ఇబ్రహీంపట్నంరూరల్‌: అడవిలో అనుమానాస్పద స్థితిలో నిలిపివేసిన కారు కలకలం రేపుతోంది. గత నాలుగు రోజులుగా అడవిలో ఉండటాన్ని గమనించిన గ్రామస్తులు భయాందోళనకు గురవుతున్నారు.  కారులో ఎమన్నా ఉందా అని భయపడుతున్నారు. మండల పరిధిలోని నాగన్‌పల్లి గ్రామంలో ఏ నోట విన్నా కారు గురించే. వివరాల్లోకి వెళితే.. నాగన్‌పల్లి గ్రామం శివారులోని మూల మలుపు వద్ద ఉన్న దాసర్‌రాయి సమీపంలోని చెట్ల పొదల్లో మారుతీ 800 కారు నిలిపి ఉంది. గత నాలుగు రోజులుగా అక్కడే ఉండటాన్ని గ్రామస్తులు గమనించారు. సోమవారం కొందరు యువకులు ధైర్యం చేసి కారు వద్దకు వెళ్లి చూశారు. కారు నెంబరు ఏఐడబ్ల్యూ–9495 నెంబరు కలిగి తెల్లరంగు కారును గుర్తించారు. నాలుగు చక్రాలలో గాలిపోయి ఉంది. కారు కనెక్షన్లు తొలగించి ఉన్నట్లు యువకులు గుర్తించారు.


 సాక్షి, రంగారెడ్డి జిల్లా: ‘మీరంతా అదృష్టవంతులు.. నాగన్‌పల్లిలో వైట్‌గోల్డ్ స్పింటెక్స్ పార్క్, ఆదిబట్లలోని సమూహ ఏరో స్పేస్ పార్క్‌తో దాదాపు 15వేల మందికి ఉద్యోగాలు లభించనున్నాయి. ఇందులో అధికభాగం స్థానికులకే ఇచ్చేలా చర్యలు తీసుకుంటాం. స్థానిక యువతకు వృత్తి నైపుణ్యంలో శిక్షణ ఇచ్చేందుకు ఐటీఐ లేదా పాలిటెక్నిక్ కాలేజీని ఏర్పాటు చేస్తాం.’ అని ముఖ్యమంత్రి నల్లారి కిరణ్‌కుమార్‌రెడ్డి భరోసా ఇచ్చారు. సోమవారం ఇబ్రహీంపట్నం మండలం నాగన్‌పల్లిలో వైట్‌గోల్డ్ స్పింటెక్స్ పార్క్‌కు శంకుస్థాపన చేశా రు. అనంతరం ఆదిబట్లలోని సమూహ ఏరోస్పేస్ పార్క్‌కు శిలాఫలకం వేశారు.
  
  ఈ సందర్భంగా వేర్వేరుగా ఏర్పాటు చేసిన బహిరంగసభల్లో సీఎం మాట్లాడారు. హైదరాబాద్ చుట్టూ విస్తరించి ఉండడంతో అభివృద్ధి అంతా జిల్లావైపు మళ్లిందని, దీంతో జిల్లాలోని భూముల ధరలు విపరీతంగా పెరిగాయని అన్నారు. ఇలాంటి పరిశ్రమల ఏర్పాటుకు జిల్లాలోని కొందరు రైతులు భూములు కోల్పోతున్నారని, వారికి ప్రత్యామ్నాయ ఏర్పాట్లతోపాటు ఉపాధి కల్పించేందుకు చర్యలు తీసుకుంటామన్నారు. ఇబ్రహీంపట్నం ప్రాంతంలో పరిశ్రమలు ఏర్పాటు కానుండడంతో నీటి సరఫరా, విద్యుత్ సరఫరాతోపాటు రవాణా సౌకర్యం మెరుగుపర్చేందుకు తగిన ఏర్పాటు చేస్తామన్నారు.