కంగనకు ముంబై రోడ్లు బ్లాక్‌ అయి ఉన్నాయి. లోపలికి రానివ్వం అంటున్నారు శివసైనికులు. ‘క్వీన్‌’లో ఇలాగే ఆమె పెళ్లి బ్లాక్‌ అయిపోతుంది. అప్పుడు ఆత్మాభిమానం అనే ఖడ్గాన్ని తీస్తుంది.  ఇప్పుడూ.. సేమ్‌ అదే.. సెల్ఫ్‌ రెస్పెక్ట్‌ ఆయుధం.  మూవీ మాఫియా.. సోషల్‌ మీడియా... ముంబై పోలీసులు.. స్టార్‌లు, కో–స్టార్‌లు.. వీళ్లందరిపై.. ఒంటరిగా యుద్ధం చేస్తోంది. నాలుగంచుల ఖడ్గంగా రీమేక్‌ అవుతోంది.  రేపు ముంబై బయల్దేరాలి కంగనా రనౌత్‌. రేపు బయల్దేరితేనే ఎల్లుండికి  ముంబైలో ఉంటారు. ఏమిటి అంత అత్యవసరం? ఆమె చాలెంజ్‌ చేశారు. ‘తొమ్మిదిన ముంబైలో దిగుతున్నాను.. ఎవరు అడ్డుకుంటారో చూస్తాను’ అని. ఆ ఛాలెంజ్‌ మహారాష్ట్ర హోమ్‌ మినిస్టర్‌కి! ‘మూవీ మాఫియా కన్నా డేంజర్‌ ముంబై పోలీసులు అన్నావు కదా. అయితే ముంబై రాకు’ అన్నారాయన. కంగన ఛాలెంజ్‌ శివసేన ఎంపీకి కూడా. ‘ముంబైని పాక్‌ ఆక్రమిత కశ్మీర్‌ అన్నావు కదా.. అయితే నువ్వెలా ముంబైలోకి అడుగుపెడతావో చూస్తాను’ అన్నారు ఆయన. బాలీవుడ్‌ యువ నటుడు సుశాంత్‌ మరణం తర్వాత కంగన చాలామందిని చాలానే అన్నారు. అలా అనడంలో ఒంటరి అయిపోయారు. ఒంటరిగా ఫైట్‌ చేస్తున్నారు. ఇప్పుడూ ఒంటరిగానే మనాలి నుంచి క్యాబ్‌లోనో, బస్‌లోనో ఢిల్లీలోని ఇందిరాగాంధీ ఇంటర్నేషనల్‌ ఎయిర్‌పోర్ట్‌ చేరుకుని అక్కడి నుంచి విమానంలో ముంబై వెళుతున్నారు! కొన్నాళ్లుగా కంగన హిమాచల్‌ ప్రదేశ్‌లో తను ఇల్లు కట్టుకున్న మనాలిలో తల్లితో కలిసి ఉంటున్నారు. ముంబై చిత్రసీమలోని బంధుప్రీతి మీద, అక్కడి డ్రగ్‌ ముఠాల మీద, మీడియా మాఫిమా మీద, ముంబై పోలీసుల మీద ధైర్యంగా మాట్లాడగలిగిన అమ్మాౖయెతే కాదు కంగన. కానీ మాట్లాడుతున్నారు! ఆ ధైర్యం ముంబై ఇచ్చిందే. అవతలి వ్యక్తిలో తప్పు కనిపిస్తే వచ్చే ధైర్యం అది. ముంబైలో ఒక తప్పు కాదు, వంద తప్పులు కనిపించాయి కంగనకు. ముంబై చేసిన మొదటి తప్పు.. ఇండస్ట్రీకి వచ్చిన కొత్తలో ఆమెకు మత్తు మందు ఇచ్చి ఆమెను ఆక్రమించుకోవడం. చివరి తప్పు (ఆమె మనాలి వెళ్లే ముందు వరకు) సుశాంత్‌ ఎలా చనిపోయాడో తెలియనివ్వకుండా చంపేయడం. తక్కిన బయటి తారల్లా ముంబై తనకు సంబంధం లేని విషయం అనుకోవడం లేదు కంగన. ముంబై ఆమెకు ఎంత ఇచ్చిందో కానీ, ఆమె దగ్గర్నుంచి చాలానే తీసేసుకుంది! ముఖ్యంగా ఆమె అమాయకత్వాన్ని. ముంబై వచ్చిన కొత్తలో ‘క్వీన్‌’లా ఉన్నారు కంగన. 2014 లో వచ్చిన ఆమె చిత్రం ‘క్వీన్‌’ లోని రాణీ మెహ్రాలా.. కోమలంగా, లాలిత్యంగా. ‘క్వీన్‌’ సినిమాలో సగటు పంజాబీ అమ్మాయి కంగన. ఫ్యామిలీ ఢిల్లీలో ఉంటుంది. తండ్రిది మిఠాయి దుకాణం. పెళ్లికి ఏర్పాట్లు అవుతుండగా అప్పుడు చెబుతాడు ఆమెకు రాజ్‌కుమార్‌రావ్‌.. ‘నీకూ నాకూ అసలేదీ కలవదు.. ఐయామ్‌ సారీ. నేన్నిన్ను పెళ్లి చేసుకోలేను. చేసుకుని నా లైఫ్‌స్టెయిల్‌తో నిన్ను బాధించలేను’ అని! విదేశంలో కొంతకాలం ఉండొస్తాడు అతడు. అదీ స్టెయిల్‌. ఆమె వెంటపడి వెంటపడి ప్రేమించినప్పుడు, ఆమెను పెళ్లి చేసుకుంటానని తల్లిదండ్రులను ఒప్పించినప్పుడు, ఆమెకు ఎంగేజ్‌మెంట్‌ రింగ్‌ తొడిగినప్పుడు, పెళ్లయ్యాక హనీమూన్‌కి పారిస్, ఆమ్‌స్టర్‌డ్యామ్‌ టిక్కెట్‌లు బుక్‌ చేసుకున్నప్పుడు అతడికి తన లైఫ్‌స్టెయిల్‌ గుర్తుకు రాదు. పెళ్లి ఆగిపోతుంది. ఆ షాక్‌ నుంచి తేరుకోడానికి కసిగా.. తనొక్కటే తల్లిదండ్రులను ఒప్పించి ప్యారిస్‌ వెళ్లిపోతుంది కంగన. అక్కడి నుంచి ఆమ్‌స్టర్‌డ్యామ్‌. ఆ కొన్నాళ్ల ఒంటరి జీవితం ఆమెకు అనేక అనుభవాలను ఇస్తుంది. స్వేచ్ఛానుభూతులను మిగులుస్తుంది. ఒక తొలిముద్దును కూడా. ఓరోజు పల్చటి డ్రెస్‌ వేసుకుని తీసుకున్న సెల్ఫీని కంగన పొరపాటున రాజ్‌కుమార్‌ రావ్‌కి షేర్‌ చేస్తుంది. అది చూసి కంగనను వెతుక్కుంటూ ఆమ్‌స్టర్‌డ్యామ్‌ వస్తాడు. సారీ చెప్తాడు. తనను పెళ్లి చేసుకొమ్మని బలవంతం చేస్తాడు. ‘నువ్వెళ్లు. ఢిల్లీ వచ్చాక కలుస్తాను’ అంటుంది. కళ్లలో ఆశలు పెట్టుకుని, ఆమె కోసం మనసులో దీపాలు వెలిగించుకుని అతడు వెళ్లిపోతాడు. ఢిల్లీలో దిగాక కంగన నేరుగా రాజ్‌కుమార్‌ రావ్‌ ఇంటికి వెళ్లి, హ్యాండ్‌బ్యాగ్‌లో ఉన్న ఎంగేజ్‌మెంట్‌ రింగ్‌ని తీసి అతడి చేతిలో పెట్టి, ‘థ్యాంక్యూ’ చెప్పి వచ్చేస్తుంది. ఆమె ముఖంలో పెద్ద రిలీఫ్‌. ‘క్వీన్‌’ చిత్రం మహిళా ప్రేక్షకులకు బాగా నచ్చింది. ప్రధానంగా అమ్మాయిలు ఆ సినిమాతో ‘రిలేట్‌’ అయ్యారు. ‘రాణిలా చూసుకుంటా..’ అనే మాట వినిపిస్తుంటుంది.. ప్రేమల్లో, పెళ్లిళ్లలో! ఎవరూ చూసుకోనవసరం లేదు. ఆత్మాభిమానమే ఆడపిల్లను రాణిని చేస్తుంది. ఆ ఆత్మాభిమానమే ఇప్పుడు నాలుగు భాషల్లోకి రీమేక్‌ అవుతోంది. తెలుగులో ‘దటీజ్‌ మహాలక్ష్మి’. క్వీన్‌ తమన్నా. తమిళ్‌లో ‘పారిస్‌ పారిస్‌’. క్వీన్‌ కాజల్‌. మలయాళంలో ‘జామ్‌ జామ్‌’. క్వీన్‌ మంజిమ. కన్నడంలో ‘బటర్‌ఫ్లై’. క్వీన్‌ పరుల్‌ యాదవ్‌.  ముగ్గురు వేర్వేరు దర్శకులు రీమేక్‌ చేస్తున్న ఈ నాలుగు సినిమాలను మను కుమరన్‌ ఒక్కరే నిర్మిస్తున్నారు. ముంబై వచ్చిన కొత్తలో ‘క్వీన్‌’లా కోమలంగా ఉన్నారని కదా అనుకున్నాం కంగన గురించి. ముంబైకి ఎన్ని ముఖాలు ఉన్నాయో అన్ని ముఖాలూ తమ అసలు స్వరూపం చూపించి కంగనని క్రూరమైన రాణిగా రాటుదేల్చాయి. ఇప్పటికీ ఆమే బాలీవుడ్‌లో అత్యధిక పారితోషికం డిమాండ్‌ చేయగల బయటి తార. టాలెంట్‌ ఉంది. దాంతో పాటు ధర్మాగ్రహం ఉంది. ఉన్నది ఉన్నట్లు మాట్లాడతారు. నిజాన్ని నిర్భయంగా చెబుతారు. బాలీవుడ్‌ నలు చదరపు బంధుగణాల క్లబ్బులలో ఇమడని నికార్సయిన గుండ్రటి షాంపేన్‌ గ్లాస్‌ కంగనా రనౌత్‌. రాణి వెడలుతున్నారు. చూడాలి.. ముంబైలో బుధవారం రిక్టర్‌ స్కేలు ఎంత చూపిస్తుందో. తెలుగు క్వీన్‌ ‘దటీజ్‌ మహాలక్ష్మి’లో తమన్నా; తమిళ్‌ క్వీన్‌ ‘పారిస్‌ పారిస్‌’లో కాజల్‌ మలయాళీ క్వీన్‌ ‘జామ్‌ జామ్‌’లో మంజిమ; కన్నడ క్వీన్‌ ‘బటర్‌ ఫ్లై’లో పరుల్‌ యాదవ్‌

హిందీలో మంచి హిట్‌ సాధించిన ‘క్వీన్‌’ సినిమాను ప్రస్తుతం దీన్ని తెలుగు, మలయాళ, కన్నడ, తమిళ భాషల్లో తెరకెక్కిస్తున్నారు. తెలుగు వర్షన్‌కు నీలకంఠ దర్శకత్వం వహిస్తున్నారు. మిల్కీ బ్యూటీ తమన్నా ప్రధాన పాత్రలో నటిస్తున్నారు. అయితే ఆమెకు, నీలకంఠకు మధ్య విభేదాలు వచ్చాయని ఇదివరకే పుకార్లు వచ్చాయి. సెట్స్‌ మీద ఒకరంటే ఒక్కరికి పడటం లేదని సమాచారం. దీంతో తెలుగు రీమేక్‌ ‘క్వీన్‌’ ఆలస్యం అవుతుందని అప్పట్లో వార్తలు వినిపించాయి. ఈ విషయంపై  నిర్మాతలు స్పందించారు.  తమన్నా, నీలకంఠ మధ్య ఎటువంటి గొడవలు లేవు.. సినిమా ఘాటింగ్‌ జరుగుతోందని గతంలో వారు చెప్పారు.  ప్రస్తుతం మళ్లీ అవే రూమర్స్‌ మళ్లీ తెరపైకి వచ్చాయి. వారి మధ్య తాజాగా విభేదాలు చోటుచేసుకున్నట్టు గుసగుసలు వినిపిస్తున్నాయి. ‘క్వీన్‌’ చిత్రం ఘాటింగ్‌ ఆగిపోయిందని పుకార్లు హల్‌చల్‌ చేస్తున్నాయి. అసలు వీరి గొడవకి కారణం.. క్రియేటివ్‌ డిఫరెన్సెస్‌ అని చెబుతున్నారు. అయితే ఈ ప్రచారంపై చిత్ర యూనిట్‌ స్పందించలేదు.     

సాక్షి, చెన్నై: విమర్శలను లైట్‌ తీస్కోవాలని అంటోంది హీరోయిన్‌ కాజల్‌ అగర్వాల్‌. ప్రస్తుతం కాజల్‌ హిందీలో సంచలన విజయం సాధించిన క్వీన్‌ తమిళ రీమేక్‌లో నటిస్తున్నారు. నటిగా దశాబ్దం పూర్తి చేసుకున్న నటిమణులో ఈ బ్యూటీ ఒకరు. ఇన్నేళ్ల నటజీవితం కాజల్‌కు చాలా అనుభవాన్ని ఇచ్చింది. చాలా విషయాలను గురించి ఎంతో పరిపక్వతతో చెప్పారు. అవేమిటో చూద్దాం.. ‘జీవితంలో ప్రతి వారికి కల అనేది ఉండాలి. దాన్ని నెరవేర్చుకోవడానికి నిరంతరం శ్రమించాలి. నటి నవ్వడం నా కల.. నేను చిన్న తనం నుంచి నటినవ్వాలని కలలు కన్నాను. శక్తి వంచన లేకుండ శ్రమించాను. కృషి, శ్రమ పట్టుదల ఉంటే కచ్చితంగా విజయం సాధించవచ్చు. ఒక్కోసారి హీరోహీరోయిన్లు ఎంతో నమ్మకం పెట్టుకున్న చిత్రాలు నిరాశపరచవచ్చు. అందుకు కారణాలు తెలియవు. చిత్రాల జయాపజయాలు మన చేతిలో ఉండవు. అలాంటప్పుడు నిరాశచెందకూడదు. అందులోంచి బయటపడి, ముందడుగు వేస్తే మళ్లీ విజయాలబాట పట్టగలం. ఫలితాలను విధి నిర్ణయిస్తుంది.. చేసే వృత్తి మనకు ముఖ్యంగా భావించాలి. ఫలితాలను విధి నిర్ణయిస్తుంది. లక్ష్య సాధనే ధ్యేయంగా శ్రమించాలి. మనకు సలహాలివ్వడానికి చాలా మంది వస్తుంటారు. అలాంటివన్నీ తీసుకోవాలి. అయితే నిర్ణయాలు మాత్రం మనవే అయ్యిఉండాలి. కుటుంబసభ్యులు, బంధువులు, మిత్రులు లేకుంటే మనం ఏం చేయలేం. అందుకే ఎంత ఎత్తుకు ఎదిగినా అనుబంధాలకు ప్రాముఖ్యతనివ్వాలి. మరో ముఖ్యమైన విషయం ఏమిటంటే సామాజిక మాధ్యమాల్లో విమర్శలను లైట్‌ తీస్కోవాలి’ అని నటి కాజల్‌ అన్నారు.  

ఎక్కడికి? మొనాకో! ఎక్కడుంది? ఫ్రాన్స్‌లో! తమన్నా ఎప్పుడు వెళ్లారు? ఈ మంత్‌ స్టార్టింగ్‌లో! ఇప్పుడు అక్కడే ఉన్నారు. తెలుగు ‘క్వీన్‌’ షూటింగ్‌ ఫ్రాన్స్‌లో జరుగుతోందిప్పుడు. ఆల్మోస్ట్‌ మరో 30 రోజులు ఫ్రాన్స్‌లోనే ఉండబోతున్నారీ రాణి! మొన్న గురువారం ఒక్కరోజు షూటింగ్‌కి సెలవు దొరికితే... మొనాకో వెళ్లారు. సముద్రపు ఒడ్డున ఉందీ సిటీ. చాలామంది సిటీ గురించి చాలా చాలా చెప్పారట! దాంతో ఎప్పటి నుంచో అక్కడికి వెళ్లాలనుకుంటున్నారట! ‘క్వీన్‌’ షూటింగుకి కాస్త గ్యాప్‌ దొరకడంతో వెళ్లడం కుదిరింది. అక్కడికి వెళ్లిన తర్వాత ఎవరైనా లవ్‌లో పడాల్సిందేనని పేర్కొన్నారు. అంతా చెబుతున్నారు కానీ.. ‘అసలు తమన్నా ఎవరితో లవ్‌లో పడ్డారో?’ చెప్పడం లేదనుకుంటున్నారా? ‘మొనాకో సిటీ’తోనే లవ్‌లో పడ్డారట! ‘‘సంతోషంగా ఉండడానికి ఎన్నో కారణాలున్నాయి. ఈ ట్రిప్‌లో అలాంటివి కొన్ని ఉన్నాయి. ఈ ప్రదేశాలు (మొనాకోలో అందాలు) నాలో సంతోషాన్ని నింపుతున్నాయి. ఈ అందమైన ప్రదేశంతో ఎవరైనా ప్రేమలో పడకుండా ఉండడం కష్టమే’’ అని తమన్నా పేర్కొన్నారు. ‘షో, మిస్సమ్మ’ సినిమాల ఫేమ్‌ నీలకంఠ దర్శకత్వంలో మను కుమారన్‌ నిర్మిస్తున్న ‘క్వీన్‌’ హిందీ హిట్‌ ‘క్వీన్‌’కి రీమేక్‌ అనే సంగతి తెలిసిందే. తమిళ రీమేక్‌లో క్వీన్‌గా కాజల్‌ అగర్వాల్‌ నటిస్తున్నారు.


 చెన్నై: ప్రారంభానికి ముందే క్వీన్‌ చిత్రం చర్చనీయాంశనీయంగా మారింది. బాలీవుడ్‌లో సంచన విజయం సాధించిన చిత్రం క్వీన్‌. నటి కంగనారావత్‌ నటించిన ఈ చిత్రం ఆమె స్థాయిని పెంచడంతో పాటు అవార్డులను తెచ్చిపెట్టింది. అలాంటి చిత్రాన్ని దక్షిణాధి భాషలలో నిర్మించే హక్కులను సీనియర్‌ దర్శక నటుడు త్యాగరాజన్‌ కొనుగోలు చేసిన విషయం తెలిసిందే. ఇందులో క్వీన్‌ పాత్రలో నటించే నటి ఎవరన్న విషయం ఆసక్తిగా మారింది. తొలుత మిల్కీబ్యూటీ తమన్నాను క్వీన్‌ను చేయాలని నిర్మాత వర్గం భావించింది. అయితే ఈ అమ్మడు అధిక పారితోషికాన్ని డిమాండ్‌ చేయడంతో వేరే హీరోయిన్‌ కోసం అన్వేషణ జరుగుతున్నట్లు సమాచారం. ఈ చిత్రాన్ని తమిళం, కన్నడం భాషలో నటుడు రమేశ్‌ అరవింద్‌ దర్శకత్వం వహిస్తున్నారు. అంతే కాదు ఈ చిత్రానికి వానిల్‌ తేడి నిండ్రేన్‌ అనే టైటిల్‌ను నిర్ణయించి హీరోయిన్‌ ఎంపిక జరగకుండానే చిత్రీకరణను ప్రారంభించారు. నటుడు నాజర్‌ తదితరులు పాల్గొన్న కొన్ని సన్నివేశాలను చిత్రీకరించారు.
 
 ఇదీ వివాదం
 కాగా గోల్డెన్‌ క్లబ్‌ ఫిలింస్‌ అనే లండన్‌కు చెందిన ప్రొడక్షన్‌ సంస్థ ఒక షాక్‌ ప్రకటనను విడుదల చేసింది. క్వీన్‌ చిత్ర దక్షిణాది భాషా చిత్రాల హక్కులు తమకు చెందినవనీ, తాను స్టార్‌ మూవీస్‌ సంస్థ అధినేత త్యాగరాజన్‌ను భాగస్వామిగా చేర్చుకున్నామనీ పేర్కొంది. క్వీన్‌ చిత్రం తమిళ, కన్నడ భాషల్లో చిత్రీకరణ జరుపుకుంటోందన్న విషయం తెలిసి తాము షాక్‌కు గురయ్యామనీ సంస్థ అధికార వర్గాలు తెలిపాయి. క్వీన్‌ చిత్ర దక్షిణాది రీమేక్‌ హక్కులను తాము బ్రిటీష్‌ ఫిలిం ఇన్‌స్టిట్యూట్‌(బీఎఫ్‌ఐ)లో రిజిస్టర్‌ చేసినట్లు తెలిపారు. ఇందులో నటించే నటవర్గాన్ని తాము ఎంపిక చేసే పనిలోనే ఉన్నామన్నారు. ఈ వ్యవహారంపై తదుపరి ప్రకటనను త్వరలోనే వెల్లడిస్తామనీ పేర్కొన్నారు. దీంతో క్వీన్‌ చిత్రం చిక్కుల్లో పడినట్లయ్యింది.