హైదరాబాద్, బిజినెస్‌ బ్యూరో: వాహన తయారీ దిగ్గజం మారుతీ సుజుకీ ఈకో వ్యాన్‌ సరికొత్త రికార్డు నమోదు చేసింది. తాజాగా 10 లక్షల యూనిట్ల అమ్మకాల మైలురాయిని చేరుకుంది. 2010లో భారత మార్కెట్లోకి ఈకో ప్రవేశించింది. 5, 7 సీట్లు, కార్గో, టూర్, అంబులెన్స్‌ వంటి 13 వేరియంట్లలో ఇది లభిస్తుంది. వ్యాన్స్‌ విభాగంలో 94 శాతం వాటా ఈకో కైవసం చేసుకుందని మారుతీ సుజుకీ ఇండియా మార్కెటింగ్, సేల్స్‌ సీనియర్‌ ఎగ్జిక్యూటివ్‌ ఆఫీసర్‌ శశాంక్‌ శ్రీవాస్తవ తెలిపారు. తొలి 5 లక్షల యూనిట్లకు ఎనమిదేళ్లు పట్టింది. మిగిలిన 5 లక్షల యూనిట్ల విక్రయాలు అయిదేళ్లలోపే పూర్తి చేశామన్నారు. 1.2 లీటర్‌ అడ్వాన్స్‌డ్‌ కె–సిరీస్‌ డ్యూయల్‌ జెట్, డ్యూయల్‌ వీవీటీ ఇంజన్‌తో ఈకో రూపుదిద్దుకుంది. మైలేజీ పెట్రోల్‌ వేరియంట్‌ లీటరుకు 20.2 కిలోమీటర్లు, ఎస్‌–సీఎన్‌జీ వేరియంట్‌ కేజీకి 27.05 కిలోమీటర్లు ఇస్తుందని కంపెనీ తెలిపింది.  

వాహనానికి బీమా తీసుకోవడం నిబంధనల రీత్యా తప్పనిసరి. ఏటేటా వాహన ప్రీమియం ఖరీదయిపోతోంది. ఈ క్రమంలో ప్రీమియం భారం కాస్త తగ్గించుకునేందుకు డిజిటల్‌ పాలసీలపై దృష్టి సారించొచ్చు. ఆన్‌లైన్‌లోనే సేవలతో దూసుకుపోతున్న అకో, గో డిజిట్‌ సంస్థలు పోటా పోటీగా మంచి ఫీచర్లతో పాలసీలను ఆఫర్‌ చేస్తున్నాయి. దీంతో యువతలో ఈ బీమా సంస్థలకు ఇటీవలి కాలంలో ప్రాచుర్యం పెరిగింది. కొనుగోలు ఎంతో సులభం కావడం, ప్రీమియం తక్కువగా ఉండడం వారికి ఎంతో సౌకర్యాన్నిస్తున్నాయి. అకో, గో డిజిట్‌ సంస్థలు నూరు శాతం ఆన్‌లైన్‌ కార్యకలాపాలకే పరిమితమయ్యాయి. భౌతికంగా వీటికి శాఖలు చాలా తక్కువగా ఉన్నాయి. దీంతో వీటికి పరిపాలన, నిర్వహణ చార్జీలు ఇతర ప్రధాన బీమా సంస్థలతో పోలిస్తే తక్కువగా ఉంటాయి. కనుక ఈ సంస్థలు 20–30 శాతం తక్కువ ప్రీమియానికే మోటార్‌ పాలసీలను ఆఫర్‌ చేస్తున్నాయి. ఈ రెండు సంస్థలకు మోటారు ఇన్సూరెన్స్‌ మార్కెట్లో ప్రస్తుతానికి 3–4 శాతం వాటా ఉంది. కానీ, ఇతర సంస్థలతో పోలిస్తే ఇవి ఎంతో వేగంగా తమ వ్యాపారాన్ని విస్తృతం చేసుకుంటున్నాయి. పాలసీ రెన్యువల్‌ చేసుకునే సమయం వస్తే, ఈ సంస్థలను ఆశ్రయించొచ్చా..? ఈ ప్రశ్న మీకు ఎదురైతే.. సమాధానం వెతుక్కునేందుకు ఇక్కడున్న వివరాలను సమగ్రంగా తెలుసుకోవాల్సిందే. మోటారు ఇన్సూరెన్స్‌లో అతిపెద్ద సంస్థగా ఉన్న ఐసీఐసీఐ లాంబార్డ్‌ జనరల్‌ ఇన్సూరెన్స్, అకో, గో డిజిట్‌ సంస్థల మధ్య కొన్ని సేవల పరంగా అంతరాన్ని పరిశీలించొచ్చు.. అకో జనరల్‌ ఇన్సూరెన్స్‌ సాధారణ బీమా వ్యాపార కంపెనీ అయిన అకో జనరల్‌ ఇన్సూరెన్స్‌ 2017లో కార్యకలాపాలు ప్రారంభించింది. మోటార్, హెల్త్, మొబైల్, ట్రావెల్‌ ఇన్సూరెన్స్‌ పాలసీలను ఈ సంస్థ అందిస్తోంది. అమెజాన్, కేటమరాన్‌ వెంచర్స్, సైఫ్‌ పార్ట్‌నర్స్‌ ఈ సంస్థలో పెట్టుబడులు పెట్టాయి. ఈ సంస్థ అందించే మోటార్‌ ఇన్సూరెన్స్‌ పాలసీలో.. రోడ్డు ప్రమాదం, అగ్ని ప్రమాదం, ప్రకృతి విపత్తుల కారణంగా సొంత వాహనానికి, మూడో పార్టీ వాహనానికి నష్టం జరిగితే కవరేజీ ఉంటుంది. వాహనం చోరీకి గురైనా బీమా లభిస్తుంది. అలాగే, వాహనదారుడికి వ్యక్తిగత ప్రమాద బీమా కవరేజీ కూడా ఇందులో ఉంటుంది. జీరో డిప్రీసియేషన్‌ను యాడాన్‌ కవర్‌గా తీసుకోవచ్చు. అంటే వాహనంలోని రబ్బర్, ప్లాస్టిక్‌ తదితర కొన్ని విడిభాగాలకు నష్టం జరిగితే బీమా సంస్థ వాస్తవ విలువలో నిర్ణీత శాతమే పరిహారం చెల్లిస్తుంది. జీరో డిప్రీషియేషన్‌ కవర్‌ తీసుకుంటే 100 శాతం విలువను పరిహారంగా చెల్లిస్తుంది. వీటికి పరిహారం రాదు...   ఈ పాలసీలో నిబంధనలు ఇతర మోటారు పాలసీల్లో మాదిరే ఉంటాయి. మద్యం సేవించి వాహనం నడుపుతూ ప్రమాదానికి గురైతే లేదా కారణమైతే, డ్రైవింగ్‌ లైసెన్స్‌ లేకుండా వాహనం నడుపుతూ ప్రమాదం బారిన పడితే అందుకు జరిగే నష్టానికి కంపెనీ రూపాయి కూడా చెల్లించదు. అలాగే, ప్రమాదం వల్ల కాకుండా ఇతర కారణాల వల్ల వాహనానికి నష్టం జరిగినా పరిహారం రాదు.   కొనుగోలు ఇలా... ఆన్‌లైన్‌ పోర్టల్‌ అకో డాట్‌ కామ్‌కు వెళ్లి మీ కారు నంబర్‌ లేదా బ్రాండ్‌ను ఎంపిక చేసుకుని, కొన్ని ప్రశ్నలకు సమాధానాలు ఇచ్చిన తర్వాత, ఇన్సూర్డ్‌ డిక్లేర్డ్‌ వ్యాల్యూ (ఐడీవీ)ను ఎంచుకోవాలి. తర్వాత ప్రీమియం చెల్లించిన నిమి షాల వ్యవధిలోనే పాలసీ ఈ మెయిల్‌కు వచ్చేస్తుంది. ఈ ప్రక్రియ కేవలం ఐదారు నిమిషాల వ్యవధిలోనే పూర్తయిపోతుంది.     క్లెయిమ్‌ ప్రక్రియ సులభం... ప్రమాదం కారణంగా వాహనానికి నష్టం జరిగితే దేశవ్యాప్తంగా 1,000కుపైగా గ్యారేజ్‌లలో నగదు రహిత సేవలు పొందొచ్చు. క్లెయిమ్‌ కోసం కంపెనీ టోల్‌ఫ్రీ నంబర్‌కు కాల్‌ చేయవచ్చు. లేదా కంపెనీ వెబ్‌సైట్‌లో నమోదు చేసుకోవచ్చు. ఒకవేళ హైదరాబాద్, బెంగళూరు, చెన్నై, ముంబై, ఢిల్లీ నగరాల్లో ఉన్న వారికి రిపేర్‌ కోసం వాహనాన్ని 60 నిమిషాల వ్యవధిలోనే పిక్‌ చేసుకుంటారు. కంపెనీ సర్వేయర్‌ వాహనానికి జరిగిన నష్టాన్ని అంచనా వేస్తారు. ఇతర పట్టణాల్లోని వారు తామే స్వయంగా వాహనాన్ని కంపెనీ నిర్దేశించిన గ్యారేజ్‌కు తీసుకెళ్లాల్సి ఉంటుంది. కారు ఆర్‌సీ, డ్రైవింగ్‌ లైసెన్స్, బీమా పాలసీ జిరాక్స్‌ కాపీ అవసరపడతాయి. క్లెయిమ్‌ను కంపెనీ ఆమోదిస్తే నగదు రహితంగా గ్యారేజ్‌లో రిపేర్‌ చేసి డెలివరీ చేస్తారు. కంపెనీ వెల్లడించిన గణాంకాల ప్రకారం.. మొత్తం క్లెయిమ్‌లలో 72.4 శాతం 15 రోజుల్లోనే పరిష్కారం అవుతున్నాయి. 90 రోజుల వ్యవధిలో ఇది 99.5 శాతంగా ఉంది. వారంలో అన్ని రోజులూ, రోజులో 24 గంటల పాటు కస్టమర్‌ సపోర్ట్‌ సేవలు అందుబాటులో ఉంటాయి.    గో డిజిట్‌ ఇన్సూరెన్స్‌ ఈ సంస్థ కూడా 2017లోనే ఆరంభమైంది. కార్లు, బైక్‌లు, సైకిళ్లు, ట్రావెల్, హోమ్, మొబైల్‌ ఫోన్లకు ఇన్సూరెన్స్‌ పాలసీలను ఆఫర్‌ చేస్తోంది. జీరో డిప్రీసియేషన్‌ కవర్, ఇంజన్‌ ప్రొటెక్షన్‌ కవర్, రిటర్న్‌ టూ ఇన్‌వాయిస్‌ కవరేజీలు ఇందులో ఉన్నాయి. థర్డ్‌ పార్టీ లయబిలిటీ కవర్‌ను కూడా విడిగా తీసుకోవచ్చు. అకో జనరల్‌ ఇన్సూరెన్స్‌ మాదిరిగానే సాధారణ మినహాయింపులు ఇందులోనూ ఉన్నాయి.   కొనుగోలు... కంపెనీ వెబ్‌సైట్‌కు వెళ్లి కారు లేదా బైక్‌ వీటిల్లో వాహనం ఏద న్నది ఎంచుకుని,బ్రాండ్, మోడల్‌ను సెలక్ట్‌ చేసిన తర్వాత, పూర్వపు బీమా సంస్థ వివరాలను ఇవ్వాలి. దాంతో ప్రీమియం ఎంతన్న వివరాలు అక్కడ కనిపిస్తాయి.ప్రీమియం చెల్లించిన అనంతరం మెయిల్‌కు పాలసీ జారీ అయిపోతుంది.   క్లెయిమ్‌ ప్రక్రియ... దేశవ్యాప్తంగా 1,400 గ్యారేజ్‌లలో నగదు రహిత సేవలు అందుబాటులో ఉన్నాయి. కంపెనీ టోల్‌ఫ్రీ నంబర్‌కు కాల్‌ చేసి క్లెయిమ్‌ వివరాలను రికార్డ్‌ చేసుకోవాలి. దాంతో మీ మొబైల్‌కు స్వీయ తనిఖీ పత్రం లింక్‌ ద్వారా వస్తుంది. వాహనానికి నష్టం జరిగితే మొబైల్‌ ద్వారా ఫొటోలు తీసి అప్‌లోడ్‌ చేయాలి. ఈ ఇమేజ్‌లను గో డిజిట్‌ టీమ్‌ పరిశీలించిన అనంతరం ఎంత మొత్తాన్ని క్లెయిమ్‌ చేయవచ్చన్న సమాచారాన్ని అందిస్తుంది. అవసరమైతే సంబంధిత డాక్యుమెంట్లను కూడా అప్‌లోడ్‌ చేయాల్సి వస్తుంది. అనంతరం నగదు రహిత సేవలు అందుబాటులో ఉన్న గ్యారేజ్‌లలో ఒకదాన్ని ఎంచుకోవచ్చు. వాహనం మీ నుంచి పిక్‌ చేసుకుని, రీపెయిర్‌ తర్వాత తిరిగి అందించే సేవలను కూడా కంపెనీ ఆఫర్‌ చేస్తోంది. కంపెనీ చెబుతున్న వివరాల ప్రకారం.. 2018–19 ఆర్థిక సంవత్సరానికి కంపెనీ పరిహారం చెల్లింపుల రేషియో 94.84 శాతం.  ద్విచక్ర వాహన క్లెయిమ్‌కు సగటున 11 రోజుల సమయం తీసుకుంటుంది.   ఐసీఐసీఐ లాంబార్డ్‌ మోటారు వాహన పాలసీల విభాగంలో ఐసీఐసీఐ లాంబార్డ్‌ చాలా పెద్ద సంస్థ. కేవలం మోటారు పాలసీల నుంచే 2018–19లో ఈ సంస్థ రూ.6,400 కోట్ల ప్రీమియం రాబట్టింది. అకో జనరల్‌ రూ.75 కోట్ల ప్రీమియం పొందగా, గో డిజిట్‌ రూ.854 కోట్ల ప్రీమియం ఆదాయం సంపాదించాయి. ఇతర సంస్థల మాదిరే ఐసీఐసీఐ లాంబార్డ్‌ మోటారు బీమాలోనూ అన్ని రకాల ఫీచర్లు, యాడాన్‌ కవరేజీలు అందుబాటులో ఉన్నాయి.   కొనుగోలు...       కారు నంబర్‌ లేదా బ్రాండ్‌ పేరు, ఏ సంవత్సరం మోడల్‌ తదితర వివరాలను ఇవ్వడం ద్వారా ఐసీఐసీఐ లాంబర్డ్‌ ఆన్‌లైన్‌ పోర్టల్‌ నుంచి మోటారు పాలసీ తీసుకోవచ్చు. అన్ని రకాల వాహన పాలసీలు కూడా అందుబాటులో ఉన్నాయి. వాహనం వివరాలను పేర్కొన్న తర్వాత ప్రీమియం వివరాలు కనిపిస్తాయి. భిన్న ఫీచర్లతో తీసుకుంటే ప్రీమియం ఏ మేరకు అన్న వివరాలు కూడా కనిపిస్తాయి. నచ్చిన దానిని ఎంపిక చేసుకుని ప్రీమియం చెల్లించాలి. ఆ సమయంలో ఎటువంటి డాక్యుమెంట్లు సమర్పించాల్సిన అవసరం ఉండదు. జీరో డిప్రీసియేషన్, ఇంజన్‌ ప్రొటెక్షన్, కీ ప్రొటెక్ట్, కన్జ్యూమబుల్స్‌ కవరేజీలను ప్రధాన పాలసీకి జత చేసుకోవచ్చు. ఆన్‌లైన్‌లోనే కాకుండా కంపెనీకి దేశవ్యాప్తంగా విస్తృత సంఖ్యలో శాఖలు కూడా ఉన్నాయి. సమీపంలోని శాఖకు వెళ్లి కూడా పాలసీ తీసుకోవచ్చు.   క్లెయిమ్‌ ప్రక్రియ... దేశవ్యాప్తంగా 8,300 గ్యారేజ్‌లలో నగదు రహిత సేవలు అందుబాటులో ఉన్నాయి. ఆన్‌లైన్‌లో లేదా సమీపంలోని శాఖకు వెళ్లి క్లెయిమ్‌ కోసం దరఖాస్తు చేసుకోవచ్చు. ఆన్‌లైన్‌ విధానంలో అయితే ‘ఇన్సూర్‌యాప్‌’ను డౌన్‌లోడ్‌ చేసుకుని ఇన్‌స్టాల్‌ చేసుకోవాలి. లైవ్‌ వీడియో స్ట్రీమింగ్‌ సదుపాయం ‘ఇన్‌స్టాస్పెక్ట్‌’ ఈ యాప్‌లో ఉంటుంది. దీని ద్వారా క్లెయిమ్‌ను నమోదు చేసుకోవడం ద్వారా సర్వేయర్‌ నుంచి వేగంగా క్లెయిమ్‌కు అనుమతి పొందొచ్చు. అవసరమైన పత్రాలను కూడా యాప్‌లో అప్‌లోడ్‌ చేయాల్సి ఉంటుంది. ఉచితంగా మీ నుంచి వాహనాన్ని స్వీకరించి గ్యారేజీకి తీసుకెళ్లే ఆప్షన్‌ను ఎంచుకోవచ్చు. సమీపంలో ఉన్న కంపెనీ నెట్‌వర్క్‌ గ్యారేజ్‌కు తీసుకెళ్లి రీపెయిర్‌ చేసి వాహనదారుడికి తిరిగి అందిస్తారు. 2018–19 సంవత్సరంలో క్లెయిమ్‌ చెల్లింపుల నిష్పత్తి 98.8 శాతంగా ఉందని కంపెనీ సమాచారం తెలియజేస్తోంది. 24 గంటల పాటు కస్టమర్‌ సేవలు అందుబాటులో ఉంటాయి. ఎంపిక ఏది..? ► ఆన్‌లైన్లో డిజిటల్‌ పాలసీలు తీసుకోవడం ద్వారా ప్రీమియం రూపంలో భారీ ఆదా చేసుకోవచ్చు. అమేజాన్‌ కస్టమర్లు అకో నుంచి ఇంకా చౌకకే పాలసీ పొందే అవకాశం ఉంది.   ► గో డిజిట్‌లో యాడాన్‌ కవరేజీలు ఎక్కువగా అందుబాటులో ఉన్నాయి. థర్డ్‌ పార్టీ స్టాండలోన్‌ కవరేజీ కూడా ఉంది. కానీ, అకో వద్ద ఇవి లేవు.   ► అకో, గో డిజిట్‌ చెల్లింపుల రేషియో 99 శాతం దగ్గరగానే ఉండడం గమనార్హం.   ► ముఖ్యంగా పాలసీ కొనుగోలు చేసే ముందు, ఆయా సంస్థ ఆఫర్‌ చేస్తున్న నెట్‌వర్క్‌ గ్యారేజీలు మీ ప్రాంతంలో అందుబాటులో ఉన్నాయా..? అన్నది  గమనించాలి.   ► అదే ఐసీఐసీఐ లాంబార్డ్‌ నుంచి అయితే ప్రీమియం ఎక్కువ. కానీ, నెట్‌వర్క్‌ గ్యారేజీలు విస్తృతంగా ఉన్నాయి. ఆన్‌లైన్‌తోపాటు, ఆఫ్‌లైన్‌లోనూ పాలసీ, క్లెయిమ్‌లకు అవకాశం ఉంటుంది. అయితే ఆన్‌లైన్‌ సౌకర్యంగా అనిపించని వారికి అనుకూలం.   ► ఒక నిర్ణయానికి ముందు నిపుణుల సలహా మంచిది. ప్రీమియం అంతరాన్ని పరిశీలిస్తే...   రెండు సంవత్సరాల వయసున్న మారుతి సుజుకీ బాలెనో, ఐడీవీ విలువ రూ.5.03 లక్షలకు సమగ్ర కవరేజీతో (వ్యక్తిగత ప్రమాద బీమాతో కూడిన) ఐసీఐసీఐ లాంబార్డ్‌ జనరల్‌ ఇన్సూరెన్స్‌ నుంచి పాలసీ తీసుకుంటే చెల్లించాల్సిన ప్రీమియం రూ.14,604. ఇందులో రోడ్డు సైడ్‌ అసిస్టెన్స్‌కు రూ.199 కూడా కలిసి ఉంది. అదే గో డిజిట్‌లో అయితే ఇదే వాహనానికి ప్రీమియం రూ.11,015, అకోలో రూ.9,276గా ఉన్నాయి.  

సుదీర్ఘ పాలన అనుభవానికి ఆంధ్రా క్రికెట్‌ అసోసియేషన్‌(ఏసీఏ) పెద్దపీట వేసింది. మన జిల్లాకు చెందిన ముండ్ల వెంకటశివారెడ్డికి ఏసీఏలో కీలకమైన సీఈఓ పోస్టును కట్టబెట్టి గౌరవించింది. జిల్లా క్రికెట్‌ అసోసియేషన్‌ అధ్యక్షుడుగా ఉన్న ఈయనకు సీఈఓ పదవి రావడంతో జిల్లా క్రికెట్‌ సంఘానికి మహర్దశ పట్టనుంది.. రానున్న రోజుల్లో కీలకమైన మ్యాచ్‌లను తీసుకురావడంతోపాటు జిల్లాలో క్రికెట్‌ మరింత వేగవంతంగా అభివృద్ధి చెందుతుందని జిల్లా క్రికెట్‌ ప్రేమికులు ఆశాభావం వ్యక్తం చేస్తున్నారు. సాక్షి, కడప :  చెన్నూరు మండలం ముండ్లపల్లె గ్రామానికి చెందిన ఎం. వెంకటశివారెడ్డి ఆంధ్రా క్రికెట్‌ అసోసియేషన్‌ చీఫ్‌ ఎగ్జిక్యూటివ్‌ ఆఫీసర్‌(సీఈఓ)గా నియమితులయ్యారు.  ఏసీఏ నుంచి ఉత్తర్వులు అందాయి. స్వతహాగా క్రికెటర్‌ అయిన వెంకటశివారెడ్డి బ్యాట్స్‌మన్‌గా, ఆఫ్‌ స్పిన్నర్‌గా రాణించారు. ఎస్వీయూ, ఎస్‌కేయూ క్రికెట్‌ జట్లకు ఈయన ప్రాతినిధ్యం వహించడమే కాక ఒకే ఓవర్‌లో 5 వికెట్లు తీసిన రికార్డు కూడా ఈయన సొంతం. ఈయన తండ్రి ఎం. చంద్రశేఖరరెడ్డి జెడ్పీ మాజీ వైస్‌ చైర్మన్‌గా, క్రికెట్‌ సంఘం అధ్యక్షుడుగా ఉన్నా రు. ఆయన స్ఫూర్తితో ఈయన తొలుత (1990) క్రికెట్‌ సంఘంలోకి ప్రవేశించడంతో పాటు అధ్యక్షస్థానాన్ని కైవసం చేసుకున్నారు. అప్పటి నుంచి ఇప్పటి వరకు దాదాపు 29 సంవత్సరాల పాటు ఏకధాటిగా జిల్లా అధ్యక్షుడుగా కొనసాగుతున్నారు. దీంతో పాటు 2011 నుంచి 2019 వరకు ఏసీఏ ఉపాధ్యక్షులుగా పనిచేశారు. దీంతో పాటు 2006లో నిర్వహించిన ఎమ్మెల్సీ ఎన్నికల్లో పట్టభధ్రుల ఎమ్మెల్సీగా ఎన్నికై ప్రజాశీర్వాదం పొందారు. కేడీసీఏ, ఏసీఏ సంఘాల పదవులతో పాటు బీసీసీఐ యాంటీ డోపింగ్‌ కమిటీ సభ్యుడుగా, ఇండియా ఏ టీం మేనేజర్‌గా పనిచేశారు. న్యూజిలాండ్‌ ఏ జట్టు లైజన్‌ ఆఫీసర్‌గా బాధ్యతలు నిర్వహించారు. కడపలో క్రికెట్‌ మైదానం ఏర్పాటులో.. 2004లో  వైఎస్‌ రాజశేఖరరెడ్డి ముఖ్యమంత్రి అయిన వెంటనే జిల్లాలో మంచి క్రికెట్‌ మైదానం ఏర్పాటు చేస్తే బాగుంటుందని ఆయన్ను కలిసి నిర్మాణానికి శ్రీకాకారం చుట్టారు. దీంతో  వైఎస్‌  11 ఎకరాల స్థలం ఇవ్వడంతో పాటు రూ.50 లక్షలు అందజేశారు. 2011 నాటికి 15వేల మంది ప్రేక్షకులు వీక్షించగలిగే మైదానం అందుబాటులోకి వచ్చింది. ఈ వ్యవహారంలో ఈయన కీలకపాత్ర పోషించారు. అప్పటి ఏసీఏ కార్యదర్శి గోకరాజు గంగరాజు సహకారంతో పలు రంజీ, రాష్ట్రస్థాయి టోర్నమెంట్‌లను కడపకు తీసుకువచ్చారు. 2013లో దేశంలోనే మొట్టమొదటి రెసిడెన్షియల్‌ క్రికెట్‌ అకాడమీనీ కడపలో ఏర్పాటు చేయడంలో వెంకటశివారెడ్డి కీలకపాత్ర పోషించారు.  2014లో కేఎస్‌ఆర్‌ఎం, కేఓఆర్‌ఎం మైదానాలను, డ్రస్సింగ్‌ రూంలను అందుబాటులోకి తీసుకువచ్చారు. కడప గడపకు దిగ్గజ క్రికెటర్లు.. 1993లో అప్పటి జిల్లా కలెక్టర్‌ కె.వి. రమణాచారి సూచనల మేరకు అప్పటి కేడీసీఏ అధ్యక్షుడుగా ఉన్న ఎం. వెంకటశివారెడ్డి కడప నగరంలోని డీఎస్‌ఏ మైదానంలో ఛారిటీ మ్యాచ్‌ నిర్వహించారు. 1993 జూన్‌ 12వ తేదీ నిర్వహించిన ఈ చారిటీ మ్యాచ్‌కు క్రికెట్‌ లెజండ్స్‌ సచిన్‌టెండూల్కర్, అనిల్‌కుంబ్లే, జవగళ్‌ శ్రీనాథ్, రవిశాస్త్రి, వెంగ్‌సర్కార్, మనోజ్‌ప్రభాకర్, వెంకటపతిరాజు, కిరణమోరే, వెంకటేష్‌ప్రసాద్, సయ్యద్‌ కిర్మాణీ, సలీల్‌ అంకోలా వంటి దిగ్గజ క్రికెటర్లు కడప గడపకు విచ్చేసి మ్యాచ్‌ ఆడారు. అలా లెజండరీ క్రికెటర్లను చూసే అవకాశం జిల్లా వాసులకి దక్కింది. కాగా జిల్లాకు చెందిన వ్యక్తికి ఏసీఏ సీఈఓగా అవకాశం రావడం పట్ల జిల్లా క్రికెట్‌ అసోసియేషన్‌ సభ్యులు, క్రీడాకారులు హర్షం వ్యక్తం చేస్తున్నారు. రానున్న రోజుల్లో జిల్లాలో క్రికెట్‌కు, క్రీడాకారులకు మరింత మేలు జరుగుతుందన్న ఆశాభావం వ్యక్తం చేస్తున్నారు. 

సాక్షి, హైదరాబాద్‌: పర్యావరణ హితమైన సాంకేతిక పరిజ్ఞానంతో చార్మినార్‌ ఎక్స్‌ప్రెస్‌ జిగేల్‌మంటోంది. తాజాగా హెడ్‌ ఆన్‌ జనరేషన్‌ టెక్నాలజీతో ఈ ట్రైన్‌ను అనుసంధానం చేశారు.ఇప్పటి వరకు బోగీల్లో లైట్లు, ఫ్యాన్లు, ఏసీ,తదితర సదుపాయాల కోసం డీజిల్‌ జనరేటర్లను వినియోగిస్తుండగా ఇక నుంచి హెడ్‌ ఆన్‌ జనరేషన్‌ పరిజ్ఞానం (ఇంజన్‌కు సరఫరా అయ్యే విద్యుత్‌ను బోగీలకు విస్తరించడం) వల్ల అన్ని బోగీలకు విద్యుత్‌ సరఫరాను ప్రవేశపెట్టారు. దీంతో డీజిల్‌ జనరేటర్ల అవసరం తప్పింది. చార్మినార్‌ ఎక్స్‌ప్రెస్‌కు గతంలో ఉన్న ఐసీఎఫ్‌ (ఇంటిగ్రల్‌ కోచ్‌ ఫ్యాక్టరీ) బోగీల స్థానంలో అత్యంత సురక్షితమైన ఎల్‌హెచ్‌బీ (లింక్‌ హాఫ్‌మెన్‌బుష్‌) బోగీలను ఏర్పాటు చేశారు. దీంతో హెడ్‌ ఆన్‌ జనరేషన్‌ వినియోగం అందుబాటులోకి వచ్చింది. ఇప్పటికే కొన్ని రైళ్లలో... దక్షిణమధ్య రైల్వేలో ఇప్పటి వరకు విక్రమ్‌ సింహపురిఅమరావతి ఎక్స్‌ప్రెస్, తెలంగాణ, జమ్ముతావి హమ్‌సఫర్, డబుల్‌ డెక్కర్, నారాయణాద్రి, సికింద్రాబాద్‌–నాగ్‌పూర్, సికింద్రాబాద్‌–సిర్పూర్‌ కాగజ్‌నగర్, సికింద్రాబాద్‌–గుంటూరు, లింగంపల్లి–విజయవాడ ఇంటర్‌సిటీ, రాయలసీమ ఎక్స్‌ప్రెస్‌ రైళ్లలో ఎల్‌హెచ్‌బీ కోచ్‌లను ఏర్పాటు చేశారు. దీంతో ఈ రైళ్లలో హెడ్‌ ఆన్‌ జనరేషన్‌ ద్వారా విద్యుత్‌ సదుపాయం అందజేస్తున్నారు. ఫలితంగా బోగీలకు డీజిల్‌ ద్వారా విద్యుత్‌ సరఫరా చేయాల్సిన అవసరం తప్పింది. దీనివల్ల ఏటా వినియోగమయ్యే 49.7 లక్షల డీజిల్‌పైన రూ.35 కోట్లను వెచ్చించవలసిన ఖర్చు తప్పింది. దీనిస్థానంలో విద్యుత్‌ వినియోగం వల్ల కేవలం రూ.5.7 కోట్ల వరకు మాత్రమే ఖర్చవుతుందని, రూ.29.3 కోట్ల మేర డబ్బు ఆదా అవుతుందని దక్షిణమధ్య రైల్వే సీపీఆర్వో సీహెచ్‌ రాకేష్‌ తెలిపారు. మరోవైపు డీజిల్‌ స్థానంలో విద్యుత్‌ను వినియోగించడం వల్ల పర్యావరణ ప్రమాణాలు రెట్టింపైనట్లు పేర్కొన్నారు. మరోవైపు శబ్దకాలుష్యం పోయింది. ఐసీఎఫ్‌ కోచ్‌ల స్థానంలో ప్రవేశపెట్టిన ఎల్‌హెచ్‌బీ కోచ్‌లు పూర్తిగా సురక్షితమైనవి. ప్రమాదాల తీవ్రత తక్కువగా ఉంటుంది. రైళ్లు పట్టాలు తప్పినప్పుడు బోగీలు దేనికవే విడిపోతాయి, ఒకదానిపైకి మరొకటి రావు. అలాగే రైళ్లలో అగ్నిప్రమాదాలు జరిగినప్పుడు వెంటనే ఆర్పేసే అగ్నిమాపక పరికరాలు ఉంటాయి. దీనివల్ల మంటలు విస్తరించవు. అలా ఈ రైళ్ల వల్ల సురక్షితమైన ప్రయాణంతో పాటు పర్యావరణ ప్రమాణాలూ మెరుగుపడుతాయి.


 ♦ ఈ కార్లకు జీరో రేటింగ్ ఇచ్చిన గ్లోబల్ ఎన్‌సీఏపీ
 ♦ భారత ప్రమాణాలకనుగుణంగానే
 ♦ కార్ల తయారీ: వాహన కంపెనీలు
 ♦ గ్లోబల్ ఎన్‌సీఏపీవి సొంత ప్రమాణాలు
 న్యూఢిల్లీ: భారత్‌లో విక్రయమవుతున్న ఐదు కార్లలో ప్రయాణికుల భద్రతా ప్రమాణాలు తగిన విధంగా లేవని గ్లోబల్ ఎన్‌సీఏపీ (న్యూ కార్ అసెస్‌మెంట్ ప్రోగ్రామ్స్) వెల్లడించింది. మారుతీ సెలెరియో, ఈకో,  రెనో క్విడ్, మహీంద్రా స్కార్పియో, హ్యుందాయ్ ఇయాన్... ఈ ఐదు కార్లు తమ క్రాష్ టెస్టుల్లో విఫలమయ్యాయని పేర్కొంది. భారత ప్రభుత్వ భద్రతా నియమ నిబంధనలకు అనుగుణంగానే కార్లను తయారు చేశామని మారుతీ, రెనో, హ్యుందాయ్ కంపెనీలు పేర్కొన్నాయి. గ్లోబల్ ఎన్‌సీఏపీ క్రాష్‌టెస్ట్‌లపై ఈ కంపెనీలతో పాటు సియామ్ కూడా సందేహాలు వ్యక్తం చేసింది. వివరాలు..
 వాహన భద్రతకు సంబంధించి ఇంగ్లాండ్‌కు చెందిన గ్లోబల్ ఎన్‌సీఏపీ సంస్థ నిర్వహించిన క్రాష్ టెస్టుల్లో ఈ ఐదు కార్లకు జీరో రేటింగ్ లభించింది.  తాజా క్రాష్ టెస్ట్ వివరాలను ఈ సంస్థ సెక్రటరీ జనరల్ డేవిడ్ వార్డ్ మంగళవారం వెల్లడించారు. ఎయిర్ బ్యాగ్‌లతో కూడిన మోడల్‌తో సహా మొత్తం మూడు వేరియంట్ల రెనో క్విడ్ కార్లను క్రాష్ టెస్ట్‌లు చేశామని, అన్ని కార్లకు జీరో రేటింగే వచ్చిందని డేవిడ్ వివరించారు. రెనో కూడా తగిన భద్రత లేని కార్లను తయారు చేయడం ఆశ్చర్యకరమని పేర్కొన్నారు.
 భారత నియమ నిబంధనల ప్రకారమే..
 భద్రత నియమ నిబంధనలు కట్టుదిట్టంగా ఉండే యూరప్, అమెరికాల్లోనే గంటకు 56 కిమీ. వేగంతో స్పీడ్ టెస్ట్‌లు నిర్వహిస్తారని, కానీ గ్లోబల్ ఎన్‌సీఏపీ గంటలకు 64 కిమీ. వేగంతో ఈ స్పీడ్ టెస్ట్‌లు నిర్వహించిందని పరిశ్రమవర్గాలు పేర్కొన్నాయి. గ్లోబల్ ఎన్‌సీఏపీ ఒక ప్రైవేట్ సంస్థ అని, తన సొంత ప్రమాణాల మేరకు ఈ సంస్థ కార్లకు రేటింగ్‌లు ఇస్తుందని సియామ్ డెరైక్టర్ జనరల్ విష్ణుమాధుర్ చెప్పారు. భారత్‌లో సగటు వేగం అంత కంటే తక్కువని పేర్కొన్నారు. తమ కార్లన్నీ భారత నియమనిబంధనలకు అనుగుణంగానే ఉన్నాయని, ఒక రకంగా అంతకంటే మంచి ప్రమాణాలతోనే ఉన్నాయని మారుతి వెల్లడించింది. భారత ప్రభుత్వ భద్రతా ప్రమాణాల ప్రకారమే కార్లను తయారు చేశామని రెనో కంపెనీ స్పందించింది.