రూ.50 కోట్లు పెట్టుబడులు పెట్టనున్న బ్లూచిప్ కంపెనీ...
 ⇒ డిసెంబర్‌కల్లా దేశంలో 90 ఔట్‌లెట్లు
 హైదరాబాద్, బిజినెస్ బ్యూరో: నాణ్యమైన పరాటాలు ఇప్పుడు హెలో కర్రీ మెనూలోకి వచ్చి చేరాయి.  హోమ్ డెలివరీ రంగంలో ఉన్న హైదరాబాద్‌కు చెందిన పరాటా పోస్ట్‌ను ,ఈ నగరం కేంద్రంగా కార్యకలాపాలు నిర్వహిస్తున్న హెలో కర్రీ కొనుగోలు చేసింది. ఎంత మొత్తానికి కొనుగోలుచేసిందీ కంపెనీ వెల్లడించలేదు. పరాటా పోస్ట్‌ను కొనుగోలు చేసిన సందర్భంగా హలో కర్రీ సీఈఓ రాజు భూపతి ‘సాక్షి బిజినెస్ బ్యూరో’తో ప్రత్యేకంగా మాట్లాడారు. పలు విశేషాలు వెల్లడించారు. అవి....
  
 ఎంత తింటే.. అంతే డబ్బులు
 సింగిల్, ఫ్యామిలీ, జంబో ప్యాక్స్.. ఇదీ స్థూలంగా బిర్యానీ ప్యాక్‌ల రకాలు. హలో కర్రీ అనే స్టార్టప్ ఒక అడుగు ముందుకేసి హైటెక్‌సిటీలో ఎక్స్‌పీరియన్స్ సెంటర్ పేరుతో వినూత్న రెస్టారెంట్‌ను ప్రారంభించింది. దీని ప్రత్యేకత ఏంటంటే మనకు ఎంత బిర్యానీ రైస్ కావాలంటే అంత.. ఎన్ని ముక్కలు కావాలంటే అన్ని వేసుకోవచ్చు ఇక్కడ. గ్రాముకు 50 పైసల చొప్పున చెల్లించాలి అంతే. ఇలా ఎందుకంటే బిర్యానీ బాగా లేదనో, ముక్కలు తినేసి ఆహారం వదలటమో, అనుకున్న దానికంటే ఎక్కువుందనో.. ఇలా కారణాలేమైనా నగరంలో రోజుకు 24.8 శాతం ఆహారం దుర్వినియోగం అవుతోంది. వేస్ట్ కాకుండా ఉండాలంటే ఎంత బిర్యానీ కావాలో ఎంచుకునే అవకాశం కస్టమర్లకే ఇస్తే సరిపోతుందంటారాయన.
  
 దేశంలో 80-90 ఔట్‌లెట్లు..
 ప్రస్తుతం హలో కర్రీకి హైదరాబాద్‌లో గచ్చిబౌలి, కొండాపూర్, మాదాపూర్, హైటెక్‌సిటీ, కూకట్‌పల్లిలో ఔట్‌లెట్లున్నాయి. వీటి నుంచి నెలకు 10 వేల ఆర్డర్లొస్తున్నాయి. మరో 15 రోజుల్లో పంజగుట్ట, హిమాయత్‌నగర్‌లోనూ ప్రారంభించనున్నాం. బెంగళూరులో  లోనూ సెంటర్లు ఉన్నాయి. డిసెంబర్‌కల్లా దేశంలో 80-90 ఔట్‌లెట్లు ప్రారంభించానేది లక్ష్యం.
  
 30 నిమిషాల్లో డెలివరీ..: ప్రస్తుతం ఒక్క రోజులో హైదరాబాద్‌లోని మొత్తం హోమ్ డెలివరీ మార్కెట్లో హలో క ర్రీ వాటా 25%. వాట్సాప్, యాప్, ఎస్‌ఎంఎస్‌ల ద్వారా కూడా ఆర్డర్లివ్వొచ్చు. ధరలు రూ.79-149 వరకున్నాయి. ఆర్డరిచ్చిన 30 నిమిషాల్లో సరఫరా చేస్తాం. ప్రస్తుతం హలో కర్రీకి 5 లక్షల మంది కస్టమర్లున్నారు.
  
 పరాటా పోస్ట్ గురించి..
 ఐఐఎం గ్రాడ్యుయేట్లు ముకేష్ లాంబ, రితురాజ్‌లు 2013లో పరాటా పోస్ట్‌ను ప్రారంభించారు. 55 రకాల పరాటాలు, కూరలను ఈ కంపెనీ సరఫరా చేస్తోంది. గతేడాది 3 లక్షలకుపైగా పరాటాలతో 60 వేల ఆర్డర్లను విజయవంతంగా పూర్తి చేసింది. పరాటాపోస్ట్ కొనుగోలుచేయడంతో పాటు దేశీయ ఫుడ్ డెలివరీ రంగ కంపెనీల కొనుగోలుపై దృష్టిపెట్టాం. ముంబై కంపెనీని త్వరలో కొనుగోలు చేయనున్నాం.
  
 రూ.50 కోట్ల పెట్టుబడులు..
 2014లో కంపెనీ ప్రారంభించే రోజుల్లో రూ.3.5 కోట్ల పెట్టుబడులు పెట్టాం. తర్వాతి నెల రోజుల్లోనే వెంచర్ క్యాపిటలిస్ట్ శశిరెడ్డి రూ.3 కోట్లు సీడ్ ఫండ్ అందించారు. తాజాగా రూ.50 కోట్లు పెట్టుబడులు పెట్టేందుకు ఒక బ్లూ చిప్ కంపెనీ ముందుకొచ్చింది. నెల రోజుల్లో పూర్తి వివరాలు వెల్లడిస్తాం.


 హైదరాబాద్, బిజినెస్ బ్యూరో: ప్రముఖ సంస్థల్లో ఉద్యోగాలు. కోట్లల్లో జీతాలు. అయినా ఎక్కడో చిన్న లోటు. ప్రత్యేకత కోసం పాకులాట. మంచి వ్యాపార ఆలోచన తట్టగానే రంగంలోకి దిగడం. దేశ, విదేశీ కంపెనీలు పెట్టుబడి పెట్టే స్థాయికి ఆ కంపెనీని తీసుకెళ్లడం. ఇదీ స్థూలంగా స్టార్టప్ కంపెనీల తీరు. ఇలా విజయవంతమైన వాటిలో హైదరాబాద్‌కు చెందిన హలో కర్రీ ఒకటి.  ఇండియన్ ఫాస్ట్ ఫుడ్‌ను అందిస్తున్న ఈ సంస్థలో పెట్టుబడికి ఓ విదేశీ కంపెనీ సిద్ధమైంది. సాంకేతిక పరిజ్ఞానాన్ని అందిపుచ్చుకుని పెద్ద ఎత్తున విస్తరించేందుకు  హలో కర్రీ సమాయత్తమవుతోంది. వివిధ ప్రాంతాల్లో ప్రాచుర్యంలో ఉన్న వంటకాలను విదేశీ స్టైల్‌లో అందించే పనిలో నిమగ్నమైంది కూడా.
 
  ఇదీ హలో కర్రీ..
  ఎవరైనా సరే సాధారణంగా లంచ్ బాక్సుతోపాటు ప్లేటు కూడా ఉండాల్సిందేనంటారు. తిన్నతర్వాత ప్లేటు కడగడం, తిరిగి బాక్సును సర్దుకోవడం పెద్ద పని. ఇలాంటి ఇబ్బందులు లేకుండా చేతిలో పట్టుకుని తినగలిగేలా ప్యాక్ చేసి ఆహార పదార్థాలను హలో కర్రీ సరఫరా చేస్తోంది. అదీ 30 నిముషాల్లోనే. ప్రస్తుతం మాదాపూర్‌కు 6-8 కిలోమీటర్ల పరిధిలో మాత్రమే సేవలందిస్తున్నారు. మాదాపూర్ అయ్యప్ప సొసైటీ వద్ద ఉన్న హలో కర్రీ డెలివరీ యూనిట్‌కు వెళితే రెండు నిముషాల్లో మెనూలో ఉన్న ఐటెమ్స్ రెడీ చేసిస్తారు.
 
 ఇందుకోసం కంపెనీ ప్రత్యేక తయారీ విధానాన్ని అనుసరిస్తోంది. రుచిలో ఇతర రెస్టారెంట్లతో ఏమీ తీసిపోమని మరీ చెబుతోందీ కంపెనీ. ఆసక్తికర విషయమేమంటే డెలివరీ యూనిట్‌లో చెఫ్ ఎవరున్నా రుచిలో తేడా రాదు. ఈ స్థాయిలో కంపెనీ ఏర్పాట్లు చేసుకుంది. బిర్యానీ, రైస్, చపాతీ, పరాటా, కర్రీస్, కబాబ్స్ ఇలా విభిన్న రకాల శాకాహార, మాంసాహార వంటకాలు అందిస్తోంది. ధర రూ.59 నుంచి ప్రారంభం. డెలివరీ ఉచితం.
 
  విభిన్న వంటకాలు..: కొన్ని వంటకాలు కొన్ని ప్రాంతాలకే పరిమితమవుతున్నాయి. వాటికి మరింత ప్రాచుర్యం కల్పిస్తామని అంటున్నారు సందీప్ వర్మ. పలావ్ మాదిరిగా విలేజ్ బిర్యానీని పరిచయం చేస్తామని చెప్పారు. మన సంస్కృతిలో భాగమైన వంటకాలకు విదేశీ స్టైల్‌ను జోడించి తీసుకొస్తామని.. హైదరాబాద్‌లో విస్తరిస్తామన్నారు. ‘కొద్ది రోజుల్లో హలో కర్రీ యాప్ రానుంది. వాట్సాప్, ఎస్‌ఎంఎస్ ద్వారా ఆర్డరు ఇచ్చే విధానం పరిచయం చేస్తాం. స్పీచ్ రికగ్నిషన్ పరిజ్ఞానం, ఆర్డరును ట్రాక్ చేసే సౌకర్యమూ తీసుకొస్తాం’ అని చెప్పారు. ‘ట్రాఫిక్‌లో ఉన్నాం, ఫుడ్ పంపించండి అని ఎవరైనా అడిగినా సరఫరా చేస్తాం. సులభంగా తినగలిగేలా ప్యాకింగ్ ఉంటుంది’ అని తెలిపారు.
 
 
  కొత్త పెట్టుబడులు..: వెంచర్ క్యాపిటలిస్ట్ శశిరెడ్డి రూ.3 కోట్లు సీడ్ ఫండ్ కింద హలో కర్రీకి అందించారు. కొద్ది రోజుల్లో ఈయన కంపెనీలో బోర్డు సభ్యుడిగా  రానున్నారు. ప్రముఖ విదేశీ సంస్థ ఒకటి ప్రైవేటు ఈక్విటీ(పీఈ)గా రూ.40 కోట్లు సమకూర్చేందుకు ముందుకొచ్చింది. హైటెక్ సిటీ వద్ద రూ.75 లక్షల వ్యయంతో ఏర్పాటవుతున్న హెలో కర్రీ తొలి ఔట్‌లెట్ సెప్టెంబరులో ప్రారంభం కానుంది. టోలిచౌకి, అమీర్‌పేట్‌లో ఇటువంటి ఔట్‌లెట్లు రానున్నాయి. డెలివరీ యూనిట్లను గచ్చిబౌలి, శ్రీనగర్ కాలనీ, సికింద్రాబాద్‌లో ఒక్కొక్కటి రూ.20 లక్షల వ్యయంతో నెలకొల్పుతున్నారు.  ఇవి కార్యరూపంలోకి వచ్చిన తర్వాతే ప్రైవేటు ఈక్విటీ స్వీకరించాలన్నది హలో కర్రీ ఆలోచన. అదనపు ఈక్విటీ నిధులు అందిన తర్వాత ఇతర నగరాలకు శరవేగంగా విస్తరించాలన్నది ఈ స్టార్టప్ కంపెనీ వ్యూహం.
 
  భారీ వేతనాన్ని వదిలి..
  హలో కర్రీ వ్యవస్థాపకుల్లో రాజు భూపతి ఒకరు. భోపాల్ యూనివర్సిటీ నుంచి ఆర్గానిక్ కెమిస్ట్రీలో మాస్టర్స్ డిగ్రీ చేసిన 36 ఏళ్ల ఈ యువకుడు సీఎస్‌సీ అనే ఐటీ కంపెనీలో డెరైక్టర్ హోదా వరకు ఎదిగారు. యూఎస్, యూకే తదితర దేశాల్లో విధులు నిర్వర్తించారు. ఉద్యోగం వదిలే సమయానికి ఆయన వార్షిక వేతనం రూ.1.5 కోట్లు. సొంత వ్యాపారం చేయాలన్న తలంపుతో 2013 జనవరిలో ఉద్యోగానికి రాజీనామా చేశారు. అదే సమయంలో ఆహారోత్పత్తుల సరఫరా రంగంలో పనిచేసిన సందీప్ వర్మతో పరిచయం కాస్తా హలో కర్రీ మొగ్గ తొడిగేలా చేసింది. 2013 డిసెంబరులో హలో కర్రీ నుంచి డెలివరీ ప్రారంభమైంది.
 
  ఇప్పుడు సంపాదిస్తున్నది అతి స్వల్పం కదాని అడిగితే సంతృప్తిని మించిన ఆదాయం లేదంటారు రాజు భూపతి. నా కంపెనీ, నా ఉద్యోగులు.. ఇంతకంటే ఏం కావాలని వినమ్రంగా చెప్పారాయన. కొద్ది కాలంలోనే 1.5 లక్షల మంది కస్టమర్లకు చేరడం గర్వంగా ఉందన్నారు. 35% మంది రిపీటెడ్ కస్టమర్లని తెలిపారు.