సాక్షి, అమరావతి:  రోగి ఆస్పత్రికి వెళితే చిత్తు కాగితం మీద కూడా మందులు రాసిన సందర్భాలు అనేకం. కేస్‌ షీట్లు రాసేందుకు కూడా ప్రభుత్వాసుపత్రుల్లో పేపర్లు ఉండేవి కావు. ఇదంతా గతం. ఇప్పుడు కార్పొరేట్‌ ఆస్పత్రుల తరహాలోనే  ప్రభుత్వ ఆస్పత్రుల్లోనూ నిర్వహణ జరుగుతోంది. ఎన్‌క్యూఏఎస్‌ (నేషనల్‌ క్వాలిటీ అస్యూరెన్స్‌) ప్రమాణాల మేరకు ఔట్‌ పేషెంట్, ఇన్‌ పేషెంట్‌ రిజిస్ట్రీ నిర్వహిస్తారు. ప్రతి పేషెంట్‌కు సంబంధించిన వివరాలు నిబంధనల మేరకు రిజిస్ట్రీ (నమోదు) అవుతాయి. గతంలోలా కాకుండా ఓపీ, ఐపీ స్లిప్పులూ మారనున్నాయి. ఇన్‌ పేషెంట్‌కు సంబంధించి ఏకంగా 16 పేజీల పుస్తకం నిర్వహిస్తారు. ఎవరు ఎలాంటి వైద్యం చేశారు.. ఏం మందులు రాశారు.. ఏయే రోగ నిర్ధారణ పరీక్షలు చేశారు వంటి వివరాలన్నీ ఈ కేస్‌ షీట్‌లో ఉంటాయి. ఒక్కసారి ఇన్‌ పేషెంట్‌గా చేరిన వ్యక్తి సమాచారం మొత్తం ఈ పుస్తకంలో ఉండేలా చర్యలు తీసుకుంటున్నారు. జాతీయ నాణ్యతా ప్రమాణాలు.. ► ప్రస్తుతం రాష్ట్రంలో పీహెచ్‌సీల నుంచి జిల్లా ఆస్పత్రులకు ఎన్‌క్యూఏఎస్‌ (నేషనల్‌ క్వాలిటీ అస్యూరెన్స్‌) మదింపు జరుగుతోంది. ఈ ప్రమాణాలను అందుకోవాలంటే ఆస్పత్రుల్లో ఆయా నిబంధనలకు అనుగుణంగా చర్యలు చేపట్టాలి. ఇందులో భాగంగానే ఓపీ, ఐపీ స్లిప్పులు, రిజిస్ట్రీలో భారీగా మార్పులు తెచ్చారు. ► దేశంలో ఏ రాష్ట్రంలోనూ ఒకేసారి ఎన్‌క్యూఏఎస్‌ మదింపు పరిధిలోకి ఇన్ని ఆస్పత్రులను తీసుకురాలేదు. ఏపీలో మాత్రమే ఈ విధానంతో ముందుకెళుతున్నారు. ఎన్‌క్యూఏఎస్‌ ప్రమాణాల మదింపు సుమారు 90 రకాల సేవలకు సంబంధించి చేస్తారు. ఇందులో ఓపీ..ఐపీ ప్రధానమైనవి. ఒక పేజీ ఓపీ షీట్, 16 పేజీల కేస్‌ షీట్‌ ► తాజాగా ఇన్‌ పేషెంట్‌ షీట్‌ను మార్చారు. ఇందులో జబ్బు వివరాలు, పేషెంట్‌ హిస్టరీ, ఫిజికల్‌ ఎగ్జామినేషన్, రోగ నిర్ధారణ పరీక్షలు ఇవన్నీ చేసి అందులో రాయాలి. ► కేస్‌ షీట్‌.. 16 పేజీలతో ముద్రించిన పుస్తకం డాక్టర్ల దగ్గర ఉంటుంది. మొదటి పేజీలో పేషెంట్‌ వివరాలు, అంగీకార పత్రం మొదలుకుని అన్ని వివరాలు ఉంటాయి. ► ఇన్వెస్టిగేషన్‌ ఫైండింగ్స్‌.. అంటే రోగ నిర్ధారణ పరీక్షలు చేశాక ఫలితాలు విధిగా రాయాల్సి ఉంటుంది. 3వ పేజీలో రోగి హిస్టరీ అంటే పేషెంట్‌కు దీర్ఘకాలిక జబ్బులున్నాయా.. ఎలాంటి మందులు వాడుతున్నారు, కుటుంబ హిస్టరీ వంటివన్నీ రాస్తారు. ► మెడికల్‌ చార్ట్‌ పేరుతో 5వ పేజీ రూపొందించారు. ఇందులో మందు పేరుతో పాటు డోసు, ఎన్ని వాడాలి, ఏ టైములో వాడాలి అనేది రాసి ఉంటుంది. ► నర్సు ఏ షిఫ్టులో ఎన్నిసార్లు పరీక్షించిందో, సేవలు అందించిందో అనే దానికి ఒక పేజీ కేటాయించారు. రోగికి కౌన్సిలింగ్‌ చేయడం, ఆహారం గురించి చెప్పడం విధిగా రాయాలి. ► డిశ్చార్జి సమ్మరీతో పాటు రోగి చనిపోతే డెత్‌ సమ్మరీ కాపీ ఒకటి ఆస్పత్రి వద్ద ఉంచుకుని, మరొకటి పేషెంట్‌ కుటుంబ సభ్యులకు విధిగా ఇవ్వాలి. ఇందులో విధిగా కారణాలను రాయాల్సి ఉంటుంది. రోగికి సంబంధించిన వివరాలు ఎలక్ట్రానిక్‌ డేటాలో నిక్షిప్తం చేస్తారు.

హైదరాబాద్‌: సికింద్రాబాద్‌ గాంధీ ఆసుపత్రిలో ఔట్‌ పేషెంట్‌ విభాగం సేవల సమయాన్ని పెంచుతూ రాష్ట్ర ప్రభుత్వం నిర్ణయం తీసుకుంది. ఇకపై ఓపీ విభాగం మధ్యాహ్నం 2 వరకు రోగులకు అందుబాటులో ఉంటుందని వైద్య, ఆరోగ్య శాఖ మంత్రి ఈటల రాజేందర్‌ శుక్రవారం ఆదేశాలు జారీ చేశారు. ప్రస్తుతం ఓపీ సేవలు ఉదయం 9 నుంచి మధ్యాహ్నం 12 వరకు మాత్రమే పనిచేస్తున్నాయి. ఇకపై మధ్యాహ్నం 2 వరకు కొనసాగుతాయి. అదే విధంగా ఉదయం 9 నుంచి మధ్యాహ్నం 2 వరకు ఉన్న డయాగ్నస్టిక్స్‌ సమయాన్ని కూడా సాయంత్రం 4 వరకు పొడిగించారు. దీంతో ఎంతో మంది పేదలకు వైద్య సేవలపరంగా ప్రయోజనం చేకూరనుంది.   సకాలంలో మెరుగైన వైద్య సేవలు..  గాంధీ ఆసుపత్రిలో రోగులకు సకాలంలో మెరుగైన వైద్య ఆరోగ్య సేవలను అందిస్తున్నామని సూపరింటెండెంట్‌ డాక్టర్‌ శ్రావణ్‌ కుమార్‌ చెప్పారు. స్పెషాలిటీ, సూపర్‌ స్పెషాలిటీ విభాగంలో నిత్యం ఎంతో మంది పేదలను అక్కున చేర్చుకొని వారి ప్రాణాలను కాపాడుతున్నామని తెలిపారు. తాజాగా ఓపీ సమయం పెంపుతో రోగుల సంఖ్య మరింత పెరుగుతుందని పేర్కొన్నారు. దీనికి అనుగుణంగా ఏర్పాట్లు చేస్తున్నామని అన్నారు. 

ఆరోగ్యపరంగా ధీమాగా ఉండాలంటే నేడు వైద్య బీమా ఉండాల్సిందే.  ఆస్పత్రి పాలైతే చికిత్స వ్యయాలను బీమా కంపెనీ చెల్లిస్తుంది. మరి ఆస్పత్రిలో చేరే అవసరం లేకుండా అవుట్‌ పేషెంట్‌గా తీసుకునే చికిత్సల వ్యయాల సంగతేంటి? ఎప్పుడైన ఆలోచించారా...? ఆస్పత్రిలో వైద్యుల కన్సల్టేషన్, వ్యాధి నిర్ధారణ పరీక్షలు, మందుల కొనుగోలు వ్యయాలు వీటికి ఎవరికి వారు విడిగా చెల్లించుకోవాలా..? లేక బీమా పాలసీలో కవరేజీ కావాలా? వైద్య బీమా పాలసీలో ఇది కూడా ముఖ్యమైన అంశమే.  చాలా కంపెనీలు రెగ్యులర్‌ హెల్త్‌ పాలసీలతోపాటు అవుట్‌ పేషెంట్‌ విభాగం (ఓపీడీ) నుంచి పొందే చికిత్సలకు కూడా కవరేజీని ఆఫర్‌ చేస్తున్నాయి. అయితే, ఓపీడీ కవరేజీని ఎంచుకునే ముందు వేటికి కవరేజీ లభిస్తుంది? ఎంత మేర గరిష్టంగా క్లెయిమ్‌కు అనుమతిస్తారు? తదితర అంశాలను తప్పక తెలుసుకోవాలి. వీటికి ప్రీమియం కూడా చాలా ఎక్కువే ఉంటుంది. ఈ విషయంలో ప్రతి ఒక్కరూ తెలుసుకోవాల్సిన అంశాలు ఇవి.  ఓపీడీ కవరేజీని విడిగా పాలసీ రూపంలో కంపెనీలు ఆఫర్‌ చేయడం లేదు. సాధారణ హెల్త్‌ పాలసీకి అనుబంధంగానే ఓపీడీ కవరేజీ తీసుకునేందుకు అవకాశం ఉంటుంది. స్టార్‌ హెల్త్‌ ఇన్సూరెన్స్, అపోలో మ్యునిక్, ఐసీఐసీఐ లాంబార్డ్, మ్యాక్స్‌ బూపా ఈ కవరేజీతో పాలసీలను ఆఫర్‌ చేస్తున్నాయి. సాధారణంగా ఓపీడీ కవరేజీలో డాక్టర్‌ కన్సల్టేషన్‌ ఫీజు, వైద్యులు రాసిన మందులకు అయ్యే వ్యయాలు, వైద్య పరీక్షల వ్యయాలకు కవరేజీ ఉంటుంది. వీటికి క్లెయిమ్‌ను ఆస్పత్రి ద్వారా క్యాష్‌లెస్‌ రూపంలో పొందొచ్చు. లేదా రీయింబర్స్‌మెంట్‌ విధానంలోనూ పొందేందుకు అవకాశం ఉంటుంది. అయితే, మొత్తం బీమాలో ఓపీడీ కవరేజీ ఎంత మేర గరిష్టంగా క్లెయిమ్‌ చేసుకోవచ్చన్నది ముఖ్యంగా తెలుసుకోవాలి. సాధారణంగా ఓపీడీ కవరేజీ చాలా పరిమితంగానే ఉండొచ్చు. వైద్య బీమా రూ.10 లక్షల కవరేజీకి తీసుకుంటే అందులో ఓపీడీ కవరేజీ గరిష్టంగా ఒక ఏడాదిలో రూ.10,000కే పరిమితం అవుతుంది. దీనికి మించి ఎంత ఖర్చు చేసినా కంపెనీ ఇవ్వదు. ఇక కొన్ని కన్సల్టేషన్‌లకు, మందుల కొనుగోలుకు మళ్లీ పరిమితులను కంపెనీలు విధిస్తుంటాయి. ఉదాహరణకు మ్యాక్స్‌ బూపా డాక్టర్‌ కన్సల్టేషన్‌ ఫీజుకు గరిష్టంగా రూ.600వరకే ఇస్తోంది. రూ.10 లక్షల పాలసీలో ఒక ఏడాదికి ఇలా గరిష్టంగా 10 డాక్టర్‌ కన్సల్టేషన్‌లకు అయిన వ్యయాలను చెల్లిస్తోంది. ఇతర ఓపీడీ ప్రయోజనాలు కూడా ఈ పాలసీలో ఉన్నాయి. అదే రూ.4 లక్షలకు పాలసీ తీసుకుంటే కన్సల్టేషన్‌లు నాలుగింటికే పరిమితం. డయాగ్నోస్టిక్‌ టెస్ట్‌లకు పరిమితి రూ.1,500.   ప్రీమియం  చిన్న చిన్న అనారోగ్య సమస్యలతో వైద్యుల వద్దకు వెళ్లడం సర్వ సాధారణం. అయితే, బీమా కంపెనీలు మాత్రం ఓపీడీ కవరేజీకి అధిక ప్రీమియం వసూలు చేస్తున్నాయి. ఓపీడీ కవరేజీ అన్నది వసూలు చేసే ప్రీమియానికి కాస్తంత ఎక్కువగా ఉండటాన్ని చాలా కంపెనీల్లో గమనించొచ్చు. స్టార్‌ హెల్త్‌ ఇన్సూరెన్స్‌ ఓపీడీ ప్రయోజనాలతో కూడిన రూ.4 లక్షల వైద్య బీమా పాలసీని 35 ఏళ్ల వయసున్న వ్యక్తి, అతని జీవిత భాగస్వామి, ఒక చిన్నారి (మొత్తం ముగ్గురు)కి కలిపి వార్షికంగా రూ.15,000 ప్రీమియంను వసూలు చేస్తోంది. ఇందులో ఓపీడీ క్లెయిమ్‌ బెనిఫిట్‌ పరిమితి ఏడాదికి ముగ్గురికీ కలిపి రూ.3,280 మాత్రమే. ఇదే కుటుంబం రూ.5 లక్షల హెల్త్‌ పాలసీని ఓపీడీ లేకుండా తీసుకుంటే వార్షిక ప్రీమియం రూ.11,915. అంటే రూ.3,280 ఓపీడీ కవరేజీ కోసం కంపెనీ రూ.3,085ను ప్రీమియంగా వసూలు చేస్తున్నట్టు అర్థమవుతోంది. మ్యాక్స్‌బూపా, ఐసీఐసీఐ లాంబార్డ్‌లోనూ ఇదే విధమైన పరిస్థితి ఉంది. రూ.10 లక్షల వైద్య బీమా పాలసీని ఓపీడీ కవరేజీతో తీసుకుంటే ప్రీమియం రూ.4,000–7,000 వరకు అదనంగా (ఓపీడీ లేని పాలసీ ప్రీమియంతో పోలిస్తే) ఉంది.   ప్రత్యామ్నాయాలూ ఆలోచించాలి..! ఓపీడీ కవరేజీ తీసుకుంటే అదనంగా చెల్లించే ప్రీమియానికి సెక్షన్‌ 80డీ కింద ఆదాయపన్ను మినహాయింపు ఉంది. ఓపీడీ కవరేజీ కింద కంపెనీల నుంచి పొందే రీయింబర్స్‌మెంట్‌కు పన్ను లేదు. అయితే, పన్ను ఆదా ఒక్కటే ఓపీడీ కవరేజీ తీసుకోవడానికి కారణం కారాదు. ఉదాహరణకు మధుమేహ సమస్యతో ఉన్న వారు, హైబీపీతో బాధపడుతున్న వారు తరచూ వైద్యుల వద్దకు వెళ్లాల్సి రావడం, వైద్య పరీక్షలు చేయించుకోవడం అవసరపడుతుంది. మందులు కూడా వాడాల్సి ఉంటుంది. ఈ తరహా వ్యక్తులకు బీమా కంపెనీల నుంచి తగినంత కవరేజీ లభించకపోవచ్చు. ఒకవేళ లభించినా ప్రీమియం అధికంగా ఉంటుంది. అందుకని ఓపీడీ కవరేజీ తీసుకోవడం కంటే అందుకు అయ్యే వ్యయాలను తట్టుకునేందుకు విడిగా ఆదా చేసుకోవడం మంచిది. ఇందుకోసం వేతనంలో కొంత మేర పక్కన పెడుతూ, ఆ మొత్తాన్ని లిక్విడ్‌ ఫండ్స్‌లో ఇన్వెస్ట్‌ చేసుకోవాలి. లేదంటే షార్ట్‌టర్మ్‌ ఫిక్స్‌డ్‌ డిపాజిట్లు లేదా రికరింగ్‌ డిపాజిట్లలో అయినా ఇన్వెస్ట్‌ చేసుకోవచ్చు. ఈ నిధి అవుట్‌ పేషెంట్‌ చికిత్సల రూపంలో ఎదురయ్యే అకస్మిక ఖర్చులను తట్టుకునేందుకు ఉపయోగపడుతుంది.

పట్నా: బిహార్‌లో మరో దారుణం. పట్నాలోని ఎయిమ్స్‌ ఆస్పత్రిలో ఓపీ కార్డు కావాలంటే క్యూలైన్‌లోనే రావాలని అధికారులు చెప్పడంతో ఆ కార్డు తెచ్చేలోగా ఓ చిన్నారి(9) ప్రాణాలు కోల్పోయింది. చివరికి ఆ అమ్మాయి చనిపోయిన తర్వాత మృతదేహాన్ని తీసుకెళ్లేందుకూ అంబులెన్స్‌ ఇవ్వడానికి కూడా ఆస్పత్రి సిబ్బందికి మనసొప్పలేదు. దీంతో వేరే గతిలేక ఆ తండ్రి తన కుమార్తె శవాన్ని 4 కిలోమీటర్ల పాటు భుజాన మోసుకుంటూ వెళ్లాడు. బిహార్‌లోని లక్షిసరై జిల్లా కజ్రా గ్రామానికి చెందిన రామ్‌ బాలక్‌ దంపతుల కుమార్తె రౌషణ్‌ కుమారి ఆరు రోజులుగా తీవ్ర జ్వరంతో బాధపడుతుండటంతో మంగళవారం ఎయిమ్స్‌ ఆస్పత్రికి తెచ్చారు. అక్కడి సిబ్బంది తొలుత ఔట్‌ పేషంట్‌(ఓపీ)కార్డు తేవాలని చెప్పారు. నిరుపేద కూలి అయిన రామ్‌ బాలక్‌ ఓపీ కార్డు కోసం యత్నిస్తుండగా.. కుమార్తె పరిస్థితి తీవ్రంగా ఉందని అతని భార్య తెలిపింది. దీంతో వెంటనే తనకు ఓపీ కార్డు మంజూరు చేయాలనీ, తన చిన్నారి పరిస్థితి తీవ్రంగా ఉందని కౌంటర్‌లో ఉన్న అధికారిని అభ్యర్థించారు. తనను ముందుకు వెళ్లనివ్వాలని లైన్లో ఉన్నవారిని వేడుకున్నారు. అయితే ఓపీ కార్డులిచ్చే ఆయన ససేమిరా అన్నారు.చివరికి ఓపీ కార్డు తీసుకుని వచ్చేసరికి రోషణ్‌ కుమారి ప్రాణాలు కోల్పోయింది. దీనికి తోడు చనిపోయిన కుమార్తె శవాన్ని ఇంటికి తీసుకెళ్లడానికి కనీసం అంబులెన్స్‌ ఏర్పాటు చేయాలని కోరిన రామ్‌బాలక్‌ విన్నపాన్నీ ఎయిమ్స్‌ అధికారులు తిరస్కరించారు. ప్రైవేటు వాహనం ఏర్పాటు చేసుకునే స్తోమత లేకపోవడంతో, రామ్‌ బాలక్‌ కూతురి శవాన్ని భుజాన వేసుకుని 4 కి.మీ. నడిచివెళ్లారు.


 ► ‘ఓపీ’క లేక సొమ్మసిల్లుతున్న రోగులు
 ► రిపోర్టు తీసుకొచ్చే సరికి వైద్యులుగాయబ్
 ► సాధారణ చికిత్సలకు తప్పని పడిగాపులు
 ► ఉస్మానియా సహా అన్ని ఆస్పత్రుల ఓపీలు కిటకిట
 
 సాక్షి, సిటీబ్యూరో: కార్పొరేట్‌ ఆస్పత్రుల్లో వైద్యం చేయించుకునే ఆర్థిక స్తోమత లేక ఆస్పత్రికి వచ్చిన జ్వర పీ డితులకు నేడు కనీస సూదిమందు కూడా వేయలేకపోతున్నారు. సుస్తీ చేసిన ఆస్పత్రికి ఎప్పటికపుడు చికిత్స చేసి గాడిలో పెట్టాల్సిన అధి కారులు దానిని పట్టించుకోవడమే మానేశారు. సాధారణ రోజుల్లో ఆస్పత్రి అవుట్‌ పేషంట్‌ విభాగానికి రోజుకు సగటున 600–700 మంది రో గులు వస్తుంటారు. ఇటీవల ఎడతెరపీ లేకుండా కురుస్తున్న వర్షాల కారణంగా ఓపీకి 2000 మందికి పైగా వస్తున్నారు. అయితే రోగుల సంఖ్యకు తగినన్ని ఓపీ కౌంటర్లు లేక పోవడంతో ఓపీ టికెట్లు తీసుకునేందుకు గంటల తరబడి క్యూలో నిలబడాల్సి రావడంతో తరచూ తొక్కిసలాటలు జరుగుతున్నాయి. దీనికితోడు జ్వరాలతో బాధపడుతున్న వారు క్యూ లైన్లలో నిరీక్షించ లేక సొమ్మసిల్లి పడిపోతున్నా, పట్టించుకునేవారు కరువయ్యారు.
 ఇటీవల రోగుల తాకిడి పెరగడంతో ఓపీ, ఫార్మసీల సమయాన్ని  సాయంత్రం 4 గంటల వరకు పొడిగించడమేగాక రోగుల రద్దీ దృష్ట్యా ఉస్మానియా నుంచి ఇద్దరు సీనియర్‌ వైద్యులను డిప్యూటేషన్‌పై ఇక్కడికి పంపినట్లు ప్రభుత్వం పేర్కొన్నా రోగుల అవసరాలు తీరడం లేదు. ఒ క్కో వైద్యుడు రోజుకు సగటున 150–200 మంది రోగులను చూడాల్సి వస్తుండటంతో ఇబ్బందులు ఎదురవుతున్నాయి. ఈఎన్‌టీ వైద్యుడు లేక పోవడంతో డిఫ్తీరియాతో బాధపడుతున్న వారికి సరైన వైద్యం అందడం లేదు. అత్యవసర పరిస్థితుల్లో వారిని ఉస్మానియాకు సిఫార్సు చేస్తున్నారు. ఇప్పటికే పరిస్థితి విషమించి 11 మంది డిఫ్తీరియాతో మృతి చెందడం విశేషం.
 అందరూ జూనియర్లేః
 నగరంలోని ఉస్మానియా, గాంధీ, సుల్తాన్‌బజార్, నిలోఫర్, పేట్లబురుజు, ఈఎన్‌టీ ఆస్పత్రుల్లో సగటున 2000–3000 మంది రోగులు వస్తుంటారు. ఉదయం ఏడు గంటలకు ఓపీ కౌంటర్‌కు చేరుకుని రెండు గంటలకుపైగా క్యూలైన్‌లో నిలబడి టోకెన్‌ తీసుకుని ఓపీకి వెళ్తే తీరా అక్కడ జూనియర్‌ డాక్టర్లు మాత్రమే అందుబాటులో ఉంటున్నారు. ఒక వేళ సీనియర్లు ఉన్నా...రక్త, మూత్ర పరీక్షలు,   వ్యాధి నిర్ధారణ పరీక్షలు చేయించుకుని వచ్చేలోగా వారు అక్కడినుంచి వెళ్లి పోతున్నారు. దీంతో సాధారణ చికిత్సల కోసం రెండు మూడు రోజులు ఆస్పత్రిలోనే పడిగాపులు కాయాల్సి వస్తుంది.


 కార్యాచరణ రూపొందిస్తున్నాం: మంత్రి లక్ష్మారెడ్డి
 బీబీనగర్ నిమ్స్‌లో ఓపీ విభాగం ప్రారంభం
 త్వరలో ఇన్ పేషంట్ విభాగాన్ని ప్రారంభిస్తామని వెల్లడి
  
 బీబీనగర్: రాష్ట్రంలోని నిరుపేద ప్రజలకు కార్పొరేట్ స్థాయి వైద్యం అందించే దిశగా ప్రభుత్వం అడుగులు వేస్తోందని, ఇందుకు కార్యాచరణ రూపొందిస్తున్నామని వైద్య ఆరోగ్యశాఖ మంత్రి లక్ష్మారెడ్డి వెల్లడించారు. నల్లగొండ జిల్లా బీబీనగర్ మండలం రంగాపురంలోని నిమ్స్ యూనివర్సిటీలో ఆదివారం ఔట్ పేషంట్ (ఓపీ) విభాగాన్ని మంత్రి జగదీశ్‌రెడ్డితో కలసి ఆయన ప్రారంభించారు. ఈ సందర్భంగా లక్ష్మారెడ్డి మాట్లాడుతూ..  ఔట్ పేషెంట్ విభాగంలో అన్ని రకాల ప్రాథమిక వైద్యం అందిస్తామని, అవసరమైన రోగులను అంబులెన్స్ ద్వారా హైదరాబాద్‌లోని నిమ్స్‌కు రెఫర్ చేయనున్నట్లు తెలిపారు.
 
 వైద్య రంగాన్ని అభివృద్ధి చేసే విషయమై ప్రత్యేక దృష్టి సారించామని, వచ్చే బడ్జెట్ సమావేశాల్లో ఈ రంగానికి అధిక ప్రాధాన్యమిస్తామని మంత్రి పేర్కొన్నారు. బీబీనగర్ నిమ్స్‌ను దశలవారీగా అభివృద్ధి చేస్తామన్నారు. త్వరలోనే ఇన్ పేషెంట్ విభాగాన్ని ప్రారంభించి హైదరాబాద్ నిమ్స్ తరహాలో దీన్ని తీర్చిదిద్దుతామన్నారు. ప్రస్తుతం నిమ్స్‌లో మెడిసిన్, సర్జరీ, ఆర్థోపెడిక్, గైనకాలజీ వైద్య సేవలు అందుబాటులో ఉంటాయన్నారు. కార్యక్రమంలో ఎంపీ బూర నర్సయ్యగౌడ్, ఎమ్మెల్యేలు కూసుకుంట్ల ప్రభాకర్‌రెడ్డి, శేఖర్‌రెడ్డి, ఎమ్మెల్సీ కర్నె ప్రభాకర్, నిమ్స్ డెరైక్టర్ మనోహర్‌రావు, డిప్యూటీ డెరైక్టర్ కేటీ రెడ్డి పాల్గొన్నారు.
  


 ♦ సూపర్ స్పెషాలిటీ ఆసుపత్రుల విముఖత
 ♦ మంత్రి లక్ష్మారెడ్డి సమక్షంలో చర్చలు విఫలం
 ♦ ముఖ్యమంత్రి దృష్టికి తీసుకెళ్లాలని నిర్ణయం
 ♦ సర్జికల్ ప్యాకేజీ 25 శాతం పెంపునకు సర్కారు సుముఖం
 ♦ నిమ్స్ తరహా మెడికల్ ప్యాకేజీ డిమాండ్‌పై తర్జనభర్జన
 ♦ రీయింబర్స్‌మెంట్‌ను ఆరునెలలు పొడిగిస్తూ ఉత్తర్వులు
  
  సాక్షి, హైదరాబాద్ : రాష్ట్ర ప్రభుత్వ ఉద్యోగులు, పింఛన్‌దారులకు ఔట్ పేషెంట్ (ఓపీ) ఉచిత సేవలు అందించడానికి సూపర్ స్పెషాలిటీ కార్పొరేట్ ఆసుపత్రి యాజమాన్యాలు ససేమిరా అంటున్నాయి. దీనిపై ప్రభుత్వానికి, కార్పొరేట్ ఆసుపత్రులకు మధ్య ప్రతిష్టంభన నెలకొంది. వైద్య ఆరోగ్యశాఖ మంత్రి లక్ష్మారెడ్డి శనివారం సూపర్ స్పెషాలిటీ ఆసుపత్రుల సంఘం (టీషా) ప్రతినిధులు, ఉద్యోగ సంఘాల నేతలతో సంయుక్తంగా జరిపిన చర్చలు విఫలమయ్యాయి. ఎటువంటి నిర్ణయాలు తీసుకోకుండానే సమావేశం అర్ధంతరంగా ముగిసింది.
 
 ఉద్యోగులకు ఓపీ సేవలు ఉచితంగా ఇవ్వాలని ప్రభుత్వం ప్రతిపాదించగా... ఎంతోకొంత ఫీజు వసూలు చేయాల్సిందేనని కార్పొరేట్ యాజమాన్యాలు తేల్చి చెప్పాయి. శస్త్రచికిత్సల ప్యాకేజీని 25 శాతం పెంచాలన్న డిమాండ్‌కు ప్రభుత్వం సుముఖంగా ఉంది. ఈ ఒక్క విషయంలోనే ఇరువర్గాల మధ్య ఏకాభిప్రాయం ఉంది. మెడికల్ ప్యాకేజీ నిమ్స్‌లో ఉన్నట్లుగా ఇవ్వాలని టీషా కోరగా, సర్కారు అంగీకరించలేదు. ఉదాహరణకు డెంగీ జ్వరం వంటివి వస్తే ఎన్నాళ్లకు నయమవుతుందో కచ్చితంగా చెప్పలేమని...
 
 కొందరికి తక్కువ రోజుల్లో నయమైతే, మరికొందరికి ఎక్కువ రోజులు పట్టొచ్చని... అందువల్ల ప్రస్తుత సాధారణ ప్యాకేజీ వల్ల నష్టపోతామని టీషా ప్రతినిధులు మంత్రికి వివరించారు. అందువల్ల నిమ్స్ తరహా ప్యాకేజీ ఆమోదయోగ్యమన్నారు. సాధ్యాసాధ్యాలపై వైద్య నిపుణులతో చర్చిస్తామని మంత్రి చెప్పారు. చర్చల్లో పురోగతి కనిపించకపోవడంతో మరోసారి సమావేశం కావాలని నిర్ణయించారు. వారి అభిప్రాయాలను ముఖ్యమంత్రి కేసీఆర్, ప్రభుత్వ ప్రధాన కార్యదర్శి రాజీవ్‌శర్మ దృష్టికి తీసుకెళ్లాలని మంత్రి లక్ష్మారెడ్డి చెప్పారు. ఓపీ సేవలు, వైద్య పరీక్షలకు అవసరమైతే ఉద్యోగులు ఎంతోకొంత ప్రీమియం చెల్లించడానికి సిద్ధంగా ఉన్నట్లు ప్రభుత్వం అంచనా వేస్తోంది. సమావేశంలో వైద్య ఆరోగ్యశాఖ ముఖ్య కార్యదర్శి సురేష్‌చందా, ఆరోగ్యశ్రీ సీఈవో జ్యోతిబుద్ధప్రకాష్, టీషా అధ్యక్షుడు గురువారెడ్డి, ఉద్యోగ సంఘాల నేతలు దేవీప్రసాద్, శ్రీనివాస్‌గౌడ్ తదితరులు పాల్గొన్నారు.  
 
  ఉద్యోగుల అవస్థలు
  ప్రధాన కార్పొరేట్ ఆసుపత్రులతో నగదు రహిత చికిత్సపై ప్రభుత్వం ఒప్పందం చేసుకోకపోవడంతో లక్షలాది మంది ఉద్యోగులు, పెన్షనర్లు అవస్థలు పడుతున్నారు. గుండె, కిడ్నీ, క్యాన్సర్ వంటి కీలకమైన చికిత్సల కోసం వారు ఆయా ప్రధాన ఆసుపత్రుల వద్దకే పరుగులు తీస్తున్నారు. నగదు రహిత చికిత్స లేకపోవడంతో ముందుగా డబ్బులు చెల్లించి చికిత్స చేయించుకుంటున్నారు. కొన్ని చికిత్సలకు తప్ప ఏ జబ్బుకూ కార్పొరేట్ ఆసుపత్రులు వేసిన బిల్లులను ప్రభుత్వం మంజూరు చేయడంలేదు.
 
 రూ. లక్ష బిల్లు అయితే రూ. 20వేల నుంచి 30 వేల వరకు మాత్రమే మంజూరు చేస్తోంది. దీనిపై ఉద్యోగులు తీవ్ర ఆవేదన వ్యక్తంచేస్తున్నారు. . ఆరోగ్య కార్డులు వచ్చినా తిప్పలు తప్పడం లేదంటున్నారు. ఇదిలాఉండగా, సూపర్ స్పెషాలిటీ ఆసుపత్రులు నగదు రహిత చికిత్సకు అంగీకరించకపోవడంతో ప్రభుత్వం ఆరోగ్యకార్డుల విధానాన్ని, రీయింబర్స్‌మెం ట్ పద్ధతినీ వచ్చే డిసెంబర్ 31వరకు పొడిగిస్తూ శనివారం ఉత్తర్వులు జారీచేసింది.


  ఔట్ పేషెంట్ ఉద్యోగుల విషయమై తెలంగాణ సర్కారు యోచన 
  సాక్షి, హైదరాబాద్: ఔట్ పేషెంట్‌గా వచ్చే ఉద్యోగుల ఉచిత వైద్యంపై తెలంగాణ సర్కారు కొత్త ప్రతిపాదనలు సిద్ధం చేస్తుంది. క్యాష్‌లెస్ ఆరోగ్య కార్డు ల ద్వారా నేరుగా కార్పొరేట్ వైద్యం చేయించుకోవచ్చని... అయితే ఔట్ పేషెంట్ల విషయంలో కొన్ని నిబంధనలను తయారు చేయాలని వైద్య ఆరోగ్యశాఖను తాజాగా ఆదేశించింది. ప్రతీ చిన్న దానికి నేరుగా కార్పొరేట్ ఆసుపత్రులకు వెళ్లడం కాకుండా ముందుగా ప్రభుత్వాసుపత్రుల్లో ఔట్‌పేషెంట్‌గా వెళ్లి అక్కడ రోగ నిర్ధారణ చేసుకొని... ఆ వైద్యుల సూచన మేరకు మాత్రమే కార్పొరేట్ ఆసుపత్రులకు వెళ్లాలన్న ప్రతిపాదన చేసే యోచనలో ఉంది. ఇటీవల కార్పొరేట్ ఆసుపత్రుల యాజ మాన్యాలతో జరిగిన సమావేశంలో వారి నుంచి వచ్చిన సూచనల మేరకు ఈ సవరణలు చేసేందుకు సర్కారు రంగం సిద్ధం చేసింది.
  
  అయితే ఈ ప్రతిపాదనపై కొన్ని ఉద్యోగ సంఘాలు మండిపడుతున్నాయి. ప్రభుత్వ నిర్ణ యం ఆచరణలో అనేక ఇబ్బందులకు గురిచేస్తుందని, ప్రతిపాదనను వెనక్కి తీసుకోవాలని  పీఆర్‌టీయూ రాష్ట్ర అధ్యక్షుడు వెంకటరెడ్డి డిమాండ్ చేస్తున్నారు. మరోవైపు ప్రభుత్వ ఆలోచనలో తప్పేమీ లేదని టీఎన్‌జీవో అధ్యక్షుడు దేవీప్రసాద్ అభిప్రాయపడ్డారు. వైద్య ఖర్చులపై మూడు ప్రత్యామ్నాయాలు: ఇదిలావుండగా వివిధ చికిత్సలకు ప్రభుత్వం ఇచ్చే ప్యాకేజీ తమకు ఏమాత్రం సరిపోదని కార్పొరేట్ ఆసుపత్రుల యాజమాన్యాలు అంటున్నాయి. దీనికి మూడు ప్రత్యామ్నాయాలను ఉద్యోగ సంఘాలు ప్రభుత్వానికి విన్నవించా యి. కేంద్ర ఉద్యోగులకు ఇచ్చే ప్యాకేజీని అమలు పరచడం ఒకటి కాగా... రెండోది నిమ్స్ ఆసుపత్రుల్లో మిలీని యం బ్లాక్ ప్యాకేజీని అమలు చేయడం రెండోది... బీమా సంస్థల ప్యాకేజీనైనా అమలు చేయడం మూడోది. వీటిలో తమకు ఏదైనా ఆమోదయోగ్యమేనని వారు అంటున్నారు.


 ఇప్పటిదాకా ఆస్పత్రిలో అడ్మిట్ అయిన పేషెంట్లకు మాత్రమే క్యాష్‌లెస్ సదుపాయాన్ని కల్పిస్తున్న బీమా కంపెనీలు ఇకపై ఔట్‌పేషెంట్లకు కూడా దీన్ని వర్తింపచేసే ఆలోచనలో ఉన్నాయి. ఇది అమల్లోకి వ చ్చిందంటే.. ఇకపై మీరు ఆస్పత్రిలో ఔట్‌పేషెంటు ట్రీట్‌మెంట్‌కి వెళ్లేటపుడు వెంట పర్సు తీసుకెళ్లక్కర్లేదు.
 
 చికిత్స ఖర్చులు బీమా కంపెనీ నేరుగా ఆస్పత్రికి చెల్లిస్తుంది. ఇప్పుడు కూడా కొన్ని కంపెనీలు ఇలాంటి సదుపాయం కల్పిస్తున్నా.. అది రీయింబర్స్‌మెంట్ పద్ధతిలోనే ఉంటోంది. అంటే.. ఖర్చులు పేషెంటు ముందు కట్టేసి.. ఆ తర్వాత క్లెయిమ్ చేసుకోవాల్సి ఉంటోంది.