హెచ్‌ఐవీని అరికట్టేందుకు శాస్త్రవేత్తలు ప్రయత్నాలు చేస్తూనే ఉన్నారు. సరికొత్తగా ఆవుతో హెచ్‌ఐవీ వ్యాక్సిన్‌ తయారు చేయొచ్చని అంటున్నారు శాస్త్రవేత్తలు. హెచ్‌ఐవీ వైరస్‌ తాలూకూ ప్రొటీన్లను ఆవుల్లోకి ఎక్కించినప్పుడు వాటిల్లో తయారైన యాంటీబాడీలతో హెచ్‌ఐవీని నిరోధించొచ్చని స్క్రిప్స్‌ రీసెర్చ్‌ ఇన్‌స్టిట్యూట్‌ శాస్త్రవేత్తలు ఇటీవల జరిపిన ఓ ప్రయోగం ద్వారా తెలిసింది. ఈ పరిశోధన వివరాలు అంతర్జాతీయ జర్నల్‌ ‘నేచర్‌’ తాజా సంచికలో ప్రచురితమయ్యాయి. వివరాలు ఇలా ఉన్నాయి. హెచ్‌ఐవీ వైరస్‌ తరచూ తన రూపం మార్చుకుంటూ ఉంటుందన్న విషయం తెలిసిందే. వ్యాధికి తగిన మందు లభించకపోవడానికి కారణమిదే.
 
 అయితే ఈ వ్యాధి మిగిలిన జంతువులకు సోకినా.. ఆవులకు మాత్రం సోకదు. దీనికి కారణమేమిటో తెలుసుకునేందుకు స్క్రిప్స్‌ రీసెర్చ్‌ సెంటర్‌ శాస్త్రవేత్తలు ఓ ప్రయోగం చేశారు. హెచ్‌ఐవీ వైరస్‌ ఉపరితలాన్ని పోలిన ప్రొటీన్‌ను ఆవుల్లోకి ఎక్కించారు. ఆ తర్వాత ఏడాది పాటు అప్పుడప్పుడూ ఆవుల రక్తం సేకరించి యాంటీబాడీలను వేరు చేశారు. ఈ యాంటీబాడీలు కణాల్లోకి హెచ్‌ఐవీ వైరస్‌ చేరకుండా అడ్డుకుంటున్నట్లు గుర్తించారు. అంతేకాదు.. ఈ యాంటీబాడీలు అనేక ఇతర వైరస్‌లను కూడా నిరోధిస్తున్నట్లు తెలిసింది.
 
 ఆవుల జీర్ణవ్యవస్థ ప్రత్యేక నిర్మాణం.. నిత్యం అనేక రకాల సూక్ష్మజీవులతో దాని రోగ నిరోధక వ్యవస్థ పోరాడుతూ ఉండటం వంటి కారణాల వల్ల ఈ క్షీరదాలు ఉత్పత్తి చేసే యాంటీబాడీలు చాలా పొడవుగా ఉంటాయని.. అందువల్లే ఇవి హెచ్‌ఐవీని అడ్డుకోగలుగుతున్నాయని ఇంటర్నేషనల్‌ ఎయిడ్స్‌ వ్యాక్సిన్‌ ఇనిషియేటివ్‌కు చెందిన శాస్త్రవేత్త డెవిన్‌ సోక్‌ చెబుతున్నారు. ఆవులకు ఉన్న ఈ వినూత్న లక్షణం ఆధారంగా భవిష్యత్తులో హెచ్‌ఐవీకి మాత్రమే కాకుండా.. అనేక ఇతర వైరస్‌ సంబంధిత వ్యాధులకూ మెరుగైన చికిత్స లభించవచ్చని శాస్త్రవేత్తలు ఆశాభావం వ్యక్తం చేస్తున్నారు.


 వాషింగ్టన్: హెచ్‌ఐవీని నియంత్రించే అధునాతన కొత్త టీకాలను అభివృద్ధి చేయడంలో చివరి అంకానికి దక్షిణాఫ్రికాలో శ్రీకారం చుట్టారు. ‘హెచ్‌ఐవీ వ్యాక్సిన్ ట్రయల్స్ నెట్‌వర్క్’లో చివరిదైన ‘హెచ్‌వీటీఎన్ 702’ అనే టీకాను ప్రస్తుతం పరీక్షించనున్నారు. ఇంతకుముందు పరీక్షించిన టీకాలు సత్ఫలితానివ్వడం తెలిసిందే.
 
 హెవీటీఎన్ 702 విజయవంతమైతే హెచ్‌ఐవీని నియంత్రించడానికి మంచి టీకా దొరికినట్లేనని శాస్త్రవేత్తలు చెబుతున్నారు. ఈ అధ్యయనంలో 5,400 మంది హెచ్‌ఐవీ సోకిన స్త్రీ, పురుషులపై టీకాలను పరీక్షించనున్నట్లు అమెరికా ఎన్‌ఐఏఐడీ (నేషనల్ ఇన్‌స్టిట్యూట్ ఆఫ్ అలర్జీ అండ్ ఇన్‌ఫెక్సియస్ డిసీజెస్) డెరైక్టర్ ఆంథోని ఫాసీ వెల్లడించారు. దక్షిణాఫ్రికాలోని 15 ప్రాంతాల్లో ఈ టీకాను పరీక్షిస్తున్నారు. 2020 చివరికి ఫలితాలు వచ్చే అవకాశం ఉంది.