పండుగ రోజు తమ ఇంటికి ఆధారమైన పెద్దకొడుకు వస్తాడని ఎదురు చూస్తున్న ఆ కుటుంబానికి అతడి మరణవార్త శరాఘాతంలా తగిలింది. జమ్ము కాశ్మీర్లో మంగళవారం నాడు పాకిస్థాన్ దళాల కాల్పుల్లో మరణించిన లాన్స్ నాయక్ ఫిరోజ్ ఖాన్ మృతితో హైదరాబాద్ పాతబస్తీలోని నవాబ్కుంట ప్రాంతంలోగల అతడి ఇంట్లో విషాద ఛాయలు అలముకున్నాయి. కుటుంబానికి పెద్దదిక్కు అతడే కావడంతో కుటుంబ సభ్యులంతా కన్నీరు మున్నీరయ్యారు. బక్రీద్ పర్వదినాన ఈ కుటుంబంలో ఆనందానికి బదులు విషాదం అలముకుంది.
 
 పండుగనాడు ఫిరోజ్ఖాన్ వస్తాడని అందరూ ఎదురు చూశామని, తీరా అతడి మరణవార్త రావడంతో అంతా పరేషాన్ అయ్యామని అతడి సమీపం బంధువు ఒకరు చెప్పారు. ఫిరోజ్ఖాన్కు ముగ్గురు పిల్లలున్నారు. ఆ కుటుంబంలో ఇంకా ముగ్గురికి పెళ్లి చేయాల్సిన బాధ్యత కూడా అతడి మీదే ఉంది. నిన్న రాత్రి రెండు గంటలకు తమకు మొదటి సమాచారం వచ్చిందని,  అప్పుడు కూడా బుల్లెట్ తగిలింది తప్ప ఏమీ కాలేదన్నారని, తీరా నిజం చెప్పమని గట్టిగా అడిగితే తర్వాత ఆర్మీలోని ఉన్నతాధికారి ఒకరు ఫోన్ చేసి ఫిరోజ్ ఖాన్ మరణించినట్లు చెప్పారని అతడి బంధువులు తెలిపారు. దీంతో వృద్ధురాలైన తల్లిని పట్టుకోవడం తమ తరం కావట్లేదని వాపోయారు. జమ్ము కాశ్మీర్లోని పూంఛ్ జిల్లా మెంధార్లోని హమీర్పూర్ ప్రాంతంలో పాక్ దళాలు ప్రయోగించిన మోర్టార్ స్ప్లింటర్ తగిలి ఫిరోజ్ఖాన్ మరణించిన విషయం తెలిసిందే.


 త్యాగానికి ప్రతీక అయిన బక్రీద్ పండుగ మరొక్క రోజు ఉందనగా.. హైదరాబాద్కు చెందిన ఓ వీర సైనికుడు జమ్ము కాశ్మీర్లో పాకిస్థానీ ముష్కరుల తూటాలకు నేలకొరిగాడు!! పూంఛ్ జిల్లాలో నియంత్రణరేఖ వెంబడి పాక్ దళాలు కాల్పుల విరమణ ఒప్పందాన్ని మరోసారి ఉల్లంఘించడంతో లాన్స్నాయక్ మహ్మద్ ఫిరోజ్ఖాన్ ప్రాణాలు కోల్పోయాడు. మెంధార్లోని హమీర్పూర్ ప్రాంతంలో పాక్ దళాలు ప్రయోగించిన మోర్టార్ స్ప్లింటర్ తగిలి ఫిరోజ్ఖాన్ మరణించినట్లు సైన్యం అధికార ప్రతినిధి ఒకరు తెలిపారు.
 
 హైదరాబాద్కు చెందిన ఫిరోజ్ మృతిపట్ల వైట్ నైట్ కోర్ కమాండర్ తీవ్ర సంతాపం తెలిపారు. మెంధార్ సెక్టార్లో సోమవారమంతా కాల్పులు జరుపుతూనే ఉన్న పాక్ దళాలు మంగళవారం కూడా వాటిని కొనసాగించాయి. మంగళవారం ఉదయం 9.30 గంటలకే కాల్పులు మొదలైనట్లు సైన్యం అధికార ప్రతినిధి ఒకరు చెప్పారు. చిన్న చిన్న ఆయుధాలు, ఆటోమేటిక్ ఆయుధాలు, మోర్టార్లతో తమపై దాడులు చేసినట్లు ఆయన వివరించారు.