కాన్పూర్: టీ తాగి నలుగురు వ్యక్తులు కుప్పకూలారు. అది విషపూరితం కావడంతో వారంతా ప్రాణాలుకోల్పోయారు. సోమవారం రాత్రి ఈ ఘటన చోటుచేసుకోగా ఆలస్యంగా వెలుగులోకి వచ్చింది. పోలీసులు చెప్పిన వివరాల ప్రకారం కాన్పూర్ కు సమీపంలోని అమృత్ పూర్ అనే గ్రామంలో రాణి(32) అనే ఓ గృహిణి ఉదయాన్నే నిద్రలేచి టీ తయారు చేసింది.
 
 తన ముగ్గురు పిల్లలు మన్సి(8), ఉపాసన(3), కనహియ(7) కు ఆ టీ పోసి తాను తాగింది. అయితే, విషపూరితంగా మారడంతో వారు నలుగురు చనిపోయారు. ఆమె భర్త ఢిల్లీలో పనిచేస్తుంటాడు. ఈ ఘటన తమను తీవ్రంగా బాధించిందని, టీ విషపూరితం కావడం వల్లే వారు చనిపోయారనే ప్రాథమికంగా తెలుస్తోందని, శవపరీక్ష నివేదిక వచ్చాక అన్ని విషయాలు తెలుస్తాయని సీనియర్ పోలీసు అధికారి ఒకరు చెప్పారు.