సాక్షి,  న్యూఢిల్లీ:  సోషల్‌ మీడియా దిగ్గజం ఫేస్‌బుక్‌ భారతీయ మహిళలకోసం డిజిటల్‌ లిటరసీ ప్రోగ్రామ్‌ను  ప్రారంభించింది. ఇందుకోసం  జార‍్ఖండ్‌ రాంచీలోని  స్వచ్ఛంద సంస్థ ,  జాతీయ  మహిళా కమిషన్‌తో   సంయుక్త భాగస్వామ్యంలో ఈ పథకాన్ని ప్రారంభించింది.   దేశవ్యాప్తంగా 60వేలమంది  యూనివర్శిటీ మహిళా విద్యార్థులకు  ఇంటర్నెట్‌,  సోషల్‌ మీడియా,  ఈ మెయిల్‌   వాడకంపై శిక్షణ ఇవ్వనుంది. ఇటీవలి కాలంలో మహిళలు, బాలికలపై  సైబర్‌ నేరాలు పెరుగుతున్న నేపథ్యంలో ఫేస్‌బుక్‌  భద్రతా అంశాలపై  అవగాహన కల్పించనుంది. ఇంటర్నెట్ భద్రతపై 60వేలమంది భారతీయ మహిళలకు శిక్షణ  ఇవ్వనున్నామని ఫేస్‌బుక్‌ బుధవారం   ప్రకటించింది. సైబర్ పీస్ ఫౌండేషన్ సహకారంతో ఈ పైలట్ ప్రోగ్రామ్‌ను  ప్రారంభించినట్టు తెలిపింది. ఈ శిక్షణ స్థానిక భాషలలో  ఉంటుందని  పేర్కొంది. మహిళలు ఆన్‌లైన్‌లో,  ఇంటర్నెట్‌లో ఉన్నపుడు  వారు సురక్షితంగా, భద్రంగా  ఫీల్‌ అవ్వాలని తాము భావిస్తున్నామని  ఎన్‌సీడబ్ల్యు అధ్యక్షురాలు రేఖ శర్మ ఒక ప్రకటనలో తెలిపారు. గత మూడు సంవత్సరాలలో   సైబర్ నేర సంబంధిత ఫిర్యాదులు పెరుగుతున్న ధోరణి ఆందోళన కలిగిస్తోందన్నారు.  ఈ నేపథ్యంలో మహిళల  ఇంటర్నెట్‌ సేఫ్టీపై ఫేస్‌బుక్‌, సైబర్‌ పీస్‌ షౌండేషన్‌ చొరవ అభినందనీయమన్నారు. ఈ శిక్షణద్వారా మహిళలు, బాలికలకు  ప్రయోజనం  పొందనున్నారని చెప్పారు. డిజిటల్ అక్షరాస్యత కార్యక్రమం హర్యానా, ఢిల్లీ-ఎన్సీఆర్, మణిపూర్, సిక్కిం, మేఘాలయ, మహారాష్ట్ర, తమిళనాడులోని ప్రధాన నగరాలలోని విశ్వవిద్యాలయాలలోని మహిళలకు ప్రయోజనం చేకూరుస్తుందని  సైబర్‌పీస్‌ ఫౌండేషన్‌   తెలిపింది. మహిళల సమాన భాగస్వామ్యంతోనే ఆర్ధికవ్యవస్థ బాగా  పుంజుకుంటుందనీ,   ఇంటర్నెట్‌ వాడకంలో వారికి  స్వేచ్ఛ, భద్రత ఉన్నపుడుమాత్రమే సాధ్యపడుతుందని ఫేస్‌బుక్‌   పబ్లిక్ పాలసీ డైరెక్టర్ ఆఫ్‌ ఇండియా( దక్షిణ,  మధ్య ఆసియా)  అంకి దాస్ చెప్పారు. తమ శిక్షణ మహిళలకు  భరోసా ఇవ్వడంతోపాటూ,  వారి భావాలను స్వేచ్ఛగా పంచుకునేందుకు వీలు కల్పిస్తుందన్నారు.


 న్యూఢిల్లీ: సురక్షిత ఇంటర్నెట్‌ వినియోగాన్ని పాఠ్యాంశంగా చేర్చేందుకు ప్రముఖ సంస్థ గూగుల్‌ నడుం బిగించింది. ఇందుకు గాను నాలుగైదు రాష్ట్రాలతో ఇప్పటికే చర్చలు కూడా ప్రారంభించింది. అమెరికా కేంద్రంగా పనిచేసే ఈ సంస్థ ఇప్పటికే గోవా ప్రభుత్వంతో  ఒప్పందం కుదుర్చుకుని ఆ రాష్ట్ర విద్యార్థుల్లో అవగాహన కల్పించేందుకు కృషి చేస్తోంది. ఆ రాష్ట్రంలోని 460 మంది టీచర్లకు శిక్షణనిచ్చి, ఎనబై వేల మంది విద్యార్థులకు అవగాహన కల్పించనుంది. ఫిబ్రవరి 7న (మంగళవారం) సురక్షిత ఇంటర్నెట్‌ డేగా పాటిస్తున్నట్లు ఆ సంస్థ గూగుల్‌ ఇండియా డైరెక్టర్‌(ట్రస్ట్‌ సేఫ్టీ) సునితా మొహంతి తెలిపారు.
 
 మైక్రోసాఫ్ట్‌ సంస్థ 14 దేశాల్లో జరిపిన ఓ సర్వేలో 63శాతం మంది భారతీయులు ఆన్‌లైన్‌ వ్యవహారాలు ప్రమాదకరమని భావిస్తున్నట్లు తేలిందన్నారు. దీనిని దృష్టిలో ఉంచుకునే తాము సేఫ్టీ ఇంటర్నెట్‌ ఆవశ్యకతను గుర్తించినట్లు వివరించారు. ఆన్‌లైన్‌లో వేధింపులు, సైబర్‌ నేరాలు, విద్వేషపూరిత ప్రసంగాలు తదితర విపరీత ధోరణుల బారిన పడకుండా ఎలా రక్షణ పొందాలో తాము నేర్పుతామన్నారు.