న్యూఢిల్లీ: చైనా అండదండలతో జిత్తులమారి పాకిస్తాన్‌ కూడా కయ్యానికి కాలుదువ్వుతుందన్న అంచనాలున్న నేపథ్యంలో భారత్‌ అమ్ములపొదిలోకి రఫేల్‌ చేరడంతో భారత్‌ వాయుసేన సామర్థ్యం మరింతగా పెరిగింది. సరిహద్దుల్లో చైనా ఆటలు ఇక సాగవని, రఫేల్‌ ఒక గేమ్‌ చేంజర్‌ అని నిపుణులు అభిప్రాయపడుతున్నారు. చైనా యుద్ధవిమానం చెంగ్డూ జే–20 కంటే రఫేల్‌ అత్యంత శక్తిమంతమైనదని చెబుతున్నారు. ‘‘జే–20 కంటే రఫేల్‌ అత్యంత శక్తిసామర్థ్యాలు కలిగినది. జే–20 అయిదో తరానికి చెందిన యుద్ధవిమానమని చైనా చెబుతున్నప్పటికీ దాని ఇంజిన్‌ మూడో జనరేషన్‌కి చెందినది. సుఖోయ్‌ యుద్ధ విమానం తరహా ఇంజిన్‌ అందులో ఉంది’’ అని రఫేల్‌ యుద్ధ విమానాన్ని పరీక్షించి చూసిన రిటైర్డ్‌ ఎయిర్‌ మార్షల్‌ నంబియార్‌ చెప్పారు. చైనా పీపుల్స్‌ లిబరేషన్‌ ఆర్మీ దగ్గరున్న జే–20 అత్యంత ఆధునికమైనదైతే ఆ దేశం రష్యా నుంచి సుఖోయ్‌ యుద్ధ విమానాలను కొనాల్సిన అవసరమేముందని ప్రశ్నించారు. గగనతలం నుంచి గగనతలం లక్ష్యాలను ఛేదించే మీటియోర్‌ క్షిపణి వ్యవస్థ, ఉపరితల లక్ష్యాలను ఛేదించగలిగిన స్కాల్ప్‌ క్రూయిజ్‌ క్షిపణి వ్యవస్థ, స్పెక్ట్రా ఎలక్ట్రానిక్‌ యుద్ధ వ్యవస్థ కలిగి ఉన్న రఫేల్‌ యుద్ధ విమానం దరిదాపుల్లోకి కూడా చైనా జే–20 రాలేదని బాలా కోట్‌ దాడుల వ్యూహకర్త, మాజీ ఎయిర్‌ మార్షల్‌ బీఎస్‌ ధనూవా అభిప్రాయపడ్డారు.


 బీజింగ్: తమ పరువును కాపాడుకునేందుకు రష్యా తాపత్రయ పడిందా?. తాజా పరిణామం ఈ విషయాన్నే సూచిస్తోంది. ఐదో తరానికి చెందిన సుఖోయ్ ఎస్ యూ-35 జెట్లను రెండేళ్లుగా చైనాకు అందజేయకుండా నాన్చుతూ వచ్చిన రష్యా.. ఎట్టకేలకు నాలుగు ఎస్ యూ-35 ఫైటర్లను అందించింది. అయితే, ఎస్ యూ-35 లను చైనాకు అందజేయడంలో రష్యా ఎందుకు జాప్యం చేసింది అన్న విషయంపై ఓ ఆసక్తికర రిపోర్టు వచ్చింది. 
  
 చైనా తయారుచేస్తున్న జే-20 స్టెల్త్ ఫైటర్ శక్తి సామర్ధ్యాల కంటే ఎస్ యూ-35ల సామర్ధ్యాలు తక్కువైతే తమ పరువుపోతుందని రష్యా భావించింది. అంతేకాకుండా మార్కెట్లో కూడా ఎస్ యూ-35లకు విలువ ఉండదు. దీంతో ఆత్మరక్షణలో పడిన రష్యా.. చైనాతో ఒప్పందం కుదరినా.. ఫైటర్లను అందజేతలో ఆలస్యం చేసింది. 
  
 గత నెలలో చైనా మిలటరీ జే-20 ఫైటర్ ను తొలిసారి పరీక్షించిన విషయం తెలిసిందే. దీంతో రష్యా సుఖోయ్ ఎస్ యూ-35 లను ఒప్పందం ప్రకారం చైనాకు అందించింది. కాగా కొత్త రకపు జెట్లను తయారుచేయడంలో దూసుకుపోతున్న చైనా సొంతగా ఇంజన్ల తయారీ విషయంలో మాత్రం ఇంకా వెనుకే ఉంది. ఫైటర్లకు అవసరమయ్యే ఇంజన్లను రష్యా నుంచి దిగుమతి చేసుకుంటోంది.