వేలై ఇల్లా పట్టాదారి చిత్రం 2014లో తెరపైకి వచ్చి మంచి విజయాన్ని సాధించిన విషయం తెలిసిందే. నటుడు ధనుష్ 25వ చిత్రంగా తెరకెక్కిన ఆ చిత్రానికి వేల్‌రాజ్ దర్శకుడు. ఇటీవల త్వరలో ఒక ఫ్లాష్ న్యూస్‌ను వెల్లడించనున్నానని పేర్కొన్నారు. దీంతో అది ఏమై ఉంటుందనే ఆసక్తి పరిశ్రమ వర్గాల్లో సర్వత్రా నెలకొంది. ధనుష్ ఒక ఆంగ్ల చిత్రంలో నటించనున్నట్లు ప్రచారం జరుగుతున్న విషయం తెలిసిందే.అదే విధంగా ఆయన పవర్‌పాండి పేరుతో ఒక చిత్రాన్ని డెరైక్ట్ చేస్తున్న విషయం విధితమే. ఇక సూపర్‌స్టార్ రజనీకాంత్ హీరోగా భారీ చిత్రాన్ని నిర్మించనున్నారన్న ప్రచారం జరుగుతున్న విషయం తెలి సిందే. వీటిలో ఏదో ఒక విషయం గురించి ధనుష్ వెల్లడించే అవకాశం ఉంటుందని చాలా మంది ఊహించారు.
 
 అయితే ధనుష్ చెప్పినట్లు గానే బుధవారం ఒక ప్రకటనను తన ట్విట్టర్‌లో వెల్లడించారు. అందులో ఆయన పేర్కొంటూ వెలై ఇల్లా పట్టాదారి 2 చిత్రంలో నటించనున్నట్లు పేర్కొన్నారు. ఆ చిత్రాన్ని కలైపులి ఎస్.థాను, ధనుష్ వండర్‌బార్ ఫిలింస్ సంస్థలు సంయుక్తంగా నిర్మించనున్నాయి. ఈ చిత్రానికి రజనీకాంత్ రెండవ కూతురు
 సౌందర్యరజనీకాంత్ దర్శకత్వం వహించనున్నారు. ఈ చిత్రానికి ఇంతకు ముందు నిలావుక్కు ఎన్నడీ ఎన్‌మేల్ కోపం అన్న టైటిల్‌ను అనుకున్న విషయం తెలిసిందే. ఇప్పుడు వేలై ఇల్లా పట్టాదారి 2 చిత్ర షూటింగ్‌ను ఈ ఏడాది చివరిలో ప్రారంభించి వచ్చే ఏడాది చివరిలో విడుదల చేయడానికి సన్నాహాలు చేస్తున్నట్లు సమాచారం.


 ప్రముఖ కథానాయకులు వర్థమాన నాయికలతో నటించడానికి ఆసక్తి చూపిస్తున్నారా? ఈ ప్రశ్నకు అవుననే భావనే కలుగుతోంది. ఇళయదళపతి విజయ్ నుంచి సూర్య, విశాల్, శింబు అంటూ పలువురు హీరోలు యువ హీరోయిన్లవైపే మొగ్గు చూపుతున్నారు. తాజాగా నటుడు ధనుష్ కూడా వర్థమాన నటితో ఆడి పాడటానికి రెడీ అవుతున్నారు. నటుడిగా చాలా బిజీగా ఉన్న ధనుష్ దర్శకుడిగా మోగాఫోన్ పట్టి పవర్‌పాండి అనే చిత్రాన్ని తెరకెక్కిస్తున్న విషయం తెలిసిందే. ఇందులో రాజ్‌కిరణ్ ప్రధాన పాత్ర పోషిస్తున్నారు. ప్రసన్న, వినయ్, నటి ఛాయాసింగ్ తదితరులు ముఖ్య పాత్రలు పోషిస్తున్న ఈ చిత్రానికి వేల్‌రాజ్ ఛాయాగ్రహణ, షాన్‌రోల్డన్ సంగీతాన్ని అందిస్తున్నారు.
 కాగా ఈ చిత్రంలో రాజ్‌కిరణ్ చిన్ననాటి పాత్రలో ధనుష్ కనిపించనున్నారట. ఈ పాత్ర చిత్రంలో 30 నిమిషాలు మాత్రమే ఉంటుందని సమాచారం. బాల్య పాత్రలో ధనుష్‌తో ఆడి పాడటానికి నటి మడోనా సెబాస్టియన్‌ను ఎంపిక చేశారు. మలయాళ చిత్రం ప్రేమమ్‌తో తెరపైకి వచ్చిన మడోనా ఈ తరువాత కాదలుమ్ కడందుపోగుమ్ చిత్రంలో తమిళంలోనూ, ప్రేమమ్ రీమేక్‌తో తెలుగులోనూ, హ్యూమన్ ఆఫ్ సమ్‌లవ్ చిత్రంతో హాలీవుడ్‌కు పరిచయం అయ్యారన్నది గమనార్హం. ప్రస్తుతం విజయ్‌సేతుపతితో మరో సారి కవన్ చిత్రంలో రొమాన్స్ చేస్తున్నారు. తాజాగా ధనుష్‌తో నటించే అవకాశాన్ని అందుకున్నారన్న మాట. వీరి మధ్య సన్నివేశాలను త్వరలో చిత్రీకరించనున్నారని తెలిసింది.


  యంగ్ స్టార్ ధనుష్ చిత్రంలో హాలీవుడ్ నటుడు నటించనున్నారన్నది తాజా సమాచారం. చూడడానికి సన్నగా, చిన్నగా క నిపించినా ధనుష్ కరెంట్ తీగ లాంటి నటుడు. ఆయనలో చాలా పవర్ ఉంది. ఇప్పటికే కోలీవుడ్ దాటి బాలీవుడ్‌కి ఎగబాకారు. త్వరలోనే హాలీవుడ్ అంతు చూడబోతున్నారు. అందుకు ముందుగా ఒక తమిళ చిత్రంలో ప్రముఖ హాలీవుడ్ నటుడితో నటించడానికి రెడీ అవుతున్నారని తెలిసింది. ధనుష్ తొలిసారిగా ద్విపాత్రాభినయం చేసిన కొడి చిత్రం దీపావళికి తెరపైకి రానుంది.
  
   కాగా ప్రస్తుతం గౌతమ్‌మీనన్ దర్శకత్వంలో ఎన్నై నోక్కి పాయుమ్ తోటా, వెట్రిమారన్ దర్శకత్వంలో వడచెన్నై చిత్రాల్లో నటిస్తున్నారు. వీటితో పాటు రాజ్‌కిరణ్ ప్రధాన పాత్రలో స్వీయ దర్శకత్వంలో నిర్మిస్తున్న పవర్‌పాండి చిత్రంలోనూ కీలక పాత్ర పోషిస్తున్నట్లు టాక్. అదే విధంగా తన మరదలు సౌందర్యరజనీకాంత్ దర్శకత్వంలో నిలావుక్కు ఎన్ మేల్ ఎన్నడీ కోపం అనే చిత్రంలో నటించడానికి రెడీ అవుతున్నారు. ఇంతగా బిజీగా ఉన్న ధనుష్ మరో చిత్రానికీ పచ్చజెండా ఊపారు. అదే యువ దర్శకుడు కార్తీక్‌సుబ్బరాజ్ దర్శకత్వం వహించనున్న చిత్రం.
  
  ఈ చిత్రం ఫ్రీ ప్రొడక్షన్స్ కార్యక్రమాలు ఇప్పటికే మొదలయ్యాయి. దీని విశేషం ఏమిటంటే చిత్రం షూటింగ్ అధిక భాగం అమెరికాలో నిర్వహించనున్నారట. ఇందులో ధనుష్‌తో హాలీవుడ్ ప్రముఖ నటుడు అల్ పాసినో నటించే అవకాశం ఉన్నట్లు కోలీవుడ్ వర్గాల సమాచారం. అల్ పాసినో స్కర్‌ఫేస్ తదితర హాలీవుడ్ చిత్రాల ద్వారా ప్రాచుర్యం పొందారన్నది గమనార్హం. దీనికి సంబంధించిన అధికారిక ప్రకటన త్వరలోనే వెలువడే అవకాశం ఉన్నట్లు సమాచారం.