► ఆదోనిలో గుప్త నిధుల పేరుతో రైతును బురిడీకి యత్నించిన ముఠా
 ► పంచలోహ విగ్రహాలను విక్రయించేందుకు వచ్చి పోలీసులకు చిక్కిన ముఠా సభ్యులు
  
 కర్నూలు: పంచలో విగ్రహాలను విక్రయించడానికి వచ్చిన ఓ ముఠా పోలీసుల వలలో పడ్డారు. ఆదోని పట్టణానికి చెందిన బోయ ఉరుకుందప్ప పొలంలో పెద్ద ఎత్తున ధనం ఉందని వెలికి తీస్తామని ముఠా సభ్యులు నమ్మించి అతని వద్ద భారీ మొత్తంలో డబ్బులు వసూలు చేసేందుకు విఫలయత్నం చేసి చివరకు పోలీసులకు చిక్కి కటకటాల పాలయ్యారు.
 
 ఆ వివరాలు.. పట్టణానికి చెందిన షేక్ మహబూబ్ బాషా, సయ్యద్ తహీర్, కర్నూలు పట్టణానికి చెందిన మహమ్మద్ షరీఫ్, షేక్ అలీ, నవాబు పేట అల్లాబకాష్ తదితరులు ముఠాగా ఏర్పడి పథకం ప్రకారం బోయ ఉరుకుందప్ప పొలంలో పంచలోహ విగ్రహాలను పాతిపెట్టారు. బోయ ఉరుకుందప్ప, బోయ ఈరప్పలను కలిసి పలానా చోట టన్నుల కొద్ది గుప్త నిధులున్నాయని నమ్మబలికారు.
 
 వాటిని వెలికి తీసేందుకు రూ.16 లక్షలకు ఒప్పందం కుదుర్చుకుని రూ.లక్ష అడ్వాన్స్ తీసుకుని పొలంలోకి వెళ్లి తవ్వకాలు జరిపి రెండు విగ్రహాలను వెలికి తీసి రైతులను నమ్మించారు. ఇంకా భారీ మొత్తంలో ఇక్కడ గుప్త నిధులున్నాయని, మిగిలిన డబ్బులు అప్పగిస్తే వాటిని కూడా వెలికి తీసి ఇస్తామని నమ్మించారు. బయట పడిన పురాతన వస్తువులను విక్రయించేందుకు కర్నూలుకు వచ్చి ముఠా సభ్యులంతా కల్లూరులోని నవాబ్‌పేట అల్లాబకాష్‌ను ఆశ్రయించి పోలీసులకు దొరికిపోయారు.
  
  పోలీసులకు ఇలా పట్టుబడ్డారు..
  
  బోయ ఉరుకుందప్ప పొలంలో తవ్వకాలు జరిపి వెలికితీసిన నాగదేవత, శివుడి విగ్రహాలు, 5 బంగారు వర్ణం కలిగిన బల్లేలు, ఇత్తడి బిందె, ఇత్తడి మూతతో పాటు ఒక సంచిలో వేసుకుని కల్లూరులోని నవాబుపేట అల్లాబకాష్ దగ్గరికి వచ్చారు. సోమవారం వాటిని విక్రయించేందుకు ప్రయత్నిస్తుండగా నాల్గవ పట్టణ పోలీసులకు సమాచారం అందడంతో మారువేషంలో కల్లూరులోని నిర్మల్ నగర్ లక్ష్మీ కమర్షియల్ కాంప్లెక్స్ వద్ద కాపు కాసి ఏడుగురిని పట్టుకుని వారి వద్ద నుంచి 18వ శతాబ్దం నాటి పంచలోహ విగ్రహాలను స్వాధీనం చేసుకుని ఎస్పీ ఆకే రవికృష్ణ ఎదుట హాజరుపరిచారు. ఈ సందర్భంగా జిల్లా పోలీసు కార్యాలయంలోని మినీ కాన్ఫరెన్స్ హాల్‌లో కర్నూలు డీఎస్పీ రమణమూర్తి, నాల్గవ పట్టణ సీఐ నాగరాజురావుతో కలసి విలేకరుల సమావేశంలో ఎస్పీ వివరాలను వెల్లడించారు.


 ► సామూహిక అత్యాచారం.. ఆపై హత్య
 ► వీడిన వృద్ధురాలి హత్య కేసు మిస్టరీ
 ► నిందితులను ఎస్పీ ఎదుట హాజరు
 ► పరిచిన కోసిగి పోలీసులు
  
  కర్నూలు:  ఇచ్చిన అప్పును తిరిగి ఇవ్వమని అడిగినందుకు ఓ మహిళను సామూహిక అత్యాచారం చేసి ఆపై హత్య చేశారు. ఈ నెల 8న జిల్లాలోని పెద్దకడబూరు స్టేషన్‌లో నమోదైన గుర్తు తెలియని మహిళ హత్య కేసు పోలీసులు ఛేదించారు. ఘాతుకానికి పాల్పడిన పెద్దకడుబూరు గ్రామానికి చెందిన బోయ మెట్రు హనుమంతు, పింజరి పీరమ్మ, బోయ బనవాసి నాగేంద్ర, బోయ కోటేకంటి లక్ష్మన్న, బోయ మెట్రు వీరేష్‌లను అరెస్టు చేసి శనివారం రాత్రి జిల్లా కేంద్రంలో ఎస్పీ ఆకే రవికృష్ణ ఎదుట హాజరుపరిచారు. అనంతరం జిల్లా పోలీసు కార్యాలయంలోని మినీ కాన్ఫరెన్స్ హాల్‌లో ఆదోని డీఎస్పీ శ్రీనివాసరావు విలేకరులకు వివరాలు వెల్లడించారు. హత్యకు గురైన వృద్ధురాలు చిట్టెమ్మ(60) నిందితుడు బోయ హనుమంతుకు రూ.5 వేలు అప్పు ఇచ్చింది.
 
 తిరిగి చెల్లించమని ఒత్తిడి చేయడంతో హతమార్చాలని హనుమంతు మిగతా నిందితులతో కలిసి పథకం వేశాడు. ఈనెల 8న హనుమంతు ప్రియురాలు పింజరి పీరమ్మ ద్వారా చిట్టెమ్మను నెమలికల్లు-పెద్దతుంబళం రోడ్డులోని తాటివనంలోకి రప్పించుకుని మూకుమ్మడిగా అత్యాచారం చేసి  కత్తితో గొంతు కోశారు. వృద్ధురాలి తల, మొండెం వేరు చేసి గుండు గీశారు. కళ్లు, ముక్కు, చెవులు కోసేశారు. రవిక, చీరను కాల్చేశారు. జత వెండి కడియాలు, బంగారం కమ్మలు తీసెకెళ్లి ఆదోనిలోని ఓ దుకాణంలో విక్రయించారు. మృతురాలి కు టుంబ సభ్యులు ఇచ్చిన సమాచారం ఆధారంగా పోలీసులు కేసు మిస్టరీని ఛేదించి నేరానికి ఉపయోగించిన కత్తి, ఇతర వస్తువులను నిందితుల నుంచి స్వాధీనం చేసుకున్నారు. రెండు వారాల్లో కేసును ఛేదించినందుకు ఎస్పీ ఆకే రవికృష్ణ కోసిగి పోలీసులను అభినందించారు. కోసిగి సీఐ కంబగిరి రా ముడు, పెద్దకడుబూరు ఎస్‌ఐ నాగరాజు విలేకరుల సమావేశంలో పాల్గొన్నారు.


  అభ్యర్థుల వ్యయాన్ని పరిశీలించిన వ్యయ పరిశీలకులు ప్రకాశ్ కారంత్
  
  విజయనగరం కంటోన్మెంట్, న్యూస్‌లైన్: ఎన్నికల్లో అభ్యర్థులు చేస్తున్న వ్యయానికి సరిగ్గా లెక్కలు చెప్పాలని లేని వారికి ఆర్వోల ద్వారా నోటీసులు ఇవ్వాలని సహాయ పరిశీలకులకు వ్యయ పరిశీలకుడు ప్రకాశ్ కారంత్ సూచించారు. శుక్రవారం ఆయన అసెంబ్లీ స్థానానాలకు పోటీ చేస్తున్న అభ్యర్థుల ఎన్నికల వ్యయాన్ని, నమోదైన రిజిస్టర్లను విజయనగరం కలెక్టరేట్‌లోని మినీ కాన్ఫరెన్సు హాలులో పరిశీలించారు.
 
 ఈ సందర్భంగా మాట్లాడుతూ ఎన్నికల కోసం పలు రాజకీయ పక్షాలు పోటీలో ఉన్న అభ్యర్థుల ప్రకటనలకు, సమావేశాలకు ఖర్చు చేసిన వ్యయంపై  పార్టీల వారీగా, అభ్యర్థుల వారీగా స్పష్టంగా ఉండాలన్నారు. అభ్యర్థులు చెప్పిన లెక్కలకు, వ్యయ పరిశీలకులు నమోదు చేసిన లెక్కలకు తేడాలుండడంతో పరిశీలకుడు ఆగ్రహం వ్యక్తం చేశారు.
 
  పార్టీల ప్రతినిధులు తక్కువగా చూపుతున్నట్టుగా భావించి ఆయా ప్రతినిధులకు ఆర్వోల ద్వారా నోటీసులు జారీ చేయాలని సూచించారు. అభ్యర్థుల సమావేశాలు, సభలు, ర్యాలీలు, పత్రికల్లో వచ్చే పెయిడ్ న్యూస్, ప్రకటనలను ఎన్నికల కమిషన్ సూచించిన ధరలకే నిర్ణయించాలన్నారు. వీడియో సర్వెలెన్సు బృందాలు నిత్యం తిరుగుతునే ఉండాలన్నారు. అభ్యర్థుల కార్యక్రమాలపై గట్టి నిఘా ఉంచాలన్నారు.
 
  సహాయ పరిశీలకులు షాడో రిజిస్టర్‌లో ప్రతి సంఘటననూ ఖర్చుతో సహా నమోదు చేయాలన్నారు. కార్యక్రమంలో అకౌంటింగ్ టీములు, విజయనగరం నియోజకవర్గానికి చెందిన వివిధ పార్టీల అభ్యర్థులు,  ప్రతినిధులు, ఇండిపెండెంటు అభ్యర్థులు పాల్గొన్నారు.