తమిళసినిమా: నటుడు, ఛాయాగ్రాహకుడు నట్టి కథానాయకుడిగా నటిస్తున్న తాజా చిత్ర షూటింగ్‌ శుక్రవారం చెన్నైలో పూజా కార్యక్రమంతో ప్రారంభమైంది. ఈ చిత్రం ద్వారా హారూన్‌ అనే నవ దర్శకుడు పరిచయం అవుతున్నారు. ఈ చిత్ర వివరాలను దర్శకుడు తెలుపుతూ ఇది సైకో కిల్లర్‌ కథాంశంతో కూడిన చిత్రంగా ఉంటుందన్నారు. ఇందులో నట్టికి జంటగా నలుగురు కథానాయికలు నటించనున్నారని, వారి ఎంపిక జరుగుతోందని చెప్పారు. ముఖ్యపాత్రల్లో బ్లాక్‌ షీప్‌ నందిని, సాస్వీ బాలా, ప్రీతి నటిస్తున్నారని తెలిపారు. దీనికి కార్తీక్‌ రాజా సంగీతాన్ని, క్రిస్టోఫర్‌ ఛాయాగ్రహణం అందిస్తున్నట్లు చెప్పారు. ఇంకా పేరు నిర్ణయించని ఈ చిత్ర కథ పలు ఊహించని మలుపులతో ఆసక్తికరంగా సాగుతుందని దర్శకుడు తెలిపారు. 


 ఎనిమిదేళ్ల ఆ బాలుడు ఎవరితోనూ సరిగ్గా మాట్లాడడు. తన వయసున్న పిల్లల్లా హుషారుగా ఉండడు. ఉద్యోగస్థులైన ఆ బాలుడి తల్లితండ్రులకు అదేమీ పట్టదు. చివరకు ఇరుగుపొరుగు, స్కూల్ నుంచి ఫిర్యాదులు రావడంతో బోర్డింగ్ స్కూల్‌లో చేర్పిస్తారు. అక్కడ కూడా బాలుడు వింతగా ప్రవర్తిస్తుంటాడు. ఎవరూ చూడనివి చూశానని చెబుతుంటాడు. ఇంతకీ ఆ బాలుడి సమస్య ఏంటి? అతని సమస్యను ఎవరు పరిష్కరించారు? అనే కథాంశంతో రూపొందిన చిత్రం ‘బుడుగు’. లక్ష్మీ మంచు ప్రధాన పాత్ర పోషించిన ఈ చిత్రంలో టైటిల్ రోల్‌ను మాస్టర్ ప్రేమ్ చేశాడు. ఇంద్రజ, శ్రీధర్‌రావు ఇతర కీలక పాత్రలు చేశారు. సుధీర్ సమర్పణలో భాస్కర్, సారికా శ్రీనివాస్ నిర్మించిన ఈ చిత్రానికి మన్మోహన్ దర్శకత్వం వహించారు. ఇది సైకలాజికల్ థ్రిల్లర్ అనీ, కొన్ని యథార్థ సంఘటనల ఆధారంగా ఈ చిత్రం చేశామని దర్శకుడు తెలిపారు. ఈ వారంలోనే పాటలను విడుదల చేస్తామని నిర్మాతలు చెప్పారు.