హైదరాబాద్, బిజినెస్‌ బ్యూరో: ఇంజనీరింగ్‌ పరికరాల తయారీ సంస్థ పెన్నార్‌ గ్రూప్‌ సెప్టెంబర్‌లో రూ.1,167 కోట్ల ఆర్డర్లను చేజిక్కించుకుంది. వీటిలో ఎన్‌టీపీసీ రెనివేబుల్‌ ఎనర్జీ నుంచి కూడా ఆర్డర్‌ పొందామని పెన్నార్‌ ఇండస్ట్రీస్‌ కార్పొరేట్‌ స్ట్రాటజీ వైస్‌ ప్రెసిడెంట్‌ సునీల్‌ కూరం వెల్లడించారు. ‘రాజస్తాన్‌లో ఎన్‌టీపీసీ 500 మెగావాట్ల ఏసీ/625 మెగావాట్ల డీసీ సోలార్‌ పీవీ ప్రాజెక్టు ఏర్పాటు చేస్తోంది. డిజైన్, సరఫరా, నిర్మాణం ప్రాతిపదికన పెన్నార్‌ ఇండస్ట్రీస్‌ 12.5 నెలల్లో ఈ ప్రాజెక్టును పూర్తి చేయాల్సి ఉంటుంది.  మూడేళ్లపాటు కార్యకలాపాలు, నిర్వహణ బాధ్యతలు సంస్థ స్వీకరిస్తుంది’ అని వివరించారు. రిలయన్స్, టీసీఐ లిమిటెడ్, థెర్మాక్స్, టాటా నుంచి సైతం పెన్నార్‌ గ్రూప్‌ కంపెనీలు ఆర్డర్లను పొందాయి.  చదవండి: బ్యాంక్‌ కస్టమర్లకు వార్నింగ్‌.. ఆ యాప్‌లు ఉంటే మీ ఖాతా ఖాళీ,డిలీట్‌ చేసేయండి!

హైదరాబాద్‌: పెన్నార్‌ ఇండస్ట్రీస్‌లో పెన్నార్‌అనుబంధ కంపెనీల విలీనానికి నేషనల్‌ కంపెనీ లా ట్రైబ్యునల్‌(ఎన్‌సీఎల్‌టీ) ఆమోదం లభించింది. పెన్నార్‌ ఇంజినీర్డ్‌ బిల్డింగ్‌ సిస్టమ్స్‌(పెబ్స్‌), పెన్నార్‌ ఎన్విరో లిమిటెడ్‌లు పెన్నార్‌ ఇండస్ట్రీస్‌లో విలీనమవుతాయి. విలీన స్కీమ్‌ ప్రకారం, ప్రతి 13 పెబ్స్‌ షేర్లకు 23 పెన్నార్‌ ఇండస్ట్రీస్‌ షేర్లు లభిస్తాయి. అలాగే ప్రతి ఒక్క పెన్నార్‌ ఎన్విరో షేర్‌కు ఒక పెన్నార్‌ ఇండస్ట్రీస్‌ షేర్‌ లభిస్తుంది. విలీన స్కీమ్‌కు అప్పాయింటెడ్‌ డేట్‌ను గత ఏడాది ఏప్రిల్‌ 1గా ఎన్‌సీఎల్‌టీ ఆమోదించింది. వాటాదారులకు కొత్త షేర్లు రావడానికి 2–3 నెలల సమయం పడుతుందని అంచనా.  విలీనం కారణంగా వ్యయాలు కలసివస్తాయని, నిధుల వినియోగం మెరుగుపడుతుందని కంపెనీ వైస్‌–ప్రెసిడెంట్‌ (కార్పొరేట్‌ స్ట్రాటజీ) కె.ఎమ్‌. సునీల్‌ పేర్కొన్నారు. త్వరలో రికార్డ్‌ డేట్‌ను ప్రకటిస్తామని వెల్లడించారు.  అనుబంధ కంపెనీల విలీనానికి ఎన్‌సీఎల్‌టీ ఆమోదం లభించిన నేపథ్యంలో పెన్నార్‌ ఇండస్ట్రీస్‌ షేర్‌ 1.7 శాతం నష్టంతో రూ.31.35 వద్ద ముగిసింది. పెబ్స్‌ షేర్‌ 4.4 శాతం నష్టంతో రూ. 52.15వద్దకు చేరింది.  

హైదరాబాద్, బిజినెస్‌ బ్యూరో: ఉక్కు ఉత్పత్తుల కంపెనీ ఇమేజ్‌ నుంచి బయటపడి పూర్తిస్థాయి ఇంజనీరింగ్, ఇంజనీరింగ్‌ సేవల కంపెనీగా ఎదుగుతున్న హైదరాబాదీ గ్రూపు పెన్నార్‌...  వాటిలో విస్తరణకూ సన్నద్ధమవుతోంది. సౌర విద్యుత్తుకు సంబంధించి ఇప్పటికే మాడ్యూల్‌ స్ట్రక్చర్ల తయారీలో ఉండగా... వీటికున్న డిమాండ్‌ దృష్ట్యా కొత్త ప్లాంటు దిశగా కసరత్తు చేస్తోంది. ప్రస్తుతం ఈ గ్రూపులో లిస్టెడ్‌ కంపెనీలు పెన్నార్‌ ఇండస్ట్రీస్, పెబ్స్‌ పెన్నార్‌ ఉండగా... పెన్నార్‌ ఎన్విరో, పెన్నార్‌ రెన్యూవబుల్స్, పెన్నార్‌ గ్లోబల్‌ వంటి అన్‌లిస్టెడ్‌ సంస్థలూ ఉన్నాయి. పెబ్స్‌ పెన్నార్‌ – పెన్నార్‌ ఇండస్ట్రీస్‌ సంయుక్తంగా ఏడాది కిందట అమెరికాలోని హూస్టన్‌లో  ఆరంభించిన ఇంజనీరింగ్‌ డిజైన్‌ సేవల సంస్థ పెన్నార్‌ గ్లోబల్‌ తొలి ఏడాదే రూ.36 కోట్ల టర్నోవర్‌ నమోదు చేసింది. ఇంజనీరింగ్‌ డిజైన్‌ సేవలు అందించటంతో పాటు తమకు హైడ్రాలిక్స్, ప్రెసిషన్‌ కాంపొనెంట్స్, స్టీల్‌ ట్యూబ్స్‌ తయారీ సామర్థ్యం కూడా ఉండటంతో ఇవన్నీ ఇంజనీరింగ్‌ విభాగంలో రాణించడానికి ఉపకరిస్తాయని కంపెనీ అంచనా వేస్తోంది. తద్వారా కంపెనీ ఆదాయంలో స్టీల్‌ స్ట్రిప్స్‌ వాటా కన్నా ఇతర విభాగాల వాటా పెరిగేలా ఫోకస్‌ చేస్తున్నట్లు గ్రూపు వైస్‌ ఛైర్మన్, ఎండీ ఆదిత్య రావు ‘సాక్షి’ బిజినెస్‌ బ్యూరో ప్రతినిధితో చెప్పారు. ప్రస్తుతం కంపెనీ ఆదాయంలో స్టీల్‌ స్ట్రిప్స్‌ వాటా 25 శాతానికన్నా తక్కువే ఉంది. అయితే మొత్తంగా స్టీలు ఉత్పత్తుల ఆదాయం 50 శాతం వరకూ ఉంది. దీన్లో హైడ్రాలిక్స్, ఆటో పరిశ్రమకు అవసరమైన ప్రెసిషన్‌ కాంపొనెంట్స్, స్టీల్‌ ట్యూబ్స్‌ వంటివీ ఉన్నాయి. ఎన్విరో విభాగానికి కొత్త క్లయింట్ల ద్వారా చెప్పుకోదగ్గ ఆర్డర్లు వస్తున్నట్లు కంపెనీ కమ్యూనికేషన్స్‌ విభాగం వైస్‌ ప్రెసిడెంట్‌గా ఇటీవలే బాధ్యతలు తీసుకున్న కె.ఎం.సునీల్‌ ‘సాక్షి’తో చెప్పారు.   ఒకే కంపెనీ... ఒకే కార్యాలయం!  గ్రూపు కార్యకలాపాలన్నీ ఒకదానితో ఒకటి ముడిపడి ఉండటం... ఇంజనీరింగ్‌ సేవల నుంచి ఉత్పత్తుల తయారీ వరకూ గ్రూపు కంపెనీలే చేపడుతుండటంతో విడిగా ఉన్న లిస్టెడ్‌ కంపెనీలు రెండింటినీ విలీనం చేయటానికి ఆయా బోర్డులు ఇదివరకే ఓకే చేశాయి. ఇంకా కొన్ని రెగ్యులరేటరీ అనుమతులు రావాల్సి ఉంది. దీంతో పాటు ప్రస్తుతం హైదరాబాద్‌లోని మాదాపూర్‌లో ఉన్న కంపెనీ ప్రధాన కార్యాలయాన్ని శంషాబాద్‌లోని జీఎంఆర్‌ ఏరో సిటీలోకి మార్చనున్నారు. హైదరాబాద్‌లో దాదాపు 4 చోట్ల గ్రూపు కంపెనీలకు ప్లాంట్లు ఉండటంతో తయారీ కార్మికులతో పాటు పలువురు ఉద్యోగులూ అక్కడకు వెళ్లి పనిచేయాల్సి వస్తోంది. మొత్తం ఉద్యోగులందరినీ ఒకే చోటికి చేర్చే క్రమంలో భాగంగా ఏరో సిటీలో జీఎంఆర్‌ నుంచి ఒక టవర్‌ను కంపెనీ లీజుకు తీసుకుంది. అయితే కాంట్రాక్టు సంస్థ హోదాలో దాని నిర్మాణ బాధ్యతలనూ పెన్నారే చేపడుతోంది. 1.15 లక్షల చదరపుటడుగుల ఈ కార్యాలయంలోకి మారటానికి ఏడాది వ్యవధి పట్టొచ్చని, ఇది అందుబాటులోకి వచ్చాక సమన్వయం మరింత పెరుగుతుందని కంపెనీ చెబుతోంది.  క్యూ–1లోనూ ఆశించిన స్థాయి వృద్ధి!  గతేడాది సంస్థ కన్సాలిడేటెడ్‌ ఆదాయం ఆదాయం రూ.1,550 కోట్ల నుంచి నుంచి 1784 కోట్లకు, నికరలాభం రూ.34.6 కోట్ల నుంచి రూ.70.4 కోట్లకు పెరిగాయి. ఎబిటా 26% పెరిగి రూ.162 కోట్ల నుంచి 221 కోట్లకు చేరగా.. ఎబిటా మార్జిన్లు సైతం 10.5% నుంచి 12.4%కి ఎగబాకాయి. కంపెనీ తొలి త్రైమా సికం ఫలితాలింకా వెలువడాల్సి ఉంది. ఇవి కూడా తమ అంచనాలకు తగ్గట్టే ఉంటాయని, కొన్నేళ్లుగా కొనసాగిస్తున్న వృద్ధి రేటు ఈ త్రైమాసికంలోనూ అందుకుంటామని కంపెనీ ధీమా వ్యక్తం చేస్తోంది.


 హైదరాబాద్, బిజినెస్ బ్యూరో: గత ఆర్థిక సంవత్సరం నాలుగో త్రైమాసికంలో పెన్నార్ ఇండస్ట్రీస్ నికర లాభం స్వల్ప పెరుగుదలతో రూ. 16.26 కోట్లుగా (కన్సాలిడేటెడ్) నమోదైంది. అంతక్రితం ఆర్థిక సంవత్సరం క్యూ4లో ఇది రూ. 16.02 కోట్లు. ఇక తాజాగా నికర ఆదాయం రూ. 367 కోట్లు నుంచి రూ. 351 కోట్లకు తగ్గింది. మరోవైపు పూర్తి ఆర్థిక సంవత్సరానికి ఆదాయం రూ. 1267 కోట్లు  నుంచి రూ. 1,307 కోట్లకు పెరగ్గా, లాభం రూ. 36 కోట్ల నుంచి రూ. 44 కోట్లకు పెరిగింది.


 
   కొత్త ఆర్డర్లతో ఉత్సాహం  
 
   నెలలో 27% ఎగసిన షేరు
 
 సాక్షి ప్రత్యేక ప్రతినిధి, హైదరాబాద్: పెన్నార్ ఇండస్ట్రీస్ దాని అనుబంధ సంస్థలు తాజాగా రూ. 105 కోట్లు విలువ చేసే కొత్త ఆర్డర్లు చేజిక్కించుకోవటంతో  బీఎస్‌ఈలో షేర్ ధర 3.40 శాతం పెరిగి రూ. 36.50 వద్ద క్లోజైంది. మంగళవారం జరిగిన ట్రేడింగ్‌లో షేర్ గరిష్ట ధర రూ. 36.85 కాగా కనిష్ట ధర రూ 34.85గా నమోదైంది. గత నెల రోజులుగా షేర్ ధర 27.44 శాతం పెరిగింది. అదే సమయంలో బీఎస్‌ఈ సెన్సెక్స్ కేవలం 4.43 శాతం వృద్ధిని నమోదు చేసింది. గత మూడు నెలలుగా పెన్నార్ షేర్ ధర 75.62 శాతం వృద్ధిని నమోదు చేయగా సెన్సెక్స్ కేవలం 15.5 శాతం మాత్రమే పెరిగింది.
  
 అంటే  మార్కెట్లో సెన్సెక్స్ కన్నా ఐదింతలు జోరును పెన్నార్ షేర్ ప్రదర్శించిందన్న మాట. పెన్నార్ ఇండస్ట్రీస్‌తో పాటు సంస్థ అనుబంధ సంస్థలైన పెన్నార్ ఇంజినీర్డ్ బిల్డింగ్ సిస్టమ్స్, పెన్నార్ ఎన్విరో లిమిటెడ్ సంస్థలకు అల్ట్రాటెక్, రిలయన్స్ ఇండస్ట్రీస్, అభిర్ ఇన్‌ఫ్రా, ఇంటెగ్రల్ కోచ్ ఫ్యాక్టరీ, బీజీఆర్ ఎనర్జీ, జేఎస్‌డబ్ల్యూ, ఎస్‌ఆర్‌కే ఇంజినీరింగ్‌ల నుండి తాజా ఆర్డర్లు లభించినట్లు సంస్థ వైస్ చైర్మన్ అండ్ మేనేజింగ్ డెరైక్టర్ ఆదిత్య రావు తెలిపారు. సోలార్ మాడ్యూల్ మౌంటింగ్ సిస్టమ్స్ వ్యాపారంలో మంచి వృద్ధి అవకాశాలు ఉన్నట్లు ఆయన పేర్కొన్నారు.
  
 బైబ్యాక్ ఆఫర్...: పెన్నార్ సంస్ధ 40 లక్షల ఈక్విటీ షేర్లను  ఒక్కో షేర్‌ను రూ. 40 చొప్పున బైబ్యాక్ చేసేందుకు గతేడాది జూన్‌లో ఇచ్చిన ఆఫర్ ఈ నెల 9న ముగిసిందని కంపెనీ తెలిపింది. బైబ్యాక్ ద్వారా సంస్థ 16,74,486 షేర్లను కొనుగోలు చేసింది. పెన్నార్ ఇండస్ట్రీస్  ఈక్విటీ క్యాపిటల్ రూ. 60.24 కోట్లు. షేర్ ముఖ విలువ రూ. 5.