న్యూఢిల్లీ: భవిష్యత్తుకు సంబంధించి ఆర్థిక సన్నద్ధత విషయమై గడిచిన రెండేళ్ల కాలంలో వినియోగదారుల్లో విశ్వాసం సన్నగిల్లినట్టు హెచ్‌డీఎఫ్‌సీ లైఫ్‌ తెలిపింది. కరోనా మహమ్మారి వచ్చిన తర్వాత ఆర్థిక అవగాహన, బీమా ప్రాధాన్యం పెరిగినట్టు పేర్కొంది. ‘లైఫ్‌ ఫ్రీడమ్‌ ఇండెక్స్‌ 2021’ పేరుతో ఒక నివేదికను సోమవారం విడుదల చేసింది. తమ ఆర్థిక ప్రణాళికలు సరిపడా లేనట్టు ప్రజలు అర్థం చేసుకున్నారని తెలిపింది. ఈ సూచీ 2019తో పోలిస్తే 4.5 పాయింట్లు తగ్గినట్టు పేర్కొంది.‘‘ఆర్థిక వ్యవస్థ మందగించడం, ఉద్యోగ భద్రత, ఆదాయ క్షీణతతో రుణ భయం ఈ మూడు ప్రధాన అంశాలు విశ్వాసం సన్నగిల్లేందుకు కారణం’’ అని ఈ నివేదిక తెలియజేసింది. ముఖ్యాంశాలు... టైర్‌–1, టైర్‌–2 పట్టణాలతో పోలిస్తే మెట్రోలలో కరోనా మహమ్మారి ప్రభావం ఎక్కుగా ఉంది. చిన్న కుటుంబాలు మరింత ఇబ్బందులు పడ్డాయి. సంక్షోభ సమయంలో ఉమ్మడి కుటుంబాలు (మద్దతు వల్ల) కొంచెం గట్టిగా  నిలబడ్డాయి.90 శాతం మంది వేతనకోతలు, వ్యాపార నష్టాన్ని ఎదుర్కొన్నారు. కరోనాతో జీవితానికి రక్షణ అవసరమన్న అవగాహన పెరిగింది. టర్మ్‌ ఇన్సూరెన్స్‌పై అవగాహన 11 పాయింట్లు పెరగ్గా.. ఎండోమెంట్, యులిప్‌ల విషయంలో 10 పాయింట్లు పెరిగింది. కరోనా మొదటి దశ తర్వాత 41 శాతం మంది (సర్వేలో పాల్గొన్న 1987 మందిలో) టర్మ్‌ ఇన్సూరెన్స్‌ తీసుకున్నారు.   చదవండి : ఒక్క రోజులో లక్ష స్కూటర్ల విక్రయం


 గతంతో పోలిస్తే పిల్లల పెంపకంపై తల్లిదండ్రులు అధికంగా దృష్టిసారిస్తున్నారు. వారికి పౌష్టికాహారం అందించడం దగ్గర నుంచి ఉన్నత చదువులు చదివించడందాకా అన్నీ ఒక ప్రణాళికాబద్ధంగా సాగిస్తున్నారు. ఉన్నత చదువులకు పిల్లలను విదేశాలకు పంపే వారి సంఖ్య కూడా బాగా పెరుగుతోంది. ఏటా వేగంగా పెరుగుతున్న విద్యావ్యయం తట్టుకోవడం వీరికి కష్టంగా మారుతోంది. హెచ్‌డీఎఫ్‌సీ లైఫ్ ఇటీవల నిర్వహించిన ‘లైఫ్ ఫ్రీడమ్ ఇండెక్స్’ సర్వేలో 75 శాతం మంది తల్లిదండ్రులు పిల్లల చదువుల కోసం పొదుపునకు అత్యధిక ప్రాధాన్యమిస్తున్నట్లు చెప్పారు. కాని చాలామంది ఈ పొదుపును చాలా ఆలస్యంగా మొదలు పెడుతున్నారు. ఉన్నత చదువుకు అక్కరకు వచ్చే విధంగా ఉండాలంటే కనీసం 3 నుంచి 8 ఏళ్ళ లోపే ఇన్వెస్ట్‌మెంట్ ప్రణాళిక మొదలు పెట్టాలి.
  దీర్ఘకాలానికి యులిప్స్   
  అటు బీమా రక్షణ కల్పిస్తూ, ఇటు ఆర్థిక లక్ష్యాలను చేరుకునే విధంగా అనేక పిల్లల పథకాలను బీమా కంపెనీలు అందిస్తున్నాయి. వీటిలో యూనిట్ లింక్డ్ ఇన్సూరెన్స్ ప్లాన్స్ (యులిప్స్) అనువైనవని చెప్పొచ్చు. తల్లిదండ్రుల రిస్క్ సామర్థ్యం ఆధారంగా వివిధ ఇన్వెస్ట్‌మెంట్ ఆప్షన్స్ ఉండటమే కాకుండా, అధిక లాభాలను పొందే అవకాశం ఉంటుంది. ప్రస్తుతం చాలామంది బ్యాంకు ఎఫ్‌డీలు, పోస్టాఫీసు సేవింగ్స్ వంటి పథకాలపై అధికంగా మొగ్గు చూపుతున్నారు. కాని వీటికంటే దీర్ఘకాలంలో ద్రవ్యోల్బణాన్ని యులిప్స్ చక్కటి పరిష్కారాన్ని చూపిస్తాయి.
  ఈ మూడు గుర్తుంచుకోవాలి
  ఏదైనా ఒక చైల్డ్ యులిప్ పథకాన్ని ఎంచుకునేటప్పుడు తప్పకుండా ఈ అంశాలను పరిశీలించడం మర్చిపోవద్దు. అందులో మొదటిది ఇన్వెస్ట్‌మెంట్ కాలపరిమితి. యులిప్స్ అనేవి కేవలం దీర్ఘకాలిక ఇన్వెస్ట్‌మెంట్స్‌కే అనువుగా ఉంటాయి. ఇప్పుడు చాలా పథకాలు 20 నుంచి 30 ఏళ్ళ వరకు ఇన్వెస్ట్ చేసే విధంగా పథకాలను అందిస్తున్నాయి. ఇలా దీర్ఘకాలం ఎంచుకోవడం వల్ల మార్కెట్లో ఉండే సహజసిద్ధమైన ఒడిదుడుకులను తట్టుకొని దీర్ఘకాలంలో మంచి రాబడులను పొందొచ్చు.
 ఇక రెండో విషయం: ఇన్వెస్ట్‌మెంట్ ఆప్షన్. ప్రారంభంలో ఈక్విటీలకు అధికంగా కేటాయిస్తూ లక్ష్యాన్ని చేరుకునేటప్పుడు రిస్క్ తక్కువగా ఉండే డెట్ ఫండ్ వంటి సాధనాల్లోకి క్రమేపీ మారాలి. ఉదాహరణకు ప్రారంభంలో 80 నుంచి 100 శాతం వరకు ఈక్విటీలకు కేటాయిస్తే పాలసీ ముగిసే వరకు అదే విధంగా కొనసాగించకూడదు. మార్కెట్లో ఉండే ఒడిదుడుకుల వల్ల లాభాలు హరించుకుపోయే ప్రమాదం ఉంది. లాభాలొచ్చినప్పుడు వాటిని డెట్ వంటి రిస్క్ తక్కువ ఉండే వాటిల్లోకి మార్చుకోవాలి. చిన్న పిల్లల పేరుమీద ఏ పాలసీ తీసుకున్నా సరే వైవర్ ఆఫ్ ప్రీమియం అనే రైడర్‌ను తీసుకోవడం మర్చిపోవద్దు. అనుకోని అవాంఛనీయ సంఘటన ఏదైనా జరిగి తల్లిదండ్రులు ప్రీమియం చెల్లించలేకపోయినా పిల్లల లక్ష్యం అక్కడితో ఆగిపోకూడదు. ఇలాంటి సమయంలో వైవర్ ఆఫ్ ప్రీమియం అక్కరకు వస్తుంది.
   ఇంతే కాకుండా యులిప్స్‌లో ఉండే ఇంకో ప్రయోజనం ఏమిటంటే.... బోనస్‌లు, లేదా ఇతర ఆదాయాలు ఏమైనా చేతికి వస్తే టాప్ అప్స్ పేరుతో అదే పథకంలో పిల్లల పేరుమీద ఇన్వెస్ట్ చేసుకోవచ్చు.