దేశవ్యాప్తంగా అనూహ్య డిమాండ్
  హైదరాబాద్, బిజినెస్ బ్యూరో : యాపిల్ ఫోన్ల కోసం క్యూలు కట్టడం ఇప్పటి వరకు విదేశాలకే పరిమితమైంది. ఇప్పుడు రిలయన్స్ జియో ప్రవేశంతో ఆ ట్రెండ్ భారత్‌లోనూ ప్రస్ఫుటమవుతోంది. అయితే ఇక్కడ దర్శనమిస్తున్న క్యూలైన్లు మొబైల్ ఫోన్ల కోసం కాదు. జియో ఇచ్చే ఉచిత సిమ్‌ల కోసం. సిమ్ చేతికొచ్చిందా జియో ప్రివ్యూ ఆఫర్‌తో 90 రోజులపాటు అపరిమిత డేటా, కాల్స్‌ను ఎంజాయ్ చేయవచ్చు. ఇంకేముంది దేశవ్యాప్తంగా ఉన్న రిలయన్స్ డిజిటల్, డిజిటల్ ఎక్స్‌ప్రెస్ మినీ స్టోర్లు, లైఫ్ మొబైల్ స్టోర్ల ముందు భారీ క్యూ లైన్లు స్వాగతం పలుకుతున్నాయి. 4జీ మొబైల్ ఉన్న ప్రతి ఒక్కరికీ ఉచిత సిమ్‌తోపాటు ప్రివ్యూ ఆఫర్‌ను వర్తింపజేస్తుండడంతో కస్టమర్లతో ఈ స్టోర్లు కిటకిటలాడుతున్నాయి.
  నల్ల బజారులో రూ.2 వేలకు..: ప్రివ్యూ ఆఫర్ కింద 4జీ డేటా, వాయిస్ ఓవర్ ఎల్‌టీఈ కాల్స్, 10 రకాల జియో ప్రీమియం యాప్స్‌ను అపరిమితంగా వినియోగించుకోవచ్చు. తొలుత రిలయన్స్ ఉద్యోగులు, వారి బంధువులకు.. ఆ తర్వాత లైఫ్ స్మార్ట్‌ఫోన్ కొన్న కస్టమర్లకు 90 రోజులపాటు ప్రివ్యూ ఆఫర్‌ను కంపెనీ ప్రకటించింది. లైఫ్ బ్రాండ్ స్మార్ట్‌ఫోన్ కొనుక్కోకపోయినా కార్పొరేట్ కంపెనీల ఉద్యోగులందరికీ ప్రివ్యూ ఆఫర్‌ను విస్తరించింది. ప్రస్తుతం 4జీ స్మార్ట్‌ఫోన్ ఉన్న ప్రతి కస్టమర్ ప్రివ్యూ ఆఫర్‌కు అర్హులు. దీంతో దేశవ్యాప్తంగా కస్టమర్లు సిమ్‌ల కోసం ఎగబడ్డారు. వినియోగదార్లు ఒకేసారి స్టోర్లను చుట్టుముట్టడంతో సిమ్‌ల కొరత కూడా తలెత్తింది. కొందరు కస్టమర్లు ఇదే అదనుగా రూ.1,500-2,000లకు సిమ్‌లను తిరిగి విక్రయిస్తున్నట్టు సమాచారం. సిమ్‌లు పక్కదారి పట్టకుండా అసలైన కస్టమర్లకే చేరేలా కంపెనీ కసరత్తు చేస్తోంది.
 క్యూ కట్టిన కంపెనీలు..
 హైదరాబాద్‌లో 50 లక్షలకుపైగా 4జీ మొబైల్ వినియోగదార్లు ఉన్నారు. గురువారం ఒక్కరోజు బిగ్ సి స్టోర్లలో 2,500లకుపైగా, లాట్ మొబైల్స్ ఔట్‌లెట్లలో అదే స్థాయిలో 4జీ స్మార్ట్‌ఫోన్లు అమ్ముడయ్యా యి. 4జీ ఫోన్ కొన్న వినియోగదార్లకు ఈ స్టోర్లలో అప్పటికప్పుడు సిమ్‌ను జారీ చేస్తున్నారు. ఇక జియో బండిల్ ఆఫర్‌ను అందించేందుకు మొబైల్ ఫోన్ కంపెనీలు క్యూ కట్టాయి. జియోతో తొలుత శామ్‌సంగ్, ఎల్‌జీ.. తర్వాత జియోనీ, కార్బన్, లావా, ఆసస్, టీసీఎల్, ఆల్కటెల్, ప్యానాసోనిక్, మైక్రోమ్యాక్స్, యూ వంటి బ్రాండ్లు చేతులు కలిపాయి. ఈ స్థాయిలో బండిల్ ఆఫర్ రావడం దేశంలో ఇదే తొలిసారి. శామ్‌సంగ్ తాజాగా రూ.4,590లకే జెడ్2ను ప్రవేశపెట్టి సంచలనం సృష్టించింది. జియో సేవల నేపథ్యంలో ఫీచర్ ఫోన్ కస్టమర్లను ఆకట్టుకోవడానికే ఈ ధరలో జెడ్2ను తీసుకొచ్చింది.


 
 నేడు జిల్లా వ్యాప్తంగా ఉచిత సిమ్‌ మేళా
 
 కరీంనగర్‌ క్రై ం :  బీఎస్‌ఎన్‌ఎల్‌ వినియోగదారులకు ఎక్స్‌పీరియన్స్‌ ఎల్‌ఎల్‌ 49 పేరుతో కేవలం రూ.49కే ల్యాండ్‌ఫొన్‌ అందిస్తోందని డీజీఎంలు రాంబాబు, నర్సయ్య, రాజేంద్రనాథ్‌ తెలిపారు. బీఎస్‌ఎన్‌ఎల్‌ కరీంనగర్‌ కార్యాలయంలో మంగళవారం వివరాలు వెల్లడించారు. ల్యాండ్‌ఫోన్‌ కొత్తప్లాన్‌లో మొదటి 6 నెలలకు కేవలం రూ.49 లకు అందిస్తున్నామని తెలిపారు. ఆగస్టు 15 నుంచి అన్ని ల్యాండ్‌ఫోన్లకు అదివారం 24 గంటల పాటు, మిగతా రోజుల్లో రాత్రి 9 గంటల నుంచి ఉదయం 7 గంటల వరకు అన్‌లిమిటెడ్‌గా మాట్లాడుకోవచ్చని పేర్కొన్నారు. ఈనెల 1వ తేదీ నుంచి బ్రాండ్‌ బ్యాండ్‌ స్పీడ్‌ 512 కేబీపీఎస్‌ నుంచి 1 ఎంబీపీఎస్‌కు పెంచామని తెలిపారు. జిల్లా వ్యాప్తంగా ఇప్పటికే 2జీ టవర్లు 315, 3జీ టవర్లు 104 ఉన్నాయని కొత్తగా చిన్నకాపువరం, వీణవంక, పైడిమడుగులో 3జీ టవర్లు ఏర్పాటు చేశామని వివరించారు. జిల్లాలో 20 వేల ల్యాండ్‌ఫోన్‌ కనెక్షన్లు, 3.50 లక్షల ప్రీపెయిడ్, 22 వేల మంది పోస్ట్‌పెయిడ్‌ వినియోగదారులున్నారని తెలిపారు. వినియోగదారుల కోసం బుధవారం జిల్లా వ్యాప్తంగా ఉచిత సిమ్‌ మేళా నిర్వహిస్తున్నట్లు పేర్కొన్నారు. అందరికీ బీఎస్‌ఎన్‌ఎల్‌ సేవలందించేందుకు పలు ప్లాన్లు అమలు చేస్తున్నామని బీఎస్‌ఎన్‌ఎల్‌ వినియోగదారులు సర్వీసుల్లో ఇబ్బందులు పడితే నేరుగా తమకు ఫిర్యాదు చేయాలని సూచించారు. 
  
  
  
  
  


 సాక్షి, సంగారెడ్డి : బీఎస్‌ఎన్‌ఎల్‌ ఆధ్వర్యంలో నేడు(సోమవారం) మెగా మేళా నిర్వహించనున్నారు. బీఎస్‌ఎన్‌ వినియోగదారులకు ఉచితంగా  సిమ్‌కార్డులు అందజేయనున్నారు. సంగారెడ్డి, సిద్దిపేట, మెదక్, పటాన్‌చెరు, జహీరాబాద్, జోగిపేట, గజ్వేల్, నారాయణఖేడ్, నర్సాపూర్, మండల కేంద్రాల్లో ఈ మేళా నిర్వహించనున్నారు.
 మేళాలో వినియోగదారులకు ఉచితంగా సిమ్‌కార్డులు అందజేసి ఒకేరోజులో యాక్టివేట్‌ చేస్తామని బీఎస్‌ఎన్‌ఎల్‌ జీఎం ఏకే సాహూ తెలిపారు. ఈ అవకాశాన్ని వినియోగదారులు సద్వినియోగం చేసుకోవాలన్నారు. ప్రీపెయిడ్‌లో విద్యార్థులు కోసం  స్టూడెంట్‌ స్పెషల్‌ ప్లాన్‌, ఇతరుల కోసం అముల్య ప్లాన్‌ అందుబాటులో ఉంచామన్నారు.
 స్టూడెంట్‌ స్పెషల్‌ ప్లాన్‌లో 30 రోజుల వరకు 1 జీబీ డాటా ఉచితంగా అందజేయటంతో పాటు ప్రతి నిమిషానికి 20 పైసలు, బీఎస్‌ఎన్‌ఎల్‌ వినియోగదారులతో మాట్లాడితే ప్రతినిమిషానికి పది పైసలు చార్జి ఉంటుందన్నారు. అలాగే ఎస్‌ఎంఎస్‌ 15 పైసలు ఉంటుందన్నారు.