ఓ నలభై ఏళ్ల మధ్యతరగతి తండ్రికి తన కుమారుడు అంటే అమితమైన ప్రేమ. కొడుకు కోరినది ఏదీ కాదనకుండా ఇస్తాడు. కానీ ఆ తండ్రి అతి ప్రేమ కొన్ని ఇబ్బందులకు కారణమైంది. వాటిని ఆయన ఎలా ఎదుర్కొన్నాడు. ఆ సమస్యలు ఏంటి? అనే అంశాల ఆధారంగా ‘ఎదురీత’ అనే చిత్రం తెరకెక్కింది. శ్రవణ్‌ రాఘవేంద్ర, లియోనా లిషోయ్‌ హీరో హీరోయిన్లుగా బాలమురుగన్‌ దర్శకత్వంలో శ్రీ భాగ్యలక్ష్మి ఎంటర్‌టైన్‌మెంట్స్‌ పతాకంపై బోగారి లక్ష్మీనారాయణ నిర్మించారు. చిత్రీకరణ పూర్తయింది. గణతంత్ర దినోత్సవం సందర్భంగా ఈ సినిమా ఫస్ట్‌ లుక్, ఫస్ట్‌ లుక్‌ మోషన్‌ పోస్టర్‌ను విడుదల చేశారు. ‘‘ప్రముఖ తమిళ దర్శకుడు విజయ్‌ మిల్టన్‌ వద్ద దర్శకత్వ శాఖలో వర్క్‌ చేశారు బాలమురుగన్‌. ఈ సినిమాను అద్భుతంగా తెరకెక్కించారు. కుమారుడి కోసం కన్నతండ్రి సాగించిన ‘ఎదురీత’ ప్రేక్షకుల హృదయాలను హత్తుకునేలా ఉంటుంది. మార్చిలో సినిమాను విడుదల చేయడానికి సన్నాహాలు చేస్తున్నాం’’ అన్నారు లక్ష్మీ నారాయణ. కాశీ విశ్వనాథ్, థర్టీ ఇయర్స్‌ పృథ్వీ, ‘రంగస్థలం’ మహేశ్, రవిప్రకాష్‌ ముఖ్య పాత్రలు చేశారు. ఈ సినిమాకు ప్రకాష్‌ మనోహరన్‌ లైన్‌ ప్రొడ్యూసర్‌.


 ‘‘బిచ్చగాడు’ వంటి చిత్రాన్ని తెలుగు ప్రేక్షకులకు అందించి, హిట్ సాధించిన నిర్మాతల నుంచి ‘పిల్ల రాక్షసి’ వంటి మరో వైవిధ్యమైన చిత్రం వస్తుందంటే వారి అభిరుచి అర్థమవుతోంది. తెలుగు ప్రేక్షకులు విభిన్నమైన కథా చిత్రాలను ఆదరిస్తున్నందుకు ఆనందంగా ఉంది. మలయాళంలో హిట్ అయిన ఈ చిత్రం ఇక్కడ కూడా విజయం సాధించాలి’’ అని ‘అల్లరి’ నరేశ్ అన్నారు. మలయాళంలో హిట్ అయిన ‘ఆన్ మరియ కలిప్పిలాను’ చిత్రాన్ని శ్రీ తిరుమల తిరుపతి వెంకటేశ్వర ఫిలింస్ పతాకంపై చదలవాడ పద్మావతి ‘పిల్ల రాక్షసి’ పేరుతో తెలుగులో విడుదల చేస్తున్నారు. మిథున్ మాన్యూల్ థామస్ దర్శకుడు.
 
 సారా అర్జున్ టైటిల్  పాత్రలో, ‘ఓకే బంగారం’ ఫేం దుల్కర్ సల్మాన్ ముఖ్య పాత్రలో నటించారు. షాన్ రెహమాన్ స్వరపరచిన ఈ చిత్రం పాటల సీడీ, ట్రైలర్‌ను నరేశ్ విడుదల చేశారు. నిర్మాత మాట్లాడుతూ- ‘‘ఓ మోసగాడిపై చిన్నారి ఎటువంటి సాహసం చేసిందన్నదే కథాంశం. ఇందులోని సన్నివేశాలు ప్రేక్షకులకు ఉత్కంఠ కలిగిస్తాయి. నవంబరు 4న ఈ చిత్రాన్ని విడుదల చేసేందుకు సన్నాహాలు చేస్తున్నాం’’ అని చెప్పారు. దర్శకుడు మిథున్, హీరోయిన్ లియోనా లిషాయ్, చదలవాడ తిరుపతిరావు, చదలవాడ లక్ష్మణ్, భాషాశ్రీ తదితరులు పాల్గొన్నారు.