమబెంగాల్, బంగ్లాదేశ్‌ తీరాల మధ్య తీరం దాటే అవకాశాలున్నాయని భారత వాతావరణ విభాగం వెల్లడించింది. దీని ప్రభావంతో నేడు, రేపు కోస్తా, రాయలసీమల్లో ఒకట్రెండు చోట్ల తేలికపాటి నుంచి ఓ మోస్తరు వర్షాలు కురిసే వీలుందని తెలిపింది. ఈ నేపథ్యంలో విశాఖపట్నం, మచిలీపట్నం, నిజాంపట్నం, కృష్ణపట్నం పోర్టులకు రెండో ప్రమాద హెచ్చరిక జారీ చేశారు. అప్రమత్తంగా ఉండాలని కళింగపట్నం, భీమునిపట్నం, వాడరేవు పోర్టులకు వాతావరణ శాఖ అధికారులు సూచించారు. సముద్రం అలజడిగా ఉండనున్న నేపథ్యంలో మత్స్యకారులెవ్వరూ శనివారం వేటకు వెళ్లొద్దని హెచ్చరించారు. 


 శ్రీకాకుళం పాతబస్టాండ్:బంగాళాఖాతంలో ఏర్పడిన వాయుగుండం తుపానుగా మారుతుండటంతో జిల్లాకు మరో ముప్పు పొంచి ఉందని వాతావరణ శాఖ హెచ్చరికలు జారీ చేసింది. రానున్న మూడు రోజుల్లో ఈ తుపాను మరింత బలపడే అవకాశముందన్న సూచనలతో జిల్లా యంత్రాంగం అప్రమత్తమైంది. జిల్లా కలెక్టరేట్‌లో కంట్రోల్ రూం ఏర్పాటు చేయాలని కలెక్టర్ గౌరవ్ ఉప్పల్ ఆధికారులను ఆదేశించారు. తీర ప్రాంత మండలాల తహశీల్దార్లను అప్రమత్తం చేశారు. అయా మండలాల్లో కూడా కంట్రోల్ రూంలు ఏర్పాటు చేయాలని, తుపాను వస్తే ఎదుర్కొనేందుకు అవసరమైన సన్నాహాలతోపాటు బియ్యం, కిరోసిన్, డీజిల్, ఇతర నిత్యావసర వస్తువులను తగినంతగా సమకూర్చుకోవాలని గురువారం సాయంత్రమే ఆయా మండలాల అధికారులకు ఆదేశాలు జారీ చేశారు. మత్య్సకారులు సముద్రంలోకి వెళ్లరాదని సూచిస్తూ మత్స్యకార గ్రామాల్లో దండోరా వేయించాలని, గ్రామాల్లో రెవెన్యూ సిబ్బందిని అప్రమత్తం చేయాలని సూచించారు.
  


 సాక్షి, హైదరాబాద్: రాష్ట్రానికి పొంచి ఉన్న తుపాను నేపథ్యంలో సమైక్య సమ్మెకు కొంత విరామం ప్రకటించి ఈ ఒక్క వారమైనా పూర్తిస్థాయి విధుల్లోకి రావాలని డిప్యూటీ కలెక్టర్లకు సర్కారు విజ్ఞప్తి చేసింది. సమ్మె చేస్తూనే తుపాను ప్రభావిత ప్రాంతాల్లో సేవ చేస్తామన్న డిప్యూటీ కలెక్టర్ల సంఘం వాదనతో ప్రభుత్వం ఏకీభవించలేదు. సమ్మెలో ఉంటూ సహాయ కార్యక్రమాలు చేపట్టడం కష్టమని, ఆయా కార్యక్రమాలకు నిధులు విడుదల చేయాల్సి ఉంటుంది కనుక, సమ్మె చేస్తూ ఆర్థిక పరమైన అంశాల జోలికి పోరాదని పేర్కొంటూ ఈ వారం రోజులు విధుల్లో చేరాలని కోరింది.
  
  ఈ మేరకు రాష్ట్ర రెవెన్యూశాఖ ముఖ్య కార్యదర్శి బీఆర్ మీనా బుధవారం విజ్ఞప్తి చేశారు. దీనిపై స్పందించిన సంఘం గురువారం చర్చించి నిర్ణయం తీసుకుంటామని తెలిపింది. ఇదిలావుంటే, సంఘం ప్రతినిధు లు బుధవారం సీఎంతో భేటీ అయ్యారు. సమైక్య రాష్ట్రంపై స్పష్టమైన ప్రకటన వచ్చే వరకూ సమ్మె విరమించేది లేదని సంఘం అధ్యక్షుడు పిడుగు బాబూరావు, ప్రధాన కార్యదర్శి విశ్వేశ్వర నాయుడు స్పష్టం చేశారు.


 ఆరు ఓడరేవుల్లో రెండో ప్రమాద హెచ్చరిక జారీ  
  హెలికాప్టర్లు, ఎన్‌డీఆర్‌ఎఫ్ బృందాలను సిద్ధంగా ఉంచాలని ఆదేశం
  
  సాక్షి, హైదరాబాద్/విశాఖపట్నం : తూర్పు మధ్య బంగాళాఖాతంలో బుధవారం సాయంత్రం తుపాను ఏర్పడింది. దీనికి ‘ఫైలిన్’గా వాతావరణశాఖ నామకరణం చేసింది. ఇది మరింత బలపడి పశ్చిమ వాయవ్య దిశగా పయనించి ఈనెల 12వ తేదీ నాటికి కళింగపట్నం, పారాదీప్ మధ్య తీరం దాటే అవకాశం ఉంది. ప్రస్తుతం విశాఖ తీరానికి సుమారు 1100కి.మీ దూరంలో కేంద్రీకృతమై ఉన్న ఈ తుపాను మరింత చేరువకు వచ్చే అవకాశం ఉంది. దీంతో ఇప్పటికే సముద్రంలో వేటకు వెళ్లే మత్స్యకారుల్ని వెనక్కు వచ్చేయాలని అధికారులు సూచించారు. తుపాను నేపథ్యంలో విశాఖపట్నం, మచిలీపట్నం, కృష్ణపట్నం, నిజాంపట్నం, కాకినాడ, గంగవరం ఓడరేవుల్లో రెండవ నెంబర్ ప్రమాద హెచ్చరికలతో పాటు సెక్షన్ 3 హెచ్చరికలను కూడా జారీ చేశారు.
  
  ఇదే సమయంలో విదర్భ నుంచి దక్షిణ తమిళనాడు వరకు దక్షిణ కోస్తాంధ్ర మీదుగా అల్పపీడన ద్రోణి కూడా కొనసాగుతోంది. వీటన్నింటి కారణంగా రానున్న 24గంటల్లో ఉత్తర/దక్షిణ కోస్తాంధ్ర ప్రాంతాల్లో ఒకటి రెండుచోట్ల ఉరుములతో కూడిన వర్షాలు, మరికొన్ని ప్రాంతాల్లో భారీ వర్షాలు పడే అవకాశం ఉందని విశాఖలోని తుపాను హెచ్చరికల కేంద్రం అధికారులు తెలిపారు. తుపాను అతి తీవ్ర తుపానుగాను, పెను తుపానుగానూ మారే అవకాశాలున్నాయని, గురువారం ఉదయం నాటికి కొంత స్పష్టత రావచ్చని చెప్పారు. నైరుతి రుతుపవనాల అనంతరం ఏర్పడిన ఈ తొలి తుపానువల్ల ఉత్తరాంధ్ర జిల్లాల్లో భారీగా వర్షాలు పడే అవకాశం ఉందని వాతావరణ శాఖ మాజీ అధికారి ఆర్. మురళీకృష్ణ తెలిపారు.
   
 వర్షాలు పడిన ప్రాంతాలివే : రాష్ట్రంలో మంగళవారం ఉదయం నుంచి బుధవారం ఉదయం వరకు కోస్తాంధ్రలోని పొదిలిలో 5 సెం.మీ, మాచర్ల, కందుకూరులలో 4, భీమిలి, గుడివాడలలో 3 సెం.మీ చొప్పున వర్షం పడింది. రాయలసీమలో బద్వేల్, పలమనేరులలో 5 సెం.మీ, కమలాపురం, ఉటుకూరు, ఆళ్లగడ్డలలో 4, తిరుపతి, కుప్పంలలో 3 సెం.మీ చొప్పున వాన కురిసింది. తెలంగాణలోని వికారాబాద్‌లో 7 సెం.మీ, కొల్లాపూర్‌లో 5, పరిగి, చేవెళ్లలలో 4, మహబూబాబాద్, సంగారెడ్డి, షాద్‌నగర్, కల్వకుర్తి, నల్గొండ ప్రాంతాల్లో 3 సెం.మీ చొప్పున వ ర్షం పడింది. గురువారం రాత్రిలోపు కోస్తాంధ్ర, తెలంగాణ ప్రాంతాల్లో ఓ మోస్తరు జల్లులు, రాయలసీమలోని కొన్ని చోట్ల ఉరుములతో కూడిన జల్లులు పడే అవకాశం ఉంది. ఆకాశం మేఘావృతమై ఉంటుందని, గరిష్ట/కనిష్ట ఉష్ణోగ్రతలు కొన్ని ప్రాంతాల్లో 33, 23 డిగ్రీలు న మోదయ్యే అవకాశం ఉందని భారత వాతావరణశాఖ విడుదల చేసిన బులెటిన్‌లో పేర్కొంది.
  
  పిడుగుపాటుకు ఇద్దరు మృతి
  పిడుగుపాటుకు విశాఖ జిల్లా ఎస్. రాయవరం మండలంలో ఒకరు, పెదబయలు మండలంలో మరొకరు మృత్యువాత పడ్డారు. కాగా, ఖమ్మం జిల్లా టేకులపల్లి మండలం ఎర్రాయిపాలెం గ్రామంలో పిడుగుపాటు శబ్దానికి ఇద్దరు మహిళలు, ముగ్గురు బాలికలు అస్వస్థతకు గురయ్యారు. వారిని కొత్తగూడెం ఏరియా ఆస్పత్రికి తరలించి చికిత్స అందిస్తున్నారు.
  
  వేల బస్తాల మొక్క జొన్న వర్షార్పణం
  రెండు రోజులపాటు కురిసిన భారీవర్షానికి మహబూబ్‌నగర్ జిల్లాలోని పలు వ్యవసాయ మార్కెట్ యార్డుల్లో మొక్క జొన్న తడిసిపోయి రైతులకు తీవ్రనష్టం వాటిల్లింది. వనపర్తి మార్కెట్ యార్డులో 20వేల బస్తాల మొక్కజొన్న తడిసిపోయింది. నవాబ్‌పేట మార్కెట్ యార్డులో 12వేల బస్తాలకు నష్టం వాటిల్లింది. దీంతో రూ. 50 లక్షలకు పైగా నష్టం వాటిల్లినట్లు అధికారులు చెప్పారు. రాష్ట్రవ్యాప్తంగా 6.2లక్షల హెక్టార్లలో సాగవుతున్న మొక్కజొన్నకు వర్షాలవల్ల భారీగా నష్టం వచ్చే అవకాశముందని అంచనా వేస్తున్నారు. పత్తికి కూడా ప్రమాదం పొంచి వుందని వ్యవసాయ నిపుణులు చెబుతున్నారు.
  
  70 మీటర్లు ముందుకు వచ్చిన సముద్రం
  తుపాను ప్రభావంతో గుంటూరు జిల్లాలోని సూర్యలంక సముద్రతీరం బుధవారం అల్లకల్లోలంగా మారింది. ఆలల ఉధృతితో పాటు సముద్రం దాదాపు 70 మీటర్లు ముందుకు రావడంతో తీరప్రాంత వాసులు ఆందోళన చెందుతున్నారు. కాగా, గుంటూరు జిల్లా దుర్గి మండలం గజాపురం తండాలో మంగళవారం రాత్రి 15 సెకన్ల పాటు వీచిన బలమైన గాలులకు చెట్లు, విద్యుత్ ట్రాన్స్‌ఫార్మర్లు, స్తంభాలు, పత్తిపైరు నేలకొరిగాయి.  
  
   కంట్రోల్ రూమ్ ఏర్పాటు..
  రాష్ట్ర ప్రకృతి విపత్తుల నివారణ శాఖ ఆధ్వర్యంలో సచివాలయంలో 24 గంటలపాటు పనిచేసే కంట్రోల్ రూమ్ ఏర్పాటు చేసినట్లు అధికారులు వివరించారు.  040-23456005/23451034 ఫోన్‌నంబర్లు, ఫ్యాక్స్ 040-23451819కు సమాచారం తెలపవచ్చన్నారు. అన్ని జిల్లాల్లోనూ కంట్రోల్ రూములు ఏర్పాటు చేయాలని ఆదేశించినట్లు వివరించారు. ఈ సమీక్షా సమావేశాల్లో మంత్రులు ఆనం రామనారాయణరెడ్డి, రఘువీరారెడ్డి, పితాని సత్యనారాయణ, కోండ్రు మురళి, ప్రభుత్వ ప్రధాన కార్యదర్శి మహంతి, ప్రకృతి విపత్తుల నివారణ శాఖ కమిషనర్ రాధా, రెవెన్యూ శాఖ ముఖ్యకార్యదర్శి బీఆర్ మీనా, ఆర్థికశాఖ ముఖ్యకార్యదర్శి సాంబశివరావు, నీటిపారుదల శాఖ ముఖ్యకార్యదర్శి అరవిందరెడ్డి, సివిల్ సప్లయ్స్ కార్పొరేషన్ ఎండీ అనిల్‌కుమార్ ఇతర శాఖల ఉన్నతాధికారులు హాజరయ్యారు.
  
   ప్రభుత్వం అప్రమత్తం
  రాష్ట్రానికి తుపాను ముప్పు ముంచుకొస్తున్న తరుణంలో ప్రభుత్వం అప్రమత్తమైంది. కోస్తా జిల్లాల కలెక్టర్లను ముందుస్తుగా అన్ని ఏర్పాట్లుచేయాలని ఆదేశించింది. ఉత్తరకోస్తాలోని మూడు జిల్లాల్లో తీవ్ర ప్రభావం, మిగిలిన ఆరు కోస్తా జిల్లాల్లో ఓ మోస్తరు ప్రభావం పడనున్న నేపథ్యంలో సీఎం కిరణ్‌కుమార్‌రెడ్డి సహచర మంత్రులతో కలిసి, ప్రభుత్వ ప్రధాన కార్యదర్శి పి.కె. మహంతితోపాటు వివిధ శాఖల ఉన్నతాధికారులతో ముందస్తు ఏర్పాట్లపై సమీక్ష నిర్వహించారు. జాతీయ ప్రకృతి విపత్తుల నివారణ బృందాలు, ఆర్మీ, నేవీ, కోస్ట్‌గార్డ్, అగ్నిమాపక సిబ్బంది సేవలను వినియోగించుకోవాలని జిల్లాల కలెక్టర్లను ఆదేశించడంతోపాటు, పర్యవేక్షణకు సీనియర్ అధికారులను ప్రత్యేకంగా నియమించారు. ప్రభుత్వ ఉద్యోగులంతా సమ్మె విరమించి విధుల్లో చేరాలని ప్రభుత్వం విజ్ఞప్తి చేసింది.


 హైదరాబాద్: వాతావరణ శాఖ 9 జిల్లాలకు తుపాను హెచ్చరిక చేసిన నేపధ్యంలో ముందు జాగ్రత్త చర్యలు తీసుకున్నట్లు మంత్రి రఘువీరా రెడ్డి చెప్పారు. సచివాలయం మీడియా పాయింట్ వద్ద ఆయన విలేకరులతో మాట్లాడారు. ఉత్తరాంధ్రలోని శ్రీకాకుళం, విజయనగరం, విశాఖ జిల్లాలలో తుఫాను ప్రభావం ఎక్కువగా ఉంటుందని తెలిపారు.  తుపాను తీరాన్ని దాటే సమయంలో 180 నుంచి 200 కిలోమీటర్ల వేగంతో ఈదురు గాలులు వీచే అవకాశం ఉంటుదని చెప్పారు.
 
 సచివాలయంలో కంట్రోల్ రూం ప్రారంభించినట్లు మంత్రి చెప్పారు.  కంట్రోల్ రూం ఫోన్ నెంబర్లు 040-23451034, 23546005. ముందు జాగ్రత్తగా అన్ని రకాల సహాయక చర్యలు చేపట్టినట్లు తెలిపారు. ఒక హెలీకాఫ్టర్ కూడా సిద్ధంగా ఉంచినట్లు చెప్పారు. ఆర్మీ, నేవీ సిబ్బంది సహకారం కూడా కోరినట్లు తెలిపారు. అప్రమత్తంగా ఉండాలని 9 జిల్లాల కలెక్టర్లకు ఆదేశాలు జారీ చేసినట్లు చెప్పారు.
 
 ఇదిలా ఉండగా, ఒడిస్సా, కోస్తా జిల్లాలలో భారీవర్షాలు కురిసే అవకాశం ఉందని వాతావరణ శాఖ అధికారులు  చెప్పారు.  తుపాను ప్రభావం వల్ల సముద్రంలో సాదారణం కంటే అలలు ఎగిసిపడతాయని వాతావరణ శాఖ అధికారులు తెలిపారు. లోతట్టు ప్రాంతాల ప్రజలను సురక్షిత ప్రాంతాలకు తరలించాని చెప్పారు. వాయుగుండం విశాఖకు వెయ్యి కిలోమీటర్ల దూరంలో కేంద్రీకృతమై ఉంది.
 విశాఖపట్నం, కళింగపట్నం, నిజాంపట్నంలలో మొదటి ప్రమాద హెచ్చరికను జారీ చేశారు.  ఈ రాత్రికి తుఫాను ఫైలిన్ తుపానుగా మారే అవకాశం ఉందని తెలిపారు. విశాఖ-పారాదీప్ మధ్య తీరం దాటే అవకాశం ఉంది. దీని ప్రభావం వల్ల ఉత్తరాంధ్రతోపాటు కోస్తా జిల్లాలైన తూర్పుగోదావరి, పశ్చిమగోదావరి, కృష్ణ, గుంటూరు, ప్రకాశం, నెల్లూరు జిల్లాలలో భారీ వర్షాలు కురిసే అవకాశం ఉంది.


 ఉత్తరాంధ్రతో పాటు ఒడిషాలోని కోస్తా తీరప్రాంతానికి తుఫాను ముప్పు పొంచివుంది. ముఖ్యమంత్రి ఎన్.కిరణ్కుమార్ రెడ్డి ఈ మేరకు అన్ని శాఖలను అప్రమత్తం చేశారు. ఆయన మంత్రులు, అధికారులతో బుధవారం సమావేశమై పరిస్థితిని సమీక్షించారు. కోస్తా తీర ప్రాంత ప్రజల్ని అప్రమత్తం చేయాలని ముఖ్యమంత్రి అధికారుల్ని ఆదేశించారు.
 
 ముందుజాగ్రత్త చర్యగా హెలీకాప్టర్లు, పడవలు, తీరప్రాంత గస్తీ సేవల్ని అందుబాటులో ఉంచాల్సిందిగా సూచించారు. అవసరమైతే ప్రజల్ని సురక్షిత ప్రదేశాలకు తరలించేందుకు వీలుగా ముందస్తు ఏర్పాట్లు చేయాలని కిరణ్కుమార్ రెడ్డి కోస్తా ప్రాంతంలోని తొమ్మిది జిల్లాల కలెక్టర్లను ఆదేశించారు. సమ్మె వల్ల విద్యుత్ సంక్షభం నెలకొన్న నేపథ్యంలో ఆ శాఖ అధికారుల్నిఅప్రమత్తం చేశారు.
 
 పరిస్థితిని ఎప్పటికప్పుడు సమీక్షించేందుకు హైదరాబాద్లో కంట్రోల్ రూమ్ను ఏర్పాటు చేశారు. వివరాలకు 040-23456005/23451034 ఫోన్ నెంబర్లలో సంప్రదించవచ్చు. ఈ సమావేశంలో మంత్రులు, ఆనం రాంనారాయణ రెడ్డి, రఘువీరా రెడ్డి, పితాని సత్యనారాయణ, కొండ్రు మురళితో పాటు ప్రభుత్వ ప్రధాన కార్యదర్శి పి.కె.మహంతి ఇతర అధికారులు పాల్గొన్నారు.