కవాడిగూడ: సమ్మె కొనసాగిస్తున్న జూడాలు బుధవారం వినూత్నరీతిలో నిరసనవ్యక్తం చేశారు. రిలే నిరాహార దీక్షలు 18వ రోజుకు చేరుకున్నాయి. ఈ సందర్భంగా జూనియర్ డాక్టర్లు పరీక్షిత్, కైలాష్‌పతి, సూర్యప్రభాత్, మహేందర్, గౌతమ్, రేష్మ, నిఖిల్‌లు దీక్షలో కూర్చున్నారు. దీక్షా శిబిరంలో డిప్యూటీ సీఎం, వైద్య ఆరోగ్య శాఖ మంత్రి రాజయ్య మాస్క్ ధరించిన నిరసనకారునికి జూనియర్ డాక్టర్లు చెవి పరీక్షలు చేశారు.
 
 తమ సమస్యలు పట్టించుకోనందున ఇలా వినూత్నంగా నిరసనవ్యక్తం చేశారు. అనంతరం జూనియర్ డాక్టర్స్ అసోసియేషన్ కన్వీనర్ డాక్టర్ శ్రీనివాస్, అధ్యక్షులు డాక్టర్ క్రాంతి చైతన్యలు మాట్లాడుతూ గ్రామీణ సేవ చేసేందుకు జూనియర్ డాక్టర్లు సిద్ధంగా ఉన్నామని చెబుతున్నప్పటికీ వైద్య, ఆరోగ్య శాఖ మాత్యులు సరైన రీతిలోస్పందించడం లేదని ఆరోపించారు. కార్యక్రమంలో జూనియర్ డాక్టర్ల అసోసియేషన్ నాయకులు నాగార్జున, అనిల్, భావ్య, స్వప్నిక, శిరీష తదితరులు పాల్గొన్నారు.
  


 వరంగల్: ప్రొఫెసర్ జయశంకర్ ఆశయాలకనుగుణంగా ప్రభుత్వం నడుచుకుంటుందని ఉప ముఖ్యమంత్రి డాక్టర్ టి.రాజయ్య చెప్పారు. ఫ్రొఫెసర్ జయశంకర్ జయంతి సందర్భంగా బుధవారం హన్మకొండలోని ఏకశిల పార్కులో జయశంకర్ విగ్రహాన్ని రాజయ్య ఆవిష్కరించారు. అనంతరం వరంగల్ పశ్చిమ ఎమ్మెల్యే దాస్యం వినయ్ భాస్కర్ అధ్యక్షతన జరిగిన సభలో రాజయ్య మాట్లాడుతూ.. సార్ ఆశించిన నవ తెలంగాణ నిర్మాణానికి ప్రజలందరూ భాగస్వాములు కావాలన్నారు. స్పీకర్ సిరికొండ మధుసూదనాచారి మాట్లాడుతూ ప్రొఫెసర్ జయశంకర్ విలక్షణ, విశిష్టవ్యక్తి అని, దార్శనికుడని కొనియాడారు. ఏకశిల పార్కును జయశంకర్ స్మృతి వనంగా తీర్చిదిద్దాలని ఎంపీ కడియం శ్రీహరి కోరారు.
 
 ఉద్యమ స్ఫూర్తి ప్రదాత: కోదండరాం
 వికారాబాద్: తెలంగాణ ఉద్యమ స్ఫూర్తి ప్రదాత ప్రొఫెసర్ జయశంకర్ అని, రాష్ట్ర సాధనలో ఆయన ముఖ్య భూమిక పోషించారని జేఏసీ చైర్మన్ కోదండరాం కొనియాడారు. రంగారెడ్డి జిల్లా వికారాబాద్‌లో తెలంగాణ లెక్చరర్స్ ఫోరం ఆధ్వర్యంలో  బుధవారం జయశంకర్ 82వ జయంతి వేడుకలను నిర్వహించారు. ఈ సందర్భంగా ఆయన చిత్రపటానికి పూలమాలలు వేసి నివాళులు అర్పించారు. అనంతరం కోదండరాం మాట్లాడారు. ఉద్యోగుల సంఘం అధ్యక్షుడు విఠల్ మాట్లాడుతూ విద్యార్థులు ఉద్యమంలో కీలక పాత్ర పోషించారన్నారు.
 
 ఢిల్లీలో టీఆర్‌ఎస్ ఎంపీల ఘన నివాళి
 న్యూఢిల్లీ: తెలంగాణ ఉద్యమంలో జయశంకర్ పోరాటాలు స్ఫూర్తిదాయకమని టీఆర్‌ఎస్ ఎంపీ లు పిలుపునిచ్చారు.జయశంకర్ జయంతి సందర్భంగా బుధవారమిక్కడి తెలంగాణ భవన్‌లో ఎంపీలు ఘనంగా నివాళులు అర్పించారు. పార్టీ ఎంపీలు కేశవరావు, జితేందర్‌రెడ్డి, బూర నర్సయ్య గౌడ్, బీబీపాటిల్, విశ్వేశ్వర్‌రెడ్డి, వినోద్‌తోపాటు మాజీ మంత్రి శంకర్‌రావు పాల్గొన్నారు.


 హైదరాబాద్: ప్రైవేట్ మెడికల్ కాలేజీ యాజమాన్యాలు ఎంబీబీఎస్ సీట్లను అంగట్లో సరుకుల్లా అమ్ముకుంటున్నాయని, వారి ఆగడాలకు కళ్లెం వేయాలని బీసీ సంక్షేమ సంఘం కేంద్ర అధ్యక్షుడు ఆర్.కృష్ణయ్య డిమాండ్ చేశారు. మంగళవారం ఆయన ఉపముఖ్యమంత్రి, ఆరోగ్య శాఖమంత్రి టి.రాజయ్యను పలు బీసీ సంఘాల ప్రతినిధులతో కృష్ణయ్య కలిశారు.
 
 ఈ సందర్భంగా మేనేజ్‌మెంట్ కోటాను తగ్గించాలని, ప్రైవేట్ మెడికల్ కాలేజీ యాజమాన్యాలకు సొంత ప్రవేశ పరీక్ష పెట్టుకునే అధికారం ఇవ్వరాదని కోరారు. అలాగే ఎంబీబీఎస్, బీడీఎస్ ఫీజులను పెంచరాదని, మూడు కేటగిరీలను, రెండు కేటగిరీలకు కుదించాలని, యాజమాన్య కోటాను 60నుంచి 20శాతానికి తగ్గించాలని డిమాండ్ చేశారు. గతేడాది మాదిరిగానే ఈ ఏడాది కూడా ఎంబీబీఎస్, బీడీఎస్ కౌన్సిలింగ్‌ను ప్రభుత్వమే జరుపుతుందని, మేనేజ్‌మెంట్ కోటాను తగ్గించడానికి త్వరలో ఉన్నతస్థాయి సమావేశం ఏర్పాటు చేస్తామని మంత్రి హామీ ఇచ్చినట్లు కృష్ణయ్య తెలిపారు.