న్యూఢిల్లీ: జిబ్రాల్టర్ చెస్ ఫెస్టివల్ అంతర్జాతీయ టోర్నమెంట్‌లో ఆంధ్రప్రదేశ్ గ్రాండ్‌మాస్టర్ పెంటేల హరికృష్ణ మూడో ‘డ్రా’ నమోదు చేశాడు. బ్రుజోన్ బాటిస్టా లాజరో (క్యూబా)తో జరిగిన ఏడో రౌండ్ గేమ్‌లో నల్లపావులతో ఆడిన హరికృష్ణ 29 ఎత్తుల్లో ‘డ్రా’ చేసుకున్నాడు. ఏడో రౌండ్ తర్వా త హరికృష్ణ 5.5 పాయింట్లతో మరో 15 మందితో కలిసి సంయుక్తంగా రెండో స్థానంలో ఉన్నాడు. ఆంధ్రప్రదేశ్‌కే చెందిన మరోగ్రాండ్‌మాస్టర్ ద్రోణవల్లి హారిక ఖాతాలో కూడా మూడో ‘డ్రా’ చేరింది. లారెంట్ ఫ్రాసినెట్ (ఫ్రాన్స్)తో జరిగిన గేమ్‌ను హారిక 30 ఎత్తుల్లో ‘డ్రా’గా ముగించింది. భారత చెస్ దిగ్గజం విశ్వనాథన్ ఆనంద్‌కు రెండో ఓటమి ఎదురైంది. బెంజమిన్ గ్లెడూరా (హంగేరి)తో జరిగిన గేమ్‌లో ఆనంద్ 48 ఎత్తుల్లో ఓడిపోయాడు.


 న్యూఢిల్లీ: జిబ్రాల్టర్ చెస్ ఫెస్టివల్ అంతర్జాతీయ టోర్నమెంట్‌లో ఆంధ్రప్రదేశ్ గ్రాండ్‌మాస్టర్ పెంటేల హరికృష్ణ రెండో ‘డ్రా’ నమోదు చేసుకున్నాడు. భారత్‌కే చెందిన అభిజిత్ గుప్తాతో జరిగిన ఆరో రౌండ్ గేమ్‌ను హరికృష్ణ 60 ఎత్తుల్లో ‘డ్రా’గా ముగించాడు. ఆరో రౌండ్ తర్వాత హరికృష్ణ ఐదు పాయింట్లతో మరో ఎనిమిది మందితో కలిసి సంయుక్తంగా అగ్రస్థానంలో ఉన్నాడు. ఆంధ్రప్రదేశ్‌కే చెందిన మరో గ్రాండ్‌మాస్టర్ ద్రోణవల్లి హారికకు తొలి పరాజయం ఎదురైంది. ఆంటోన్ గిజారో (స్పెయిన్)తో జరిగిన గేమ్‌లో హారిక 53 ఎత్తుల్లో ఓడిపోయింది. మరోవైపు భారత దిగ్గజం విశ్వనాథన్ ఆనంద్ మూడో విజయాన్ని సాధించాడు. ఫియాలా విక్లావ్ (చెక్ రిపబ్లిక్)తో జరిగిన గేమ్‌లో ఆనంద్ 32 ఎత్తుల్లో గెలిచాడు.


 న్యూఢిల్లీ: జిబ్రాల్టర్ చెస్ ఫెస్టివల్ అంతర్జాతీయ టోర్నమెంట్‌లో ఆంధ్రప్రదేశ్ గ్రాండ్‌మాస్టర్ పెంటేల హరికృష్ణ మూడో విజయాన్ని సాధించాడు. నాలుగో రౌండ్‌లో అరవింద్ చిదంబరం (భారత్)తో జరిగిన గేమ్‌లో తెల్లపావులతో ఆడిన హరికృష్ణ 115 ఎత్తుల్లో గెలుపొందాడు. ఆంధ్రప్రదేశ్‌కే చెందిన మరో గ్రాండ్‌మాస్టర్ ద్రోణవల్లి హారిక తొలి ‘డ్రా’ నమోదు చేసింది.
 రిచర్డ్ రాపోర్ట్ (హంగేరి)తో జరిగిన గేమ్‌ను హారిక 37 ఎత్తుల్లో ‘డ్రా’ చేసుకుంది. గ్రిగోరి ఒపారిన్ (రష్యా)తో జరిగిన గేమ్‌ను విశ్వనాథన్ ఆనంద్ 31 ఎత్తుల్లో ‘డ్రా’గా ముగించాడు. జోల్టాన్ అల్మాసీ (హంగేరి)తో జరిగిన గేమ్‌లో లలిత్ బాబు 47 ఎత్తుల్లో ఓడిపోగా... దిమిత్రిజ్ కొలార్స్ (జర్మనీ)తో జరిగిన గేమ్‌ను ప్రత్యూష ‘డ్రా’ చేసుకుంది.