ఇస్లామాబాద్‌: పుల్వామా దాడి వెనుక పాకిస్తాన్‌ హస్తం ఉందనీ, ఆ ఘటన ప్రధాని ఇమ్రాన్‌ ఖాన్‌ విజయమని ఆ దేశ మంత్రి ఒకరు ప్రకటించడం సంచలనం రేపింది. పాకిస్తాన్‌ జాతీయ అసెంబ్లీలో గురువారం జరిగిన చర్చ సందర్భంగా శాస్త్ర, సాంకేతిక శాఖ మంత్రి ఫవద్‌ చౌధరి ఈ మేరకు ప్రకటన చేశారు. ‘‘భారత్‌ను వారి దేశంలోనే గట్టి దెబ్బ తీశాం. పుల్వామా విజయం ఇమ్రాన్‌ ఖాన్‌ నాయకత్వంలో మన జాతి సాధించిన విజయం. ఈ విజయంలో మీరు, మేము, మనందరమూ భాగస్వాములమే’’అని అన్నారు. పుల్వామాలో విజయం అని మంత్రి పేర్కొనడంపై సభలో కొందరు సభ్యులు అభ్యంతరం వ్యక్తం చేశారు. అనంతరం ఫావద్‌ మీడియాతో మాట్లాడుతూ.. పుల్వామా ఘటన అనంతరం పాక్‌ బలగాలు దాడి చేసేందుకు భారత్‌ భూభాగంలోకి వెళ్లగలిగాయని తెలిపారు. ఇమ్రాన్‌ ఖాన్‌ నేతృత్వంలో పుల్వామాలో విజయం అన్న వ్యాఖ్యలను మాత్రం వెనక్కు తీసుకునేందుకు ఆయన నిరాకరించారు. అభినందన్‌ని విడుదల చేయకపోతే భారత్‌ దాడి చేస్తుందని ఆర్మీ చీఫ్‌కే కాళ్లలో వణుకు పుట్టినట్టుగా పీఎంఎల్‌–ఎన్‌ నేత అయాజ్‌ సాధిక్‌ ప్రకటన చేసిన నేపథ్యంలో పాక్‌ ప్రధాని ఇమ్రాన్‌ఖాన్‌కు అత్యంత సన్నిహితుడైన చౌధరి ఈ వ్యాఖ్యలు చేశారు. సాధిక్‌ చేసిన వ్యాఖ్యలు అర్థరహితమని ఆయన పేర్కొన్నారు. ‘ప్రభుత్వాన్ని వ్యతిరేకించే హక్కు ప్రతి ఒక్కరికీ ఉంటుంది. కానీ, జాతిని కించపరచడం తగదు’ అని తెలిపారు. గత ఏడాది జమ్మూకశ్మీర్‌లోని పుల్వామాలో జరిగిన ఉగ్రవాదుల ఆత్మాహుతి దాడిలో 40 మంది భారత్‌ జవాన్లు నేలకొరిగిన విషయం తెలిసిందే. ఈ ఘటన అనంతరం రెండు దేశాల మధ్య విభేదాలు తీవ్ర రూపం దాల్చాయి.   కాళ్లు వణికాయి.. చెమటలు పట్టాయి మేజర్‌ అభినందన్‌ వర్ధమాన్‌.. ఈ పేరు వింటేనే చాలు భారతీయుల గుండెలు ఉప్పొంగుతాయి. గత ఏడాది ఫిబ్రవరిలో కశ్మీర్‌లోని పుల్వామా దాడి ఘటన అనంతరం పాక్‌ చెరలో ఉన్న వింగ్‌ కమాండర్‌ అభినందన్‌ వర్ధమాన్‌ ప్రదర్శించిన శౌర్య పరాక్రమాలకు సాక్షాత్తూ పాకిస్తాన్‌ ఆర్మీ జనరల్‌ చీఫ్‌ కమర్‌ జావేద్‌ బాజ్వా వెన్నులో వణుకు పుట్టింది. ‘‘బాజ్వా కాళ్లు వణికాయి, నుదుటంతా చెమటలు పట్టాయి, పాక్‌ చెరలో ఉన్న అభినందన్‌ను విడుదల చేయకపోతే భారత్‌ ఎక్కడ దాడికి దిగుతుందోనని ఆయన నిలువెల్లా వణికిపోయారు’’అని పాకిస్తాన్‌ ఎంపీ, పాక్‌ ముస్లిం లీగ్‌–నవాజ్‌ (పీఎంఎల్‌–ఎన్‌) నాయకుడు సర్దార్‌ అయాజ్‌ సాధిక్‌ బుధవారం పార్లమెంటులో వెల్లడించారు. పుల్వామా దాడి ఘటనలో 40 మంది జవాన్లు ప్రాణాలు కోల్పోవడంతో ప్రతీకారంగా పాకిస్తాన్‌లోని బాలాకోట్‌లో ఉగ్రవాద శిక్షణా శిబిరాలపై ఫిబ్రవరి 26, 2019న భారత్‌ బాంబులతో దాడి చేసింది. ఈ సందర్భంగా ఇరుపక్షాల మధ్య జరిగిన వైమానిక పోరులో పాక్‌ యుద్ధవిమానం ఎఫ్‌–16ని అభినందన్‌ మిగ్‌–21 విమానంతో వెంబడించారు. పాక్‌ విమానాన్ని కూల్చేశారు. అదే సమయంలో మిగ్‌ విమానం పాక్‌ భూభాగంలో కూలిపోవడంతో అభినందన్‌ను పాక్‌ సైన్యం అదుపులోకి తీసుకుంది. ఆనాటి సమావేశంలో ఏం జరిగిందంటే..! మేజర్‌ అభినందన్‌ వర్ధమాన్‌ను పాక్‌ చెరలోకి తీసుకున్న నేపథ్యంలో ఇరు దేశాల మధ్య ఉద్రిక్తతలు తారాస్థాయికి చేరుకున్నాయి. ఆ సమయంలో పాక్‌లో పార్లమెంటరీ పార్టీ నాయకులతో కూడిన ఉన్నతస్థాయి సమావేశంలో జరిగిన విషయాలను సాధిక్‌ వెల్లడించారు. ‘‘ఆనాటి సమావేశానికి పాకిస్తాన్‌ ప్రధానమంత్రి ఇమ్రాన్‌ ఖాన్‌ హాజరు కాలేదు. విదేశాంగ మంత్రి షా మహమూద్‌ ఖురేషి సమావేశంలో ఉన్నారు. అప్పుడే గదిలోకి వచ్చిన ఆర్మీ చీఫ్‌ బాజ్వా కాళ్లు వణుకుతున్నాయి. శరీరమంతా చెమటలతో నిండిపోయింది. చర్చలు జరిగిన అనంతరం ఖురేషి అభినందన్‌ను వెంటనే విడుదల చేయనివ్వండి. లేకపోతే భారత్‌ రాత్రి 9 గంటలకి మన దేశంపై దాడికి దిగుతుందని ఖురేషి అన్నారు’’ అంటూ సాధిక్‌ ఆనాటి సమావేశ వివరాలను గుర్తు చేసుకున్నారు. భారత్‌ దాడి చేయడానికి సన్నాహాలు చేయకపోయినా, పాక్‌ సర్కార్‌ భారత్‌ ముందు మోకరిల్లి అభినందన్‌ని అప్పగించిందంటూ సాధిక్‌ ఇమ్రాన్‌ ఖాన్‌ ప్రభుత్వంపై మాటల తూటాలు విసిరారు.  తన మాటల్ని వక్రీకరించారంటూ ఆ తర్వాత సాధిక్‌ ఒక వీడియో సందేశం విడుదల చేశారు.


 • భారత్-పాక్ సరిహద్దు ఉద్రిక్తతల ప్రభావం
 • సెన్సెక్స్ 465 పాయింట్లు పతనం 
 • నిఫ్టీ 154 పాయింట్లు డౌన్
 ముంబై: పాకిస్తాన్‌లో ఉగ్రవాదుల శిబిరాలపై భారత్ దాడులు జరిపిందన్న వార్తలతో గురువారం స్టాక్ మార్కెట్ కుప్పకూలింది. బీఎస్‌ఈ సెన్సెక్స్ 465 పాయింట్లు (1.64 శాతం) పతనమయ్యింది. గత మూడు నెలల్లో ఇదే పెద్ద క్షీణత. అంతర్జాతీయ ట్రెండ్ అనుకూలంగా వుండటంతో ట్రేడింగ్ ప్రారంభంలో 180 పాయింట్లకుపైగా సెన్సెక్స్ పెరిగినప్పటికీ, మధ్యాహ్న సమయంలో పాక్ సరిహద్దుల్లో దాడుల అంశాన్ని భారత్ వెల్లడించడంతో క్షణంలో షేర్లు నిలువునా పడిపోయాయి. ఒక దశలో సెన్సెక్స్ 573 పాయింట్లవరకూ క్షీణించింది. చివరకు క్రితం ముగింపుతో పోలిస్తే 465 పాయింట్ల తగ్గుదలతో 27,828 పాయింట్ల వద్ద ముగిసింది. ఆగస్టు 26 తర్వాత ఇదే కనిష్ట ముగింపు. ఎన్‌ఎస్‌ఈ నిఫ్టీ కూడా ఇదే బాటలో 154 పాయింట్లు పతనమై (1.76 శాతం) 8,591 పాయింట్ల వద్ద క్లోజయ్యింది.
  గరిష్టస్థాయి నుంచి 755 పాయింట్లు డౌన్...
 ట్రేడింగ్ ప్రారంభంలో సెన్సెక్స్ 28,475 పాయింట్ల గరిష్టస్థాయివరకూ పెరి గింది. ఆ స్థాయి నుంచి ఆర్మీ అధికారుల ప్రకటన వెలువడగానే 27,720 పాయింట్ల కనిష్టస్థాయి వరకూ కుప్పకూలింది. గరిష్టస్థాయి నుంచి 755 పాయింట్ల పతనాన్ని (2.65 శాతం) బీఎస్‌ఈ ప్రధాన సూచీ చవిచూసింది. అలాగే నిఫ్టీ 8,800 పాయింట్ల నుంచి 8,558 పాయింట్ల వరకూ 242 పాయింట్లు (2.75 శాతం) ఇంట్రాడేలో పడిపోయింది.
  సెన్సెక్స్ షేర్లలో ఒకటి తప్ప...
 సెన్సెక్స్-30లో ఒక్క షేరు తప్ప మిగిలిన 29 షేర్లూ నష్టాల్ని చవిచూసాయి. అన్నింటికంటే అధికంగా అదాని పోర్ట్స్ 5.01 శాతం తగ్గగా, సన్‌ఫార్మా, ఐసీఐసీఐ బ్యాంక్, గెయిల్, టాటా స్టీల్, లుపిన్, టాటా మోటార్స్, ఎస్‌బీఐలు 2-5 శాతం మధ్య తగ్గాయి. ఐటీ దిగ్గజం టీసీఎస్ మాత్రం 0.46 శాతం పెరుగుదలతో ముగిసింది. దాడుల ప్రకటన వెలువడగానే ఒక్కసారిగా మార్కెట్లో భయాందోళనలు వ్యాపించాయని, దాంతో అమ్మకాలు వెల్లువెత్తాయని జియోజిత్ బీఎన్‌పీ పారిబాస్ మార్కెట్ స్ట్రాటజిస్ట్ ఆనంద్ జేమ్స్ చెప్పారు. రియల్టీ షేర్లు మిగతా రంగాలతో పోలిస్తే బాగా పడిపోయాయని ఆయన తెలిపారు. ఈ సూచి 6.31% తగ్గగా, డీఎల్‌ఎఫ్, హెచ్‌డీఐఎల్, ఇండియాబుల్స్ రియల్టీ షేర్లు 8-9% మధ్య పతనమయ్యాయి. పవర్ సూచి 4.11 శాతం, హెల్త్‌కేర్ సూచి 3.26 శాతం, మెటల్ సూచి 3.17 శాతం, ఇన్‌ఫ్రా సూచి 3.15 శాతం చొప్పున తగ్గాయి.
 డెరివేటివ్స్ ముగింపుతో కొంత ఊరట..
 సెప్టెంబర్ డెరివేటివ్ కాంట్రాక్టులకు ముగింపునకు గురువారమే చివరిరోజుకావడంతో మార్కెట్ మరిం త పతనంకాకుండా నిలిచిందని విశ్లేషకులు చెప్పారు. ఒకే రోజున భారీ లాభాలు సంపాదించిన బేర్స్ వారి షార్ట్ పొజిషన్లను అక్టోబర్‌కు రోలోవర్ చేసేబదులు స్క్వేర్‌ఆఫ్ చేసుకోవడంతో చివరి అరగంటలో పలు లార్జ్‌క్యాప్ షేర్లు కనిష్టస్థాయి నుంచి కోలుకున్నాయని, దాంతో సూచీల పతనం ఆగిందని విశ్లేషకులు వివరించారు. లాంగ్ పొజిషన్ల ఆఫ్‌లోడింగ్ భారీస్థాయిలో వున్నా, షార్ట్ కవరింగ్ చాలావరకూ షేర్ల భారీ పతనాన్ని నిలువరించిందని వారన్నారు.
 ఇన్వెస్టర్ల సంపదలో 2.45 లక్షల కోట్లు మైనస్
 గురువారం నాటి మార్కెట్ పతనంతో ఇన్వెస్టర్ల సంపద ఒక్కరోజులోనే రూ. 2.45 లక్షల కోట్లు హరించుకుపోయింది. బీఎస్‌ఈలో లిస్టయిన కంపెనీల మార్కెట్ విలువ రూ. 2,45,360 కోట్ల మేర తగ్గి, రూ. 1,09,58,658 కోట్లకు దిగింది.
 ప్రభావం కొద్ది కాలమే..
 సరిహద్దు ఉద్రిక్తతల ప్రభావం మార్కెట్లపై దీర్ఘకాలం వుంటుందని భావించడం లేదు. 1998లో పోఖ్రాన్‌లో భారత్ అణు పరీక్షలు,  1999లో కార్గిల్ యుద్ధం జరిగిన సందర్భాల్లో ఇరుదేశాల మధ్యా సంబంధాలు పూర్తిగా దెబ్బతిన్నాయి. ఇటువంటి సంఘటనల్ని మార్కెట్ కొద్దికాలంపాటు ప్రతికూలంగా పరిగణిస్తుంది. కానీ మధ్య, దీర్ఘకాలాల్లో ప్రభావమేదీ వుండదు.
 - తీర్థంకర్ పట్నాయక్, ఇండియా స్ట్రాటజిస్ట్, మిజుహో బ్యాంక్
 ఇంకొన్ని రోజులు మార్కెట్‌పై ఒత్తిడి..
 మరికొన్ని రోజులు మార్కెట్ అమ్మకాల ఒత్తిడికి లోనవుతుందని విశ్లేషకులు వ్యాఖ్యానించారు. భారత్- పాక్‌ల మధ్య నెలకొన్న ఉద్రిక్తతల ప్రభావం మార్కెట్‌పై వుంటుంది. స్వల్పకాలంలో ఇన్వెస్టర్లు వేచిచూసే ధోరణిలో వుంటే మంచిది.
 - దినేశ్ టక్కర్, సీఎండీ, యాంజిల్ బ్రోకింగ్
 దీర్ఘకాలిక పెట్టుబడులకు సమస్య లేదు
 ఉగ్రవాద శిబిరాలపై జరిగిన దాడులు... పూర్తిస్థాయి యుద్ధానికి దారితీస్తుందన్న భయాలే తాజా పతనానికి కారణం. యుద్ధం జరుగుతుందని నేను భావించడం లేదు. దేశ ఆర్థిక వ్యవస్థకు సంబంధించి దీర్ఘకాలిక చోదకాలు పెట్టుబడులు అనుకూలంగా వున్నాయి.
 -దీపేన్ సేథ్, హెచ్‌డీఎఫ్‌సీ సెక్యూరిటీస్