న్యూఢిల్లీ: బీజేపీ నేతృత్వంలోని కేంద్ర ప్రభుత్వం పోలీసు వ్యవస్థను దుర్వినియోగం చేస్తోందని సీపీఎం పొలిట్ బ్యూరో సభ్యురాలు బృందా కారత్ విమర్శించారు. నల్లధనం వెలికితీయడానికి బదులుగా గోమాంసం ఎక్కడుందో వెతకడానికే పోలీసులను కేంద్రం ఉపయోగిస్తోందని ఆక్షేపించారు. 'బ్లాక్ మనీ ఎక్కడుందో కనిపెట్టేందుకు పోలీసులు దాడులు చేయడం లేదు. గోమాంసం కోసం పోలీసులు సోదాలు చేస్తున్నారు. వాహ్ మోదీ!' అంటూ బృందా కారత్ ట్వీట్ చేశారు.
 
 గోమాంసం వడ్డిస్తున్నారనే ఫిర్యాదుతో ఢిల్లీలోని కేరళ హౌస్ లో సోమవారం పోలీసులు సోదాలు చేసిన నేపథ్యంలో ఆమె ఈ వ్యాఖ్యలు చేశారు. ప్రజలు వండుకోవడానికి పప్పులు ఇవ్వలేని మోదీ సర్కారు ఆవు మాంసం కోసం పోలీసులతో వెతికిస్తోందని ధ్వజమెత్తారు.
 
 Brinda Karat: Police raids not to unearth black money but to unearth imaginary cow meat, vah Modi! #KeralaHouse
 — CPI (M) (@cpimspeak) October 28, 2015


 అందరూ చెబుతున్నట్లుగా అసలు తమ పోలీసు సిబ్బంది కేరళ హౌస్ మీద దాడి చేయనేలేదని ఢిల్లీ పోలీసు కమిషనర్ బీఎస్ బస్సీ తెలిపారు. అక్కడ బీఫ్ వండి వడ్డిస్తున్నట్లు పోలీసు కంట్రోల్ రూంకు తప్పుడు ఫోన్ కాల్ వచ్చిందని, అయితే ఇలాంటి సందర్భంలో మతపరమైన అల్లర్లు జరిగే ప్రమాదం ఉన్నందున తమ సిబ్బంది వెంటనే అక్కడకు వెళ్లిన మాట వాస్తవమే గానీ, వాళ్లు అక్కడ సమస్య తలెత్తకుండా ముందు జాగ్రత్తగా మాత్రమే వెళ్లారన్నారు. విష్ణుగుప్తా, అతడి అనుచరులు అక్కడ ఏమైనా వివాదం సృష్టిస్తే అడ్డుకునేందుకు మాత్రమే వాళ్లు వెళ్లారన్నారు.
 
 కేరళ హౌస్‌పై అసలు పోలీసులు దాడి చేయలేదని ఆయన స్పష్టం చేశారు. కంట్రోల్ రూంకు ఫోన్ చేసిన విష్ణు గుప్తా అనే వ్యక్తి ఇప్పటికే పోలీసుల దృష్టిలో ఉన్నాడని, కానీ ఈ ఘటన విషయంలో ఎవరూ అతడిపై ఫిర్యాదు చేయలేదని బస్సీ చెప్పారు. అయినా సెక్షన్ 182 (తప్పుడు సమాచారం) కింద అతడిపై చర్యలు తీసుకునేందుకు ప్రయత్నిస్తున్నామన్నారు.


 న్యూఢిల్లీ: ఢిల్లీలోని కేరళ భవన్ క్యాంటీన్ లో గోమాంసం వండివడ్డిస్తున్నారంటూ చెలరేగిన వివాదంపై కేరళ ప్రభుత్వం వివరణ ఇచ్చింది. ఆ రాష్ట్ర ప్రభుత్వ ప్రధాన కార్యదర్శి జిజీ థామస్ మంగళవారం మీడియాతో మాట్లాడుతూ.. కేరళ భవన్ క్యాంటీన్ లో ఆవు మాంసం వండటం లేదని, కేవలం బర్రె మాంసం మాత్రమే అందిస్తున్నామని వివరించారు.
  
 అనుమతి లేకుండా భవనంలోకి చొరబడి, ఆందోళసృష్టించిన శ్రీరామ్ సేన కార్యకర్తలపై  పోలీసులకు ఫిర్యాదుచేశామన్నారు. మరోవైపు క్యాంటీన్ అధికారులు మెనూ నుంచి బీఫ్ పదాన్ని తొలిగించారు. కేరళ ముఖ్యమంత్రి ఊమెన్ చాందీ కూడా ఈ వ్యవహారంపై గుర్రుగా ఉన్నట్లు తెలిసింది.  ఆందోళనల నేపథ్యంలో ఢిల్లీలోని కేరళ భవన్ ఉద్యోగులు వచ్చే రెండుమూడు రోజులు జాగ్రత్తగా ఉండాలని ఆయన సూచించారు.
 
 వివాదం ఎలా మొదలైందంటే..
 అన్ని రాష్ట్రాలకు ఉన్నట్లే కేరళకూ ఢిల్లీలో కేరళ భవన్ ఉంది. జంతర్ మంతర్ కు అతి సమీపంలో ఉండే ఈ భవన్ క్యాంటీన్ మెనూలో.. బీఫ్ కూడా ఉండటం వివాదానికి ప్రధాన కారణం. అన్ని ఆహార పదార్థాల పేర్లు ఇంగ్లీషులో ఉండి, ఒక్క బీఫ్ మాత్రం మలయాళంలో రాసి ఉండటం గమనార్హం. ఈ విషయం తెలుసుకున్న శ్రీరామ్ సేన సంస్థన కార్యకర్తలు.. సోమవారం సాయంత్రం 4 గంటల ప్రాంతంలో భవన్ క్యాంటీన్ లోకి చొరబడి బీఫ్ వండకూడదంటూ ఆందోళన చేశారు.
 
 భయాందోళనకు గురైన సిబ్బంది.. పోలీస్ కంట్రోల్ రూమ్ కు సమాచారం అందించారు. ఆ తరువాత కొద్దిసేపటికే పార్లమెంట్ స్ట్రీట్ పోలీస్ స్టేషన్ నుంచి 20 మంది పోలీసులు కేరళ హౌస్ కు చేరుకున్నారు. అప్పుడే అసలు కథ మొదలైంది.. ఖాకీలు వచ్చేసరికే శ్రీరాంసేన కార్యకర్తలు పారిపోయారు. దాడి ఎలా జరిగిందో వివరాలు సేకరించిన పోలీసులు.. నేరుగా కిచెన్ లోకి వెళ్లి వంట పాత్రలను పరిశీలించారు!
 రాజకీయ దుమారం
 దాద్రి ఘటనలోనూ బీఫ్ వండారా లేదా అని పోలీసులు దర్యాప్తు చేసిన దరిమిలా ఢిల్లీ పోలీసుల తీరుపై పలు రాజకీయ పక్షాలు అసహనం వ్యక్తం చేశాయి. ఢిల్లీ సీఎం అరవింద్ కేజ్రీవాల్ ఒక అడుగు ముందుకేసి ఢిల్లీ పోలీసులు బీజేపీ సేనగా వ్యవహరిస్తున్నారని, ఒక రాష్ట్రానికి సంబంధించిన భవనంలోకి చొరబడే అధికారం ఎవరిచ్చారంటూ మండిపడ్డారు. పశ్చిమబెంగాల్ సీఎం మమతా బెనర్జీ కూడా ఈ ఘటనపై విచారం వ్యక్తం చేస్తూ ఢిల్లీ పోలీసుల తీరున ఖండించారు. పార్టీలకు అతీతంగా కేరళ ఎంపీలందరూ ఈ రోజు సాయంత్రం భవన్ ముందు ఆందోళన నిర్వహించనున్నారు.
 'ఇది సున్నితమైన అంశం కాబట్టే బీఫ్ వండారో లేదో తేల్చుకోవాలనుకున్నాం అందుకే వంట పాత్రలు పరిశీలించాం' అని పోలీస్ అధికారులు వివరన ఇచ్చుకున్నారు.