తెలుసుకోదగ్గ పుస్తకం:  ‘జీవితంలో నువ్వు నెరవేర్చవలసిన ధర్మం ఒకటే ఒకటుంది. ఏమిటో తెలుసా? ఎప్పుడూ సంతోషంగా ఉండు. అంతేరా కన్నా’ అని చెప్పేవారు మా నాన్న. నేనెప్పుడూ సంతోషంగానే ఉన్నాను....
  
  ‘ఒక మనిషి... ఒక ఇల్లు.. ఒక ప్రపంచం’లో ప్రధాన పాత్రధారి హెన్రీ తనని తాను ఆవిష్కరించుకుంటూ అన్న మాటలు ఇవి. జ్ఞానపీఠ అవార్డు గ్రహీత జయకాంతన్ తమిళంలో రచించిన సుప్రసిద్ధ నవల ఇది. ఈ నవల సాహిత్య అకాడమి పురస్కారం పొందింది. జయకాంతన్ రెండు వందలకు పైగా కథలు, నలభై నవలలు రాశారు. ఈ నవలను తెలుగులోకి జిల్లేళ్ళ బాలాజీ అనువదించారు.
  
  ఒక మంచి నవల జ్ఞాపకంలా జీవితాంతం వెంటాడుతుంది. దాని స్వభావాన్ని బట్టి విషాదాన్నో తాత్వికతనో మరో సుగంధాన్నో మోస్తూ ఉంటుంది. ఈ నవల అపారమైన సంతోషాన్ని మోసుకొస్తుంది. చదువుతున్నంత సేపూ  ఈ ప్రపంచం మీద ఎనలేని నమ్మకం, మనుషుల పట్ల అంతులేని ప్రేమ కలుగుతాయి. ప్రధాన పాత్రధారుడు హెన్రీ గుర్తుకురాగానే మన మొహం మీద అప్రయత్నంగా ఒక చిరునవ్వు మెలుస్తుంది. బక్క పలుచగా, నీలి కళ్లతో క్రీస్తులా ఉన్న అతన్ని దగ్గరకు తీసుకుని ముద్దాడాలనిపిస్తుంది. ప్రేమ, కామం, ద్వేషం ఇలాంటి విషయాలు ఏవీ లేకుండా ఇంతందంగా రాయడం జయకాంతన్‌కే సాధ్యం.
  
  కృష్ణరాజపురం ఒక అందమైన గ్రామం. సభాపతి పిళ్లై పండితుడు, ఊరి గుడి ధర్మకర్త కూడా. ఆయన భార్య ఇంటి మంగలి వాడితో లేచి వెళ్లిపోతుంది. ఈ విషయం ఊళ్లో వాళ్లకి తెలియక ముందే అతను ఊరు విడిచి మిలట్రీలో చేరుతారు. అక్కడ యుద్ధంలో ఆప్తమిత్రుణ్ని పోగొట్టుకుంటాడు. అతని భార్య దిక్కులేనిది కాకుండా ఉండేందుకు ఆమెతో సహజీవనం చేస్తూ రైల్వే షెడ్డులో దొరికిన కుర్రాణ్ని తెచ్చుకుని పెంచుకుంటాడు. ఆ కుర్రాడే ‘హెన్రీ’.  మొదట తల్లి, తర్వాత తండ్రి చనిపోతారు.
  
  తండ్రి చనిపోతూ ఊళ్లో ఉన్న ఇల్లు, కొద్దిపాటి పొలం అతనికి వారసత్వంగా ఇస్తాడు. హెన్రీకి ఆస్తుల మీద వ్యామోహం లేదు కాని తన తండ్రి జ్ఞాపకాలతో పెనవేసుకున్న ఆ ఇంటిలో ఉంటే తనకి ఎంతో ఇష్టమైన తండ్రి లేని లోటు తీరుతుందని ఆ ఇల్లు వెతుక్కుంటూ బయలుదేరుతాడు. ఒక మనిషి తన పెంపుడు తండ్రి ఎప్పుడో ఊళ్లో వదిలేసిన ఒక ఇంటిని వెదుక్కుంటూ అందులో ఉండటం కోసం చేసే ప్రయత్నం, ఆ ప్రయత్నంలో అతని చుట్టూ ఏర్పరచుకున్న ఒక ప్రపంచం.. ఇది ఈ నవల సారాంశం.
  
  ఈ ప్రయత్నంలో తారసపడే పాత్రలు- ఇతనికి మొదటి నుంచి తోడుగా ఉన్న యువకుడు దేవరాజన్; అన్నగారు వదిలేసిన పొలాలను సంరక్షిస్తూ, తానొక ధర్మకర్తనని, ఎప్పుడు వారసుడు వస్తే, అతనికి ఆస్తి అప్పజెప్పాలనుకునే దొరైకణ్ణు; ఎవరో ముక్కూ మొహం తెలియని వ్యక్తి వచ్చి ఆస్తి నాది అని ఋజువులు చూపించినపుడు, ఊళ్లోనే ఇంత కాలం తమ మధ్య ఉన్న వ్యక్తికి అన్యాయం జరిగిపోతోందేమోనని మథనపడ్డ ఊరి పెద్దలు; అందరికీ తలలో నాలుక లాగా ఉండే దేవరాజన్ అక్క... ఇలా హెన్రీ ప్రపంచంలో చేరిన ప్రతీపాత్ర, పిచ్చి పిల్లతో, సహా ఎంతో సంస్కారవంతంగా ఉంటాయి. ‘హెన్రీ పాత్ర చాలా ఐడియలిస్టిక్. ఇలాంటి మనిషిని మనం ఎప్పుడూ చూడలేదు. అయితే చూడగలరు.. చూడండి’ అని రచయిత తన ముందు మాటలో చెబుతాడు. ఎప్పుడు ఏ చిన్న విషాదానికో గుండె బరువెక్కినపుడు, మనసు కలత చెందినపుడు ఈ పుస్తకం తీసి చదవండి. మీ మీద మీకు విశ్వాసం, ఈ ప్రపంచం మీద అపారమైన నమ్మకం కలక్కపోతే అడగండి.
  - కృష్ణమోహన్‌బాబు


 దాదాపు నాలుగేళ్ల విరామం తర్వాత సుస్మితాసేన్ ఓ చిత్రంలో నటించబోతున్నారు. ‘నో ప్రాబ్లమ్’ తర్వాత ఆమె వేరే ఏ సినిమాలోనూ నటించ లేదు. ఈ ఏడాది నుంచి వరుసగా సినిమాలు చేయాలనుకుంటున్నారు. ఈ నేపథ్యంలో ఇటీవల ఓ బెంగాలీ సినిమాలో నటించడానికి అంగీకరించారు సుస్మిత. తొమ్మిదేళ్ల క్రితం ‘ఇట్ వాస్ రెయినింగ్ దట్ నైట్’ అనే బెంగాలీ సినిమాలో నటించారు. ఇన్నేళ్ల తర్వాత మళ్లీ ఆమె ఆ భాషలో సినిమా అంగీకరించడానికి కారణం కథ బాగా నచ్చడమే. లేడీ డెరైక్టర్ రూపాలీ గుహ దర్శకత్వంలో ఈ చిత్రం రూపొందనుంది. ఈ చిత్రకథ నచ్చి, ఓ నిర్మాతగా కూడా వ్యవహరించాలనుకుంటున్నారట సుస్మిత. అలాగే, ఈ చిత్రం రీమేక్ హక్కులను చేజిక్కించుకుని, హిందీలో నిర్మించాలనుకుంటున్నారట.
  
   ఒకవైపు బెంగాలీ సినిమాకి సన్నాహాలు చేసుకుంటూనే మరోవైపు ‘హ్యాపీ యానివర్శరీ’ అనే హిందీ చిత్రంలో నటించడానికి గ్రీన్ సిగ్నల్ ఇచ్చారు. పలు వాణిజ్య ప్రకటనలకు దర్శకత్వం వహించిన ప్రహ్లాద్ కక్కర్ ఈ చిత్రానికి దర్శకత్వం వహించనున్నారు. ఇందులో అభిషేక్‌బచ్చన్, ఐశ్వర్యారాయ్ జంటగా నటించనున్నారట. ఒకప్పుడు ఐష్, సుష్‌ల మధ్య అంత సఖ్యత ఉండేది కాదనే వార్తలు వచ్చాయి. అయితే, అవేం మనసులో పెట్టుకోకుండా ఈ ఇద్దరూ ఈ సినిమా చేయడానికి ముందుకొచ్చారట. సుస్మితా అయితే.. ‘ఐశ్వర్యాతో సినిమా చేయడానికి నేను రెడీ’ అని ఇటీవల ఓ సందర్భంలో బహిరంగంగా స్టేట్‌మెంట్ కూడా ఇచ్చారు.