చెన్నై: ప్రొ కబడ్డీ లీగ్‌–6లో పుణేరీ పల్టన్‌ శుభారంభం చేసింది. సోమవారం జోన్‌ ‘ఎ’లో భాగంగా జరిగిన తమ తొలి మ్యాచ్‌లో రైడర్లు నితిన్‌ తోమర్‌ (7 పాయింట్లు), జీబీ మోరే (6), దీపక్‌ కుమార్‌ దహియా (5) రాణించడంతో... 34–22తో హరియాణా స్టీలర్స్‌పై ఘనవిజయం సాధించింది. హరియాణా జట్టులో వికాస్‌ కండోలా 8 పాయింట్లతో సత్తా చాటినప్పటికీ అతనికి సహచరుల నుంచి తగిన సహకారం అందలేదు. మ్యాచ్‌ ఆరంభంలో ఇరుజట్లు పోటాపోటీగా తలపడటంతో పాయింట్లు నెమ్మదిగానే వచ్చాయి. 13వ నిమిషంలో 7–6తో దాదాపు ఇరు జట్లు సమానంగానే  ఉన్నాయి. అయితే, మ్యాచ్‌ సాగిన కొద్ది పట్టు సాధించిన పుణేరి రైడర్లు ఆట 19వ నిమిషంలో ప్రత్యర్థిని ఆలౌట్‌ చేసి తొలి అర్ధభాగాన్ని 15–9తో ఆధిక్యంతో ముగించారు. రెండో అర్ధభాగంలో పుంజుకున్న హరియాణా వరుసగా 5 పాయింట్లు సాధించి 14–18తో రేసులోకి వచ్చింది. పల్టన్‌ ఆటగాళ్లు 36వ నిమిషంలో స్టీలర్స్‌ను రెండోసారి ఆలౌట్‌ చేసి 30–17తో స్పష్టమైన ఆధిపత్యాన్ని ప్రదర్శించారు. ఇదే జోరును చివరి వరకు సాగిస్తూ విజయాన్ని అందుకున్నారు. అనంతరం జరిగిన రెండో మ్యాచ్‌లో తమిళ్‌ తలైవాస్‌కు ఓటమి ఎదురైంది. టోర్నీ ఆరంభ మ్యాచ్‌లో డిఫెండింగ్‌ చాంపియన్‌ పట్నా పైరేట్స్‌ను కంగుతినిపించిన ఆ జట్టు రెండో మ్యాచ్‌లో 32–37తో యూపీ యోధచేతిలో ఓడిపోయింది. తలైవాస్‌ తరఫున అజయ్‌ ఠాకూర్‌ 12 రైడ్‌ పాయింట్లతో ఆకట్టుకోగా... ట్యాకిల్‌లో మన్‌జీత్‌ చిల్లర్‌ (4 పాయింట్లు) రాణించాడు. యూపీ యోధా తరఫున రైడర్లు ప్రశాంత్‌ కుమార్‌ (8), శ్రీకాంత్‌ (5), రిషాంక్‌ దేవడిగ (4) క్రమం తప్పకుండా స్కోర్‌ చేస్తూ జట్టు విజయంలో కీలకపాత్ర పోషించారు. 


 ప్రొ కబడ్డీ లీగ్‌
 
 రాంచీ: ప్రొ కబడ్డీ లీగ్‌ ఐదో సీజన్‌లో భాగంగా మంగళవారం జరిగిన మ్యాచ్‌లో ఆల్‌రౌండ్‌ షోతో విజృంభించిన పుణేరి పల్టన్‌ 37–25 తేడాతో హరియాణా స్టీలర్స్‌పై ఘనవిజయం సాధించింది. రాజేశ్‌ మొండల్‌ 7 రైడింగ్‌ పాయింట్లతో ఆకట్టుకుని విజయంలో కీలక పాత్ర పోషించాడు. అయితే హరియాణా రైడర్‌ సుర్జీత్‌ సింగ్‌ అత్యధికంగా 10 రైడింగ్‌ పాయింట్లు సాధించినా సహచరుల వైఫల్యంతో ఆ జట్టుకు ఓటమి తప్పలేదు. జోన్‌ ‘ఎ’లో రెండో స్థానంలో కొనసాగుతున్న హరియాణా స్టీలర్స్‌ ఆరంభంలో పుణేరికి గట్టి పోటీనే ఇచ్చింది.
 
 ఇరు జట్లు ఒక్కో పాయింట్‌ కోసం హోరాహోరీగా తలపడ్డాయి. ప్రథమార్ధం మరో నాలుగు నిమిషాల్లో ముగిసేవరకు హరియాణా 8–9తో గట్టి పోటీనే ఇచ్చింది. కానీ ఆఖర్లో పుంజుకున్న పుణేరి 16–10తో ఆధిక్యంలో నిలిచింది. ఇక ద్వితీయార్ధంలో హరియాణా నుంచి ఏమాత్రం పోటీ ఎదురుకాకపోవడంతో చకచకా పాయింట్లు సాధించిన పుణెరి స్పష్టమైన ఆధిక్యంతో విజయాన్నందుకుంది. మరో మ్యాచ్‌లో పట్నా పైరేట్స్‌ 36–32 తేడాతో బెంగళూరు బుల్స్‌ను ఓడించింది. నేడు జరిగే మ్యాచ్‌ల్లో యు ముంబాతో గుజరాత్‌ ఫార్చూన్‌ జెయింట్స్‌; పట్నా పైరేట్స్‌తో తమిళ్‌ తలైవాస్‌ తలపడతాయి. 


 ప్రొ కబడ్డీ లీగ్‌  
 
 కోల్‌కతా: ప్రొ కబడ్డీ లీగ్‌లో హరియాణా స్టీలర్స్‌ ఐదో విజయాన్ని సాధించింది. మంగళవారం జరిగిన మ్యాచ్‌లో హరియాణా స్టీలర్స్‌ 36–29తో బెంగాల్‌ వారియర్స్‌పై విజయం సాధించింది. ఈ మ్యాచ్‌లో 11సార్లు రైడింగ్‌ వెళ్లిన వాజిర్‌ సింగ్‌ 10 పాయింట్లు స్కోర్‌ చేయగా, టాకిల్‌లో మోహిత్‌ ఛిల్లర్‌ 4 పాయింట్లు సాధించాడు. సుర్జీత్‌ సింగ్‌ 8 పాయింట్లు సాధించాడు. బెంగాల్‌ వారియర్స్‌ తరఫున మనీందర్‌ సింగ్‌ 14 పాయింట్లు సాధించి ఈ మ్యాచ్‌లో టాప్‌స్కోరర్‌గా నిలిచాడు.
 
 వినోద్‌ కుమార్‌ 4 పాయింట్లు స్కోర్‌ చేశాడు. మరో మ్యాచ్‌లో పాట్నా పైరేట్స్‌ 47–21తో జైపూర్‌ పింక్‌ పాంథర్స్‌పై గెలుపొందింది. రైడర్‌ పర్దీప్‌ నర్వాల్‌ 21 పాయింట్లతో అదరగొట్టాడు. అతను 22 సార్లు రైడింగ్‌కు వెళ్లి 21 పాయింట్లు స్కోర్‌ చేశాడు. జైపూర్‌ పింక్‌ పాంథర్స్‌ తరఫున పవన్‌ కుమార్‌ 7 పాయింట్లు సాధించాడు.