* ఆదాల తప్పుకోవడంతో పోటీ నామమాత్రమే
 * కాంగ్రెస్, టీడీపీ అభ్యర్థుల గెలుపు ఖాయం
 * కేకేకు కొన్ని ఓట్లు వేయనున్న కాంగ్రెస్, ఎంఐఎం!
 * ఓటింగ్‌కు వైఎస్సార్ కాంగ్రెస్, బీజేపీ, సీపీఎం దూరం
 * ఏర్పాట్లను పర్యవేక్షించిన భన్వర్‌లాల్
 * తొలిసారిగా తిరస్కార ఓటుకు అవకాశం
  
 సాక్షి, హైదరాబాద్: రాజ్యసభ ద్వైవార్షిక ఎన్నికల్లో రాష్ట్రంలోని ఆరు స్థానాలకు శుక్రవారం పోలింగ్ జరగనుంది. అయితే స్వతంత్ర అభ్యర్థిగా పోటీలో ఉన్న ఆదాల ప్రభాకరరెడ్డి పోటీనుంచి తప్పుకోవడంతో గెలిచే అభ్యర్థులు దాదాపు ముందే ఖరారయ్యారు. దీంతో రాష్ట్రంలో రాజ్యసభ ఎన్నికలకు 16 ఏళ్ల తరువాత జరుగుతున్న పోలింగ్ నామమాత్రంగానే కొనసాగనుంది. ఆదాల ప్రకటనతో వివిధ పార్టీల అధికారిక అభ్యర్థులు కేవీపీ రామచంద్రరావు, టి. సుబ్బిరామిరెడ్డి, ఎంఏ ఖాన్ (కాంగ్రెస్), గరికపాటి మోహనరావు, తోట సీతారామలక్ష్మి (టీడీపీ), కే కేశవరావు (టీఆర్‌ఎస్)లకు పోలింగ్‌కు ముందే విజయం ఖరారయినట్టే. అయితే ఉపసంహరణ గడువు ఇదివరకే ముగిసిపోవడంతో సాంకేతికంగా ఆదాల పోటీలో ఉన్నట్లే. దీంతో ఎన్నికలు తప్పనిసరిగా మారాయి.
 
 అసెంబ్లీ కమిటీహాల్ నంబర్-1లో పోలింగ్‌కు అనుగుణంగా ఏర్పాట్లు జరిగాయి. అసెంబ్లీ లోపల, బయట కూడా భద్రతా ఏర్పాట్లను చేపట్టారు. రాష్ట్ర ఎన్నికల ప్రధానాధికారి భన్వర్‌లాల్ గురువారం అసెంబ్లీకి వచ్చి రిటర్నింగ్ అధికారి, అసెంబ్లీ కార్యదర్శి రాజసదారాం, పోలీసు ఉన్నతాధికారులతో సమావేశమయ్యారు. ఉదయం తొమ్మిది నుంచి సాయంత్రం నాలుగు గంటలవరకు పోలింగ్ జరగనుందని, ఓటు వేయనున్న ఎమ్మెల్యేలు 276 మంది ఉన్నారని రాజసదారాం వివరించారు. సాయంత్రం అయిదింటి నుంచి లెక్కింపు ప్రారంభిస్తామన్నారు. రాజ్యసభ ఎన్నికల పరిశీలకునిగా ఉత్తరప్రదేశ్ రాష్ట్ర ఎన్నికల ప్రధానాధికారి ఉమేష్ సిన్హా వ్యవహరిస్తారని తెలిపారు. మరిన్ని వివరాలు...
 
 * సుప్రీంకోర్టు ఆదేశాల మేరకు ఓపెన్ బ్యాలెట్ విధానంతోపాటు ఎన్నికల్లో పైవి ఏవీ కావు (నోటా) ఆప్షన్‌ను పొందుపరిచి తిరస్కరణకు అవకాశం కల్పిస్తున్నారు. 2004లో ఎన్నికల నిబంధనావళిలో 239 ఏఏ సడలించి ఈ పద్ధతిని ప్రవేశపెట్టారు.
      
 * బ్యాలెట్ పత్రంలో మొదట కె.కేశవరావు, ఆ తర్వాత గరికపాటి మోహన్‌రావు, టి.సుబ్బరామిరెడ్డి, తోట సీతారామలక్ష్మి, ఎం.ఏ.ఖాన్, కేవీపీ, ఆదాల ప్రభాకర్‌రెడ్డిల పేర్లను వరుస క్రమంలో వచ్చాయి. ఎనిమిదో కాలమ్‌లో ‘పైవి ఏవీ కావు’ అని పెట్టారు.
      
 * ఓపెన్ బ్యాలెట్‌ను అనుసరిస్తున్నందున ఆయా పార్టీలనుంచి ప్రత్యేక ఏజెంట్లు పోలింగ్‌బూత్‌లోకి అనుమతిస్తారు. ఆయా ఏజెంట్లకు బ్యాలెట్ పత్రాలను చూపించాకనే ఎమ్మెల్యేలు బ్యాలెట్ బాక్సులో దాన్ని వేయాల్సి ఉంటుంది. అయితే ఎమ్మెల్యేలు ఎవరికి ఓటు వేశామనేది బహిర్గతం చేయకూడదు. అలా చేస్తే క్రిమినల్ కేసులు పెడతారు.
      
 * శాసనసభలో మొత్తం 294 స్థానాలకు ప్రస్తుతం 15 స్థానాలు ఖాళీగా ఉన్నాయి. కోర్టు కేసుల కారణంగా కాంగ్రెస్, టీడీపీ, టీఆర్‌ఎస్‌ల నుంచి ఒక్కో సభ్యుడికి ఓటుహక్కు లేదు. మిగిలిన 276 ఎమ్మెల్యేలు ఓటింగ్‌లో పాల్గొంటే ఒక్కొక్క అభ్యర్థి గెలుపునకు 40 మొదటి ప్రాధాన్యత ఓట్లు రావాలి.
 
 * వైఎస్‌ఆర్ కాంగ్రెస్‌కు చెందిన 17 మంది ఎమ్మెల్యేలు, ఆ పార్టీకి మద్దతు ఇస్తున్న మరో ఆరుగురు.. బీజేపీకి చెందిన ముగ్గురు ఎమ్మెల్యేలు, పార్టీకి మద్దతు ఇస్తున్న స్వతంత్ర ఎమ్మెల్యే నాగం జనార్దన్‌రెడ్డి.. ఏకైక సీపీఎం ఎమ్మెల్యే ఓటింగ్‌కు దూరంగా ఉంటారని ఆయా పార్టీలు ప్రకటించాయి.
      
 * వీరిని మినహాయించి మిగిలిన 248  ఎమ్మెల్యేలు మాత్రమే ఓటింగ్‌లో పాల్గొనే పక్షంలో ఒక్కొక్క అభ్యర్థి గెలుపునకు 37 ఓట్లు రావాల్సి ఉంటుంది. పోటీ నామమాత్రంగానే జరుగుతున్న దృష్ట్యా కాంగ్రెస్ పార్టీ తెలంగాణ ప్రాంత ఎమ్మెల్యేలు, ఎంఐఎంల ఓట్లలో కొన్ని ఓట్లు టీఆర్‌ఎస్ అభ్యర్థి కేశవరావుకు వేసేలా ఏర్పాటు జరుగుతున్నాయని ఆయా పార్టీల వర్గాలు వెల్లడించాయి.


  నామినేషన్‌కు సిద్ధం కావాలన్న చంద్రబాబు
  సాక్షి, హైదరాబాద్: తెలంగాణ ప్రాంతం నుంచి తెలుగుదేశం పార్టీ తరఫున రాజ్యసభ సీటుకు ఆ పార్టీ ప్రధాన కార్యదర్శి గరికపాటి మోహనరావు పేరు ఖరారైంది. రాజ్యసభ ఎన్నికలు జరిగిన ప్రతిసారీ తన కోటరీ నుంచి ఒకరికి టికెట్ ఇస్తున్న చంద్రబాబు.. ఈ సారి గరికపాటి పేరును ఖరారు చేశారు. గతంలో రెండుసార్లు సుజనా చౌదరి, సీఎం రమేష్‌లను చంద్రబాబు వరుసగా రాజ్యసభకు పంపిన విషయం తెలిసిందే. ఈసారి గరికపాటి పేరును ఖరారు చేసిన బాబు.. నామినేషన్ వేసేందుకు ఏర్పాట్లు చేసుకోవాలని సూచించారు. ఇక మరో సీటు కోసం సీమాంధ్ర ప్రాంతం నుంచి ఒకరిని ఎంపిక చేయాలని భావిస్తున్నట్టు పార్టీ వర్గాలు తెలిపాయి. గరికపాటి అభ్యర్థిత్వం ఖరారు కాకుండా అడ్డుకోవాలని ప్రయత్నించిన ఎంపీ సుజనా చౌదరి... సీమాంధ్ర నుంచి సోమిరెడ్డి చంద్రమోహన్‌రెడ్డి లేదా నారాయణ విద్యా సంస్థల చైర్మన్ పి.నారాయణకు సీటు ఇవ్వాల్సిందిగా చంద్రబాబుపై ఒత్తిడి తెస్తున్నారు.
  
   ‘నారాయణకు రాజ్యసభ సీటు ఇవ్వడమనేది నా ఆబ్లిగేషన్. నేను సూచించిన వ్యక్తికి కాకుండా మరెవరికి చంద్రబాబు సీటు ఇస్తారు..?’ అంటూనెల్లూరు జిల్లాకు చెందిన ఒక నేత వద్ద సుజనా వ్యాఖ్యానిం చినట్లు సమాచారం.  పశ్చిమ గోదావరి జిల్లా పార్టీ అధ్యక్షురాలు సీతామాలక్ష్మి, గుంటూరు జిల్లాకు చెంది న పార్టీ రాష్ట్ర కార్యనిర్వాహక కార్యదర్శి దాసరి రాజా మాస్టార్‌తో పాటు మాజీ ఎమ్మెల్సీ నిమ్మకాయల చినరాజప్ప, మాజీ ఎమ్మెల్యే సత్యనారాయణ (బాబ్జీ), బోండా ఉమామహేశ్వరరావు తదితరుల పేర్లను రాజ్యసభ కోసం పరిశీలిస్తున్నట్లు సమాచారం.  రాజ్యసభ సీటుపై ఆశలు వదులుకున్న కంభంపాటి రామ్మోహనరావు అసెంబ్లీ వైపు కన్నెత్తి కూడా చూడలేదు.
  
  అలకవీడని మోత్కుపల్లి!
  రాజ్యసభ టికెట్ కావాలని పట్టుబడుతున్న మోత్కుపల్లి నర్సింహులు వరుసగా రెండోరోజూ శాసనసభకు రాలేదు. సన్నిహితులు ఫోన్‌లో మాట్లాడి బుజ్జగించే ప్రయత్నం చేయగా... చంద్రబాబు తనకు అన్యాయం చేశారని చెప్పినట్లుగా వారు పేర్కొంటున్నారు.