రుణమాఫీపై చంద్రబాబు రోజుకోమాట
 
      బ్యాంకు నోటీసులతో రైతుల ఆందోళన
 
      కొత్త రుణాలివ్వకపోతే ఖరీఫ్ పెట్టుబడులెలా
 
      ఉద్యమ బాటలో రైతు, డ్వాక్రా సంఘాలు
 
 చోడవరం: ‘ఏరు దాటే వరకు ఓడ మల్లన్న.. ఏరు దాటాక బోడి మల్లన్న’... అన్నట్టుంది తెలుగుదేశం ప్రభుత్వ వైఖరి. ఎన్నికల ముందు అధికారం కోసం అమలు కాని హామీలు ప్రకటించింది. వ్యవసాయ, డ్వాక్రా రుణాలను మాఫీ చేస్తానని హామీ ఇచ్చింది. తమ ప్రభుత్వం వస్తే వ్యవసాయ రుణాలు మాఫీ చేస్తామని, ఎవరూ బకాయిలు చెల్లించవద్దని కూడా తెలుగుదేశం అధినేత చంద్రబాబు సూచించారు.
 
 అప్పును సజావుగా చెల్లించే రైతులు ఏడాదిగా రుణాలు  చెల్లించడం మానేశారు. డ్వాక్రా సభ్యులు రుణవాయిదాల చెల్లింపును నిలిపివేశారు. తీరా అధికారంలోకి వచ్చాక టీడీపీ రుణమాఫీపై పూటకో మాట మాట్లాడుతోంది. రైతులు, డ్వాక్రా మహిళల్లో అయోమయం నెలకొంది. కాలయాపన చేస్తుండటంతో రైతులు, డ్వాక్రా మహిళలు ఆగ్రహంతో ఊగిపోతున్నారు. ఉద్యమాలతో నిరసన గళం వినిపిస్తున్నారు.
  
  బ్యాంకు ఒత్తిడి చేస్తోంది
  వ్యవసాయ పెట్టుబడుల కోసం తుమ్మపాల యూనియన్ బ్యాం క్‌లో రూ.లక్ష రుణం తెచ్చాను. పంట సరిగ్గా పండక చాలా ఇబ్బందులు పడ్డాను. రుణాలు మాఫీ చేస్తానని చంద్రబాబు హామీ ఇచ్చారు. ఇప్పుడు అధికారంలోకి వచ్చాక ఏమీ మాట్లాడటం లేదు. అప్పు తీర్చమని బ్యాంక్ వాళ్లు ఒత్తిడి చేస్తున్నారు.
  - గొంప దేముడునాయుడు, రామచంద్రపురం, కె.కోటపాడు
  
  చంద్రబాబు మాట నిలబెట్టుకోవాలి
  చంద్రబాబు మాటలు విని అప్పు చెల్లించలేదు. నాకు ఎకరన్నర పొలం ఉంది. వరి, చెరకు పంటలు వేస్తున్నాను. వ్యవసాయ పెట్టుబడుల కోసం తుమ్మపాల యూని యన్ బ్యాంక్‌లో రూ.50 వేల రుణం తీసుకున్నాను. అప్పు చెల్లించాలని బ్యాంకు అధికారులు నోటీసిచ్చారు. ముఖ్యమంత్రి ఇచ్చిన మాటను నిలబెట్టుకోవాలి.
  - కిల్లి సోమినాయుడు, సింగన్నదొరపాలెం, కె.కోటపాడు
  
  వ్యవసాయం కష్టంగా ఉంది
  వ్యవసాయం చేయడం చాలా కష్టంగా మారింది. రెండేళ్లుగా కరువు వస్తుండటంతో పెట్టుబడులు రావడం లేదు. అధికారంలోకి వచ్చాక చంద్రబాబు ఏమీ చెప్పడం లేదు. హామీ మేరకు అన్ని వ్యవసాయ రుణాలు మాఫీచేయాలి.
  - పెదిరెడ్ల మల్లునాయుడు, కొండపాలెం, బుచ్చెయ్యపేట
  
  మాఫీ చేయకపోతే ఆందోళన చేస్తాం
  వ్యవసాయ పెట్టుబడుల కోసం గత ఏడాది బుచ్చెయ్యపేట ఐఓబి బ్యాంక్‌లో బంగారంపై రూ.20 వేలు రుణం తీసుకున్నాను. ప్రభుత్వం రుణమాఫీ చేయకపోతే ఆందోళన దిగుతాం.           
  - గరికి అర్జున, పెదమదీన, బుచ్చెయ్యపేట
  
  మాఫీ చేస్తారని రుణం చెల్లించలేదు
  రెండేళ్ల కిందట మా డ్వాక్రా సంఘం తరపున రూ.3 లక్షలు బుచ్చెయ్యపేట ఐఓబి బ్యాంక్‌లో డ్వాక్రా రుణం తీసుకున్నాం. చంద్రబాబు హామీతో మూడు నెలలుగా అప్పు వాయిదాలు కట్టడం మానేశాం.
  - కోనపల్లి రాజు, డ్వాక్రాగ్రూపు అధ్యక్షురాలు, కొండపాలెం, బుచ్చెయ్యపేట
  
  రుణం ఎలా తీర్చాలో తెలియడం లేదు
  తెలుగుతల్లి డ్వాక్రా సంఘం పేరున 2013 డిసెంబరులో యూనియన్ బ్యాంక్‌లో రూ.3 లక్షల రుణం తీసుకున్నాం. వాయిదాలు చెల్లించాలని బ్యాంక్ ఒత్తిడి తెస్తోంది.
  - వంటాకు సుశీల, డ్వాక్రా మహిళ, లక్కవరం
  
  బ్యాంకు నోటీసులిచ్చింది
  నాకు ఎకరన్నర భూమి ఉంది. గత ఏడాది జన్నవరం సహకార బ్యాంక్‌లో రూ.20 వేలు, విజయరామరాజుపేట గ్రామీణ బ్యాంకులో రూ.20 వేలు రుణం తీసుకున్నాను. అప్పు తీర్చమని గ్రామీణ బ్యాంక్ నోటీసు ఇచ్చింది.                
  - మంగ అప్పలనాయుడు, గౌరీపట్నం, చోడవరం
  
  ఖరీఫ్ పెట్టుబడికి డబ్బుల్లేవు
  వ్యవసాయ రుణమాఫీపై ప్రభుత్వం నాన్చడం వల్ల చా లా ఇబ్బంది పడుతున్నాం. ఏడాది కిందట  లక్కవరం సహకార బ్యాంక్‌లో రూ.50 వేల రుణం తీసుకున్నాం. ఖరీఫ్ పెట్టుబడులకు డబ్బుల్లేవు. వెంటనే మాఫీ చే యాలి.                   
  - జెర్రిపోతుల అప్పారావు, లక్కవరం, చోడవరం
  


  సాక్షి, ఒంగోలు : ‘డామిట్..కథ అడ్డం తిరిగింది..’ అన్న చందంగా జిల్లా కేంద్రంలో శుక్రవారం తెలుగు తమ్ముళ్ల ప్రయత్నం అభాసుపాలైంది. తొలిసంతకంతో రైతు రుణమాఫీ అమలు చేయలేకపోయిన ప్రభుత్వం.. అధికార పార్టీ నేతలతో ప్రస్తుతం పూటకోమాట చెప్పిస్తోంది. ఆధార్‌కార్డు లింకు, చిన్నసన్నకారు రైతులకే లబ్ధి, రూ.1 లక్షలోపు రుణాల్నే మాఫీ చేస్తారంటూ.. తదితర ప్రకటనలతో నేతలు ఊదరగొడుతున్న సంగతి తెలిసిందే. ప్రభుత్వం ఇచ్చినకాడికి వచ్చిందే దక్కుదలగా రైతులను మానసికంగా సిద్ధం చేయాలనే ప్రణాళికా రచన కొనసాగుతోంది.
  
  = ఇదే విషయాన్ని ఇప్పటికే రైతుసంఘాల నేతలు గుర్తించినప్పటికీ, ప్రభుత్వం నుంచి పంటరుణ మాఫీపై స్పష్టత కోసం ఎదురు చూస్తున్నట్లు తెలుస్తోంది.
  = ఈక్రమంలో ప్రకాశం జిల్లా వేదికగా చేసుకుని తాము చెప్పినట్టు రైతులతో తలాడించవచ్చనే ఎత్తుగడకు టీడీపీ నేతలు తెరతీశారు. శాస్త్రవేత్తలు, రైతులతో ముఖాముఖి అంటూ ఆ కార్యక్రమానికి ముఖ్యఅతిథిగా రాష్ట్ర వ్యవసాయశాఖ మంత్రి ప్రత్తిపాటి పుల్లారావును ఆహ్వానించారు.
  = ఈసందర్భంగా ఆయన ప్రసంగం ఆద్యంతం రాష్ట్రంలోని 13 జిల్లాల సమస్యలు, ప్రభుత్వ ఖజానా ఆదాయం తదితర వివరాలను ప్రస్తావిస్తూ.. రైతుల పంటరుణాలు మాఫీ కావాలంటే కేంద్ర సహకారం తప్పనిసరని, కేంద్రం మొండిచేయి చూపితే రాష్ట్ర ప్రభుత్వమేమీ చేయలేద న్నారు.
  = ఈ ప్రస్తావనపై అక్కడున్న రైతులు తీవ్ర ఆగ్రహం వ్యక్తం చేశారు. ఎన్నికల్లో అజెండా హామీని తొలి సంతకంతోనే నెరవేర్చుకుంటామన్న పెద్దలు.. నేడు అధికారంలోకి రాగానే కేంద్రం పేరుతో కుంటిసాకులు చెప్పొద్దంటూ బహిరంగంగానే కేకలేస్తూ అసంతృప్తిని వెళ్లగక్కారు.
  = అధికార పార్టీ నేతల ప్రకటనల మేరకు ఆధార్‌కార్డు లింకు, రూ.లక్షలోపు మాఫీ, చిన్నసన్నకారు రైతులనే నిబంధనలు పెట్టరాదన్నారు. రుణమాఫీతో పాటు గతంలో జరిగిన ప్రకృతి వైపరీత్యాలకు సంబంధించి పరిహారం పంపిణీపై స్పష్టతనివ్వాలని మంత్రిని డిమాండ్ చేశారు.
  = ఊహించని పరిణామానికి మంత్రి ప్రత్తిపాటి పుల్లారావుతో పాటు అక్కడున్న అధికారపార్టీ నేతలు బిత్తరపోయారు. షాక్‌లోనుంచి తేరుకున్న అధికారపార్టీ నేతలు కొందరు రంగంలోకి దిగి ఆందోళన చేస్తోన్న రైతులను సముదాయించే ప్రయత్నం చేశారు. దీంతో స్వపక్షంలోనే ఇరువర్గాలు మంత్రి సమక్షంలో వాదులాడుకున్నారు.
  = అదేవిధంగా జిల్లా అభివృద్ధిని టీడీపీ నేతలు పట్టించుకోవడంలేదని, కేంద్ర విద్యాసంస్థలతో పాటు ఇతర అభివృద్ధి పనుల ప్రతిపాదనలు ముఖ్యమంత్రి చంద్రబాబు సొంత జిల్లాకు, గుంటూరు, విజయవాడ, విశాఖ జిల్లాలకే పరిమితం చేస్తున్నారంటూ పలువురు ఆందోళన వ్యక్తం చేశారు. సీమాంధ్ర జిల్లాలకు మధ్యలోనే ఒంగోలును రాష్ట్ర రాజధానిగా ప్రకటించాల్సిందేనని డిమాండ్ చేశారు.
  
  రైతు సంక్షేమానికి కృషి..
 శనగల కొనుగోలుపై ప్రభుత్వం సీరియస్‌గా ఆలోచిస్తోందని వ్యవసాయశాఖ మంత్రి ప్రత్తిపాటి పుల్లారావు తెలిపారు. స్థానిక వ్యవసాయ ుమార్కెట్ యార్డులో శుక్రవారం ఆయన విలేకరుల సమావేశంలో మాట్లాడుతూ.. రాష్ట్రంలోనే ప్రకాశం జిల్లాలో శనగలు టన్నుల కొద్దీ నిల్వలు ఉన్నాయని.. ప్రస్తుత ధర రూ.3,100 కొంటే రైతులకు నష్టం వస్తుందని తెలిసే వెనకడుగు వేశామన్నారు. రైతుకు గిట్టుబాటు ధర కనీసం రూ.3,500 కొనాల్సి ఉందన్నారు.
 
 ఇతర రాష్ట్రాలకు ఎగుమతులు ఉన్నాయా? లేదా..? అనే విషయాన్ని కూడా తెలుసుకుంటామని చెప్పారు. రైతులకు బ్యాంకులు నోటీసులు ఇవ్వకుండా ఆదేశాలు జారీ చేస్తామన్నారు.  సుబాబుల్, జామాయిల్‌కు గిట్టుబాటు ధర కల్పించేలా చర్యలు తీసుకోవాలని మార్కెటింగ్ శాఖ జేడీ శ్రీనివాసరావుని మంత్రి ఆదేశించారు. వ్యాపారులు, రైతులతో కలిసి కలెక్టర్‌తో మీటింగ్ ఏర్పాటు చేయించి గిట్టుబాటు ధర కల్పించేలా వ్యాపారులపై ఒత్తిడి తీసుకురావాలని ఆదేశించారు. కనీసం రూ.4,400 కొనుగోలుకు చర్యలు తీసుకోవాలన్నారు.