సాక్షి, గుంటూరు: సుమారు 500 ఎకరాల రెవెన్యూ పోరంబోకు భూముల్లో సర్వే నిర్వహించి ఈ ప్రాజెక్టుకు స్థలాన్ని కేటాయించేందుకు రెవెన్యూశాఖ చర్యలు చేపట్టింది. అనంతరం వైఎస్సార్‌ అకాల మరణం, తర్వాత ముఖ్యమంత్రిగా పనిచేసిన కె.రోశయ్య మైసూరులోని బృందావన్‌ గార్డెన్స్, బెంగళూరులోని లాల్‌బాగ్‌ గార్డెన్‌ల తరహాలో ఇక్కడ అత్యాధునికంగా పార్కును అభివృద్ధి చేయాలని సంకల్పించారు. అప్పటి పర్యాటక శాఖ మంత్రి గీతారెడ్డి, పర్యాటక శాఖ ఉన్నతాధికారులతో సమావేశం నిర్వహించి నూతన పర్యాటక విధాన ముసాయిదాను ఆమోదించారు. పర్యాటక అభివృద్ధితో పాటు పెద్ద ఎత్తున ఉద్యోగ అవకాశాలు లభించే విధంగా మాస్టర్‌ ప్లాన్‌ రూపొందిచాలని అధికారులను ఆదేశించారు. దీంతో ఈ ప్రాజెక్టు భూములను అనేక సార్లు పర్యాటకశాఖ అధికారులు సందర్శించి హైదరాబాద్, ముంబాయి నగరాలకు చెందిన ఆర్కిటెక్చర్స్‌తో ప్రాజెక్టుకు రూపకల్పన చేశారు. నిధుల విడుదలలో నెలకొన్న జాప్యంతో ప్రాజెక్టు నిలిచిపోయింది. టీడీపీలో రేటు మారింది మెగా టూరిజం ప్రాజెక్టుకు తెలుగుదేశం ప్రభుత్వం 2015లో  250 ఎకరాల స్థలాన్ని కేటాయించి దశల వారీగా మరికొంత  స్థలంతో పాటు నిధులు మంజూరు చేసి ప్రాజెక్టును పూర్తి చేస్తామని హామీనిచ్చింది. 2013లో టూరిజం శాఖ మెగా టూరిజం ప్రాజెక్టు స్థలాన్ని కేటాయించమని కోరినప్పుడు ప్రభుత్వం నిర్ణయించిన ధర ప్రకారం ఎకరం 1.80లక్షల రూపాయలు ఉండగా  ప్రస్తుతం ఎకరం 2.50లక్షల రూపాయలుగా పెరిగింది.  చూసి వెళ్తున్నారు.. టీడీపీ ప్రభుత్వం ప్రైవేట్‌ భాగస్వామ్యంతో మెగా టూరిజం ప్రాజెక్టును అభివృద్ధి పర్చాలని భావించింది. ఈ నేపథ్యంలో 2015 డిసెంబర్‌ 29న ముంబాయి ఎస్సెల్‌ గ్రూప్‌ చైర్మన్‌ సుభాష్‌చంద్ర తన సొంత హెలికాఫ్టర్‌లో మెగా టూరిజం ప్రాజెక్టు స్థలాన్ని సందర్శించి ముఖ్యమంత్రి చంద్రబాబునాయుడిని కలిసి ఈ ప్రాంతం ఎంతో నచ్చిందని చెప్పటంతో ప్రాజెక్టు నిర్మాణానికి గ్రీన్‌ సిగ్నల్‌ పడినట్లయ్యింది. 2017 ఫిబ్రవరిలో కూడా ఎస్‌ఎల్‌ గ్రూపు ప్రతినిధులు మరో సారి మెగాటూరిజం ప్రాజెక్టు స్థలాన్ని సందర్శించారు. ఇప్పటి వరకు వారు చూసి వెళ్లడమే కానీ ప్రాజెక్టు నిర్మాణ పనులు మాత్రం ప్రారంభం కాలేదు.  ఎన్నెన్నో అందాలు.. విజయపురిసౌత్‌ పరిధిలో చూడచక్కని చారిత్రక ప్రదేశాలైన నాగార్జునకొండ, అనుపు, ఎత్తిపోతల జలపాతాలు పర్యాటకులను కనువిందు చేస్తాయి. దేశ, విదేశీ పర్యాటకులు కారులో ఇక్కడకి చేరుకోవాలంటే హైదరాబాద్‌ శంషాబాద్‌ విమానశ్రయం నుంచి కేవలం రెండున్నర గంటల సమయం పడుతుంది. ఇక్కడ ఇన్ని సౌకర్యాలతో పాటు కనువిందు చేసే ప్రకృతి అందాలకు తోడు మెగా టూరిజం ప్రాజెక్టును ఏర్పాటు చేయాలి. మెగా టూరిజం ప్రాజెక్టులో చూడచక్కని అందాలతో ఎమ్యూజ్‌మెంట్‌ పార్కులు, సినిమా స్టూడియోలు, స్విమ్మింగ్‌పూల్స్, స్టార్‌ హోటళ్లు పర్యాటకులకు అందుబాటులోకి వస్తాయి. ఆంధ్ర, తెలంగాణా రాష్ట్రాలకు సరిహద్దు ప్రాంతమైన విజయపురిసౌత్‌లో వందలాది ఎకరాల ప్రభుత్వ పోరంబోకు భూమి ఉంది. ఇక్కడ ఈ ప్రాజెక్టును ఏర్పాటు చేస్తే సినీ పరిశ్రమకు కూడా ఎంతో ఉపయోగంగా ఉంటుందని పలువురు భావిస్తున్నారు.  తెలుగుదేశం ప్రభుత్వం అధికారంలోకి వచ్చిన తర్వాత అప్పట్లో ఇచ్చిన హామీకి ఇప్పటి వరకు మోక్షం లభించలేదు.  


 సాక్షి ప్రతినిధి, ఖమ్మం: ఖమ్మం జిల్లా మెగా టూరిజమ్ సర్క్యూట్ కలగా మారనుంది. ఆఘమేఘాల మీద అంచనా వ్యయంతో ప్రాజెక్టును రూపొందించిన అధికారులకు కేంద్ర ప్రభుత్వం షాక్ ఇచ్చింది. విభజన అంశాన్ని సాకుగా చూపి ప్రాజెక్టు మంజూ రు వ్యవహారంలో  మొండిచెయ్యి చూపింది. ఖమ్మం జిల్లాలోని పోలవరం కేంద్రంగా మెగా టూరిజం సర్క్యూట్ కోసం అధికారులు రూ. 57 కోట్లతో కేంద్ర టూరిజం మంత్రిత్వశాఖకు నివేదిక పంపారు. ప్రాజెక్టుకు మౌఖిక అంగీకారం తెలిపి తుది దశలో ఉండగా రాష్ట్ర విభజన సాకుతో ప్రసుత్తం ఫైల్ పక్కన పెట్టారు. పర్యవసానంగా ఖమ్మం, తూర్పుగోదావరి, పశ్చిమగోదావరి జిల్లాల్లో పర్యాటక అభివృద్ధి పై నీలినీడలు కమ్ముకున్నాయి.
  
  పోలవరం సందర్శనకు రాష్ట్రం నుంచే కాకుండా ఇతర రాష్రాల నుంచి కూడా పర్యాటకులు వస్తున్నారు. ముఖ్యంగా ఖమ్మం జిల్లా నుంచి వస్తే భద్రాచలం రామాలయాన్ని సందర్శించిన తర్వాత పోలవరం ప్రాంతం నుంచి పాపికొండలు విహారయాత్రకు వెళుతుంటారు. అయితే ప్రస్తుతం పర్యాటక శాఖ పరంగా కనీస సౌకర్యాలు లేకపోవటంతో ప్రైవేట్ వ్యక్తుల ఇష్టారాజ్యంగా మారింది. అలాగే తూర్పు గోదావరి జిల్లా నుంచి రాజమండ్రి, పశ్చిమగోదావరి జిల్లా నుంచి కొవ్వూరు, పట్టిసీమ ప్రాంతాల్లోని లాంచీల రేవు నుంచి పర్యాటకులు పోలవరం సందర్శనకు వస్తుంటారు. ఈ క్రమంలో రాష్ట్ర పర్యాటక శాఖ మెగా టూరిజం సర్క్యూట్ పేరుతో పోలవరానికి అనుబంధంగా ఉండే ప్రాంతాల్ని పర్యాటకంగా అభివృద్ధి చేయాలని నిర్ణయించారు. దీంతో 2011లో ఖమ్మం జిల్లా అధికారులు ప్రాథమిక ప్రతిపాదనలు సిద్ధం చేసిన క్రమంలో కేంద్ర నిధుల కోసం సమగ్ర నివేదిక తయారు చేయాలని రాష్ట్ర శాఖ ఆదేశించింది. దీంతో బాధ్యతలను ఓ ఏజెన్సీకి అప్పగించారు. సదరు మెగా టూరిజం సర్య్కూట్ పేరుతో సమగ్ర నివేదిక (డిటైల్డ్ ప్రాజెక్ట్ రిపోర్ట్) సిద్ధం చేసి ఈ ఏడాది జూన్‌లో కేంద్రానికి పంపారు.
  
  ప్రాజెక్టులోని అంశాలు...
  
  ప్రాజెక్టులో భాగంగా సుమారు 10 లాంచీస్టేషన్లలో మౌలిక సదుపాయాలు, కొన్ని చోట్ల పార్కులు, రిసెప్షన్ సెంటర్లు ఏర్పాటు చేసేలా నివేదిక సిద్ధం చేశారు. ముఖ్యంగా ఖమ్మం జిల్లా భద్రాచలం డివిజన్ పరిధిలో లాంచీ స్టేషన్లయిన కూనవరం, శ్రీరాంగిరి, పోచవరంలో లాంచీల రాకపోకలకు వీలుగా బేస్‌క్యాంప్ ఏర్పాటు, మూడు ప్రాంతాల్లో పర్యాట కులు వేచి ఉండటానికి భవనాలు, భద్రాచలం దేవస్థానం సమీపంలో పోలవరం యాత్ర, ఇతర టూరిజం  వివరాలను తెలియజేసేందుకు భారీ రిసెప్షన్ హాల్‌ను నిర్మించాలని నిర్ణయించారు. కేవలం ఖమ్మం జిల్లాలో గోదావరి తీరాన రూ.15 కోట్లతో అభివృద్ధి పనులు చేపట్టాలని నిర్ణయించారు. అలాగే జిల్లాలో రోడ్డుమార్గంలో చివరిన ఉన్న పేరంటాలపల్లి, ఖమ్మం, తూర్పుగోదావరి, పశ్చిమగోదావరి జిల్లాల నదీ సరిహద్దులో ఉన్న కొల్లూరులో పర్యాటకులకు మధ్యాహ్న భోజనం ఏర్పాటుకు వీలుగా అక్కడి ఇసుక తిన్నెల్లో కుటీరాలు, ఇతర సౌకర్యాలను కల్పించనున్నారు. అలాగే ఉభయగోదావరి జిల్లాల్లోని ఐదు ప్రాంతాల్లో బేస్‌క్యాంప్‌లను ఇతర అభివృద్ధి కార్యక్రమాలను నిర్వహించాలని నిర్ణయించారు.    ఇక్కడి 22 లాంచీల్లో అధికశాతం ప్రైవేటువారి చేతుల్లోనే ఉన్నాయి. అభివృద్ధి చెందితే పర్యాటకుల సంఖ్య పెరిగి ప్రభుత్వానికి ఆదాయం వస్తుందని భావించారు.
  
  చూపుతున్న సాకులివే...
  
  సాధారణంగా కేంద్ర ప్రభుత్వం ఒక ప్రాజెక్టును పూర్తిగా ఒకే రాష్ట్రానికి ఇస్తుంది. రాష్ర్ట విభజన జరిగినందున ఈ మెగా టూరిజం సర్క్యూట్ రెండు రాష్ట్రాల పరిధిలోకి వెళ్తుంది. సాంకేతికంగా ఇది సాధ్యం కాదని ఆ శాఖ అధికారులు చెబుతున్నారు. ఒకవేళ విభజన కంటే ముందే నిధులు మంజూరు అయి, పనులు చేపడితే పూర్తి చేసే అవకాశం ఉండేది. కానీ కేంద్రం నిధులు మంజూరు చేయడంలో జాప్యం చేయడంతో పర్యాటక ప్రాజెక్టుపై నీలినీడలు కమ్ముకున్నాయి. మరోవైపు పోలవరం ప్రాజెక్టు మూడేళ్లలో పూర్తయితే ఖమ్మం జిల్లాలో  టూరిజం సర్క్యూట్ నిష్ఫలంగా మారుతుంది. పోలవరం వల జిల్లాలో 154 ముంపు గ్రామాలుండగా, ఈ సర్క్యూట్‌లో నిర్మించే లాంచీ స్టేషన్లన్నీ ముంపునకు గురవుతాయి.  దీంతో జిల్లాలో ప్రాజెక్టు కింద ఖర్చు పెట్టే రూ.15 కోట్ల నిధులు గోదావరి పాలుకానున్నాయి.