హీరో సూర్య – దర్శకురాలు సుధ కొంగరది హిట్‌ కాంబినేషన్‌. సూర్య హీరోగా సుధ దర్శకత్వంలో రూపొందిన ‘సూరరై పోట్రు’ (తెలుగులో ‘ఆకాశం నీ హద్దు రా’) మంచి విజయాన్ని సొంతం చేసుకున్న విషయం తెలిసిందే. ఇటీవల ప్రకటించిన జాతీయ అవార్డుల్లో ఈ చిత్రానికి ఐదు అవార్డులు దక్కాయి. కాగా సుధ కొంగర దర్శకత్వంలో మరో సినిమా చేయడానికి సూర్య అంగీకరించారు. గ్యాంగ్‌స్టర్‌ కథతో ఈ చిత్రాన్ని రూపొందించనున్నట్లు ఓ ఇంటర్వ్యూలో సుధ పేర్కొన్నారు. అయితే ఈ సినిమా ఆరంభానికి కొంత టైమ్‌ పడుతుంది. ప్రస్తుతం బాల దర్శకత్వంలో సూర్య ‘వణంగాన్‌’ (తెలుగులో ‘అచలుడు’) అనే సినిమా చేస్తున్నారు. ఈ సినిమా తర్వాత సుధ దర్శకత్వంలో సూర్య చేసే సినిమా ఆరంభం అవుతుందని సమాచారం. పక్కా మాస్‌ మసాలా కథతో కమర్షియల్‌ చిత్రంగా సుధ తెరకెక్కించనున్నారని తెలిసింది.


 ‘ఈ భాషా ఒక్కసారి చెప్తే.. వందసార్లు చెప్పినట్టే’ – ఇరవైయేళ్ల క్రితం విడుదలైన ‘భాషా’లోని ఈ డైలాగ్‌ ఇప్పటికీ జనాలకు గుర్తే. మరో ఇరవై కాదు.. వందేళ్లు గడిచినా ‘భాషా’ సినిమా, అందులో రజనీకాంత్‌ యాక్టింగ్, ఆయన డైలాగులను ప్రేక్షకులు మర్చిపోరంటే అతిశయోక్తి కాదు. ఇండియన్‌ ఫిల్మ్‌ ఇండస్ట్రీలో ‘భాషా’తో సరికొత్త ట్రెండ్‌ సెట్‌ చేశారు రజనీ. ముంబై మాఫియా నేపథ్యంలో ఏదైనా సినిమా వస్తే ఆయన ఫ్యాన్స్‌కి ‘భాషా’ గుర్తొస్తుంది. ఇప్పుడీ సినిమా ప్రస్తావన ఎందుకంటే... మళ్లీ ముంబై నేపథ్యంలో రజనీ సినిమా చేయనున్నారట! రజనీకాంత్‌ హీరోగా పా.రంజిత్‌ దర్శకత్వంలో ధనుష్‌ ఓ సినిమా నిర్మిస్తున్న సంగతి తెలిసిందే.
 
  ఈ సినిమా ముంబై నేపథ్యంలో ఉంటుందట! అండర్‌వరల్డ్‌ మాఫియా నేపథ్యంలో సాగే గ్యాంగ్‌స్టర్‌ కథతో ఈ చిత్రాన్ని తెరకెక్కించనున్నారట. ఇటీవల రజనీకాంత్, దర్శకుడు పా. రంజిత్, మరికొంత మంది యూనిట్‌ సభ్యులు ముంబై వెళ్లి లోకేషన్స్‌ ఫైనలైజ్‌ చేశారని చెన్నై కోడంబాక్కమ్‌ వర్గాల సమాచారం. ఆల్రెడీ ‘కబాలి’లో రజనీకాంత్‌ని గ్యాంగ్‌స్టర్‌గా చూపించి ఆయన అభిమానులను పా. రంజిత్‌ ఖుషీ చేశారు. ఇప్పుడు ముంబై నేపథ్యం అనగానే, రజనీ అభిమానుల్లో సినిమాపై అంచనాలు పెరుగుతున్నాయి. ఇంకోసారి అభిమాన హీరో ‘ఈ భాషా ఒక్కసారి చెప్తే.. వందసార్లు చెప్పినట్టే’ అనే రేంజ్‌ డైలాగ్‌ చెబితే చూడాలని ఆశపడుతున్నారు. మరి, అలాంటి డైలాగ్‌ ఉంటుందా? వెయిట్‌ అండ్‌ సీ!