సాక్షి, సిటీబ్యూరో: పనిచేసే కార్యాలయం...ఇంటరయ్వలు జరిగే ప్రాంతం...చదువుకునే ప్రాంతం...ఇలా ఎక్కడైనా పరిచయమైన యువతులతో సన్నిహితంగా మెలుగుతూనే వేధింపులకు గురిచేస్తూ సైబరాబాద్‌ షీ బృందాలకు చిక్కుతున్న ఆకతాయిల సంఖ్య పెరుగుతోంది. మార్చి 1 నుంచి 16వ తేదీవరకు సైబరాబాద్‌ షీ బృందాలు సామాజిక మాధ్యమాల ద్వారా వచ్చిన 112 ఫిర్యాదుల్లో 62 కేసులు నమోదు చేశారు. ఇందులో 54 మంది నిందితులను అరెస్ట్‌ చేశారు. వీటిలో 16 క్రిమినల్‌ కేసులుండగా, 36 పెట్టీ కేసులు ఉన్నాయి. ఈవ్‌టీజర్లందరికి గచ్చిబౌలిలోని సైబరాబాద్‌ పోలీసు కమిషనరేట్‌ కార్యాలయంలోని ఉమెన్‌ అండ్‌ చిల్డ్రన్‌ సేఫ్టీ వింగ్‌ వద్ద కౌన్సెలింగ్‌ నిర్వహించినట్లు షీ టీమ్స్‌ ఇన్‌చార్జ్‌ అనసూయ మంగళవారం తెలిపారు. బస్‌స్టాప్‌లు, షాపింగ్‌ మాల్స్, రైల్వే స్టేషన్లు, ట్యుటోరియల్స్, కాలేజీల్లో 129 డెకాయ్‌ అపరేషన్లు నిర్వహించినట్లు తెలిపారు. 61 జాగృతి కార్యక్రమాలు నిర్వహించి 14,940 మందికి మహిళా చట్టాలపై అవగాహన కల్పించామన్నారు.   నర్సు పట్ల వైద్యుడి అసభ్యప్రవర్తన... శేర్‌లింగంపల్లి, పట్టణ ప్రాథమిక ఆరోగ్య కేంద్రంలో ఐదేళ్లుగా పనిచేస్తున్న ఓ నర్సుతో ఈ నెల 9న అదే సెంటర్‌లో పని చేస్తున్న వైద్యుడు డాక్టర్‌ రాంరెడ్డి అసభ్యంగా ప్రవర్తించాడు. తన క్యాబిన్‌లో నుంచి ఇతర సిబ్బందిని బయటకు పంపించి బాధితురాలిని పిలిచి అసభ్యంగా వ్యవహరించాడు. దీంతో బాధితురాలు షీ బృందానికి ఫిర్యాదు చేయడంతో రంగంలోకి దిగిన షీ టీమ్‌ సభ్యులు నిందితుడిని అరెస్టు చేసి చందానగర్‌ పోలీసులకు అప్పగించారు. అలాగే మాదాపూర్‌లోని హైటెక్‌సిటీలో ఓ కంపెనీ ఇంటర్వ్యూకు హాజరైన సమయంలో పరిచయమైన కొడారి కృష్ణ అనే యువకుడు ఆమె వివరాలు తీసుకున్నాడు. అనంతరం ఒక నెల తర్వాత గుర్తు తెలియని నంబర్‌ నుంచి ఎస్‌ఎంఎస్‌లు వస్తుండటంతో బాధితురాలికి భర్తతో గొడవ జరిగింది. దీనిపై ఆమె షీ బృందాన్ని ఆశ్రయించడంతో నిందితుడిని అదుపులోకి తీసుకున్న పోలీసులు అతడికి కౌన్సెలింగ్‌ ఇచ్చి బాధితురాలు, ఆమె భర్తకు క్షమాణలు చెప్పించారు. మరో ఘటనలో లైక్‌ యాప్‌ ద్వారా బాధితురాలికి పరిచయమైన అనిల్‌ స్నేహితులుగా మారారు. అయితే తాను ఉంటున్న హాస్టల్‌కు వచ్చి బలవంతంగా తన కారులో ఎక్కించుకొని మత్తు మందు కలిపిన నీళ్లను తాగించడంతో స్పృహ కోల్పోయింది. అయితే మెళకువ వచ్చేసరికి అతడి గదిలో ఇద్దరు స్నేహితులు ఉన్నారు. ఎవరికీ చెప్పవద్దంటూ ఆమెను కొట్టి సైబర్‌ టవర్‌ క్రాస్‌రోడ్డు సమీపంలో వదిలేసి పరారయ్యారు. బాధితురాలు షీ టీమ్‌ను ఆశ్రయించడంతో నిందితుడు అనిల్‌ను అదుపులోకి తీసుకున్నారు. 


 ఆదిలాబాద్ రిమ్స్: డాక్టర్ వేధింపులు భరించలేకపోతున్నానంటూ ఆత్మహత్యాయత్నం చేసిందో వైద్యవిద్యార్థిని. ఆదిలాబాద్ జిల్లా కేంద్రంలోని రిమ్స్ వైద్య కళాశాలలో చోటుచేసుకున్న ఈ సంఘటన స్థానికంగా కలకలం సృష్టించింది. పోలీసులు తెలిపిన వివరాల ప్రకారం..
 
 మంచిర్యాల మండలం తర్లపాడుకు చెందిన యువతి రిమ్స్ లో ఎంబీబీఎస్ సెకండియర్ చదువుతోంది. రిమ్స్ ఆసుపత్రిలోనే జనరల్ ఫిజీషియన్ గా పనిచేస్తున్న వ్యక్తి ఆమెను కొంతకాలంగా వేధిస్తున్నాట్లు తెలిసింది. ఈ క్రమంలోనే శుక్రవారం ఆసుపత్రి ఓపీ భవనంపైకి ఎక్కిన విద్యార్థిని.. కిందికి దూకి ఆత్మహత్యకు యత్నించింది. ఇది గమనించిన ఆసుపత్రి సిబ్బంది ఆమెను అడ్డుకున్నారు. వైద్యుడు తనను లైంగికంగా, మానసికంగా వేధిస్తున్నాడని, ఈ విషయం తల్లిదండ్రులకు చెప్పినా పట్టించుకోవడంలేదని అందుకే చనిపోవాలనుకుంటున్నట్లు బాధిత విద్యార్థిని వెల్లడించింది.
 
 తండ్రి మాటలతో గందరగోళం
 సిబ్బంది ఇచ్చిన సమాచారంతో రిమ్స్ కు చేరుకున్న పోలీసులు విద్యార్థిని తల్లిదండ్రులను పిలిపించి మాట్లాడగా.. అమ్మాయి ఆరోగ్య పరిస్థితి బాగోలేదని ఆమె తండ్రి పోలీసులకు చెప్పాడు. దీంతో కాసేపు గందరగోళ వాతావరణం ఏర్పడింది. అనంతరం బాధితురాలికి చికిత్స నిమిత్తం హైదరాబాద్ తరలిస్తామని, వేధింపుల వ్యవహారంపై దర్యాప్తు చేస్తామని టూ టౌన్ ఎస్సై విష్ణు వెల్లడించారు. కాగా, వైద్యుడితో పాటు కొంత మంది విద్యార్థులు కూడా ఆమెను వేధించినట్లు తెలుస్తోంది. బాధితురాలి ఆరోగ్యం కుదుటపడిన తర్వాతగానీ నిజానిజాలు వెలుగులోకి రావని పోలీసులు భావిస్తున్నారు.