జోథ్పూర్ : సవాలక్ష అడ్డంకుల అనంతరం పాకిస్తాన్ అమ్మాయి.. ఇండియా అబ్బాయి పెళ్లి నేడు జరుగుతోంది. భారత విదేశాంగ మంత్రి సుష్మాస్వరాజ్ సహకారంతో జోథ్పూర్(రాజస్తాన్)కు చెందిన నరేశ్ తేవానీ, కరాచీకి చెందిన ప్రియా బచ్చానీలు ఒకటి కాబోతున్నారు. రెండేళ్ల కిందట మ్యాట్రిమోనియల్ సైట్ ద్వారా కుదిరిన వీరి పెళ్లికి ఇటీవల భారత్-పాకిస్తాన్ల మధ్య ఏర్పడిన ఉద్రిక్తతలు అడ్డుగా నిలిచాయి. పెళ్లి బృందానికి వీసా నిరాకరించారు. దిక్కుతోచని పరిస్థితిలో పెళ్లికొడుకు దేశప్రధానికి, విదేశీ వ్యవహారాల మంత్రికి తమ గోడు విన్నవించుకున్నాడు. వారి పెళ్లికి వీసా మంజూరు చేపించే బాధ్యత తానదేనంటూ సుష్మాస్వరాజ్ హామీఇచ్చారు. సుష్మా జోక్యంతో భారత రాయబారి కార్యాలయం పెళ్లికూతురికి, తన కుటుంబానికి వీసా మంజూరు చేసింది. దీంతో పెళ్లి కూతురు కుటుంబసభ్యులు 35 మంది ఆదివారం జోథ్పూర్ చేరుకున్నారు.
  
 నిర్ణయించిన ప్రకారం నేడు వారి పెళ్లి జోథ్పూర్లో జరుగుతోంది. తమ అభ్యర్థనకు వెంటనే స్పందించి, పెళ్లికూతురికి వారి కుటుంబానికి వెంటనే వీసా మంజూరు చేసినందుకు నరేశ్, సుష్మాస్వరాజ్కు కృతజ్ఞతలు చెప్పాడు. "నేను చాలా సంతోషంగా ఉన్నా. అన్నీ అనుకున్నమాదిరిగానే జరిగాయి. వేడుకలను చాలా సంతోషంగా జరుపుకుంటున్నాం" అని ప్రియా చెప్పింది. పెళ్లి నిశ్చయం అయ్యాక, అమ్మాయి తరుఫు వాళ్లు వీసాకు దరఖాస్తు చేసుకున్నారని, పెళ్లి ఏర్పాట్లన్నీ షెడ్యూల్ ప్రకారం జరుగుతూ వస్తున్నాయని కానీ అంతలోనే వారికి వీసా మంజూరులో ఆటంకం ఏర్పడిందని అబ్బాయి తండ్రి కన్హెయా లాల్ తేవానీ చెప్పారు. ఇలాంటి సమస్యలకు సుష్మాజీ దయాగుణం తెలిసి, వెంటనే ఆమెకు అభ్యర్థన పెట్టుకున్నామని తెలిపాడు. తమ అభ్యర్థనకు కూడా వెంటనే స్పందించిన సుష్మా , వెంటనే వీసా మంజూరు చేపించారని వివరించాడు.   


 న్యూఢిల్లీ: పాకిస్థాన్ అమ్మాయి.. ఇండియా అబ్బాయి.. త్వరలో పెళ్లి.. ఇంతలోనే ఇరుదేశాల మధ్య ఉద్రిక్తత.. ఈ కారణంగా పెళ్లి బృందానికి వీసా నిరాకరణ.. దిక్కుతోచని స్థితిలో.. సహాయం చేయాల్సిందిగా ఆ యువకుడు దేశప్రధానికి, విదేశీవ్యవహారాల మంత్రికి గోడు విన్నవించుకున్నాడు. చివరికేం జరిగిందంటే..
 
 జోథ్ పూర్(రాజస్థాన్) కు చెందిన నరేశ్ తేవానీకి కరాచీ(పాకిస్థాన్)కు చెందిన ప్రియా బచ్చానికి రెండేళ్ల కిందట పెళ్లి కుదిరింది. మ్యాట్రిమోనియల్ సైట్ ద్వారా పరిచయమైన ఈ జంట 2014లో నిశ్చితార్థం జరుపుకొంది. అప్పటి పరిస్థితుల్లో పెళ్లి కూతురు, ఆమె కుటుంబ సభ్యులు ఎలాంటి ఆటంకాలు లేకుండానే ఇండియాకు వచ్చి వెళ్లారు. కానీ పెళ్లికి మాత్రం సవాలక్ష అడ్డంకులేర్పడ్డాయి. నరేశ్, ప్రియల వివాహం నవంబర్ 7న జోధ్ పూర్ లో జరగాల్సిఉంది.
 
 ప్రస్తుతం ఇరుదేశాల మధ్య నెలకొన్న ఉద్రిక్తతల నేపథ్యంలో కరాచీలోని ఇండియన్ ఎంబసీ.. ప్రియాకు, ఆమె బంధువులకు వీసా నిరాకరించింది. దీంతో పెళ్లి ఆగిపోయే పరిస్థితులు ఏర్పడ్డాయి. ఏం చెయ్యాలో పాలుపోని వరుడు నరేశ్ తన గోడునంతా.. ప్రధాని మోదీ, విదేశీ వ్యవహారాల మంత్రి సుష్మా స్వరాజ్ కు ట్విట్టర్ ద్వారా చేరవేశాడు. ఈ వ్యవహారంపై స్పందించిన మంత్రి సుష్మా.. 'డోన్ట్ వరీ.. వీసా సమస్యను పరిష్కరిస్తాం..'అని నరేశ్ కు భరోసా ఇచ్చారు. ఇంకేముంది.. అతి త్వరలోనే ఈ ఇండోపాక్ ప్రేమపెళ్లికి శుభంకార్డు పడ్డట్టే! (పాక్ యువతకు మరింత దగ్గరైన సుష్మా)
 
 आप चिंता न करें. हम वीज़ा दिलवा देंगे. Pl do not worry. We will issue the Visa. pic.twitter.com/yubcZXcQKG https://t.co/8jUPo6VUvi
 — Sushma Swaraj (@SushmaSwaraj) 7 October 2016