- నామ్ విధానంతో రైతులకు మద్దతు ధ ర: మంత్రి హరీశ్
 - రైతు బజార్ వ్యవస్థను విస్తరిస్తాం
 - విడతలవారీగా రెవెన్యూ డివిజన్లు, అసెంబ్లీ నియోజకవర్గాల్లో ఏర్పాటు
 - నామ్‌పై రెండ్రోజుల శిక్షణ తరగతులు ప్రారంభం
 సాక్షి, హైదరాబాద్: వ్యవసాయ ఉత్పత్తుల ఆన్‌లైన్ మార్కెటింగ్‌లో దేశంలోనే తెలంగాణ అగ్రస్థానంలో ఉందని, హర్యానా మాత్రమే మన రాష్ట్రంతో పోటీ పడుతోందని మార్కెటింగ్ శాఖ మంత్రి టి.హరీశ్‌రావు తెలిపారు. జాతీయ వ్యవసాయ మార్కెట్ (నామ్) విధానంపై రెండ్రోజుల పాటు జరిగే శిక్షణ తరగతులను మంత్రి బుధవారమిక్కడ ప్రారంభించారు. కేంద్రం ఈ ఏడాది ఏప్రిల్ 14న దేశవ్యాప్తంగా 214 వ్యవసాయ మార్కెట్ యార్డులను అనుసంధానం చేస్తూ నామ్‌ను ప్రారంభించిందని, రాష్ట్రంలో 44 మార్కెట్లను కింద ఎంపిక చేయగా వాటిలో ఐదు మార్కెట్ యార్డుల్లో ప్రయోగాత్మకంగా ఇప్పటికే కార్యకలాపాలు ప్రారంభమయ్యాయని మంత్రి వివరించారు. ఏకీకృత లెసైన్సు, ఒకేసారి మార్కెట్ ఫీజు వసూలు తదితరాలు నామ్ ప్రత్యేకతలని పేర్కొన్నారు. ఆన్‌లైన్ మార్కెటింగ్ విధానం ద్వారా రైతులు తమ ఉత్పత్తులను మద్దతు ధరకు అమ్ముకునే  అవకాశం ఉందని.. తద్వారా దళారీ వ్యవస్థ నిర్మూలించవచ్చన్నారు. మార్కెటింగ్ కార్యకలాపాల్లో పారదర్శకత పెంచడంతో పాటు రైతులకు లాభం కలిగేలా నూతన విధానం ఉంటుందని చెప్పారు.
  సంస్కరణల కోసం అస్కితో ఒప్పందం
 నూతన సంస్కరణలు, విధానాలు ప్రవేశ పెట్టడం ద్వారా మార్కెటింగ్ శాఖను బలోపేతం చేస్తామని, అందులో భాగంగా అడ్మినిస్ట్రేటివ్ స్టాఫ్ కాలేజీ ఆఫ్ ఇండియా(అస్కి)తో ఒప్పందం కుదుర్చుకున్నట్లు హరీశ్ తెలిపారు. మార్కెటింగ్ లావాదేవీల్లో మార్గదర్శకాలను సులభతరం చేసేందుకు అవసరమైన సూచనలు, సలహాల కోసం నల్సార్ న్యాయ విశ్వవిద్యాలయంతో చర్చలు జరుపుతున్నామన్నారు. పెసర సాగు విస్తీర్ణం ఎక్కువగా ఉండే మహబూబ్‌నగర్, రంగారెడ్డి, మెదక్ జిల్లాలో కేంద్ర ప్రభుత్వ మార్కెటింగ్ సంస్థలు ఎఫ్‌సీఐ, నాఫెడ్ ద్వారా కొనుగోలు కేంద్రాలు ఏర్పాటు చేస్తామన్నారు. కొనుగోలు కేంద్రాల ఏర్పాటుకు కేంద్ర వ్యవసాయ శాఖ మంత్రి రాధామోహన్ సింగ్ సుముఖత వ్యక్తం చేశారన్నారు.
 
 రైతు బజారు వ్యవస్థను మరింత బలోపేతం చేస్తామని, తొలి విడతలో రెవెన్యూ డివిజన్లలో.. మలి విడతలో అన్ని అసెంబ్లీ నియోజకవర్గాల్లో ఏర్పాటు చేస్తామని చెప్పారు. కూరగాయల ధరలను స్థిరీకరించేందుకు హైదరాబాద్‌లో ‘మన కూరగాయలు’ పథకం కింద వంద విక్రయ కేంద్రాలు ఏర్పాటు చేస్తామని వెల్లడించారు. వ్యవసాయ ఉత్పత్తుల నిల్వ సామర్థ్యాన్ని పెంచేందుకు రూ.1,024 కోట్ల వ్యయంతో 330 గోదాములు నిర్మిస్తున్నట్లు తెలిపారు. సమావేశంలో అస్కి చైర్మన్ పద్మనాభయ్య, మార్కెటింగ్ డెరైక్టర్ డాక్టర్ శరత్, అదనపు డెరైక్టర్ లక్ష్మీబాయి పాల్గొన్నారు.


 ► సరుకును ఆన్‌లైన్‌లో కొనుగోలు చేసేందుకు
 ► అవకాశంపెలైట్‌ప్రాజెక్ట్ కింద బాదేపల్లి
 ► మార్కెట్‌యార్డు ఎంపిక
 ► ఏప్రిల్ 14న లాంఛనంగాప్రారంభం
  
  రైతు ముంగిట్లోకి ‘నామ్’సేవలు
  
 జడ్చర్ల: కేంద్ర ప్రభుత్వం దేశవ్యాప్తంగా అమలుచేయనున్న జాతీయ వ్యవసాయ మార్కెట్ విధానం(నేషనల్ అగ్రికల్చర్ మార్కెట్..నామ్) మరికొద్ది రోజుల్లోనే రైతు ముంగిట్లోకి రాబోతుంది. ఏప్రిల్ 14న భారతరత్న డాక్టర్ బీఆర్ అంబేద్కర్ జయంతి సందర్భంగా ఈ పథకానికి ప్రభుత్వం శ్రీకారం చుట్టనుంది. ఇందుకోసం దేశంలో పెలైట్ ప్రాజెక్ట్ కింద22 మార్కెట్లను, రాష్ట్రంలో ఐదు మార్కెట్‌యార్డులను ఎంపికచేశారు. వాటిలో బాదేపల్లి మార్కెట్‌యార్డుకు స్థానం దక్కింది. ఈ విధానం ద్వారా మార్కెట్‌యార్డుకు విక్రయానికి వచ్చిన ఉత్పత్తుల క్రయవిక్రయాల్లో పారదర్శకత ఉంటుందని అధికారులు చెబుతున్నారు. మార్కెట్ ప్రవేశద్వారం వద్ద సరుకుకు సంబంధించి లాట్‌కోడ్ నంబర్ కేటాయిస్తారు. ఇక్కడే రైతుకు సంబంధించిన పూర్తివివరాలు ఆన్‌లైన్‌లో నమోదు అవుతాయి.
 
 రైతుల నుంచి సరుకులు కొనుగోలుచేసే వ్యాపారులకు లాగిన్, పాస్‌వర్డ్ కేటాయించడంతో వారు కోడ్‌చేసిన ధరలను యార్డులో ఏర్పాటుచేసిన కంప్యూటర్‌లో గాని తమ సొంత మొబైల్, కంప్యూటర్ల ద్వారా ఆన్‌లైన్‌లో పొందుపరుస్తారు. టెండర్ సమయం ముగిసిన వెంటనే కేటాయించిన ధరల వివరాల ఎస్‌ఎంఎస్‌లు సంబంధిత రైతు, కమీషన్ ఎజెంట్, ట్రేడర్‌కు వెళ్తాయి. దీంతో ధరల కేటాయింపులో పారదర్శకతతో పాటు వేగవంతం చోటుచేసుకుంటుంది. సరుకు నాణ్యత గ్రేడింగ్ ల్యాబ్స్‌ను కూడా ఏర్పాటుచేయనున్నారు. ఈ ప్రక్రియలో సంబంధిత రైతులు తమ సరుకును ఈ ల్యాబ్ ద్వారా నాణ్యతను పరిశీలించి ఆన్‌లైన్‌లో నమోదుచేస్తే దేశంలో ఎక్కడి నుంచైనా వ్యాపారులు కొనుగోలుచేసే అవకాశం ఉంటుంది. ఈ విధానంలో రైతులకు గిట్టుబాటు ధరలు కూడా లభిస్తాయని అధికారులు పేర్కొంటున్నారు.
 
  బాదేపల్లి యార్డులో ఏర్పాట్ల పరిశీలన
 బాదేపల్లి వ్యసాయ మార్కెట్‌యార్డులో ఈ-మార్కెట్ విధానాన్ని అమలుచేసేందుకు గురువారం వ్యవసాయ మార్కెట్ డిప్యూటీ డెరైక్టర్ మల్లేశం, ఏడీఎం బాలమణి, నాగార్జున ఫర్టిలైజర్స్ కెమికల్ లిమిటెడ్ అధికారులు వినోద్‌కుమార్, ఆదిల్ పరిశీలించారు. యార్డులో 20 కంప్యూటర్లను ఏర్పాటుచేసేందుకు గదులు, క్యాబిన్లను వారు పరిశీలించారు. ఈ సందర్భంగా ప్ర యోగాత్మకంగా యార్డు ప్రవేశద్వారం వద్ద ప్రత్యేక గదిలో కంప్యూటర్ విభాగాన్ని ఏర్పాటుచేశారు. అనంతరం వ్యాపారులు, కమీషన్ ఏజెంట్లతో సమావేశమై ఈ-మార్కెట్ విధానాన్ని వివరించారు. కార్యక్రమంలో యార్డు సెక్రటరీ భాస్కరయ్య పాల్గొన్నారు.
 
  
 ఏప్రిల్ 14న ప్రారంభం
 వచ్చే నెల 14న బాదేపల్లి మార్కెట్‌లో నామ్(నేషనల్ అగ్రికల్చర్ మార్కెట్)విధానాన్ని ప్రయోగాత్మకంగా ప్రారంభిస్తున్నట్లు డీడీఎం, ప్రత్యేక అధికారి మల్లేశం ‘సాక్షి’కి వివరించారు. ఇందుకు సంబంధించిన ఏర్పాట్లను పూర్తిచేయనున్నట్లు తెలిపారు.