సాక్షి, మహబూబ్‌నగర్‌ : టీఆర్టీ ద్వారా ఉద్యోగాలకు అర్హత సాధించిన ఉపాధ్యాయులు ఎంతో కాలంగా ఎదురు చూస్తున్న భర్తీకి ప్రభుత్వం ఓకే చెప్పిడంతో అభ్యర్థులు ఆనందం వ్యక్తం చేస్తున్నారు. 2017నవంబర్‌లో పోస్టులు భర్తీ చేసేందుకు నోటిఫికేషన్‌ విడుదల చేసి రెండేళ్లు పూర్తయింది. భర్తీ ఉత్తర్వులు అందకపోవడంతో అభ్యర్థులు అనేక విధాలుగా ఉద్యమాలు చేశారు. ఉమ్మడి మహబూబ్‌నగర్‌ జిల్లాలో 1,979 ఉపాద్యాయ పోస్టుల  గాను 2018 ఫిబ్రవరీ, మార్చిలో ఆన్‌లైన్, ఆఫ్‌లైన్‌ పద్ధతిలో నిర్వహించన పరీక్షకు  దాదాపు 50వేల మందికి పైగా అభ్యర్థులు టీఆర్టీ పరీక్ష రాశారు. పోస్టుల భర్తీకి ప్రభుత్వం అనుమతి అనందంగా ఉన్నా సీనియర్‌ ఉపాధ్యాయులకు ఒకింత అసంతృప్తి వ్యక్తం చేస్తున్నారు. ప్రస్తుతం ప్రభుత్వం అటువంటి చర్యలు తీసుకోకుండానే నేరుగా పోస్టులు భర్తీ చేయడం సరికాదని ఉపాధ్యాయ సంఘాల నాయకులు పేర్కొంటున్నారు.   1,979 పోస్టుల భర్తీకి కసరత్తు  టీఆర్టీ నోటిఫికేషన్‌ ద్వారా ఉపాధ్యాయ పోస్టుల భర్తీ  ఉమ్మడి మహబూబ్‌నగర్‌ జిల్లా వ్యాప్తంగా జరగనుంది. ఇందుకు సంబందించిన ఉత్తర్వులను ప్రభుత్వం జారీ చేసింది. కలెక్టర్‌ కమిటీ చైర్మన్‌గా, జాయింట్‌ కలెక్టర్‌ను వైస్‌ చైర్మన్‌గా, డీఈఓను కార్యదర్శిగా నియమించారు. ఈ కమిటీ పాత జిల్లాలో ఎంపికైన అభ్యర్థుల రోస్టర్‌ పాయింట్లకు సంబంధించిన వివరాలను విద్యాశాఖకు అందిస్తారు. పాత, కొత్త జిల్లాల వారీగా ఖాళీలు, సబ్జెక్టు, మాధ్యమం, ప్రాంతాల వారీగా వివరాలు సేకరించాల్సి ఉంది. విద్యార్థుల సంఖ్య ఆధారంగా ఉపాధ్యాయులను నియమిస్తూ కమిటీ ఉత్తర్వులు ఇవ్వాల్సి ఉంటుంది.  వివిధ సబ్జెక్టుల వారీగా 1,979 పోస్టులను ఖాళీలకు భర్తీ ప్రక్రియ చేపట్టనున్నారు. 1979 ఎస్జీటీ, 1400 ఎస్టీటీ పోస్టులు ఇవ్వనుండగా, మిగతావి వివిధ సబ్జెక్టులకు సంబంధించి స్కూల్‌ అసిస్టెంట్‌ పోస్టులు ఇవ్వనున్నారు. ప్రమోషన్లు కల్పించాల్సిందే  గత డీఎస్సీలో సీనియర్ల ఉపాధ్యాయులకు ప్రమోషన్లు బదిలీలు ఇచ్చిన తర్వాత మాత్రమే నూనతంగా వచ్చిన ఉపాధ్యాయులకు పోస్టింగ్‌లు ఇచ్చారు. ప్రస్తుతం ప్రభుత్వం అలాంటి ప్రక్రియ చేపట్టాల్సిన అవసరం ఉంది. కనీసం అడ్‌హాక్‌ పద్ధతిలో అయినా పోస్టింగ్‌లు ఇచ్చి, విద్యాసంవత్సరం ప్రారంభంలో వారిని రివర్ట్‌ చేస్తే ఇబ్బంది ఉండదు. లేకపోతే సీనియర్‌ ఉపాధ్యాయులు నష్టపోయే అవకాశం ఉంది. -గట్టు వెంకట్‌రెడ్డి,పీఆర్‌టీయు జిల్లా అధ్యక్షుడు న్యాయమైన సమస్యలు పరిష్కరించాలి  ప్రస్తుతం ప్రభుత్వం టీఆర్టీ అభ్యర్థుల అభ్యర్థుల భర్తీ ప్రక్రియను ఎటువంటి న్యాయపరైమన ఇబ్బందులు రాకుండా భర్తి చేస్తే బాగుటుంది. మొదటిగా సీనియర్‌ ఉపాధ్యాయులకు ప్రమోషన్లు, బదిలీలు ఇవ్వాలి. అదికూడా పాత జిల్లాల ప్రకారమే ఇస్తే ఇబ్బందులు ఉండవు. కానీ నూతనంగా ఏర్పడిన జిల్లాల వారీగా ఇస్తే సమస్యలు ఎదురవుతాయి. పాత జిల్లాల వారీగా టీఆర్టీ నోటిఫికేషన్‌ ఇచ్చి, ప్రమోషన్లు మాత్ర కొత్త జిల్లాల ప్రకారం ఇవ్వడం సరికాదు.  – దుంకుడు శ్రీనివాస్, టీపీఆర్టీయూ జిల్లా అధ్యక్షుడు      

పదిహేనేళ్ల నిరీక్షణకు తెరపడింది. దశాబ్దంన్నర కాలంగా పదోన్నతులకు నోచుకోకుండా ప్రాథమికోన్నత, ఉన్నత పాఠశాలల్లో గ్రేడ్‌–2 హోదాలో పనిచేస్తున్న భాషా పండితులకు, పీఈటీలకు తాజాగా ప్రభుత్వం తీసుకున్న నిర్ణయంతో స్కూల్‌ అసిస్టెంట్‌ హోదా దక్కనుంది. అయితే ఎస్‌జీటీలకు పదోన్నతులు కల్పించకపోవడంపై వారు నిరసన వ్యక్తం చేస్తున్నారు. ఉపాధ్యాయ ఎమ్మెల్సీ ఎన్నికల్లో ఎస్‌జీటీలకు ఓటు హక్కు లేనందునే ప్రభుత్వం అన్యాయం చేస్తోందని విమర్శిస్తున్నారు.  కరీంనగర్‌ఎడ్యుకేషన్‌: గత కొంత కాలంగా పదో న్నతులు కల్పించాలని వివిధ తీరుల్లో ఉద్యమాలు చేసిన భాషా పండితులకు ఊరట లభించింది. 2012 సంవత్సరంలో రాష్ట్రవ్యాప్తంగా ఉన్న భాషా పండితులు హైదరాబాద్‌లోని ఇందిరాపార్క్‌ వద్ద ఎనిమిది రోజుల పాటు నిరాహార దీక్షలు చేస్తే స్పందించిన ప్రభుత్వం నాడు ఉపాధ్యాయ సంఘాల నాయకులు, ఉపాధ్యాయ ఎమ్మెల్సీలతో చర్చలు జరిపింది. జీవో నెం.17, 18ను తీసుకవచ్చి పదోన్నతులకు పచ్చజెండా ఊపడంతో భాషా పండితులు దీక్షను విరమించారు. ఇంతలోనే సదరు జీవోలపై వేరే ఉపాధ్యాయ సంఘాలు కోర్టుకు వెళ్లడంతో భాషా పండితుల పదోన్నతుల సమస్య మళ్లీ మొదటికి వచ్చింది. 15 ఏళ్లుగా వివాదాల పేరిట భాషా పండితులకు పదోన్నతులు ఇవ్వకపోవడంతో పదోన్నతుల ప్రక్రియ, వేతన వ్యత్యాసాలు తదితర లాభాలన్నింటిని కోల్పోయి ద్యోగ విరమణ పొందుతున్నారు. ఈ అంశంపై భాషా పండితులు తీవ్ర ఆవేదనకు గురవుతూ ప్రభుత్వాల దృష్టికి తీసుకెళ్లారు. గతేడాది హైదరాబాద్‌లో జరిగిన ప్రపంచ తెలుగు మహాసభల్లో భాషా పండితులను అప్‌గ్రేడ్‌ చేస్తామని, త్వరలోనే శుభవార్త విననున్నారని సీఎం ప్రకటించడంతో వారు హర్షం వ్యక్తం చేశారు. అయినా ప్రభుత్వం మళ్లీ భాషా పండితుల పట్ల వివక్షత చూపుతూ ఏడాదిగా కాలయాపన చేయడంతో చేసేదేమీ లేక  నిరాశకు గురయ్యారు. తాజాగా ఉపాధ్యాయ ఎమ్మెల్సీలు, సీఎంఓ ప్రత్యేక అధికారితో సమావేశమైన సీఎం కేసీఆర్‌ భాషా పండితుల దస్త్రాన్ని తెప్పించడం వారి సమక్షంలోనే పదోన్నతుల ఫైల్‌పై సంతకాలు చేయడంతో దశాబ్దాల నిరీక్షణకు తెరపడినట్లయింది. ఉమ్మడి జిల్లాలో 1579 మందికి లబ్ది... ప్రభుత్వం భాషా పండితుల విషయంలో తీసుకున్న నిర్ణయం పట్ల 1579 మంది ఉపాధ్యాయులకు లబ్ది జరుగనుంది. ఉమ్మడి కరీంనగర్‌ జిల్లాలో 583 మంది హిందీ భాషోపాధ్యాయులు, 646 మంది తెలుగు ఉపాధ్యాయులు, పీఈటీలు 350 మందికి అప్‌గ్రేడ్‌ అయ్యే అవకాశం ఉంది. వీరికి స్కూల్‌ అసిస్టెంట్‌ హోదా దక్కనుంది. ఎస్‌జీటీలు సమరానికి సై..  ప్రభుత్వం భాషా పండితులకు స్కూల్‌ అసిస్టెంట్‌ హోదా కల్పిస్తూ తీసుకున్న నిర్ణయంపై సెకండరీ గ్రేడ్‌ ఉపాధ్యాయ సంఘం ఆధ్వర్యంలో ఆందోళన కార్యక్రమాలు చేపడుతున్నారు. విద్యాహక్కు చట్టానికి భిన్నంగా, రూల్‌ ఆఫ్‌ రిజర్వేషన్‌ పాటించకుండా ఏకపక్ష నిర్ణయంతో భాషా పండితులకు స్కూల్‌ అసిస్టెంట్‌ హోదా కల్పించడం పట్ల మండిపడుతున్నారు. కేవలం ఉపాధ్యాయ ఎమ్మెల్సీ ఎన్నికల దృష్టిలో పెట్టుకొని ప్రభుత్వం ఈ తతంగానికి తెరలేపిందని ఆరోపణలు వినిపిస్తున్నాయి. ఉన్నత పాఠశాలల్లో పనిచేసే భాషా పండితులు, పీఈటీల ఓట్లను ఉపాధ్యాయ ఎమ్మెల్సీ ఎన్నికల్లో దండుకునేందుకే ప్రభుత్వం ఈ నిర్ణయం తీసుకుందని పలువురు విమర్శిస్తున్నారు. ప్రభుత్వ నిర్ణయం వల్ల 20 సంవత్సరాల సర్వీసుకు పైగా కలిగి ఉన్న ఎస్‌జీటీలు ఆరు సంవత్సరాల సర్వీసు కలిగి ఉన్న వారి కన్నా వెనుకకు పోయే ప్రమాదంతో పాటు పదోన్నతుల ప్రక్రియ మున్ముందు గందరగోళంగా మారనుందనే అభిప్రాయాలు వ్యక్తమవుతున్నాయి. ఉపాధ్యాయ వర్గాల్లో సింహభాగమైన సెకండరీ గ్రేడ్‌ టీచర్లు ప్రభుత్వ నిర్ణయంపై త్వరలోనే న్యాయస్థానాన్ని అశ్రయించడంతో పాటు భారీ ఆందోళన కార్యక్రమాలు చేపట్టి ప్రభుత్వానికి తమ నిరసనను తెలిపేందుకు సిద్ధమవుతున్నారు.  ఎస్‌జీటీలకూ పదోన్నతులు కల్పించాలి కరీంనగర్‌ఎడ్యుకేషన్‌: రాష్ట్ర ప్రభుత్వం భాషా పండితులను స్కూల్‌ అసిస్టెంట్లుగా అప్‌గ్రేడ్‌ చేస్తూ ఎస్‌జీటీలను విస్మరించడం బాధాకరమని ఎస్‌జీటీయూ రాష్ట్ర ప్రధాన కార్యదర్శి కరివేద మహిపాల్‌రెడ్డి అన్నారు. పదోన్నతుల్లో ఎస్‌జీటీలను విస్మరించడంపై ఎస్‌జీటీ యూ ఆధ్వర్యంలో రాష్ట్రవ్యాప్త ఆందోళనల్లో భాగంగా శుక్రవారం అన్ని మండల కేంద్రాల్లోని ఎమ్మార్సీ సెంటర్లలో నిరసన వ్యక్తం చేశారు. ఈ సందర్భంగా ఆయన మాట్లాడుతూ గత ప్రభుత్వాలు ప్రాథమిక విద్యను నిర్లక్ష్యం చేయడం, సమాజ పోకడలకు అనుగుణంగా విద్యావిధానం లేకపోవడం వల్ల ప్రభుత్వ పాఠశాలలు కనుమరుగు అవుతున్నాయని అన్నారు. సమాజం, ప్రభుత్వం, అధికారులు ప్రాథమిక విద్య స్థాయిలో బోధించే ఉపాధ్యాయులను బాధ్యులు చేస్తున్నారని పేర్కొన్నారు. అభివృద్ధి చెందని దేశాలు ప్రాథమిక విద్యకు అధిక ప్రాధాన్యత ఇస్తున్నాయని చెప్పారు. తెలంగాణ రాష్ట్రంలో ఉన్నత విద్యారంగంలో గురుకులాలు దేశానికి ఆదర్శం కాగా, ప్రభుత్వ ప్రాథమిక విద్య మాత్రం పూర్తిగా వెనుకబడి ఉందని విమర్శించారు. అప్‌గ్రేడేషన్‌ చేసిన పోస్టులలో అర్హతలు గల ఎస్‌జీటీలకూ అవకాశం కల్పించాలని డిమాండ్‌ చేశారు. ఉన్నతీకరించిన పండిట్‌ పోస్టులలో అర్హత గల ఎస్‌జీటీలకు అవకాశం కల్పించి, ప్రతి ప్రాథమిక పాఠశాలకు పీఎస్‌ హెచ్‌ఎంను నియమించడం వల్ల సీనియర్‌ ఉపాధ్యాయులకు న్యాయం జరుగుతుందని పేర్కొన్నారు. జిల్లా కేంద్రాలలో శనివారం, ఈనెల 11న హైదరాబాద్‌లోని కమిషనర్, డైరెక్టర్, స్కూల్‌ ఎడ్యుకేషన్‌ కార్యాలయం ఎదుట నిరసన వ్యక్తం చేయనున్నట్లు తెలిపారు. కార్యక్రమంలో సంఘం రాష్ట్ర, జిల్లా నాయకులు జి.నాగభూషణం, దాసరి శ్రీనివాస్, బి.శ్రీనివాస్, తిమ్మాపూర్‌ మండల నాయకులు శేఖర్, సంతోష్, ఉమాకుమారి, గాయత్రీలత, పద్మ, కవితారాణి, గంగయ్య, శ్రీనివాస్, జయశ్రీ, మంజుల, కిరణ్‌కౌర్, అస్రా పాల్గొన్నారు.

ఆదిలాబాద్‌టౌన్‌: ఏకీకృత సర్వీస్‌రూల్స్‌పై రాష్ట్రపతి సవరణ ఉత్తర్వులు కొట్టివేస్తూ హైకోర్టు ఇచ్చిన తీర్పుపై సుప్రీంకోర్టుస్టే ఇవ్వడంతో ఉపాధ్యాయుల్లో పదోన్నతుల ఆశలు రేకెత్తుతున్నాయి. దాదాపు 20 ఏళ్లుగా పదోన్నతులు లేక మానసికంగా ఇబ్బందులకు గురవుతున్న టీచర్లకు సుప్రీంకోర్టు తాజా స్టే ఊరటనిచ్చినట్లు కనిపిస్తోంది. ఏకీకృత సర్వీస్‌ రూల్స్‌ నిబంధనలపై రాష్ట్రపతి సవరణ ఉత్తర్వులు చెల్లవని 2018 ఆగస్టులో హైకోర్టు తీర్పుఇచ్చింది. తాజాగా సోమవారం సుప్రీంకోర్టు హైకోర్టు తీర్పుపై స్టే ఇవ్వడంతో పంచాయతీరాజ్‌ ఉపాధ్యాయుల్లో ఆనందం వ్యక్తమవుతోంది. ఈ నేపథ్యంలో పాఠశాల విద్యాశాఖ పరిధిలోని ఉపాధ్యాయులకు పదోన్నతులు కల్పించేందుకు ప్రభుత్వం చర్యలు చేపడుతున్నట్లు తెలుస్తోంది. ఖాళీలతో విద్యాశాఖ అస్తవ్యస్తం.. ఆదిలాబాద్‌ ఉమ్మడి జిల్లాలో 70 మండలాలు ఉండగా, కొత్త జిల్లాల వారీగా పరిశీలిస్తే..నిర్మల్‌లో 19, ఆదిలాబాద్, మంచిర్యాలల్లో 18 మండలాల చొప్పున ఉండగా, ఆసిఫాబాద్‌లో 15 మండలాలు ఉన్నాయి. దాదాపు 4 వేల వరకు ప్రభుత్వ, జెడ్పీ పాఠశాలలు ఉండగా, 4 లక్షల 80 వేల మంది విద్యార్థులు చదువుకుంటున్నారు. ఎంఈవో పోస్టులు ఖాళీగా ఉండడంతో విద్యావ్యవస్థ అస్తవ్యస్తంగా మారింది. ఉమ్మడి జిల్లాలో రెగ్యులర్‌ ఎంఈవో ఒక్కరే ఉండగా, డైట్‌ కళాశాలలో లెక్చరర్‌ పోస్టులు ఖాళీగా ఉన్నాయి. దీని ప్రభావం పదోతరగతి ఫలితాలపై ఏటా పడుతోంది. ఉమ్మడి జిల్లా ఫలితాలపరంగా చూస్తే రాష్ట్రంలో చివరిస్థానంలో ఉన్నాం. కౌటాల ఎంఈవో మాత్రమే రెగ్యులర్‌ కాగా మిగతా అందరూ ఇన్‌చార్జి అధికారులే. ప్రధానోపాధ్యాయులు ఎంఈవోగా అదనపు బాధ్యతలు నిర్వర్తిస్తున్నారు. రెండు పోస్టుల్లో దేనికి న్యాయం చేయలేకపోతున్నారనే ఆరోపణలు ఉన్నాయి. కాగా కొత్తగా ఏర్పడిన మండలాలకు కూడా ఎంఈవోలను నియమించలేదు. ఆదిలాబాద్‌ ఉమ్మడి జిల్లా పరిధిలో మంచిర్యాల, ఆదిలాబాద్‌ డిప్యూటీ ఈవో, జెడ్పీ డిప్యూటీ ఈవోలు కొన్నేళ్లుగా ఖాళీగా ఉన్నాయి. ఆదిలాబాద్‌ పట్టణంలోని ప్రభుత్వ డైట్‌ కళాశాలలో ఇద్దరు మాత్రమే రెగ్యులర్‌ ఉండగా, ప్రస్తుతం ఒకరు ఆదిలాబాద్‌ డీఈవోగా ఇన్‌చార్జి బాధ్యతలు నిర్వర్తిస్తున్నారు. పదోన్నతులు చేపడితే ఎంఈవో పోస్టులు, జూనియర్‌ లెక్చరర్‌ పోస్టులు, డైట్‌ లెక్చరర్‌ పోస్టులు భర్తీ కానున్నాయి. విద్యార్థులకు పూర్తిస్థాయిలో విద్యాబోధన జరిగే అవకాశాలు ఉన్నాయి. దాదాపు 3 వేల మంది ఉపాధ్యాయులకు పదోన్నతులు లభించనున్నట్లు తెలుస్తోంది. రెండు దశాబ్దాలుగా ఎదురుచూపు.. ఏకీకృత సర్వీస్‌ రూల్స్‌ నిబంధన అమలుకాకపోవడంతో రెండు దశాబ్దాలుగా ఉపాధ్యాయులకు పదోన్నతులు లభించక నష్టపోతున్నారు. లోకల్‌ బాడీ ఉపాధ్యాయులు ఏకీకృత సర్వీస్‌ రూల్స్‌ అమలు చేయాలని, ప్రభుత్వ యజమాన్యంలో పని చేస్తున్న (డీఈవో పరిధిలో) ఉపాధ్యాయులు మాత్రం యాజమాన్యాల వారీగానే పదోన్నతులు చేపట్టాలని కోర్టును ఆశ్రయిస్తున్నారు. ఈ నేపథ్యంలో హైకోర్టు ఇచ్చిన తీర్పుపై సోమవారం సుప్రీంకోర్టు స్టే విధించింది. దీంతో మళ్లీ పంచాయతీరాజ్‌ ఉపాధ్యాయుల్లో ఆశలు చిగురిస్తున్నాయి. కాగా మరోసారి ప్రభుత్వ యాజమాన్య పరిధిలో పనిచేస్తున్న కొంత మంది ఉపాధ్యాయులు సుప్రీంకోర్టును ఆశ్రయించనున్నట్లు సమాచారం. అయితే సుప్రీంలో కేసు విచారణ చేపట్టే వరకు రాష్ట్ర ప్రభుత్వం పదోన్నతులు కల్పిస్తే ఉపాధ్యాయులతోపాటు విద్యార్థులకు మేలు జరుగుతుందని పలు ఉపాధ్యాయ సంఘాలు చెబుతున్నాయి. ఖాళీల భర్తీతో విద్యావ్యవస్థ పటిష్టం కానుంది. కాగా సుప్రీంకోర్టు స్టే ఇవ్వడంతో పంచాయతీరాజ్‌ ఉపాధ్యాయులు  హర్షం వ్యక్తం చేస్తుండగా ప్రభుత్వ యాజమాన్య పాఠశాలల్లో పని చేస్తున్న ఉపాధ్యాయుల్లో భిన్నాభిప్రాయాలు వ్యక్తమవుతున్నాయి. ఇదీ ఏకీకృత సర్వీస్‌రూల్స్‌ వివాదం  పంచాయతీరాజ్, జడ్పీ యాజమాన్యంలో పని చేస్తున్న ఉపాధ్యాయులకు కామన్‌ సర్వీస్‌ రూల్స్‌ ఉండాలనేది పంచాయతీరాజ్‌ ఉపాధ్యాయులు కొన్నేళ్లుగా పోరాటం చేస్తున్నారు. ఇది అమలుకాకపోవడంతో ఎంఈవో, డిప్యూటీ ఈవో, డైట్‌ లెక్చరర్, జూనియర్‌ లెక్చరర్‌ పోస్టులకు పదోన్నతులు లభించడంలేదు. 1998 నుంచి ఇప్పటివరకు కోర్టులో కేసులు నడుస్తున్నాయి. ప్రభుత్వ యాజమాన్యంలో పని చేస్తున్న ఉపాధ్యాయులు ఎంఈవో, జేఎల్, డైట్‌ లెక్చరర్‌ పోస్టుల పదోన్నతులకు తామే అర్హులమని కోర్టును ఆశ్రయించారు. అయితే పంచాయతీరాజ్‌ ఉపాధ్యాయులు తాము కూడా ఉపాధ్యాయులమేనని, పట్టణ ప్రాంతంలో విధులు నిర్వహించకూడదా అనేది వారి వాదన. అదేవిధంగా ఎంఈవో, జేఎల్‌ డిప్యూటీ ఈవో, డైట్‌లెక్చర్‌ పోస్టులకు తాము అర్హులమేనని కోర్టులో పిల్‌ దాఖలు చేస్తున్నారు. కోర్టుల్లో ఉండడంతో పదోన్నతులు నిలిచిపోతున్నాయి.


  సాక్షి, హైదరాబాద్: జూన్ 22: పాఠశాలల్లో 1, 2, 3, 4  కేటగిరీలవారీగా తాత్కాలిక ఖాళీల వివరాలు తెలుపుతూ డీఈవో కార్యాలయాలు, వెబ్‌సైట్‌లో ప్రదర్శన 22 నుంచి 27 వరకు: బదిలీల కోసం ఆన్‌లైన్‌లో దరఖాస్తుల స్వీకరణ, పరిశీలనాధికారులకు ప్రతుల అందజేత  26: మేనేజ్‌మెంట్ , కేటగిరీ, సబ్జెక్టు, మీడియం వారీగా తుది ఖాళీల వివరాలను డీఈవో కార్యాలయాలు, వెబ్‌సైట్‌లో ప్రదర్శన.
 (హేతుబద్ధీకరణ పూర్తి చేసి అందుబాటులో ఉంచుతారు)
  28, 29: డీఈవోలతో దరఖాస్తులు, పాయింట్ల పరిశీలన
  30: డీఈవో కార్యాలయాలు, వెబ్‌సైట్‌లో ప్రాథమిక సీనియారిటీ జాబితా, పాయింట్ల ప్రదర్శన. హేతుబద్ధీకరణలో సర్‌ప్లస్ ఉపాధ్యాయులుగా గుర్తించిన వారి పేర్లు, జాబితా ప్రదర్శన
  జూలై 1: సీనియారిటీ జాబితాలపై టీచర్ల నుంచి అభ్యంతరాల స్వీకరణ
  2, 3: అభ్యంతరాలు, విజ్ఞప్తుల పరిష్కారం
  4: బదిలీలు, పదోన్నతులకు అర్హులైన వారి తుది సీనియారిటీ జాబితాల ప్రదర్శన
  5: జిల్లా, జోనల్ స్థాయిల్లో మేనేజ్‌మెంట్ వారీగా జిల్లా పరిషత్, ప్రభుత్వ స్కూళ్ల ప్రధానోపాధ్యాయుల బదిలీలు, పదోన్నతులకు కౌన్సెలింగ్.   6: జిల్లా, జోనల్ స్థాయిల్లో జిల్లా పరిషత్, ప్రభుత్వ స్కూళ్లలో అసిస్టెంట్లకు ప్రధానోపాధ్యాయులుగా పదోన్నతులు, బదిలీలు
  7 నుంచి 9 వరకు: అన్ని మీడియాలు, అన్ని మేనేజ్‌మెంట్లలో జిల్లా స్థాయిలో అన్ని సబ్జెక్టులు బోధించే స్కూల్ అసిస్టెంట్లు, ఎల్‌ఎఫ్‌ఎల్ హెడ్‌మాస్టర్ల బదిలీలకు కౌన్సెలింగ్
  10, 11: అన్ని సబ్జెక్టుల్లో, అన్ని మేనేజ్‌మెంట్లలో, అన్ని మీడియంలలో మేనేజ్‌మెంట్ల వారీగా జిల్లా స్థాయిలో సెకండరీ గ్రేడ్ టీచర్లకు స్కూల్ అసిస్టెంట్లుగా, ఎల్‌ఎఫ్‌ఎల్ హెడ్‌మాస్టర్లుగా పదోన్నతులు
  12 నుంచి 16 వరకు: జిల్లా పరిషత్తు, ప్రభుత్వ మేనేజ్‌మెంట్లలో సెకండరీ గ్రేడ్ టీచర్ తత్సమాన కేడర్ వారిబదిలీలకు కౌన్సెలింగ్.
  
  పాయింట్ల ఆధారంగా కేటాయింపులు
  నాలుగో కేటగిరీ పాఠశాలల్లో (12 శాతం ఇంటి అద్దె పొందుతూ గ్రామానికి ఏ విధమైన రోడ్డు సౌకర్యం లేని గ్రామాలు) పనిచేస్తున్న వారికి ప్రతి ఏడాది సర్వీసుకు 5 పాయింట్లు(నెల సర్వీసుకు 0.416 పాయింట్ల చొప్పున) ఇస్తారు.
 మూడో కేటగిరీ పాఠశాలల్లో (12 శాతం ఇంటి అద్దె పొందుతూ రోడ్దు సౌకర్యం ఉన్న గ్రామాలు) పని చేస్తున్న వారికి ఏడాదికి 3 చొప్పున (నెలకు 0.25 చొప్పున) పాయింట్లు ఇస్తారు.
 రెండో కేటగిరీ పాఠశాలల్లో (14.5 శాతం ఇంటి అద్దె పొందే పట్టణాలు, శివారు గ్రామాలు) పనిచేస్తున్న వారికి ఏడాది సర్వీసుకు 2 పాయింట్లు (నెలకు 0.16) ఇస్తారు.
  ఒకటో కేటగిరీ పాఠశాలల్లో (20 శాతం, ఆపైన హెచ్‌ఆర్‌ఏ పొందే పట్టణాలు, శివారు గ్రామాలు) పనిచేస్తున్న వారికి ఏడాదికి ఒకటి చొప్పున (నెలకు 0.083) పాయింట్లు ఇస్తారు.
  నాలుగో కేటగిరీ పాఠశాలల జాబితాను జిల్లా కలెక్టర్ ప్రకటిస్తారు.
  ఆన్‌డ్యూటీ సౌకర్యం ఉన్న ఉపాధ్యాయ సంఘాల రాష్ట్ర, జిల్లా అధ్యక్ష, ప్రధాన కార్యదర్శులకు, వివాహం కాని మహిళలకు 10 పాయింట్లు కేటాయిస్తారు.
  భార్యాభర్తలిద్దరిలో ఒకరు కేంద్ర, రాష్ట్ర ప్రభుత్వ ఉద్యోగులైతే 10 పాయింట్లు ఇస్తారు. వీటిని హెచ్‌ఎంలు ఐదేళ్లకోసారి, టీచర్లు 8 ఏళ్లకోసారి వినియోగించుకోవచ్చు.
  హేతుబద్ధీకరణ ద్వారా బదిలీ అయ్యే వారికి అదనంగా 10 పాయింట్లు ఇస్తారు. 8 ఏళ్ల సర్వీసు పూర్తయిన వారికి అదనంగా పాయింట్లు ఇవ్వరు.
  2013లో బదిలీ అయినా పాత స్థానాల్లోనే ఉండిపోయిన వారు కోరుకున్న స్థానం హేతుబద్ధీకరణలో పోతే వారి బదిలీని రద్దు చేసి, అదనంగా 5 పాయింట్లు ఇచ్చి ప్రస్తుత బదిలీల్లో అవకాశం ఇస్తారు.
  జాతీయ అవార్డు పొందిన వారికి 15, రాష్ట్ర అవార్డు పొందిన వారికి 10 పాయింట్లు ఇస్తారు.
  పదో తరగతిలో 100% ఫలితాలు సాధించిన వారికి 2.5 పాయింట్లు, 95- 99%ఫలితాలు సాధిస్తే 2 పాయింట్లు, 90- 94% ఫలితాలు వస్తే ఒక పాయింటు ఇస్తారు.
 
  ఎస్‌ఎస్‌ఏ, ఆర్‌ఎంఎస్‌ఏ రిసోర్స్ పర్సన్స్‌కు రాష్ట్ర స్థాయి వారికి 5, జిల్లా స్థాయి వారికి 4, మండల స్థాయి వారికి 2 పాయింట్లు ఇస్తారు.
  70 శాతంకంటే ఎక్కువ వైకల్యం కలిగిన వారు, వితంతువులు, విడాకులు పొందిన మహిళలు, దీర్ఘకాలిక వ్యాధుల బారిన పడిన వారు, మానసిక వైకల్యం, బ్లడ్ క్యాన్సర్, జువైనల్ డయాబిటిస్‌తో బాధపడే పిల్లల తల్లిదండ్రులకు, ప్రాధాన్య క్రమంలో కౌన్సెలింగ్‌లో ముందుగా బదిలీకి అవకాశం కల్పిస్తారు. ఈ ప్రాధాన్య బదిలీలు హెచ్‌ఎంలకు ఐదేళ్లకోసారి, టీచర్లకు 8 ఏళ్లకోసారి అవకాశమిస్తారు.జోనల్ స్థాయిలో ప్రభుత్వ ఉన్నత పాఠశాలల హెచ్‌ఎంల బదిలీల కోసం వేసే కమిటీ కి డీఎస్‌సీ నుంచి నియమితులయ్యే సీనియర్ అధికారి చైర్మన్‌గా ఉంటారు.
  జిల్లా పరిషత్ ఉన్నత పాఠశాలల హెచ్‌ఎంల బదిలీల కమిటీకి చైర్మన్‌గా జెడ్పీ చైర్మన్ ఉంటారు. జిల్లా స్థాయిలో ప్రభుత్వ టీచర్ల బదిలీల కమిటీకి జిల్లా కలెక్టర్, జిల్లా పరిషత్ టీచర్ల బదిలీల కమిటీకి చైర్మన్‌గా జెడ్పీ చైర్మన్ వ్యవహరిస్తారు.  బదిలీ అయిన వెంటనే ఉపాధ్యాయులకు వ్యక్తిగతంగా ఉత్తర్వులు అందుతాయి. వారు రిలీవ్ అయిన మరుసటి రోజే విధుల్లో చేరాలి.  ఒక గ్రామ పంచాయతీ పరిధిలో గరిష్ట సర్వీసు పూర్తయిన వారికి మళ్లీ అదే గ్రామ పంచాయతీ పరిధిలో పోస్టింగ్ ఇవ్వరు. ఒకసారి చేసిన బదిలీని మార్చడానికి వీల్లేదు. తప్పనిసరి బదిలీల్లో ఉండి కౌన్సెలింగ్‌కు హాజరుకాకపోతే మిగిలిన ఖాళీల్లోకి పంపిస్తారు.
  
  బదిలీలకు  నిబంధనలివే...
  ా బదిలీల దరఖాస్తులు, కౌన్సెలింగ్ అం తా ఆన్‌లైన్‌లో ఉంటుంది. జిల్లా/జోనల్ స్థాయిలో ఏర్పడిన బదిలీల కమిటీ ఆమో దం ప్రకారమే ఉత్తర్వులు జారీ చేస్తారు. ా 2015 జూలై 1 నాటికి ఒకే చోట రెండేళ్ల సర్వీసు పూర్తయిన ప్రధానోపాధ్యాయులు, ఉపాధ్యాయులు బదిలీ కోసం దరఖాస్తు చేసుకోవచ్చు. అలాగే ఒకే స్కూల్లో ఐదేళ్లు పూర్తయిన ప్రధానోపాధ్యాయులు, 8 ఏళ్ల సర్వీసు పూర్తయిన టీచర్లకు తప్పనిసరి బదిలీ ఉంటుంది. పదవీ విరమణకు రెండేళ్ల సర్వీసు కలిగిన వారికి(వారు కోరుకుంటే తప్ప) తప్పనిసరి బదిలీ ఉండదు.
  
  ా బాలికోన్నత పాఠశాలలో పనిచేస్తున్న 50 ఏళ్లలోపు పురుష ఉపాధ్యాయులు/హెచ్‌ఎంలకు తప్పనిసరి బదిలీ. వీటిల్లో పనిచేసేందుకు మహిళా హెచ్‌ఎం /టీచర్లు లేదా 50 ఏళ్లు పైబడిన పురుష టీచర్లు/హెచ్‌ఎంలకు అవకాశం కల్పిస్తారు  ఇటీవలి పదో తరగతి పరీక్షల్లో 25 శాతం కంటే తక్కువ ఫలితాలు వచ్చిన పాఠశాలల టీచర్లు, హెచ్‌ఎంలను 3 లేదా 4వ కేటగిరీ పాఠశాలలకు కౌన్సెలింగ్‌కు ముందే బదిలీ చేస్తారు. ఒకవేళ సబ్జెక్టు టీచర్ లేని పరిస్థితిలో ఫలితాలు తగ్గితే మాత్రం సదరు హెచ్‌ఎంకు దీని నుంచి మినహాయింపు ఉంటుంది.
  ా హేతుబద్ధీకరణ ద్వారా సర్‌ప్లస్‌గా గుర్తించిన వారు దరఖాస్తు చేసుకుని కౌన్సెలింగ్‌లో పాల్గొనాలి. ఈ బదిలీలన్నీ ఆయా మేనేజ్‌మెంట్ల పరిధిలోనే ఉంటాయి.