కనిగిరి: జిల్లాలో జనవరి నుంచి ఇప్పటి వరకు 520 పాజిటివ్‌ కేసులు నమోదయ్యాయని డీఎంఅండ్‌ హెచ్‌ఓ యాస్మిన్‌  అన్నారు. ఇటీవల ‘సాక్షి’లో కనిగిరి జ్వరాల మరణాలపై, అధ్వాన పారిశుద్ధ్యంపై వచ్చిన కథనాలకు అధికారులు స్పందించారు. శనివారం వైద్యశాఖ, మున్సిపల్‌ అధికారులు శివనగర్‌ కాలనీని సందర్శించి, వైద్య శిబిరాన్ని పరిశీలించి,  విషజ్వరంతో మృతి చెందిన బాలుడు అభిరామ్‌ రిపోర్ట్స్‌ను పరిశీలించారు.  ఈ సందర్భంగా డీఎంహెచ్‌ఓ విలేకర్లతో మాట్లాడుతూ ఎలిసా టెస్ట్‌లో డెంగీగా నిర్ధారణ జరిగి ఒక్కటి మాత్రమే డెత్‌గా నమోదైనట్లు తెలిపారు. ఇటీవల జిల్లాలో జరిగిన మృతుల సంఖ్యపై సరైన సమాచారం వెల్లడించలేదని, మృతుల్లో ఎక్కువ మంది చిన్నారులు ఉన్నది వాస్తవమన్నారు. మృతులకు గల కారణాలపై ఒక నివేదిక తయారు చేసేందుకు ప్రత్యేక వైద్యాధికారుల బృందం నియమించామని, టీం సర్వే చేస్తోందని 20 రోజుల్లో తుది నివేదిక ఇస్తారని తెలిపారు చిన్నారులు, వృద్ధుల్లో ఇమ్యునిటీ పవర్‌ తక్కువ ఉండటం వల్లే  జ్వరాలకు తోడు కిడ్నీ, న్యుమోనియా వ్యాధులతో మరణిస్తున్నట్లు వెల్లడించారు. జ్వరాలు, సీజనల్‌ వ్యాధులు వస్తే వెంటనే ప్రభుత్వాస్పత్రుల్లో చూపించాలని డీఎంహెచ్‌ఓ అన్నారు. అన్ని పీహెచ్‌సీల్లో ప్లేట్‌లెట్స్‌ తదితర టెస్ట్‌లు చేస్తారన్నారు.   8 వారాలు స్పెషల్‌ డ్రైవ్‌:  కనిగిరిలో వైద్య, మున్సిపల్‌ సిబ్బందితో 8 వారాలు స్పెషల్‌ డ్రైవ్‌ నిర్వహిస్తున్నట్లు డీఎంహెచ్‌ఓ తెలిపారు. ప్రతి వారం 20 వార్డుల్లో రెండు టీంలు అవగాహన కార్యక్రమంతో పాటు, పారిశుద్ధ్య చర్యలు చేపడుతున్నట్లు చెప్పారు. ఈమేరకు ప్రణాళికపై కమిషనర్‌ కేవీ పద్మావతి, డాక్టర్‌ కేఎన్‌ రాజ్యలక్ష్మితో చర్చించారు. సుమారు 150  మంది సిబ్బంది స్పెషల్‌ డ్రైవ్‌లో పాల్గొంటారని డీఎంహెచ్‌ఓ చెప్పారు. కార్యక్రమంలో జిల్లా గణాంకాధికారి  శ్రీధర్, హెల్త్‌ ఎడ్యుకేటర్‌ ఎంవీ విజయభాస్కర్, ఎంపీహెచ్‌ఈఓ హృదయరంజన్, సూపర్‌వైజర్లు బాలుడు, ఇబ్రహీం, రత్న శోభ, ఎస్తేరురాణి, బాలశ్రీను, మస్తాన్‌ తదితరులు పాల్గొన్నారు.    


 సాక్షి ప్రతినిధి, ఆదిలాబాద్ : విష జ్వరాలు.. ఆయా కారణాలతో చిన్నారులు పిట్టల్లా రాలుతున్నారు. భావిభారత పౌరులుగా ఎదగాల్సిన వారు డెంగీ, మలేరియా వంటి వ్యాధులతో బాల్యంలోనే తనువు చాలి స్తున్నారు. దీనికితోడు నీటి బకెట్లో పడి చనిపోవడం.. ఏదో ఓ వస్తువు మింగి తనువు చాలించడం వంటివి మనం చూస్తూనే ఉన్నాం. దీంతో కన్నవారికి కడుపుకోత మిగులుతోంది. వీటిలో జ్వరాలతో చనిపోయిన వారి సంఖ్య ఎక్కువగా ఉంది.
 
 జ్వర మరణాలు రోజురోజుకూ పెరుగుతుండడం ఆందోళనకు గురిచేసే అంశం. ముఖ్యంగా మారుమూల గిరిజన గూడాల్లో జ్వరాల తీవ్రత అధికంగా ఉంది. ఇంటికి ఒకరిద్దరు చొప్పున మంచం పట్టారు. తమ ఆశల ప్రతిరూపాలు కళ్ల ముం దే కానరాని లోకాలకు వెళ్లిపోతుంటే తల్లిదండ్రులు కన్నీటి పర్యంతమవుతున్నారు. ఒక్క అక్టోబర్ మాసంలోనే విష జ్వారాల బారిన పడి 15 ఏళ్లలోపు చిన్నారులు 16 మంది చనిపోయారంటే పరిస్థితి తీవ్రతకు అద్దం పడుతోంది.
 
  ఈ నెల 2న ఒక్కరోజే నార్నూర్, కాసిపేట మండలాల్లో నలుగురు చిన్నారులు మృత్యువాత పడ్డారు. ఈ వారంలో ఇప్పటివరకు పది మంది చిన్నారులు ప్రాణాలు వదిలారు. ఈ విష జ్వరా లు చిన్నారులపై తీవ్ర ప్రభావం చూపుతున్నాయి. ఈ స్థాయిలో మరణాలు జరుగుతున్నా పాలకులు అసలు డెంగీ మరణాలు ఒక్కటి కూ డా లేవని చెప్పడం శోచనీయం.
 
  డెంగీ పాజిటివ్ కేసులు నమోదవుతున్నాయే తప్ప మరణాలు అసలే లేవని వైద్యారోగ్య శాఖ మంత్రి టి.రాజయ్య ఇటీవల జిల్లా పర్యటనలో పేర్కొనడం తీవ్ర విమర్శలకు దారితీస్తోంది. జ్వరాల తీవ్రత పెరిగిన ప్రాంతాల్లో వైద్యారోగ్య శాఖ అధికారులు మొక్కుబడిగా వైద్య శిబిరాలు నిర్వహించి చేతులు దులుపుకుంటున్నారు. విష జ్వరాలు ప్రబలకుండా తీసుకోవాల్సిన చర్యలపై దృష్టి సారించడం లేదనే అభిప్రాయం వ్యక్తమవుతోంది.
 
  నిర్ధారణలోపే మరణం..
  చిన్నారులకు డెంగీ, మలేరియా వంటి జ్వరాలు వచ్చినట్లు నిర్ధారణ అయ్యేలోపే మృత్యువాత పడుతున్నట్లు వైద్యులు పేర్కొంటున్నారు. శరీరంలోకి వెళ్లిన డెంగీ కారక వైరస్ ఎనిమిది నుంచి పది రోజుల్లోనే తీవ్ర ప్రభావాన్ని చూపుతుందని చెబుతున్నారు. జ్వరాల బారిన పడిన చిన్నారులకు సకాలంలో వైద్యం అందకుంటేనే మరణాలకు దారితీస్తుందని అభిప్రాయపడుతున్నారు. క్షేత్ర స్థాయిలో వైద్య సేవలందించాల్సిన పీహెచ్‌సీల్లో ఈ వ్యాధుల నిర్ధారణ సరిగా జరగకపోవడంతో మరణాలు చోటుచేసుకుంటున్నాయి.
 
  పారిశుధ్య లోపమే ప్రధాన కారణమా..?
  గ్రామాల్లో పారిశుధ్య చర్యల లోపం ఫలితంగా ప్రాణాలు గాలిలో కలుస్తున్నాయి. ముఖ్యంగా దోమల నివారణకు ప్రణాళికబద ్ధమైన చర్యలు లేకపోవడంతో ఈ పరిస్థితులకు దారితీస్తోందనే విమర్శలు ఉన్నాయి. వర్షాకాలం ప్రారంభంలోనే పంచాయతీ, వైద్యారోగ్య, ఆర్‌డబ్ల్యూఎస్ శాఖల అధికారులు, సిబ్బంది సమన్వయంతో పారిశుధ్య చర్యలు చేపట్టాలి.
 
 ముఖ్యంగా దోమలు వృద్ధి చెందే జూన్ మాసంలోనే యాంటీ లార్వ ఆపరేషన్లు నిర్వహించాలి. దోమలు గుడ్డు దశలో ఉన్నప్పుడే జూన్ నుంచి అక్టోబర్ వరకు ఎబేట్, థిమోపాస్, ఎంల్‌ఆయిల్ వంటి స్ప్రే చేయాలి. ముఖ్యంగా నీరు నిల్వ ఉండే ప్రాంతాల్లో ఈ చర్యలు తీసుకోవాలి. అలాగే పారిశుధ్యంపై క్షేత్ర స్థాయిలో అవగాహనకార్యక్రమాలు చేపట్టాలి. కానీ.. ఈ శాఖల అధికారులు ఇవేవీ పట్టించుకోకపోవడంతో ప్రజల ప్రాణాల మీదికొస్తోంది.
 
  పీడిస్తున్న రక్తహీనత..
  రక్తహీనత కూడా చిన్నారులను మృత్యు ఒడికి చేరుస్తోంది. వ్యాధి నిరోధక శక్తి తగ్గిపోయి జ్వరం వస్తే వారాల తరబడి కోలుకోలేక పోతున్నారు. ముఖ్యంగా చిన్నారుల్లో రక్తహీనత తీవ్రత ఎక్కువగా ఉంది. రక్తంలో సాధారణంగా 12 నుంచి 16 శాతం ఉండాల్సిన హిమోగ్లోబిన్ ఆరు శాతానికి పడిపోతోందని వైద్యులు పేర్కొంటున్నారు.