జంషెడ్‌పూర్: జాతీయ సీనియర్ ఆర్చరీ చాంపియన్‌షిప్‌లో ఆంధ్రప్రదేశ్ ఆర్చర్లు సనమ్, జిజ్ఞాస్‌లు రజత, కాంస్య పతకాలు సాధించారు.  జేఆర్‌డీ టాటా స్పోర్ట్స్ కాంప్లెక్స్‌లో జరుగుతున్న ఈ పోటీల్లో పురుషుల 50 మీటర్ల కాంపౌండ్ ఈవెంట్‌లో ఐ.ఆర్.సనమ్‌కు తృటిలో పసిడి పతకం చేజారింది. 701 పాయింట్లతో అతను రజతంతో సరిపెట్టుకోగా, వర్మ (702) పాయింటు తేడాతో పసిడి పతకం గెలిచాడు. ఇందులో జిజ్ఞాస్ (699) కాంస్యం నెగ్గాడు.
 ఈ పోటీల్లో జార్ఖండ్‌కు చెందిన స్టార్ ఆర్చర్ దీపిక కుమారి రెండు జాతీయ రికార్డులు నెలకొల్పింది. 70 మీటర్ల ఈవెంట్‌లో 333 పాయింట్లతో సరికొత్త రికార్డు నమోదు చేసింది.  60 మీటర్ల ఈవెంట్‌లో 346 పాయింట్లతో మరో జాతీయ రికార్డు నెలకొల్పింది.