న్యూఢిల్లీ: ఐక్యరాజ్యసమితిలో భారత ప్రధాని నరేంద్ర మోడీ తన ప్రసంగం ద్వారా అందరి దృష్టినీ ఆకర్షించనున్నారు! ఈ నెల చివర్లో ఐరాస సాధారణ సభ సమావేశంలో మోడీ పాల్గొననుండడం తెలిసిందే. ఆ సందర్భంగా మోడీ హిందీలో ప్రసంగించనున్నట్లు హోం మంత్రి రాజ్‌నాథ్ సింగ్ వెల్లడించారు. హిందీ దివస్ సందర్భంగా ఆదివారం రాష్ట్రపతి భవన్‌లో జరిగిన కార్యక్రమంలో రాజ్‌నాథ్ పాల్గొన్నారు. అమెరికాలో హిందీలో మాట్లాడిన మొదటి ప్రధాని అటల్ బిహారీ వాజపేయి అని చెప్పారు. విదేశీ అతిథులను కలుసుకున్నప్పుడు ప్రధాని మోడీ వారితో హిందీలోనే మాట్లాడుతుంటారని రాజ్‌నాథ్ వెల్లడించారు. దేశంలో 55 శాతం హిందీ మాట్లాడగలరని, 90 శాతం మంది అర్థం చేసుకోగలరన్నారు.
 
 మోడీకి ఎర్రతివాచీ
 
 మోడీకి ఎర్రతివాచీతో ఘనంగా స్వాగతం పలికేందుకు అమెరికా యంత్రాంగం సిద్ధమవుతోంది. ద్వైపాక్షిక సంబంధాలను ఉన్నత స్థితికి తీసుకెళ్లడానికి, ఇరు దేశాల మధ్య ఆర్థిక, వాణిజ్య, రక్షణ ఒప్పందాలు పట్టాలెక్కించడానికి ఈ పర్యటనను అనువుగా మలచుకోవాలని అగ్రరాజ్యం భావిస్తోంది. ఐక్యరాజ్యసమితి సమావేశంలో పాల్గొన్న అనంతరం మోడీ ఈ నెల 29న న్యూయార్క్ నుంచి వాషింగ్టన్ రానున్నారు. అదే రోజు మోడీకి అమెరికా అధ్యక్షుడు ఒబామా చిన్నపాటి విందు ఇవ్వనున్నారు. ఆ రోజు, మరుసటి రోజు ఒబామా, మోడీ మధ్య చర్చలు జరగనున్నాయి. ఈ సందర్భంగా ఇరాక్, సిరియా, ఇరాన్, ఇజ్రాయెల్-పాలస్తీనా తదితర అంశాలపై అభిప్రాయాలను మోడీతో ఒబామా పంచుకోనున్నారు.
  


 హైదరాబాద్: రాజకీయాల్లో విశ్వసనీయత లోపించిందని, రాజకీయాల్లో మార్పు అవసరమని వైఎస్ఆర్ కాంగ్రెస్ పార్టీ అధినేత వైఎస్ జగన్మోహన్ రెడ్డి అన్నారు. ఎన్నికల ప్రచారంలో భాగంగా ఖైరతాబాద్ నియోజకవర్గంలోని బీఎస్ మక్తాలో హిందీలో వైఎస్ జగన్ ప్రసంగించారు.  
  
 హిందీలో మాట్లాడి వైఎస్ జగన్ అందర్నీ ఆకట్టుకున్నారు.  ప్రజలకు ఇచ్చిన మాటలను నేతలు విస్మరిస్తున్నారని, ఎన్నికల ముందు ఒకలా..తర్వాత మరోలా చెబుతున్నారని వైఎస్ జగన్ ఆవేదన వ్యక్తం చేశారు. 
  
 స్వచ్చమైన పాలన కోసం పోటీ చేస్తున్న విజయారెడ్డిని గెలిపించాలని ఓటర్లకు వైఎస్ జగన్ సూచించారు.  తెలంగాణలో నేడు కాకున్నా మరో రోజు అధికారంలోకి రావడం ఖాయమని వైఎస్ జగన్ ధీమా వ్యక్తం చేశారు.  ఐదేళ్లు అధికారం ఇచ్చిన కాంగ్రెస్ ప్రజలకు ఏం చేయలేదన్నారు. 
  
 చెడిపోయిన రాజకీయ వ్యవస్థలోకి విశ్వసనీయతకు అర్థం తీసుకురావాలని,  వైఎస్ఆర్సీపీ అభ్యర్థులను గెలిపించుకుందామని వైఎస్ జగన్మోహన్ రెడ్డి పిలుపునిచ్చారు.