నిత్యావసరాలు పక్కదారి పట్టకుండా చర్యలు
 
  ఏ గుర్తింపుకార్డు లేకపోయినా సరకులు
 
  ఎమ్మెల్యే లేదా జన్మభూమి కమిటీ  లేఖ తప్పనిసరి
 
  వస్తువుల సరఫరాపై విజిలెన్స్ నిఘా
 
  నేడు లక్ష మందికి సరకుల పంపిణీ
 
 విశాఖ రూరల్: రేషన్ కార్డు లేని వారికి ఫొటో తీసి నిత్యావసర సరకులు అందించేందుకు అధికారులు నిర్ణయించారు. సరకులు పక్కదారి పట్టకుండా, తీసుకున్న వారే మళ్లీ తీసుకోకుండా ఉండేందుకు చర్యలు చేపడుతున్నారు. ఎటువంటి గుర్తింపు కార్డు లేకపోయినప్పటికీ... స్థానిక ఎమ్మెల్యే లేదా జన్మభూమి కమిటీల నుంచి లేఖ తీసుకువస్తే సరకులు అందజేస్తారు. ఆ లేఖలను పరిశీలించడంతో పాటు రేషన్ దుకాణంలో ఫొటోగ్రాఫర్‌తో అభ్యర్థికి ఫొటో తీసిన తరువాత వస్తువులు ఇవ్వాలని నిర్ణయించారు.
 
 ఇందుకోసం 400 మంది ఫొటోగ్రాఫర్లకు శిక్షణ ఇచ్చారు. సోమవారం ఒక్క రోజే నగరంలో లక్ష మంది కార్డులు లేని వారికి సరకులు పంపిణీ చేసేందుకు వీలుగా ఏర్పాట్లు చేస్తున్నారు. ఇప్పటికే ప్రతి రేషన్ షాపునకు 200 నుంచి 400 మందికి సరిపడా సరకులు పంపిణీ చేశారు.
  
 విజిలెన్స్ నిఘా: హుదూద్ తుపాను కారణంగా 13 లక్షల మంది నష్టపోయినట్టు అధికారులు అంచనా వేస్తున్నారు. వీరిలో తెలుపు, గులాబీ కార్డులు ఉన్న సుమారు 12 లక్షల మందికి ఇప్పటికే సరకులు పంపిణీ జరుగుతోంది.
 
 ఇతర ప్రాంతాల నుంచి విశాఖకు వలస వచ్చిన వారు, కార్డులు లేని వారు లక్ష మంది వరకు ఉంటారని అధికారులు భావిస్తున్నారు. వారందరికీ  సోమవారం రేషన్ దుకాణాల ద్వారా సరకులు అందించడానికి ఏర్పాట్లు చేస్తున్నారు. రేషన్ కార్డులు, ఎటువంటి గుర్తింపు కార్డు లేకపోయినా సరకులు ఇస్తుండడంతో ఇవి కొంత పక్కదారి పట్టే అవకాశాలు ఉండడంతో తూర్పు, పశ్చిమగోదావరి జిల్లాల నుంచి విజిలెన్స్ బృందాలను అదనంగా జిల్లాకు రప్పిస్తున్నారు.
  
 రెండో సారి సరకులు తీసుకుంటే చర్యలు
 
 తొలుత గుర్తింపు కార్డులు చూపిస్తే సరకులు ఇవ్వాలని భావించినప్పటికీ... తరువాత ఆ నిర్ణయాన్ని మార్చుకున్నారు. ఒక కుటుం బంలో ఇద్దరు, ముగ్గురు సభ్యులు గుర్తింపు కార్డులు చూపించి సరకులు తీసుకొనే అవకాశముండడంతో ఎమ్మెల్యే, జన్మభూమి కమిటీల నుంచి లేఖలను తప్పనిసరి చేశారు. ఎమ్మెల్యేల నుంచి ఈ లేఖలు పొందలేని వారు జన్మభూమి కమిటీల నుంచయినా లేఖ తీసుకుంటే సరకులు ఇస్తారని కలెక్టర్ డాక్టర్ ఎన్.యువరాజ్ తెలిపారు.
 
 ఎవరూ రెండోసారి రేషన్ తీసుకొనే అవకాశంలేకుండా ఆ లేఖలను పరిశీలిస్తారు. ఆ లేఖల్లో లబ్ధిదారుడితో పాటు, వారి కుటుంబ సభ్యుల వివరాలు, ఫొటోను కూడా జత చేయనున్నారు. తెలుపు, గులాబీ కార్డుదారులు ఎవరైనా మళ్లీ సరకులు తీసుకోడానికి వస్తే  ఫోటోల ఆధారంగా గుర్తించి వారిపై తగిన చర్యలు తీసుకుంటామని జాయింట్ కలెక్టర్ ప్రవీణ్‌కుమార్ తెలిపారు.
  


 
 అర్హులందరికీ పింఛన్లు
 
 జన్మభూమి-మాఊరు ప్రారంభసభలో మంత్రి బొజ్జల
 
 ఎన్‌ఆర్ పేటలో ఎన్టీఆర్ సుజలస్రవంతి ప్రారంభం
 
 చిత్తూరు (టౌన్): ప్రజల భాగస్వామ్యంతోనే జన్మభూమి-మా ఊరు కార్యక్రమాన్ని నిర్వహిస్తున్నామని రాష్ట్ర అటవీ, సహకారశాఖల మంత్రి బొజ్జల గోపాలకృష్ణారెడ్డి అన్నారు. గురువారం గాంధీ జయంతి సందర్భంగా ఆయన స్థానిక ప్రజాప్రతినిధులు, అన్ని శాఖల జిల్లా అధికారులతో కలిసి చిత్తూరులో గాంధీ విగ్రహానికి పూలమాలలు వేసి ఘనంగా నివాళులర్పించారు. అనంతరం రాష్ట్ర ప్రభుత్వం అమలు చేస్తున్న జన్మభూమి-మాఊరు కార్యక్రమాన్ని అక్కడే లాంఛనంగా ప్రారంభించారు.  
 
 ఈ సందర్భంగా సభలో ఆయన మాట్లాడుతూ ప్రజల భాగస్వామ్యం లేకపోతే ఏ కార్యక్రమమూ విజయవంతం కాదన్నారు. అందుకే చంద్రబాబు వారిచేతనే ఈ కార్యక్రమాన్ని నిర్వహించే విధంగా రూపకల్పన చేశారన్నారు. ఈ కార్యక్రమం ద్వారా పెంచిన పింఛన్లను అధికారులు లబ్ధిదారులకు పంపిణీ చేస్తారన్నారు. గతంలో ఇస్తున్న పింఛన్ మొత్తాన్ని పెంచినట్టు వివరించారు. గతంలో పింఛన్ల మంజూరులో అవకతవకలు జరిగినట్టు తెలియడంతో వాటిపై సర్వేచేసి అనర్హులకు రద్దుచేశామన్నారు. అర్హులకు ఎక్కడైనా పింఛన్ రద్దయివుంటే సంబంధిత అధికారుల దృష్టికి తీసుకొస్తే పరిశీలించి మంజూరు చేస్తారన్నారు.
 
 జన్మభూమి స్పెషలాఫీసర్ ఎస్‌ఎస్ రావత్ మాట్లాడుతూ గ్రామాలు అభివృద్ధి చెందాలనే ఉద్దేశంతోనే ముఖ్యమంత్రి ఈ కార్యక్రమాన్ని అమలు చేస్తున్నారన్నారు. పేదరికాన్ని నిర్మూలించాలనే ముఖ్య సిద్ధాంతంతో మాఊరు కార్యక్రమాన్ని సీఎం ప్రవేశపెట్టారన్నారు. కలెక్టర్ సిద్ధార్థ్‌జైన్ మాట్లాడుతూ గ్రామాలను బాగుచేయాలనే ఉద్దేశంతోనే ముఖ్యమంత్రి మాఊరు కార్యక్రమాన్ని చేపట్టారన్నారు. ప్రజల అవసరాలను గుర్తించి తీర్చడం కోసం ప్రభుత్వం సూక్ష్మప్రణాళికను అమలు చేస్తోందన్నారు. అందరూ విజన్ మోడ్‌తో పనిచేసిన నాడే అది సాధ్యమన్నారు.
 
 చిత్తూరు ఎమ్మెల్యే సత్యప్రభ మాట్లాడుతూ  గాంధీ జయంతి రోజు  జన్మభూమి కార్యక్రమాన్ని చేపట్టడం శుభపరిణామమన్నారు. చంద్రబాబు నాయుడు వందల కిలోమీటర్లు పాదయాత్ర చేసి ప్రజాసమస్యలను తెలుసుకోగలిగారన్నారు. వాటి పరిష్కారం కోసమే నేడు జన్మభూమి కార్యక్రమాన్ని చేపడుతున్నారన్నారు. అంతకుముందు జన్మభూమి ర్యాలీని మంత్రి ప్రారంభించారు.
 
 జెడ్పీ చైర్‌పర్సన్ శ్రీరామనేని గీర్వాణి, మేయర్ కటారి అనురాధ, జాయింట్ కలెక్టర్ నారాయణ్ భరత్‌గుప్తా,  ఏజెసీ వెంకటసుబ్బారెడ్డి, ఆర్‌డబ్ల్యూఎస్ ఎస్‌ఈ శ్రీనివాసులు, జెడ్పీ సీఈవో వేణుగోపాలరెడ్డి, ఆర్‌అండ్‌బీ ఎస్‌ఈ శివకుమార్, వ్యవసాయశాఖ జేడీ రవికుమార్, పశుసంవర్థకశాఖ జేడీ శ్రీనివాసరావు, ఎసీడీఎస్ పీడీ ఉషాఫణికర్,డీఎంఅండ్‌హెచ్‌వో దశరథరామయ్య,  డీసీహెచ్‌ఎస్ కనకదుర్గ,  డ్వామా పీడీ గోపీచంద్, డీఆర్‌డీఏ పీడీ రవిప్రకాష్‌రెడ్డి,  డీఈవో ప్రతాప్‌రెడ్డి, ఎస్‌ఎస్‌ఏ పీవో లక్ష్మి,  డీపీవో ప్రభాకర్‌రావు,  సాంఘిక సంక్షేమశాఖ డీడీ ధనుంజయరావు, చిత్తూరు మున్సిపల్ కమిషనర్ రాజేంద్రప్రసాద్, చిత్తూరు ఆర్డీవో  పెంచల కిశోర్ తదితరులు పాల్గొన్నారు. అనంతరం చిత్తూరు రూరల్ మండలంలోని ఎన్‌ఆర్ పేటలో ఏర్పాటు చేసిన ఎన్టీఆర్ సుజల స్రవంతి తాగునీటి పథకాన్ని మంత్రి ప్రారంభించారు.
  


 అనంతపురం అర్బన్:  జిల్లాలో 4 నియోజకవర్గాల్లో నిర్వహించే జన్మభూమి కార్యక్రమంలో సమస్యలపై టీడీపీ ప్రజాప్రతినిధులను, నాయకులను నిలదీయాలని కాంగ్రెస్ నాయకులు ప్రజలకు  పిలుపునిచ్చారు. స్థానిక జిల్లా కాంగ్రెస్ పార్టీ కార్యాలయంలో బుధవారం ఏర్పాటు చేసిన విలేకరుల సమావేశంలో డీసీసీ అధ్యక్షుడు కోటా సత్యం, మాజీ ఎమ్మెల్యే సుధాకర్ మాట్లాడారు. గురువారం నుంచి అధికార పార్టీ చేపడుతున్న జన్మభూమి కార్యాక్రమాన్ని స్వాగతిస్తున్నామన్నారు. అదే సమయంలో ప్రజలకు ఇచ్చిన హామీలను నెరవేర్చాలని ముఖ్యమంత్రి చంద్రబాబును డిమాండ్ చేస్తున్నామన్నారు.
 
 టీడీపీ అధికారంలోకి వచ్చిన తర్వాత ఐదు ఫైళ్లపై సీఎం తొలిసంతకం చేశారని వారు గుర్తుచేశారు. కానీ వాటిని అమలు చేయడంలో విఫలమయ్యారన్నారు. అధికారంలోకి వచ్చిన ప్రభుత్వంపై ప్రజా వ్యతిరేకత వచ్చేందుకు సంవత్సర కాలం పడుతుందని, టీడీపీ ప్రభుత్వం వంద రోజులకే వ్యతిరేకతను మూటగట్టుకుందన్నారు.  ఎన్నికలకు ముందు మేనిఫెస్టోలో ప్రకటించిన విధంగా బేషరతుగా రైతు, డ్వాక్రా రుణాలను మాఫీ చేయాలని వారు డిమాండ్ చేశారు. రైతులను పూర్తిగా రుణ విముక్తుల గావించని తర్వాతే ప్రభుత్వం రైతుల కోసం పెట్టిన ‘రైతు సాధికారిత సంఘం’కు సార్థకత లభిస్తుందన్నారు. ఒక్కో మండలంలో వెయ్యి మంది చొప్పున  అర్హులైనవారిని పింఛను పథకం నుంచి తొలగించారని వారు ఆందోళన వ్యక్తం చేశారు.
 
 అర్హులకు న్యాయం చేయకపోతే పెద్ద ఎత్తున ఆందోళనలు చేపడతామన్నారు.  జాబితా నుంచి తొలిగించిన పింఛన్ లబ్ధిదారులు ప్రతి నియోజకవర్గంలో నిర్వహించే జన్మభూమి కార్యక్రమంలో టీడీపీ నాయకులను నిలదీయాలన్నారు. బాధితులకు కాంగ్రెస్ నాయకులు ఉంటారన్నారు. పింఛన్లు, రేషన్‌కార్డులు ఇతర ప్రభుత్వ సంక్షేమ పథకాల్లో అర్హులను  తొలిగిస్తే ఫిర్యాదు చేయాలని వారు సూచించారు. ఇందుకు ఫిర్యాదు విభాగాన్ని ఏర్పాటు చేశామని, ఛిౌజట్ఛటట ఛిౌఝఝజ్ట్ట్ఛ్ఛీ.్చఞఃజఝ్చజీ.ఛిౌఝ ద్వారా ప్రజలు ఫిర్యాదు చేయవచ్చునన్నారు.