సాక్షి, ముంబై: ఛత్రపతి శివాజీ మహరాజ్‌ టర్మీనస్‌ (సీఎస్‌ఎంటీ)– మసీద్‌ బందర్‌ స్టేషన్ల మధ్యనున్న 154 ఏళ్ల పురాతనమైన కర్నాక్‌ వంతెన కాలగర్భంలో కలిసిపోయింది. శనివారం రాత్రి 11 గంటల నుంచి ఆదివారం అర్ధరాత్రి దాటిన తరువాత అంటే సోమవారం తెల్లవారుజాము రెండు గంటల వరకు 27 గంటలు జంబో బ్లాక్‌ తీసుకున్నప్పటికీ 16 గంటల్లోనే కూల్చీవేత పనులు పూర్తిచేశారు. ఆ తరువాత సాంకేతిక సిబ్బంది రంగంలోకి దిగారు. 25 వోల్టేజీల విద్యుత్‌ ప్రవహించే ఓవర్‌ హెడ్‌ వైరు, సిగ్నల్స్, ఇతర సాంకేతిక పనులు సరిచేసి విద్యుత్‌ సరఫరాను పునరుద్ధరించారు. దీంతో ఆదివారం సాయంత్రం నుంచి లోకల్‌ రైళ్ల రాకపోకలు మెల్లమెల్లగా పునరుద్ధరించారు. ఎట్టకేలకు 19 గంటల తరువాత సెంట్రల్‌ రైల్వే మార్గంలో ఆదివారం సాయంత్రం 4 గంటల ప్రాంతంలో సీఎస్‌ఎంటీ నుంచి థానే దిశగా, హార్బర్‌ మార్గంలో మొదటి రైలు 5.52 గంటలకు సీఎస్‌ఎంటీ నుంచి పన్వేల్‌ దిశగా నెమ్మదిగా బయలు దేరింది. బ్లాక్‌ కారణంగా సోమవారం ఉదయం ముంబైకి చేరుకోవల్సిన అనేక దూరప్రాంతాల ఎక్స్‌ప్రెస్‌ రైళ్లు రాలేకపోయాయి. దీంతో కొన్ని రైళ్లు సోమవారం కూడా రద్దయ్యాయి.   సిబ్బందికి సెలవులు రద్దు...  జంబో బ్లాక్‌ కారణంగా శని, ఆదివారాలు రైల్వే ప్రొటెక్షన్‌ ఫోర్స్‌ (ఆర్పీఎఫ్‌), రైల్వే పోలీసులు, ముంబై పోలీసుల వారంతపు సెలవులు రద్దు చేశారు. సాధారణంగా ప్రతీరోజు సెంట్రల్‌ రైల్వే మార్గంలో ప్రతీరోజు 1,810 లోకల్‌ రైళ్లు తిరుగుతాయి. కాని జంబో బ్లాక్‌ కారణంగా ఆదివారం 1,096 ట్రిపులు రద్దయ్యాయి. అదేవిధంగా 36 దూరప్రాంతాల మెయిల్, ఎక్స్‌ప్రెస్‌ రైళ్లు రద్దుచేయగా 68 ఎక్స్‌ప్రెస్‌ రైళ్లను దాదర్‌ టర్మీనస్, లోకమాన్య తిలక్‌ (కుర్లా) టర్మీనస్, థానే, కల్యాణ్, కసారా, నాసిక్, కర్జత్, పుణే తదితర ప్రధాన స్టేషన్లలో రద్దుచేసి అటునుంచి తిరిగి పంపించిన విషయం తెలిసిందే. ముఖ్యంగా శని, ఆదివారాలు 27 గంటలపాటు జంబో బ్లాక్‌ తీసుకోవడానికి ప్రధాన కారణం ప్రభుత్వ కార్యాలయాలతోపాటు ప్రైవేటు వాణిజ్య, వ్యాపార, విద్యా సంస్ధలకు, సెలవు ఉంటుంది. దీంతో ఉద్యోగులు, వ్యాపారులు, విద్యార్ధులు ఇబ్బందులు పడరు. అత్యవసరమైతే తప్ప ఇళ్ల నుంచి బయట పడవద్దని రైల్వే అధికారులు సూచనలు సైతం జారీ చేశారు. కానీ ప్రస్తుతం పెళ్లిల సీజన్‌ కావడంతో అనేక మంది ఆదివారం షాపింగులకోసం ఇళ్ల నుంచి బయటపడ్డారు. జంబో బ్లాక్‌ విషయం తెలియక కొందరు పర్యాటకులు రోడ్డు మార్గం ద్వారా ముంబైకి చేరుకున్నారు. కాని ముంబైకి చేరుకున్నాక ఇబ్బందులు పడక తప్పలేదు. అనేక లోకల్‌ రైళ్ల ట్రిప్పులు రద్దు కావడంతో ప్రధాన స్టేషన్ల ప్లాట్‌ఫారాలపై ఇసుకపోస్తే రాలనంత జనాలు ఉన్నారు. ప్రయాణికులను నియంత్రించడానికి రైల్వే పోలీసులకు తల ప్రాణం తోకకు వచ్చింది. ముఖ్యంగా బైకళ, వడాల రోడ్‌ స్టేషన్‌లో లోకల్‌ రైళ్లను షార్ట్‌ టర్మానేట్‌ చేశారు. వచి్చన రైళ్లను అటునుంచి తిరిగి పంపించడంతో ప్లాట్‌ఫారాలన్నీ ప్రయాణికులతో కిక్కిరిసిపోయాయి. ఏ రైలు, ఎటు పోతుందో తెలియక ఉరుకులు పరుగులు తీశారు. రద్దీ ఉండే కీలకమైన స్టేషన్ల నుంచి బెస్ట్‌ బస్సులు నడిపినప్పటికీ అవి ఎటూ చాలకుండా పోయాయి. ఆదివారం అర్ధరాత్రి వరకు డ్రైవర్లు, కండక్టర్లు విశ్రాంతి లేకుండా విధులు నిర్వహించారు. తగినంత సిబ్బంది లేకపోవడంతో బెస్ట్‌ సంస్ధ పూర్తి స్ధాయిలో బస్సులు నడపలేకపోయింది. అయినప్పటికీ 80 శాతం ప్రయాణికులను తమ గమ్యస్ధానాలకు చేరవేసింది. రైల్వే స్టేషన్ల బయట బెస్ట్‌ బస్సులతో పాటు రైళ్ల రాకపోకల తాజా వివరాలు వెల్లడించేందుకు అన్ని ప్రధాన స్టేషన్లలో అనౌన్స్‌మెంట్‌ సిస్టం ఏర్పాటు చేశారు. దీంతో ప్రయాణికులకు, పర్యాటకులకు కొంత ఊరట లభించింది.   అత్యంత పురాతనమైన వంతెన...  దేశ ఆర్థిక రాజధాని ముంబై నగరంలో పశ్చిమ–తూర్పు ప్రాంతాలను కలిపేందుకు వందేళ్లకు ముందు బ్రిటీష్‌ కాలంలో నిర్మించిన పురాతన వంతనలే ఉన్నాయి. ప్రస్తుతం అవి శిథిలావస్ధకు చేరుకోవడంతో దశలవారీగా వాటిని కూల్చివేయాలని రైల్వే నిర్ణయం తీసుకుంది. అందులో భాగంగా సెంట్రల్‌ రైల్వే మార్గంపై ఉన్న పురాతన వంతెనల్లో కర్నాక్‌ వంతెన ఆగ్రస్ధానంలో ఉంది. కర్నాక్‌ వంతెన నిర్మాణ పనులు 1858లో ప్రారంభం కాగా 1868లో పూర్తయ్యాయి. ఈ వంతెన పూర్తి చేయడానికి మొత్తం పదేళ్ల సమయం పట్టింది. ఆ సమయంలో జెమ్స్‌ రివేట్‌ కర్నాక్‌ గవర్నర్‌గా పనిచేశారు. దీంతో ఈ వంతెనకు కర్నాక్‌గా నామకరణ జరిగింది. సెంట్రల్‌ రైల్వే మార్గంలో ఉన్న వివిధ పాత వంతెనల్లో ఇదే అత్యంత పురాతనమైనదిగా గుర్తింపు పొందింది. అక్కడ ఈ వంతెన పేరు ఇంగ్లీష్‌, హిందీ, మరాఠీ భాషాల్లో రాసి ఉంది.   కూల్చివేత పనులు ఇలా...  50 మీటర్ల పొడవు, 18.8 మీటర్ల వెడల్పు ఉన్న ఈ వంతెనను పూర్తిగా నేల మట్టం చేయడానికి 400 మందికిపైగా కార్మికులు, 100 మందికిపైగా సూపర్‌వైజర్లు, సాంకేతిక సిబ్బంది, 35 మంది రైల్వే అధికారులు, 42 మంది రైల్వే పోలీసులు, 350 టన్నుల సామర్థ్యం గల 3 భారీ క్రేన్లు, 500 టన్నుల సామర్థ్యం గల ఒక క్రేన్, 300 మందికిపైగా గ్యాస్‌ కట్టర్లు, ఆరు టవర్‌ వ్యాగన్లు వినియోగించాల్సి వచ్చింది. ఈ వంతెనపై ఉన్న ఇనుప రాడ్లు, ప్లేట్లు ఇలా మొత్తం 44 ముక్కలు చేశారు. ఇందులో ఒక్కో ఇనుప ముక్క బరువు 10–12 టన్నులు ఉండగా మరికొన్ని 14–16 టన్నుల బరువున్నాయి. ఇందులో కొన్ని ముక్కలను ఒకేసారి పక్కకు నెట్టడానికి 350 టన్నుల సామర్థ్యంగల క్రేన్ల సాయం తీసుకున్నారు. కేవలం ఈ ముక్కలన్నీ పక్కకు నెట్టడానికి ఏకంగా ఎనిమిది గంటల సమయం పట్టింది. వంతెన శిథిలాలను తరలించేందుకు 50పైగా ట్రక్కులు, టిప్పర్లను వినియోగించారు.   

ముంబై: గేదెలు ఢీకొట్టిన ప్రమాదంలో దెబ్బతిన్న వందే భారత్‌ ఎక్స్‌ప్రెస్‌ రైలును అధికారులు బాగుచేశారు. ఘటన జరిగిన 24 గంటల్లోనే రైలుకు మరమత్తులు నిర్వహించారు. దెబ్బతిన్న రైలు ముందు భాగంలోని మెటల్‌ ప్లేట్‌ను ముంబై సెంట్రల్‌లోని కోచ్ కేర్ సెంటర్‌లో మార్చారు. దీనిని ఫైబర్‌ రీఇన్‌ఫోర్స్‌డ్‌ ప్లాస్టిక్‌(ఎఫ్‌ఆర్‌పీ)తో తయారు చేశారు. దీనికి సంబంధించిన ఫోటోను అధికారులు ట్విటర్‌లో షేర్‌ చేశారు.  కాగా ముంబై నుంచి గాంధీనగర్‌ వెళ్తుండగా గురువారం అహ్మదాబాద్‌ సమీపంలో పట్టాలపై వెళ్తుండగా  గేదెలను ఢీకొట్టిన విషయం తెలిసిందే. ఈ ఘటనలో ప్రయాణికులెవరికీ గాయాలు కాకపోయినా రైలు ముందు భాగం ధ్వంసమైంది.  ఏకంగా ఇంజిన్‌ ముందు భాగం ఊడిపోయింది. ఈ ప్రమాదం జరిగిన సమయంలో రైలు గంటకు 100 కి.మీ. వేగంతో ఉంది. అయితే రైలు ప్యానెల్ లేకుండానే గాంధీనగర్ స్టేషన్‌,  తిరిగి ముంబై సెంట్రల్‌కు సకాలంలో ప్రయాణించింది. గాంధీనగర్‌-ముంబై సెంట్రల్‌ మధ్య వందే భారత్‌ ఎక్స్‌ప్రెస్‌ ట్రైన్‌ను 2022, సెప్టెంబర్‌ 30న జెండా ఊపి ప్రారంభించారు ప్రధానమంత్రి నరేంద్ర మోదీ. ఈ ట్రైన్‌ స్పీడును గరిష్ఠంగా 160 కిలోమీటర్లుగా  ఉందని అధికారులు తెలిపారు. అయితే రైలు ప్రమాదానికి గురికావడంతో విపక్షాలు మోదీ సర్కారుపై విమర్శలు ఎక్కుపెట్టాయి. ప్రారంభించిన 6 రోజుల్లోనే బర్రెలు ఢీకొడితేనే రైలు పార్టులు ఊడిపోవటం ఏమిటని ప్రశ్నిస్తున్నారు. చదవండి: ఇదెక్కడి గొడవరా బాబూ.. సీటు కోసం జుట్లు పట్టుకొని కొట్టుకున్న మహిళలు

అహ్మదాబాద్‌: కేంద్ర ప్రభుత్వం ఇటీవలే ముంబై సెంట్రల్‌- గాంధీనగర్‌ క్యాపిటల్‌ మధ్య ప్రారంభించిన వందే భారత్‌ ఎక్స్‌ప్రెస్‌ ట్రైన్‌కు త్రుటిలో ప్రమాదం తప్పింది.  గురువారం ఉదయం రైలు పట్టాలపైకి గేదేలు రావటంతో వాటిని ఢీకొట్టింది. దీంతో రైలు ఇంజిన్ ముందుభాగం పూర్తిగా దెబ్బతిన్నది. బట్వా, మనినగర్‌ స్టేషన్ల మధ్య గురువారం ఉదయం 11.15 గంటల సమయంలో ఈ ప్రమాదం జరిగినట్లు అధికారులు తెలిపారు.  ఈ ప్రమాదంలో ఎవరూ గాయపడలేదని, ట్రైన్‌ను బాగు చేసి గమ్యానికి చేర్చినట్లు పశ్చిమ రైల్వే జోన్‌ అధికారులు తెలిపారు. అనుకున్న సమయానికే గాంధీనగర్‌ క్యాపిటల్‌ నుంచి ముంబై సెంట‍్రల్‌ స్టేషన్‌కి చేరుకున్నట్లు చెప్పారు. గాంధీనగర్‌-ముంబై సెంట్రల్‌ మధ్య వందే భారత్‌ ఎక్స్‌ప్రెస్‌ ట్రైన్‌ను 2022, సెప్టెంబర్‌ 30న జెండా ఊపి ప్రారంభించారు ప్రధానమంత్రి నరేంద్ర మోదీ. ఈ ట్రైన్‌ స్పీడును గరిష్ఠంగా 160 కిలోమీటర్లుగా  ఉందని అధికారులు తెలిపారు. ఇదీ చదవండి: Ravan Dahan: బెడిసి కొట్టిన రావణ దహనం.. ఆపై ఎద్దు వీరంగం.. వీడియో వైరల్‌

భారతీయ రైల్వేస్‌ ప్రయాణికులకు అద్బుతమైన, విలాసవంతమైన ప్రయాణాలను అందించడం కోసం రకరకాల సౌకర్యాలను ప్రయాణికులకు అందుబాటులోకి తెస్తోంది. ప్రయాణికులకు మెరుగైన సేవలు అందించేందుకుగాను పలు రైల్వే స్టేషన్లలో ఎన్నో వసతులను రైల్వే శాఖ ఏర్పాటు చేస్తోంది. ప్రయాణికులు తమ గమ్యస్థానాలకు చేరుకోవడం కోసం పలు రైల్వే స్టేషన్లలో వెయింటింగ్‌ హాల్స్‌ను ఏర్పాటు చేస్తోంది. ఏసీ, నాన్‌ ఏసీ వంటి హాల్స్‌ను ప్రయాణికులకు రైల్వే శాఖ అందుబాటులో ఉంచుతుంది.  తాజాగా ముంబై సెంట్రల్‌ రైల్వే స్టేషన్‌లో ప్రయాణికుల కోసం ఆధునాథన ‘పాడ్‌ రూమ్స్‌’ను భారతీయ రైల్వేస్‌ నిర్మించింది. రైల్వే, బొగ్గు  గనుల శాఖ సహాయ మంత్రి రావు సాహెబ్ పాటిల్ దాన్వే నవంబర్‌ 17న ప్రారంభించారు ముంబై సెంట్రల్‌ స్టేషన్‌లోని మొదటి అంతస్తులో ఈ అర్భన్‌ పాడ్‌ రూమ్‌ హోటల్‌ను నిర్మించింది. కాగా పాడ్‌ హోటల్స్‌కు సంబంధించిన ఫోటోలను రైల్వే మంత్రిత్వశాఖ ట్విటర్‌లో షేర్‌ చేసింది. ప్రస్తుతం ఈ ఫోటోలు నెట్టింట్లో వైరల్‌గా మారాయి.  చదవండి: ఐరన్‌ మ్యాన్‌ కలను నిజం చేసిన ఆనంద్‌ మహీంద్రా పాడ్‌ హోటల్స్‌ అంటే..! పాడ్‌ హోటల్స్‌ జపాన్‌లో అత్యంత ప్రాచుర్యాన్ని పొందాయి. జపాన్‌లో వీటిని క్యాప్సూల్స్‌ హోటల్స్‌గా పిలుస్తుంటారు. ఈ హోటల్స్‌లో ప్రయాణికులకు హలీవుడ్‌ సినిమా రేంజ్‌ ఇంటీరియర్స్‌ను ఏర్పాటు చేశారు. పాడ్‌ హోటల్స్‌లో వ్యక్తిగత సేఫ్‌లను కూడా ప్రయాణికులు పొందవచ్చును.  ఇందులో ప్రయాణికులు రాత్రివేళల్లో బస చేసే విధంగా గదులను ఏర్పాటు చేశారు. హోటల్‌ ప్రాంగణంలో ఉచిత వైఫై సౌకర్యం కూడా ఏర్పాటు చేశారు. అలాగే ఈ హోటల్‌ గదులలో ఏసీ, టెలివిజన్‌, మొబైల్‌ ఛార్జింగ్‌ పాయింట్‌, రీడింగ్‌ లైట్స్‌ మరెన్నో సదుపాయాలను ఏర్పాటుచేశారు.  ఛార్జీలు ఎంతంటే...! ఈ హోటల్‌లో బస చేసే ప్రయాణికులకు 12 గంటలకు రూ.999, 24 గంటలకు 1,999 ఛార్జీలను రైల్వే శాఖ వసూలు చేయనుంది.  మహిళలు, వికలాంగుల కోసం ప్రత్యేక పాడ్‌లతో సహా 48 క్యాప్సూల్‌ లాంటి గదులను నిర్మించారు. Travelling by train on a short business trip or taking a group of students on a tour, POD rooms at Mumbai Central station are here to make your journey comfortable and easy. pic.twitter.com/7yfbSfeZ9g — Ministry of Railways (@RailMinIndia) November 17, 2021 pic.twitter.com/SMuAKQnQtr — Ministry of Railways (@RailMinIndia) November 17, 2021 చదవండి: రియల్‌మీ స్మార్ట్‌ఫోన్లపై భారీ తగ్గింపు..!


 సాక్షి, ముంబై : నగరంలోని కుర్లా, ముంబై సెంట్రల్ రైల్వే స్టేషన్లలో ఎక్కువ మంది ఆత్మహత్య చేసుకుంటున్నట్టు తేలింది. దీంతో వీటిని ‘సూసైడ్ హాట్‌స్పాట్స్’గా పేర్కొంటున్నారు. శివారు రైలుపట్టాలపై ప్రతిరోజూ దాదాపు 10 మంది ఆత్మహత్యలకు పాల్పడుతున్నారు. 2013 నుంచి ఇప్పటివరకు దాదాపు 79 మంది ఎదురుగా వస్తున్న రైలు కింద పడి తనువు చాలించారు.
 
  సెంట్రల్, వెస్టర్న్ పరిధిలోని 127 రైల్వేస్టేషన్లలో పలువురు నగరవాసులు ఆత్మహత్య చేసుకుంటున్నారు. వీరిలో అత్యధిక శాతం మంది కుర్లా, ముంబై సెంట్రల్ రైల్వే స్టేషన్లనే ఎంచుకుంటున్నారు.
 
  రైల్వే పోలీసులు ఇందుకు సంబంధించి అందజేసిన గణాంకాల మేరకు.. 2013లో 62 మంది ఆత్మహత్యలకు పాల్పడగా ఇందులో 51 మంది పురుషులు, 11 మంది మహిళలు ఉన్నారని తేలింది. అయితే ఓ వ్యక్తి మాత్రం ఆత్మహత్య చేసుకోబోతూ తృటిలో ప్రాణాపాయం నుంచి బయటపడ్డాడు. వీటిలో సగానికిపైగా కేసులు కుర్లా, ముంబై సెంట్రల్ స్టేషన్లలోనే నమోదయ్యాయి.
 
 అయితే ఈ ఏడాది మాత్రం ఆత్మహత్యలకు సంబంధించిన కేసులు తక్కువగానే నమోదయ్యాయని సంబంధిత అధికారి ఒకరు వెల్లడించారు. ఈ ఏడాది ఇప్పటి వరకు ముంబై సెంట్రల్‌లో మొత్తం ఐదుగురు ఆత్మహత్యలు చేసుకున్నారు. కుర్లాలో ఎనిమిది మంది ఆత్మహత్య చేసుకోగా వీరిలో ఏడుగురు పురుషులు, ఒక మహిళ ఉన్నారు.
 
  దీంతో ఇప్పటివరకు మొత్తం 17 ఆత్మహత్యల కేసులు నమోదయ్యాయి. ఆత్మహత్యలు చేసుకోవడానికి ఈ రెండు స్టేషన్లనే ఎందుకు ఎక్కువగా ఎంచుకుంటున్నారని అధికారులను మీడియా ప్రశ్నించగా దూరప్రాంతాల రైళ్లు ఎక్కువగా రావడమేనని వారు అభిప్రాయపడ్డారు.