– విజయేంద్రప్రసాద్‌
 ‘‘నా తెలంగాణ కోటి రతనాల వీణ’ అంటూ అలనాడు దాశరథి నిజామాబాద్‌ కారాగారం సాక్షిగా నినదించారు. తెలంగాణది గొప్ప పోరాటాల చరిత్ర. తెలంగాణ తల్లి రుణం తీర్చుకునే అవకాశం నాకూ రావాలని కోరుకుంటున్నా’’ అని రచయిత–దర్శకుడు విజయేంద్రప్రసాద్‌ అన్నారు. ‘బందూక్‌’ ఫేమ్‌ లక్ష్మణ్‌ దర్శకత్వంలో లక్ష్మణ్‌ కొణతం నిర్మించనున్న ‘గులాల్‌’ మోషన్‌ పోస్టర్‌ని విజయేంద్రప్రసాద్‌ రిలీజ్‌ చేశారు.
 
 ‘బందూక్‌’ లక్ష్మణ్‌ మాట్లాడుతూ– ‘‘ముఖ్యమంత్రి కేసీఆర్‌గారి జీవిత క్రమాన్ని ఈ సినిమాలో ఐదు భాగాలుగా చూపించనున్నాం. కారణజన్ముడి జననం, బాల్యం మొదలుకొని ఉద్యమ ప్రస్థానం, బంగారు తెలంగాణ సాధన దిశగా సాగుతున్న పాలన ప్రధానాంశాలుగా ఈ చిత్రం ఉంటుంది. త్వరలో కేసీఆర్‌గారికి ఈ చిత్ర ఇతివృత్తాన్ని వివరించి, ఆయన అనుమతి తీసుకోవాలనుకుంటున్నాం’’ అన్నారు. ‘‘ఈ సినిమా కోసం అనేక మంది కవులు, మేధావులను కలుసుకున్నాం’’ అన్నారు లక్ష్మణ్‌ కొణతం. దర్శకుడు ఇ.నివాస్, నిర్మాతలు మల్కాపురం శివకుమార్, వల్లూరిపల్లి రమేష్, యుగంధర్‌రావు తదితరులు పాల్గొన్నారు.


 తొలి చిత్రం ‘బందూక్‌’తో దర్శకుడిగా విమర్శకుల ప్రశంసలు అందుకున్న బందూక్‌ లక్ష్మణ్‌ తాజాగా తెరకెక్కిస్తోన్న చిత్రం ‘గులాల్‌’. సమన్వి క్రియేషన్స్‌ పతాకంపై లక్ష్మణ్‌ కొణతం నిర్మిస్తున్నారు. లక్ష్మణ్‌ మాట్లాడుతూ– ‘‘గులాల్‌ అంటే కేవలం ఒక రంగు మాత్రమే కాదు. విజయానికి గుర్తు.
 
 ముఖ్యమంత్రి కేసీఆర్‌ ఆలోచనా విధానాన్ని అధ్యయనం చేసి, ఆయన ఆలోచనలకు ప్రతిరూపంగా ఈ చిత్రం రూపొందిస్తున్నాం. ‘1956లో జరిగిన ఒక ఒప్పందం చారిత్రాత్మక తప్పైతే.. 2014లో జరిగిన ఒక ఒప్పందం చారిత్రాత్మకమయింది’ అనే విషయాలను చర్చిస్తున్నాం. తెలంగాణలో వాడుకలో ఉండీ లిపిలేని 18 తెలంగాణ భాషల రైతుల జీవితానికి కేసీఆర్‌గారు ఇస్తున్న భరోసాని ఉద్దేశిస్తూ ఈ చిత్రం కోసం గోరెటి వెంకన్నగారు రాసిన పాటను తెలంగాణ ఆవిర్భావ దినోత్సవాలలో విడుదల చేస్తాం’’ అన్నారు. ఈ చిత్రానికి సంగీతం: కార్తీక్‌ కొడకండ్ల, స్క్రీన్‌ప్లే సహకారం: హుస్సేన్‌ షా కిరణ్, కెమెరా: రాహుల్‌ మాచినేని, లైన్‌ ప్రొడ్యూసర్‌: రమేష్‌ మాదాసు, ఎగ్జిక్యూటివ్‌ నిర్మాత: సాయి.