11 మంది అరెస్ట్
 
 గచ్చిబౌలి: మాదాపూర్‌లోని ప్లే బాయ్ క్లబ్‌పై బీజేవైఎం కార్యకర్తలు దాడికి యత్నించారు. హెచ్‌ఐసీసీలోకి చొచ్చుకుపోయి ఫర్నిచర్ ధ్వంసం చేశారు. బీజేవైఎం రంగారెడ్డి జిల్లా అధ్యక్షుడు బొక్క బాల్‌రెడ్డి, ప్రధాన కార్యదర్శి హరిబాబుల ఆధ్వర్యంలో శనివారం రాత్రి 9 గంటల సమయంలో కార్లలో హెచ్‌ఐసీసీ సెక్యూరిటీ కళ్లుగప్పి లోపలికి ప్రవేశించారు. బౌన్సర్‌లు, సెక్యూరిటీ సిబ్బంది ఉన్నప్పటికీ చొచ్చుకొని ఒక్కసారిగా లోపలికి వెళ్లారు.
 
 రెండు టీపాయిలను ధ్వంసం చేశారు. అనంతరం అక్కడే బైఠాయించి సీఎం డౌన్ డౌన్ అంటూ నినాదాలు చేశారు. నోవాటెల్ సమీపంలో సైబర్‌సిటీ కన్వెన్షన్ సెంటర్‌లో ఓ వివాహనికి హాజరైన తెలంగాణ రాష్ట్ర హోంమంత్రి నాయిని నర్సింహారెడ్డి బందో బస్తులో ఉన్న మాదాపూర్ పోలీసులు హుటాహుటిన హెచ్‌ఐసీసీకి చేరుకుని నిరసనకారులను అరెస్ట్ చేసి రాయదుర్గం పోలీస్ స్టేషన్‌కు తరలించారు.
  
 క్లబ్‌ను మూసి వేయాలి
  
 భారతీయ సంస్కృతిని కించ పరిచేవిధంగా నడిచే ప్లేబాయ్ క్లబ్‌ను వెంటనే మూసివేయాలని బీజేవైఎం రంగారెడ్డి జిల్లా అధ్యక్ష, ప్రధాన కార్యదర్శులు బాల్‌రెడ్డి, హరికృష్ణలు డిమాండ్ చేశారు. ఇలాంటి క్లబ్‌లకు అనుమతిస్తే యువత పెడదారి పడుతుందని ఆవేదన వ్యక్తం చేశారు. ప్లే బాయ్ క్లబ్ యాజమాన్యాన్ని వెంటనే అరెస్ట్ చే యాలని వారు డిమాండ్ చేశారు.
  
 నిబంధనలు ఉల్లంఘిస్తే చర్యలు: ఏసీపీ
  
 నగరంలో ఉన్న పబ్‌లకు వర్తించిన నిబంధనలు ప్లే బాయ్ క్లబ్‌కు వర్తిస్తాయని మాదాపూర్ ఏసీపీ శ్రీధర్ తెలిపారు. అర్థ నగ్న, అశ్లీల నృత్యాలను సహించమని స్పష్టం చేశారు.
  


 హైదరాబాద్ : అమెరికాకు చెందిన అంతర్జాతీయ సంస్థ... అశ్లీలానికి కేరాఫ్ అడ్రస్ ప్లేబాయ్ గ్రూప్ హైదరాబాద్‌లో అడుగుపెడుతోంది. ఈ సంస్థ ఏర్పాటు చేస్తున్న పబ్‌ను శుక్రవారం నగరంలోని ఓ ప్రముఖ హోటల్‌లో లాంఛనంగా ప్రారంభించడానికి సన్నాహాలు చేస్తోంది. ప్లేబాయ్ గ్రూప్ వాస్తవానికి 2012లోనే దేశంలోకి అడుగుపెట్టాలని ప్రయత్నించింది. గోవాతో పాటు ఢిల్లీ, ముంబైలలో క్లబ్బులు, పబ్‌ల ఏర్పాటుకు అనుమతి కోరుతూ దరఖాస్తు చేసుకుంది. ఆ సమయంలోనే అశ్లీలానికి తావు లేకుండా వీటిని నిర్వహిస్తామంటూ హామీ ఇచ్చినా అనుమతి లభించలేదు.
 
 గోవాలోని క్యాండోలిమ్ బీచ్ సమీపంలో 22 వేల చదరపు అడుగుల సువిశాల ఓపెన్ ఎయిర్ క్లబ్ ఏర్పాటుకు అక్కడి సర్కారుకు గత ఏడాది దరఖాస్తు చేసుకుంది. అత్యంత విలాసవంతమైన ప్రాంతంగా పేరున్న ఆ నగరంలోనూ దీని ఏర్పాటుకు అక్కడి ప్రభుత్వం అనుమతించలేదు. ప్లేబాయ్ పేరుతో ఏర్పాటుకు పరిస్థితులు అనుకూలించకపోవడంతో చివరకు సన్‌షైన్ రిసార్ట్స్ పేరుతో గోవాలో ఏర్పాటైంది. ఇప్పుడు ప్లేబాయ్ సంస్థ కన్ను హైదరాబాద్‌పై పడింది. పబ్ ఏర్పాటుకు అనుమతి లభించడంతో శుక్రవారం నగర శివారులోని ఓ ప్రముఖ హోటల్‌లో లాంఛనంగా ప్రారంభించేందుకు ప్లేబాయ్ గ్రూప్ సన్నాహాలు చేస్తోంది.
 
 ఈ అంశంలో కొసమెరుపు ఏమిటంటే... ప్లేబాయ్ పబ్ ప్రారంభ కార్యక్రమానికి హాజరుకావడానికి సిటీలో పని చేస్తున్న అనేక విభాగాలకు చెందిన ఉన్నతాధికారులు ముమ్మరంగా ప్రయత్నాలు చేయడం. ఈ నేపథ్యంలోనే సంస్థకు చెందిన ఆహ్వానపత్రాలతో పాటు వీఐపీ పాస్‌లకూ భారీ డిమాండ్ ఏర్పడిందని సమాచారం. అయితే నగరంలో ఏర్పాటు కానున్న   పబ్‌లో ఎలాంటి అశ్లీలానికీ తావు లేకుండా నిబంధనలు విధించినట్లు తెలిసింది.