ఉగ్రరూపమెత్తిన కడలి  
 
 ఉప్పాడ తీరంపై విరుచుకుపడుతున్న అలలు
 
 ధ్వంసమవుతున్న బీచ్‌రోడ్డు  
 
 అన్నదాతల కలవరం
 
 చి‘వరి’లో నష్టం తప్పదేమోనని ఆందోళన 
 
 పిఠాపురం :
 వార్దా తుపాను ప్రభావంతో ఉప్పాడ తీరంలో సముద్రం ఉగ్రరూపం దాల్చింది. బలమైన ఈదురుగాలులకు తోడు అత్యంత వేగంగా దూసుకువస్తున్న కెరటాల తాకిడికి ఉప్పాడ సాగరతీరం ముక్కలవుతోంది. ఆధునిక సాంకేతిక పరిజ్ఞానంతో ఎంతో బలంగా నిర్మించిన జియో ట్యూబ్‌ రక్షణ గోడను సైతం చిన్నాభిన్నం చేస్తూ.. గ్రామంలోని మత్స్యకారుల ఇళ్లపై అలలు విరుచుకుపడుతున్నాయి. సుమారు 6 మీటర్ల ఎత్తున ఎగసి పడుతున్న కెరటాల తాకిడితో ఉప్పాడ – కాకినాడ బీచ్‌రోడ్డు ధ్వంసమవుతోంది. దీంతో ఆ రోడ్డుపై ప్రయాణికులు ప్రాణాలు అరచేత పట్టుకొని ప్రయాణిస్తున్నారు. పరిస్థితి ప్రమాదకరంగా మారడంతో తీరం వెంబడి కొత్తపల్లి పోలీసులు గస్తీ ఏర్పాటు చేశారు. ఆదివారం రాత్రికి బీచ్‌రోడ్డుపై వాహనాల రాకపోకలను నిలిపివేయనున్నారు.
 సముద్రంలోనే ఉన్న బోట్లు?
 కొత్తపల్లి, తొండంగి మండలాలకు చెందిన పలు బోట్లు ప్రస్తుతం తీరానికి దూరంగా సముద్రంలో చేపల వేటలో ఉన్నాయని మత్స్యకారులు చెబుతున్నారు. సముద్రం అల్లకల్లోలంగా ఉండడంతో వెంటనే ఒడ్డుకు వచ్చేయాలంటూ ఆ బోట్లపై ఉన్న మత్స్యకారులకు వారి కుటుంబ సభ్యులు సెల్‌ ఫోన్ల ద్వారా సమాచారం అందించే ప్రయత్నాలు చేస్తున్నారు. ఇప్పటికే కొన్ని బోట్లు వివిధ ప్రాంతాల్లో ఒడ్డుకు చేరుకుంటున్నాయని వారు చెబుతున్నారు. కొన్ని బోట్లలో ఉన్న మత్స్యకారుల సెల్‌ ఫోన్లు పని చేయకపోవడంతో వారికి సమీపంలోని బోట్లలో ఉన్న మత్స్యకారుల ద్వారా సమాచారం అందించేందుకు ప్రయత్నిస్తున్నారు. ఇదిలా ఉండగా, సముద్రంలో ఎవరూ లేరని, సముద్రంపై వేటకు వెళ్లిన అన్ని బోట్లూ తీరానికి చేరుకున్నాయని అధికారులు చెబుతున్నారు. అయినప్పటికీ ఎన్ని బోట్లపై చేపల వేటకు వెళ్లారు? ఎక్కడ ఉన్నారనే విషయాలపై మత్స్యశాఖ అధికారులు దృష్టి సారించారు. మండల అధికారులు గ్రామాల్లో సమాచారం సేకరిస్తున్నారు. సముద్రంలో ఉన్నవారికి వీహెచ్‌ఎఫ్‌ సెట్ల ద్వారా సమాచారం అందించి, వారు తీరానికి చేరుకునేలా చర్యలు తీసుకుంటున్నామని చెప్పారు.
 ప్రమాదాన్ని లెక్క చేయకుండా..
 ఓపక్క కెరటాలు అత్యంత ప్రమాదకరంగా విరుచుకుపడుతున్న సమయంలో కూడా కొందరు తమ సెల్‌ఫోన్లకు పని చెప్పారు. ప్రమాదకర పరిస్థిల్లో రక్షణ గోడలపై నిలబడి సెల్ఫీలు దిగడానికి పోటీ పడ్డారు. వారిని అదుపు చేయడం పోలీసులకు తలనొప్పిగా మారింది.
 అమలాపురం :
 ఈశాన్యం కరుణించడంతో ఒడ్డున పడ్డామని సంతోషంగా ఉన్న ఖరీఫ్‌ రైతులను వార్దా తుపాను భయపెడుతోంది. దీని ప్రభావం జిల్లా మీద కూడా ఉండే అవకాశముందని వాతావరణ శాఖ హెచ్చరించడం రైతులను కలవరానికి గురి చేస్తోంది. ఈ నెల రెండో తేదీన నాడా తుపాను ప్రభావం ఉంటుందన్న వాతావరణ శాఖ హెచ్చరికలతో జిల్లాలోని వరి రైతులు తీవ్ర ఆందోళన చెందారు. ఆ గండం గట్టెక్కడంతో ఊపిరి పీల్చుకుని కోతలు ముమ్మరం చేశారు. తీరా ఇప్పుడు వార్దా తుపాను రావడం వారిని మరోసారి ఆందోళనకు గురి చేస్తోంది. ఖరీఫ్‌ కోతలు దాదాపు పూర్తి కావస్తున్నా.. తీరప్రాంత మండలాల్లో ఇప్పటికీ కొనసాగుతున్నాయి. తూర్పు డెల్టా పరిధిలోని కరప, కాకినాడ, అమలాపురం, ముమ్మిడివరం, రాజోలు, పి.గన్నవరం సబ్‌ డివిజన్ల పరిధిలో సుమారు 60 వేల ఎకరాల్లో ఇంకా వరి కోతలు జరగాల్సి ఉంది. సాగు ఆలస్యం కావడంవల్ల ఇక్కడి పంటలు ఇప్పుడు కోతలకు వచ్చాయి. మరో 20 వేల ఎకరాల్లో పంట పనల మీద ఉంది.
 పెద్ద నోట్ల రద్దువల్ల కూలీలకు సొమ్ములు సర్దలేక చాలామంది రైతులు కోత కోసిన పనలను, నూర్పిళ్ల తరువాత ధాన్యాన్ని చేలల్లోను, కళ్లాలోను ఉంచేశారు. నోట్ల రద్దు వల్ల అటు అమ్మకాలు కూడా లేకపోవడంతో ధాన్యం కళ్లాలను వీడడం లేదు. ఈ సమయంలో వార్దా తుపాను వల్ల భారీ వర్షాలు కురిస్తే పంట నష్టం తప్పదని రైతులు ఆందోళన చెందుతున్నారు. ధాన్యం రాశులు, పనల మీద బరకాలు కప్పి ఒబ్బిడి చేసుకునే పనిలో నిమగ్నమయ్యారు. చేలల్లో పనలను గట్ల మీదకు తరలిస్తున్నారు. మరో వారం, పది రోజులు వాతావరణం సహకరిస్తే గట్టెక్కుతామని, జిల్లాలో తుపాను ప్రభావం లేకుండా చూడాలని దేవుళ్లకు మొక్కుకుంటున్నారు. వార్దా తుపాను నేపథ్యంలో పనలమీద, కళ్లాల్లో ధాన్యం ఉంచుకున్న రైతులను అప్రమత్తం చేయాలని వ్యవసాయ శాఖ సంయుక్త సంచాలకుడు కేఎస్‌వీ ప్రసాద్‌ అధికారులను ఆదేశించారు.
 ఆక్వాపైనా ప్రభావం
 వరి రైతులతోపాటు ఆక్వా రైతులను సైతం వార్దా తుపాను ఆందోళనకు గురి చేస్తోంది. వైరస్‌ వల్ల పోయినంత పోగా, చాలా తక్కువ విస్తీర్ణంలో ఆక్వా రెండు, మూడు పంటలు ఉన్నాయి. ఇవి కొంత ఆశాజనకంగా ఉండగా తుపాను వల్ల భారీ వర్షాలు కురిసి వాతావరణం మరింత చల్లబడితే తమకు నష్టం తప్పదని ఆక్వా రైతులు అంటున్నారు.
  
  
 తీవ్ర తుపాను
 ‘వార్దా’ ప్రభావంతో ‘తూర్పు’ తీరం వణుకుతోంది. అది తీరం దాటేది దక్షిణ కోస్తాలోనే అని చెబుతున్నప్పటికీ.. దాని ప్రభావంతో ఎగసి పడుతున్న అలలతో కడలి ఉగ్రరూపం దాల్చింది. విరుచుకుపడుతున్న అలలతో ఉప్పాడ తీరం ముక్కలవుతోంది. మరోపక్క ఆదివారం ఉదయం నుంచి వీస్తున్న ఈదురుగాలులతో కోతకు వచ్చిన వరిచేలు నేలకు ఒరిగిపోయే పరిస్థితి నెలకొంది. దీనికి వర్షాలు కూడా తోడైతే ఈ ఏడాది కూడా పంట నష్టం తప్పదని అన్నదాతలు కలవరపడుతున్నారు.
  
 అధికారయంత్రాంగం అప్రమత్తం
 కాకినాడ సిటీ : వార్దా తుపాను ప్రభావం జిల్లాపై అంతగా ఉండనప్పటికీ అధికార యంత్రాంగం అప్రమత్తంగా ఉంది. క్షేత్రస్థాయిలో ప్రధానంగా తీరప్రాంత మండలాల్లో ఎటువంటి పరిస్థితులనైనా ఎదుర్కొనేందుకు ఇప్పటికే నియమితులైన ప్రత్యేకాధికారులు ఆయా ప్రాంతాల ప్రజలను అప్రమత్తం చేశారు. ముందుజాగ్రత్తగా పౌరసరఫరాల శాఖ నిత్యావసర సరుకులను మండల స్థాయి స్టాక్‌ పాయింట్లలో సిద్ధంగా ఉంచింది. కాకినాడ పోర్టులో జారీ చేసిన రెండో ప్రమాద హెచ్చరిక కొనసాగుతోంది.
  


 
  ‘ఎత్తిపోతల’కు భూసేకరణతో బతుకు భారమేనని ఆందోళన
 
 ∙ తమ భూములు ఇచ్చేది 
 
  లేదంటున్న అన్నదాతలు
 
 వారంతా చిన్న, సన్నకారు రైతులే.. ఉన్న కొద్దిపాటి భూమే వారికి జీవనాధారం. దానిపైనే వారి ఆశలన్నీ. అయితే ఇప్పటి వరకు ఆనందంగా ఉన్న ఆ రైతుల్లో ఆందోళన నెలకొంది. పురుషోత్తపట్నం ఎత్తిపోతల పథకం నిర్మాణం కోసం తమ భూములు కోల్పోవలసి వస్తుందనే గుబులు మొదలైంది. భూసేకరణ పేరుతో తమ పంట భూములు కోల్పోతే తామంతా వీధిన పడతామని, బతుకు భారమవుతుందని, ఆత్మహత్యలే శరణ్యం అని అన్నదాతలు కన్నీరుమున్నీరవుతున్నారు. భూసేకరణ జాబితా రావడం, అందులో సుమారు 80మంది వరకు రైతులు భూములు కోల్పోతారని తెలియడంతో వారంతా ’కలవరపడుతున్నారు. 
 – పురుషోత్తపట్నం (సీతానగరం)
  
 పురుషోత్తపట్నం ఎత్తి పోతల పథకానికి సంబంధించి సుమారు 200 ఎకరాలు భూసేకరణ చేసేందుకు అధికారులు సిద్ధమవుతున్నారు. పది పంపులతో నెలకొల్పుతున్న ఈ పథకం కోసం  సుమారు పదికిలో మీటర్ల మేర పైపులై¯ŒS వెళ్లనుంది. ఇందులో సుమారుగా 80 ఎకరాలు ప్రభుత్వ భూమి ఉంటే.. మిగిలింది స్థానిక రైతుల నుంచి సేకరించేందుకు అధికారులు సిద్ధమయ్యారు. భూసేకరణలో రైతులకు చెల్లించే ధర అనుకూలంగా ఉంటే వారికి నగదు చెల్లిస్తామని, లేకుంటే పైప్‌లై¯ŒS భూమి కింద నుంచి వెళుతున్నందున లీజుకి తీసుకుని ప్రభుత్వం నగదు చెల్లిస్తుందని అధికారులు చెబుతున్నారు. పోలవరం ఎడమ కాలువ ఏలేరు రిజర్వాయర్‌ వరకు 58 కిలోమీటర్లు ఉందని, ఇక్కడ వరకు మూడు ప్యాకేజీలలో రెండు ప్యాకేజీలు పూర్తయ్యాయని, ఒక ప్యాకేజీలో పనులు పూర్తయ్యే సమయానికి కాలువ పనులు పూర్తి చేస్తామని పోలవరం ఎల్‌ఎంసీ ఎస్‌ఈ సుగుణాకరరావు ‘సాక్షి’కి తెలిపారు.
 ఎందుకివ్వాలి..
 పురుషోత్తపట్నం ఎత్తిపోతల పథకం వల్ల మాకు ఒరిగేదేమి లేదని, తమ పంట భూములను ఎక్కడో ఉన్న వారి లబ్ధికి ఎందుకు ఇవ్వాలంటూ రైతులు ఆగ్రహం వ్యక్తం చేస్తున్నారు. తమ పంట భూముల నుంచి పైప్‌లై¯ŒS వేసి, తమ భూములను తీసుకుంటే సహించేది లేదని హెచ్చరిస్తున్నారు. మాకు ఉన్న కొద్దిపొలంను ఎవరికోసమో కాజేస్తారా? అంటూ ప్రశ్నిస్తున్నారు. మాకు ఉన్న కొద్దిపాటి పొలాన్ని ఎత్తిపోతల పథకానికి ఇచ్చేది లేదని రైతులు అంటున్నారు. 
  
 ఆ భూమినైనా ఉంచండి
 రెండు ఎకరాల భూమి ఉంది. అమ్మాయికి వివాహమైంది. కట్నం గా ఎకరం ఇచ్చా. ఉన్న భూమి నుంచి పైప్‌లై¯ŒSకు తీసుకుంటే నా బతుకేంటి. నా భూమి నాకు ఉంచండి.
 – కలగర చిన సుబ్బారావు, రామచంద్రపురం 
  
 ఎలా పోషించాలి
 ఉన్నది రెండెకరాలు. అప్పు రూ.12 లక్షలు. ఇద్దరు పిల్లలు ఉన్నారు. నా భూమి నుంచి పైప్‌లై¯ŒS వెళుతుంది. ఉన్న భూమి పోతే నా కుటుంబాన్ని ఎలా పోషించాలి. మానోటి వద్ద కూడు లాగవద్దు.
 – అయినంపూడి వెంకట రామారావు, రామచంద్రపురం 
  
 బతుకు భారమే..
 ఉన్నది ఎకరంన్నర భూమి. అందులో నుంచి ఎత్తిపోతల పథకం పైప్‌లై¯ŒS వెళుతుందని, భూమి తీసుకుంటున్నామని అంటున్నారు. నాకు ఉన్న ఆ భూమే ఆధారం. భూమి తీసుకుంటే బతకడమే చాలా కష్టమవుతుంది.
 – నందిపాటి పాపారావు, రామచంద్రపురం 
  
 మరణమే శరణ్యం
 నాకు ఉన్నదే యాభైసెంట్ల భూమి అందులో నుంచి పైప్‌లై¯ŒS వెళుతుందంటున్నారు. నాకున్న ఆధారం అదే. ఆ భూమి పోతే మరణమే శరణ్యం. దయచేసి నా భూమి పోకుండా చూడండి.
 – కొండిపాటి వీర వెంకట సత్యనారాయణ, రామచంద్రపురం
  
 రోడ్డున పడినట్టే
 అమ్మాయి, అబ్బాయి, భార్య ఉన్నారు. నాకు ఉన్నది ఎకరం భూమి. అందులో నుంచి పథకం పైప్‌లై¯ŒS వెళుతుందంటున్నారు. ఆ భూమి లేకపోతే కుటుంబమంతా రోడ్డున పడినట్టే.
 – దుద్దిపూడి వెంకట రామారావు, రామచంద్రపురం 
  
 జీవించడం కష్టమే..
 ఎకరా 30 సెంట్ల భూమి ఉంది. వ్యవసాయ కుటుంబం. అమ్మాయికి వివాహం చేశాం. అప్పు ఇంకా తీరలేదు. అబ్బాయి చదువుకుంటున్నాడు. ఉన్న పొలం పథకంలో పోతే జీవనాధారం పోయినట్టే.
 – అట్రు పద్మావతి, రామచంద్రపురం 
  
 ఎలా బతికేది
 అమ్మాయి, అబ్బాయి. ఇద్దరూ చదువుకుంటున్నారు. ఉన్న పొలం 60 సెంట్లు భూమి. అందులో నుంచి పైప్‌లై¯ŒS వెళుతుంది. మాకున్న ఆ భూమి ప్రభుత్వ తీసుకుంటే మేము ఎలా బతకాలి. 
 – దుర్దిపూడి అనంత పద్మావతి, రామచంద్రపురం